إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...

انضم الينا
استراحات زايد الصفحة الرئيسية

         :: طرق عزل الاسطح بالخبر (آخر رد :رودى طه)       :: كيف تحمي منزلك من هجوم الحشرات (آخر رد :رودى طه)       :: برامج الرشاقة السعيدة (آخر رد :دارين الدوسري)       :: تبي متابعين تيك توك مجاناً؟ (آخر رد :ريم جاسم)       :: قهوجي جدة صبابين قهوه مباشرات ضيافه 0539307706 (آخر رد :ksa ads)       :: وانيت نقل عفش بالرياض 0539735360 ونيت توصيل اثاث مشاوير (آخر رد :ksa ads)       :: متجر Google Play: (آخر رد :محمد العوضي)       :: فوائد تحميل التطبيقات: (آخر رد :محمد العوضي)       :: تحميل التطبيقات ومصادرها: دليل شامل (آخر رد :محمد العوضي)       :: شركة مكافحة حشرات بالرياض (آخر رد :gmalnagy)      

إضافة رد
 
LinkBack أدوات الموضوع انواع عرض الموضوع
  #1  
قديم 06-16-2009, 03:50 PM
عضو ماسي
بيانات محروم.كوم
 رقم العضوية : 503
 تاريخ التسجيل : Dec 2007
الجنس : female
علم الدوله :
 المشاركات : 2,100,610
عدد الـنقاط :3341
 تقييم المستوى : 2139

السلام عليكم ورحمة الله وبركاته

قرر واحد من الزملاء من اصحاب الصيد ان يعمل شبه محمية للضبان
في مزرعتهم الخاصة ومزرعة ثانية لأحد من اعمامه ومساحة المزرعة
الاولى 2 كيلو * 1 كيلو والثانية 2 كيلو * 2 كيلو والمساحات مناسبة نوعاّ
ما والاولى لايوجد بها إلا محوري واحد يعمل حالياً لكن الثانية ماشاء الله
تبارك الله اغلبها مزروعة واكثر مابالمزرعتين نبات الحمظ ماشاالله تبارك الله
ونوعية الارضين مابين ارض قاسية ورمل وطعوس يعني تقريباً منوعة
والرجال حار وحامي حامي توكل على الله وشرى 430 ضب تقريباً
ومن هنا تبدأ قصة حباينا الضبان ومواقفهم الغريبة والطريفة

بسم الله وعلى بركة الله نبدأ :

الضبان جاية بخياش وكانت على دفعتين الأولى تقريبا 18 خيشه 183 ضب

والثانية 20 خيشه 247 ضب ومابين الدفعتين 6 ايام تقريباً وقلنا وش نسوي
جهزنا لها سيب بطول 6م بعرض 2م وسدينا المدخلين واحد بثلاجة
والثاني بكنب قديم مع تغطية الفتحات لأن الضب يدخل بأي فتحه وتوكلنا على الله وأطلقناها
وليتنا ماأطلقناها ؟ يعني قلنا يقعدن بالهواء الطلق ولا بالخياش لمدة أسبوع وجبنا لهن علف
ونثرناه بالسيب والمواقف المحزنة والغريبة والطريفة بال 6 ايام هي :
- انها تتراكب فوق بعضها بشكل غريب ومخيف وأدى إلى موت كمية منها
- الكنب تحته لايقل عن 80 فوق بعض بزاويه منه وكان الموت الضحايا
بهذا المكان ومات تقريباً منهن 40 ضب الله لا يعاقبنا
- وجبنا فرشة جلوس ورميناها واشوى الحمد لله اغلبها جت تحتها
- كفر لاند كروزر بجنطة يرفعه الضب براسه ويدخل تحته
- الثلاجة دخل فيه كمية 20 ضب تقريباً

قررنا باليوم الثاني نفتح لها المجال بالبيت كله تاخذ راحتها ونتلافى الموت
الجماعي ( الشكوى لله ) وش نسوي الله يعين اهلنا كل شوي وهو خاطمن عليهم
واحد والمطبخ لقينا فيه اثنين داخلين مع الدريشه ؟؟ هذا موب ضب حشا قطو
لكن الحمد لله بعدها مالقينا وفيات ابداً

وكان موعدنا مع الدفعة الثانية بعدها ب 4 أيام وجت الدفعة ولله الحمد سليمة
وقررنا عدم فتح الخياش ونتركها إلى بكرا عشان مايصير لنا ماصار معنا اول مره
والله يعينا اللحين نبي نصيد المطلوقه وكان عددنا اربعه الخال وانا وابن الخال وابن
الخال الثاني الشقردي الله يحفظة ابو سعود 9 سنين طبعاً لبسنا المداس إلا الخال على الطبيعة
مافيه إلا مصع مع الرقبة والعكره , ويالله ابلش دورهن تحت فوق في كل مكان لا تستغرب
إنه يكون موجود فيه جمعناهن بالخياش وقررنا المشيه بكرا الظهر إن شاء الله وحطيناهن
بالأماكن إللي فيهن ضلال , وكان شغلنا الشاغل متى الوقت المناسب عشان نطلقهن
وقررنا يكون قبل المغرب بساعتين عشان مايمدي الضب ياخذ راحته وينحاش إلا والليل
داخل عليهم لأن الضب يبي يدور اي فتحه يدخل خشته به او قشعه يزبن تحتها والظلام دخل عليه

البداية : يوم الأربعاء 10/6/1430هجريه الموافق 3/6/2009ميلادي
مشينا الساعه 12 الظهر وعشان لا سمح الله التفتيش لا يحسبنا نتاجر فيها
وكنا سيارتين سيارة فيها 18 خيشه تقريباً والثانيه 12 خيشه
وصلنا للمزرعه الساعة 4 عصراً تقريباً وجسينا المواقع على الطاير وتوكلنا على الله
وسمينا بالله وبدينا بفك الخياش وكل مكان نرمي فيه كميه وتكون بعيده عن الشبك بلايقل
عن 200 إلى 300 متر وفي اربع اماكن متفرقه من المزرعة الأولى , وبعدها رحنا للمزرعة الثانية
قبل المغرب بساعة وسوينا نفس إللي سويناه وعلى المغرب الحمد لله انتهينا منها .
المزرعة الأولى حطينا فيها تقريباً 260 والثانية 120 ضب

وكانت لي زيارات لها ليومين بعدها صباح ظهر عصر والغريب إني عجزت اشوف
كمية منها إلا بسيطة لا تتجاوز 5 ضبان بكل زيارة لكن فسرت هذا السبب بأنه المكان
غريب عليها والأكل واجد فتاكل وترجع لجحرها على طول ميب بحاجة تدور اكلها لانه فوق راسها
والنثايل مابعد تكونت بشكل كبير واغلب الجحوره إللي شفتها تحت الحمظ

مواقف طريفه :
- وانا بالسيارة كل شوي وانا ملتفت ذبحتني بالحركة واخاف تنطلق علي

- واحد من الضبان اندعس بالموتر لأننا اول مانطلقها تروح تحت الموتر
- بعد ماوصلنا للديرة اتصل علي الخال وقال نسيتوا 5 خياش وتماكنت الوضع
وكلمت واحد من الشباب كان بيجي وجابها معه الساعة 11 ليلاً الله يجزاه خير
واطلقناها من بكرا يوافق يوم الخميس ( الناس تنسى ملح شنطة , وحنا 5 خياش )
- بعدها بيومين قاللي الخال لقينا 10 ضبان

إن شاء الله بعد اسبوعين من اطلاق الضبان بالمزرعتين ابسوي زيارة
إن شاء الله واعطيكم التقرير الثاني بالصور


الصور والتعليق : امشوا بالترتيب مرقمها اول 3 صور 1,2,3 وهكذا
اول ماتفتح الصور على طول اضغط السهم على اليسار إلى ان توصل للصورة رقم 1
عشان تبدأ بالترتيب من اول الموضوع للصور


الحقيقة ان الغرض الأساسي من هذا العمل والموضوع هو الحفاظ على الحياة الفطرية لهذا الحيوان
الذي يواجهه الضب حالياً بسبب الصيد الجائر والذي كان لسنوات قريبة مضت يوجد بشكل كبير جداً
فلنتعاون على حماية الحيوانات بعدم الأنقراض بأي وسيلة كانت والأساس هو (عدم الصيد الجائر )

فليكن شعارنا

( لا للصيد الجائر )

وفي النهاية اتقدم بالشكر والدعاء لكل من وقف معي في هذه الفكرة والعمل وشجعني وساعدني :
الوالد حفظة الله , الخال ابو محمد غرقني بصنيعة وعمله وابن الخال محمد السنافي
والشقردي عبدالعزيز وابو يزيد وابو الوليد والعم ابو محمد واوبنائه الكرام
وشكراً لأخي الفاضل مشرفنا صقر20 ( ابووليد) على حسن تعامله
ومساعدته ودعمه

اعتذر لكم على الأطالة وتراني غشيم بمثل هالمواضيع
والعذر والسموحة

اسأل الله العلي القدير ان يبارك لنا بعملنا هذا
وان يحوز الموضوع والفكره والعمل على رضاكم

تمنياتي للجميع بالتوفيق والرزق الوفير
وفي أمان وحفظ الله

أخوكم : ابو ابراهيم
__DEFINE_LIKE_SHARE__
رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 05:43 PM


Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By Almuhajir

RSS RSS 2.0 XML MAP HTML