تنبيه بعدم التعامل مع محل protection 5 يقدم خدمات متدنية في الدمام

محروم.كوم · #1 07-20-2014, 05:10 PM

نصيحة لوجه الله، اللي مهتم بسيارته لا يوديها لهذا المحل اللي يقول أن تخصصه "العناية بالسيارات"

قصتي هي أني اشتريت سيارة مستخدمة وتمت المبايعة في أحد معارض الدمام. وأفادني الموظف بالمعرض بوجود كوبونات تخفيض مقدم من أحد محلات العناية بالسيارات ومكانه خلف الفحص الدوري بالدمام.

أخذت الكوبون وتوجهت للمحل المزعوم، استقبلني العامل بالمحل -وهو من جنسية عربية- ودار بيننا نقاش حول الخدمات المقدمة، وأهمها:
- تظليل كامل للسيارة من شركة 3m.
- حماية للوجهية وبعض أجزاء السيارة.
- حماية ضد الصداء.
- تلميع الأنوار.
- تلبيسة لأرضية السيارة من الداخل.
- تلميع داخلي وخارجي.

هذا ما أذكره..

المهم، جينا للنقطة الأخيرة وهي: السعر و الوقت.

فقال: السعر بدون الكوبون هو 4400 ريال (أو أكثر)، وبعد الخصم يطلع السعر الإجمالي: 2200 ريال.

وتسلم السيارة الحين (يوم الخميس المغرب) وتأخذها بعد بكرة يوم السبت الساعة 11ص.

فقلت: ممتاز، كل الخدمات هذي بهذا السعر وفي خلال يوم ونصف تقريباً يخلص السيارة.. عرض رائع فعلاً، لكن أنا من النوع الشكاك.

قلت في نفسي: "معقولة يمديه؟؟؟! وخصوصاً بكرة جمعة مقفلين؟!"

قلت نشوف نهايتها معه. بيّت النية أني أجيه اليوم الثاني (جمعة) وأشرف حضرتي على العملية

أخذت جميع أغراضي من السيارة، ولأني غير مطمأن قمت بتصوير عداد السيارة ODO، وصفّرت عداد الرحلات، والساعة المؤقتة، عشان أعرف إذا تحركت وكم قعدت شغالة.

سلمته السيارة ودفعت المبلغ كامل وأخذت الفاتورة، ورحت استأجرت سيارة ورجعت للجبيل، وجيتهم بعد 22 ساعة بالضبط (قبل صلاة المغرب بنص ساعة تقريباً يوم الجمعة).

دخلت المحطة وأدور للسيارة في المحل ما أشوفها، رحت خلف المحطة، يمين يسار، مالها أثر. رحت لأحد العاملين عنده وسألته: وين سيارتي؟؟

قال: في الفرع الثاني!!!!@!#$#%$^%

أنا قفلت أخلاقي ونقزت بلوفي وقامت شياطيني..: ليييييييييييييش تحركون السيارة من المحل؟ ومن سمح لكم؟ وفين المحل هذا.....

دقيت على الشخص المسوؤل -لا بارك الله فيه- واللي اتفاقي كان معه، وسألته عن السيارة، الرجال انصدم وبدأ يطلع أعذار... بعد صلاة المغرب جاء، وبدأ "التحقيق"، فقال أن السيارة في فرعهم الثاني بشارع الملك سعود، لأن عنده زحمة بالمحل.... وكلام لا يودي ولا يجيب.

أنا ما أسمح لأحد يحرك سيارتي من المحل إلا بإذني وأكون موجود، فكيف هذا يحركها إلى مكان بعيد ومن غير ما يعلمني!؟!؟!

المهم، طلعت من عنده وسيدا على "فرعهم" اللي يقول عنه بشارع الملك سعود، بالضبط عند الإشارة، تقاطع الملك سعود مع شارع الأمير نايف، اللي عند سوق الحياة بلازا، هذا الموقع http://goo.gl/maps/Y8r5o واسمع (77). يعني لا طلع فرعهم ولا شيء، مجرد محل زينة، مثله مثل المحلات اللي في نفس الشارع. وهذي الصدمة الثاني.

أدخل المحل أشيك على السيارة، كل شيء سليم فيها والحمد لله، لكن ما سووا فيها ولا مثقال ذرة، وأسألهم، فقالوا مديرهم ما هو موجود، يعني بتتأخر شوي.

طيب الحين أنا أفكر، كيف الشخص هذا اللي اتفقت معه بيسلمني السيارة بكرة الصباح؟! وهو ما سوا ولا شيء.

المهم رحت مشوار أبو ساعتين ورجعت، وكانت تقريباً الساعة 11:30م وتوهم بدأوا في التظليل، وأسأل الشخص المسئول فقال اتفق معنا "فلان" اننا نسوي له تظليل فقط.

ودار كلام كثير معهم، لكن مالكم بالطويلة.

كلمت الشخص اللي اتفقت معه من البداية أنه يسوي لي كل الخدمات فقلت له : ضبط شغلك، ولو محتاج زيادة وقت مو مشكلة، (لأني أعرف الوقت ضيق ولا يمديه الكذاب، ولا ودي يمشورني 200 كيلو على الفاضي) فاتفقنا يكون استلام السيارة نفس اليوم بس بدل 11ص يكون 5م.

جيت بالضبط على موعدي اليوم الثاني، وأدور للسيارة ماني ملاقيها.

تعال يا فلان، وين السيارة؟ قال: جايه بالطريق. تأخر نص ساعة تقريباً. ولا سوا لها تلميع وكان بافي فيه نواقص ما اكتملت. شغله وتعامله ما راق لي أبداً أبداً.
وفي خلال هذا الوقت، قلت له: شيل كل شيء حطيته بالسيارة وعطني فلوسي، أنلطم الرجال.

وبعد نقاش، عرض عليّ الإبقاء على كل شيء مقابل تخفيض المبلغ إلى 1200 ريال ويرجع لي 1000 ريال.

فكرت بالموضوع، طلع ماهو بشين خصوصاً مع الضمان 10 سنوات على كل شيء، والفحص عنده كل 6 أشهر. وقلت الله يعين نتحمله. أخذت الألف وكمل شغله. ولمع السيارة بسرعة وكمل النواقص الثانية برضوه بسرعة، وطلب أجيه وقت ثاني عشان اللفة خلصت .

الزبدة، أنبه كل واحد لا يروح له ولا أنصح أحد بالتعامل معه. وهو كل مرة يجيب عمالة غير، وأنا أشك أصلاً في نوعية المواد المستخدمة، خصوصاً لمن أخذت قطعة من التظليل وتوجهت إلى شركة 3M بالخبر وتناقشت معه بالموضوع، فقال: منتجت 3M يجي فيها "علامة مائية: 3M" صغيرة منتشرة على كامل لفة التظليل وعلى كل الألوان، ماعدا نوع واحد وهو الأقل جودة، ما تجي فيه هذي العلامة المائية. لكن برضوه قارن النوعية هذي بالقطعة اللي جبتها معي ولاحظنا اختلاف في درجة اللون، وهو غير متأكد من كونها من نفس شركة 3M الأمريكية أو أنها مجرد تقليد.

موقع المحل: في المنطقة اللي شرق الفحص الدوري بالدمام، حي المنار، شارع الإمام محمد بن سعود، في محطة ناسي اسمها، هذا موقعهم: http://goo.gl/maps/WLXNq

اسم المحل: الحماية الخامسة Protection 5

والله كل ما أشوف الناس يجونه أحزن عليهم وودي أحذرهم منه ومن شغله البايخ.

واللي يبي يجرب يروح عنده ويشوف كلامه زي العسل ويغري، لكن ماااااااااااش ما من خدمة تسوا، ولا احترافية في العمل.

وأرجو أن لا يفهم البعض أن أطعن في شخص الرجل لكن ما أقصده هو تعامله اللا احترافي وخدماته المتواضعة ورداءة المواد المستخدمة (أو على الأقل المشكوك فيها).

واللي أعطاني الكوبون طلب مني أكلمه بخصوص أي ملاحظة، وإن شاء الله راح أدق عليه وأعلمه بالسالفة.

وأعتذر عن الإطالة لكن لزوم التوضيح أكثر.

تحياتي،،
أبو مشاري __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
[ بيع ] موقع البائع المحترف .. يقدم خدمات رائعة	محروم.كوم	منتدى أخبار المواقع والمنتديات العربية والأجنبية	0	01-18-2014 05:30 PM
المصرية للاتصالات تعدل غرض الشركة بما يسمح لها بتقديم خدمات المحمول و الكوابل	محروم.كوم	منتدى أخبار المواقع والمنتديات العربية والأجنبية	0	06-06-2013 12:40 PM
تنبيه لأهل الدمام	محروم.كوم	منتدى أخبار المواقع والمنتديات العربية والأجنبية	0	10-05-2012 11:30 PM
إلزام تجار الدواجن براس الخيمة بعدم التعامل مع المزارع غير المرخصة..	محروم.كوم	منتدى أخبار المواقع والمنتديات العربية والأجنبية	0	04-16-2012 11:30 AM
طريقة عمل تنبيه وتحذير بعدم رفع صور رمزية مخالفة	محروم.كوم	منتدى أخبار المواقع والمنتديات العربية والأجنبية	0	07-06-2009 04:50 AM