ما شا الله الوالي على الرنـج لافـاع = فواع طيـر مـن يديـن الصقاقيـر
على ثـلاث دونهـن يزمـي القـاع = حول الحنيه واكفخـن توه أعصيـر
وتل السبوق وخالـط الغيـم هـزاع = والأرض وعره والحبـاري معاشيـر
واقفى وراهن مطلب الصيـد طمـاع = وتقطعـن دونـه حبـال المناظـيـر
الله يقلـل وفقـة الطيـر لا ضــاع = ضيعة عمر كامل ولا ضيعـة الطيـر
لا صار لون وجـرم وافـي وطـلاع = واسبق امن الشيهان ورهى من الجير
يملاك حزن وغيض وهموم وأوجاع = ويدق فـي قلبـك فراقـه مساميـر
ما كن لـه خـوه ومقنـاص وامتـاع = تجيله اصفى من حليـب المصاغيـر
تامنه فـي كفـك واذا طـار خـداع = في القاع غير ولا ارتكز للسمـا غيـر
تفرح ليا من صاد وتضيـق لا جـاع = وتنسى علشانه جميع المخاسير
فزته عنـدي فـزة الرنـج لنصـاع = لأمري ليـا كثـرة علـي التفاكيـر
يالرنج عقب شوي بنعقـب انطـاع = وايد على السكان وايد علـى القيـر
مابيـك لامنـي تجـاوزت تـرتـاع = الخـط واحـد والمواتـر طوابـيـر
ودون الرياض اهجر وشبوك واسباع = وخطوط وبيـوت وحـلال ومعابيـر
وانته جديد وغيرك اشكـال وانـواع = بس انت فيك يسطـرون الاساطيـر
راحـه رفاهيـه ليـا حـد الاقنـاع = مركب ملوك وعشق كـل الجماهيـر

ولا سرت ما رخصتك ولانيـب بيـاع = مالك من الروضـه مصـد ومعاذيـر
صاحبك فيه هيام وجنـون وصـداع = منا غـلا احبابـه ومنـا المقاديـر
والشوق يدفع به على وصـل قطـاع = عمه ذياب وجده مـن أمـه الزيـر
له في حنايا القلـب مشتـا ومربـاع = ومصيفه اعيونـي ومعاليقـي البيـر
وشلون ما أقصد واطرق أبواب الابداع = وشلون ما أقطع في رجاه المشاويـر
يا رنج فيه أخلاق واعلـوم واطبـاع = خلت بنـات الفكـر ورد ومصاديـر
ما أشبعت شوفي منه وعيوني جيـاع = عليـه شعبـان المحبـه محـاديـر
أبطيت وحروفـي كسبهـا بالاجمـاع = أما صباح الخيـر ولا مسـاء خيـر
يا مرحبـا ذلحيـن يا مرحبـا السـاع = ما بين ذيك وذيـك يا ويـن باطيـر
جيته وريضان الغـلا عطرهـا فـاع = عسا البطا ماله على العشـق تأثيـر
وعسا الزمن ما لبسك عقبـي قنـاع = ولا أطغتك دنيـا الكبـار المشاهيـر
تصدق انه من مسيرك على القـاع = عرفت باللي صار واللي يبي يصيـر
كانك تبي الفرقا ترى دروبها وسـاع = تبع المقفي عيـب عنـد المساييـر