::][روحـ (ن) عشقته وقلبـ (ن) فقدته][:: .. - الصفحة 17

غاايه · 03-06-2009, 02:26 AM

فطوم: آسفه خلاص.. انزين يلا حطي بالج على روحج.. (بصوت واطي) بشتاق لك..
فيصل: وانا اكثر فديييييييت روحج..
فطوم: عيب يدام ربيعك..
فيصل: عادي يعرف انج مرتي..
فطوم: انزين يلا باي..
فيصل: هههه استحت..باي..
وبندت الخط وتم فيصل يضحك من الخاطر..ويطالع التليفون يضحك : صدق انج هبله.. احين انا الي بكون اهبل لا خذت وحدة من أشكالج..
سالم: افا جي تقول عن حرمتك ما يوز..
فيصل: هههههههه خل عنك..
سالم: انزين وين صورتها خل نشوفها..
فيصل: وحياتك .. قطعه.. اتحداك ان ربيعتك توازي جمالها..
سالم: خل اشوف واحكم؟
فيصل: شوف..
وتم يطالع سالم الصورة وعيبته فطوم صدق وبغفله فيصل حفظ رقمها .. بوقت الحاجه.. على قولته.. حاليا عندي اكتفاء يوم اشبع من الي عندي ألجأ لليديد..
فيصل: ها شو رايك؟
سالم: الصراحه.. شي عجيب.. احسدك على هالصيدة..
.. ..
حطت راسها وهي مستانسه انها راضته .. ياربي فديته متى بس ياربي يخطبني.. وشوي وصل لها مسج..
(( باجر بخليج ترمسين أمايه ))
انصدمت فطوم من بعد الرمسة الي قرتها وتمت كل شوي تتطالعه وتتأكد من الرقم.. ونشت واتطالعت حواليها شافت منى راقده.. تمت اتهز منى..
فطوم: منووو نشي نشي..
منى وهي مبطله عين ومغمضه عين وتتطالع بصعوبه: شو عندج..
فطوم: نشي مافيه رقاد ابا ايلس وياج..
منى: شو ياج .. خليني ارقد وراي مدرسة باجر..
فطوم: خلها تولي باجر بنغيب.. نشي عااااااااااد
منى: لا حول ولا قوة إلا بالله.. قلت لج مابا وخليني ارقد..
فطوم: افففف.. ارقدي انخمدي.. مالت علي يوم اني فكرت اسهر وياج..
ونشت فطوم وفتحت الكمبيوتر..
منى: اييييييييه انتي بندي هالزفت الي يدامج نوره في عيني..
فطوم: والله مشكلتج هاي مب مشكلتي.. انا ابا اسهر وانتي ماطعتي تنشين ماشي غير الكمبيوتر..
منى: مب ناشه لو شو ماسويتي اوكي..
فطوم: أحسن..
ويلست فطوم اتابع المواضيع في المنتدى .. والمسنجر فاتح عندها..
... ... ...
يوم الأحد الصبح
نش وكله نشاط وحيويه.. يحس هالشمس المشرقه اليوم اشراقة حياة يديدة له.. تنهد ومن بعدها تسفر وتم يطالع عمره فالمنظرة.. وابتسم.. : اصلا هي الخسرانه اذا ضيعت هالجمال كله.. فديتني ( وباس نفسه من بعيد) اممموح.. هههههه
وشل كتبه وطلع من الغرفه ونزل كانت الصالة فاضية.. صد حواليه وماحصل حد.. وطلع من الصالة وركب الموتر وشغله وطلع من البيت .. ورن تليفونه كان متصل فيه هزاع..
أحمد: صباح الورد يا ورد..
هزاع: صباح الفل والياسمين والزهر وكل شي حلو فهالدنيا..
أحمد: هههههه.. شوسالفة هالإتصال عالصبح..
هزاع: ياخي ولهت عليك ماتباني اتوله عليك..
أحمد: ههههه عاش هزاع يتوله بعد..
هزاع: انزين خل عنك هالسوالف.. وخبرني جنك متأخر على الكلية..
أحمد: ياخي الرقاد حلو.. والحلم كان أحلى فعز علي اني اقطع حلمي عشان خاطر الكلية..
هزاع: ههههه لوتي .. انزين وقول لي شو علومك الثانية..
أحمد: على حد السيف.. مرتااااااح من دون بنات تصدق..
هزاع: يوم اقولك ماكنت تصدقني.. احين روحك حسيت.. بس انا ترا مب متصل عشان سواد عيونك متصل اقولك شي..
أحمد: اقول انا بعد هزاع متصل الصبح اكيد شي وراه..
هزاع: قول مبروك..
أحمد: مبروك بس على شو؟
هزاع: الحرمه حامل.. يعني بستوي أبو..
أحمد: وانا بستوي عم.. مبروووووووووك ألف ألف مبروك.. تستاهل كل خير ان شاء الله.. انزين انا عندي سؤال بس مادري كيف بتفهمه..
هزاع: اسأل افا عليك انت اخوي..
أحمد: تليفوني اشحاله؟
هزاع: هههههه اسكت ياك رقم امس وعطيته الحرمه ترد.. وطلعت وحده من الي ترمسهن.. شو هزبتها.. عاد اتعرف ضرابة الحريم شقايل..
أحمد: هههههه هيه لا تقول.. انزين اتخبرك تراني وصلت الكلية اشوفك اليوم نتلاقى ف الكوفي..
هزاع: خلاص ان شاء الله..
وبند احمد عن هزاع وتم يفكر شوي منو الي ممكن تكون متصله من البنات الي يرمسهن.. بس تناساه لأنه مب هامنه.. ونزل الكلية ورن تليفونه كان خالد متصل فيه..
أحمد: هلا النسيب..
خالد: اهلين.. ياخي شو ها ماقدرنا انحصلك الا بطلعة الروح..
أحمد: ليش خير؟.. انا فالبيت
خالد: حضرتك مغير رقمك من غير لا تقول..
أحمد: اوه صدق انت ماتعرف هالرقم.. هههههههه ومن وين يبته..
خالد: مروه اليوم قالت لي انك غيرت رقمك.. ماتبانا نتصل فيك قول..
أحمد: هههه.. لا مب جي والله انزين اخبرك انا توني واصل الكلية وامبوني متأخر على الكلاس.. برمسك خلاف
خالد: خلاص تم..
وبند الخط وراح احمد صوب كلاسه..

خلود: انزين اميه احين شو الحل اتم جي للساعه 5 بليا شغلة
شيخة: انزين الدريول ابوج مطرشنه لشغلة .. وابوج تدرين به دوم لاهي بشغله ومب فاضي..

خلود: امييييه عاد شو الحل.. كلمي خالد خل يوصلني..
شيخة: انتي ماعندج لسان ترمسينه
خلود: بلا بس استحي
شيخه: والله انكن بنات اخر زمن.. يوم نبيكن تستحن ولا عالبال... والحين تستحي ترمس اخوها
خلود: ههههههههه فديتج اميييه عاد
شيخه: انزين يالله حشرتيني من صباح الله..
ابندت شيخة عن خلود.. واتصلت في خالد وقالت له يمر على خوله الكلية ويردها البيت .. وخالد لأنه كان فاضي وماخذ اجازه فهاليوم فوافق.. وبعد 20 دقيقه كان عند خلود..
خلود: احم احم .. السلام عليكم
خالد: وعليكم السلام.. الدبه
خلود: لاحوووول متأخر علينا ويغلط..
خالد: دبه بعد شو...
خلود: هههههه.. انزين براويك شي بتخبل.. ماخليت حد ماراويته اليوم
خالد: شو هو راويني...
طلعت خلود الرسمه من بين اوراقها ومدت ايدها له.. : شو رايك..
خالد وهو يطالع الرمسه وفاج عينه.. يود خلود من راسها بإيده اليمين واليسار يسوق بها: انتي شو اسوي بج .. احلل دمج ..
خلود: خيبه ليش.. شعري انزين يعور.. ااااي..
خالد وبعصبيه: بنفدج من هالدنيا... عند منو سايره عشان يرسمج قولي..
خلود: هههههههههه.. انزين ودر شعري وبقولك..
خالد كان واقف عند الإشاير ودر شعرها وربع ايديه : قولي بسرعه لأني صدق واصل حدي..
خلود: ههههههه.. مجوود الي راسمتني..
خالد: منو مجود؟
خلود: بنت خالي.. اخت حور..
خالد: اخبرج.. انا لا اهبل ولا ياهل عشان تقصين علي.. هالرمسه مب رسمة وحده عادية.. رسمة رسام
خلود: هههههههه ياربي هالريال مايصدقني.. ياخوي ياحبيبي سير عند امي واسألها بنفسك وشوف شو بتقول لك.. هي شافت الرسمه يوم عطتني اياها مجد.. وبعدين انت ماتعرفها عشان تحكم.. هاي رسيمة درجه اولى.. تباني اييب لك رسماتها عشان تأكد
خالد: عطيها صورتي ترسمها عشان اصدق.. بس ترسمه يدامي
خلود: هيه تباها تنفدني... انا ماطاعت ترسمني الا بالأيام .. بترسمك انت الريال نفس الوقت..

خالد: شوفي انا السالفة ماداخلة مخي.. فاهمة..
وتم يسوق بينون وزحمه دبي كانت مأخرتنهم.. وتمت خلود ساكته ومغيضة.. ها وين يبا يعني شو مب واثق فيه .. خالد تم يطالعها وحسها متضايجه ماهانت عليه اخته...
خالد: عازمنج على كوفي في أي كوفي شوب تبينه..
تمت ساكته ولا ترد عليه.. تلوم منها زود.. صد صوبها.. : انتي ارمسج ترا بهون..
خلود مارامت تسكت وغصبن عنها صاحت: كيف تشك بإختك كييييييييف؟؟ تربيتك وتربية نفس الأم الي يابتك ونفس الأبو... مب واثق
خالد: يلا عاد خلود والله ماكان قصدي بس من خوفي عليج.. خلووود عاد..
خلود: يعني انت تعرف اني لا يمكن اسويها كيف فكرت هالتفكير.. عيل لو راويت جاسم عقب بيقول نفس الرمسة...
خالد: يهبي اختي محد يرمس عليها..
مسحت دموعها وتمت تتطالعه بطرف عينها.. : ابا اسير هافانا كافيه في الستي..
خالد ابتسم لها: من عيووووووني..
رن تليفونه كانت مروه متصله فيه.. : الوو هلا الحب..
مروه: ههههه وينك.. ؟
خالد: طالع ويا حبيبتي واعدنها اوديها هافانا كافيه ..
مروه وهي مستغربه: شووو منو حبيبتك؟
خالد: مايخصج يلا.. فدييييييييتها هالنظره انا..
خلود تمت تحاول تغير صوتها: حياتي مين هاي الي عم بتحكي معها
من سمعت مروه هالصوت اشتطت بزيادة: خلوووووووووود منو هاي الي حذالك؟
خالد: لا حوول ماتفهم هاي.. اقولج حبيبتي هاج رمسيها..
مروه والدمعه محبوسه في عيونها..: ايه انتي منو..
خلود: شوبكي عن بتصرخي ... يابنت لك طيرتيلو ديناتوو..
مروه: طار ويهج ان شاء الله.. انتي شو يايبنج هني؟؟
خلود: لك انا مع حبيبي شو بكي عم بتزعقي.. خالد حبيبي انت كيف تحملت وحده هيك واتزوجتها..
خالد: كنت مينون وماشفت جمالج ودلعج غير احين..
هني حست خلود ان الموضوع بيكبر لو مارمست عدل.. ونقعت من الضحك..: يالدبه مروو ماعرفتيني انا خلود..
مروه وهي تحاول تهدي نفسها: خسج الله من بنت.. والله طار عقلي قلت ماحيد خالد عليه هالحركات شو ياه فجأة.. ينيت..
خلود: هههههههههههه.. انزين دبه يلا شو تبين انا معزومه اليوم على حساب ريلج
مروه: مابا شي بس بغيت اوصيه على شوية أغراض للبيت
خلود: ها شغلكم انتو الحريم.. كله هات وهات وهات..
مروه: ههههه انزين بنشوف ترانا انتي شو بتسوين ويا جسوم..
خلود: ههههه على كفوف الراحة خلاص..
مروه: انزين بنذكرج ... هاتي ريلي عشان ارمسه..
خلود: هاج ريلج...
وتمت ترمس خالد شوي ومن بعدها بندت عنه وصلوا الستي ونزلوا عشان ياكلون لهم شي هناك..
.. .. ..
حور كانت توها نازله من الغرفه ومشت صوب الريسبشن عشان تسلم لهم المفتاح وتتريا عبيد اييها.. ياها واحد من هالأجانب ويا مرته وقفوا حذالها وقعدوا يرمسونها شوي.. لأن كان شكلها عربيه ويبون يعرفون من وين هي وهالسوالف.. وهي كانت تسولف لهم بإبتسامه ماليه ويهها بارز جمالها... عبيد توه كان طالع من صوب الحمامات وماشي صوب حور.. تفاجأة يوم شاف الريال واقف مجابلنها ويرمسها وهي ترمس وياه وتاخذ وتعطي وياه.. مات من الغيض والقهر.. كان في هالوقت الأجنبي روحه واقف وياها ليش إنه مرته سارت ورا بنتها تييبها ونفس الوقت كانت الأجنبية تقرب من حور من جهة ومن الجهة الثانيه عبيد يقرب منها.. تم يطالع عبيد الريال بغيض وقهر وده يجلع له عيونه من نظراته لحور..
حور: Obiad, my husband
الأجنبي: Nice to meet you sir.
مد له ايده وعبيد فشله ومامد له ايده ويود حور وسحبها وياه..
الأجنبيه: What’s wrong with him?
الأجنبي: I don’t know … i think he is jealous
الأجنبية: let us go or we will be late.
..

عبيد: وايد ماخذة راحتج اشوف؟؟

حور: شو فيك عبيد مب حلوة قفطت الريال..

عبيد: لا والله تحاتينهم بعد.. شو رايج تكملين القعدة وياهم بعد.. ولا تسيرين تعتذرين بالنيابه عني..

حور تمت تتطالعه ومستغربه.. : شو بلاك عبيد .. شو ياك.. الريال ماقال شي غلط.. تم يسـ..

عبيد قاطعها: مابا اعرف شي.. ويالله تغشي..

حور صدت صوبه ودها تصيح.. ليش جي يعاملني انا شو سويت.. ماظني سويت شي غلط.. وتغشت وتمت تمشي وياه بخطوات بطيئة وهو يمشي عنها بسرعه وهي ميته قهر وغيض.. ادمعت عينها من القهر.. وكان لازم يعدون الشارع.. وكانت حور واقفه تتريا الشارع يفضى عشان تعدي.. وعبيد بسرعه عدى وهي خافت وعدت من بعده بس تأخرت شوي.. فالسياره كانت مسرعه شوي.. ومن شافتها حور يايه صوبها انصدمت حست عمرها مب قادره تحرك من مكانها من الصدمة.. وعبيد يصرخ: حوووووووووور .. تعالي بسرعه .. حووووووور..

حور من سمعت صوت بريك السياره لا إراديا غمضت عينها وصرخت : عبيييييييييييييييييد..

وبرحمه رب العالمين وستره وقفت السياره على بعد شعره من حور.. وطلع راسه من الجامه وتم يهزب حور على وقفتها كان بيتوهق لو دعمها.. وعبيد ربع بسرعه وسحب حور وهو لاوي بإيده حوالي جتفها ومشى فيها صوب الرصيف.. وحور من الخوف ترتجف من الخاطر مب قادره تستوعب شي وساكته.. من لقى عبيد كرسي يلس حور وسار اشترى له ماي عشان تشربه..

عبيد: بغيتي تذبحيني..

حور تمت تشرب الماي وهي ترتجف.. وضمت ايد عبيد بإيدها بقوة..

عبيد والدمعه في عينه من الخوف: حرام عليج حور .. بغيتي تذبحيني .. لو استوابج شي انا مادري شو بيصير فيه.. دخيلج حاسبي على نفسج اذا مب عشانج عشاني..

حور صدت صوبه وعيونها محمره من الصياح: مادري شو ياني مارمت اتحرك..

عبيد: دخيلج من اليوم وساير ماتمشين الا وايدج بإيدي بكل خطوة تمشينها..

حور وهي تتنهد ان شاء الله..

عبيد:سامحيني على اسلوبي وياج فالفندق.. بس ماتدرين شو صار فيه وانا اشوف ريال غريب واقف حذالج ويرمسج.. ولا عيونه ماتنشال من عليج.. بغيت اموووت يا حور والله بغيت اموت..

حور: بس انا ماسويت شي.. واذا انت بتم على هالحال ترا المكان الي أداوم فيه ياما رياييل اتقابل وياهم وارمسهم بتقعد على كل واحد بتسوي جي..

عبيد: حور تقدرين تقدمين استقالتج..

حور: قبل لا اعرف انت منو الي خاطبني وبتكون ريلي كان شرطي عن الشغل وقالو لي ان ماعندك مانع..

عبيد: ماعندي مانع.. قدمي في أي مكان ثاني.. لأني واقف فيج.. بس يوم اشوف يدام عيني ماروم اتحكم في نفسي..

حور: اذا تميت على هالحال وايد بنتعب ياعبيد.. الرياييل فكل مكان.. الدوام وبرع الدوام..

عبيد نزل راسه مب عارف شو يقول لها أو كيف يرد عليها

حور: عبيد.. هالراتب الي انا استلمه أعطيه لأبويه عشان اساعده في ديونه.. انت تدري انه مابيرضى ياخذ لا من عمي ولا من أي انسان ثاني

عبيد: بس..

حور: دخيلك عبيد حاول تقاوم.. توك تقول انك واثق فيه..

ابتسم لها عبيد وتقرب منها وباس راسها..

حور نزلت راسها: عبيد .. مب حلوة في الشارع نحن..

عبيد: احين بتيودين على بوسة الراس.. ترا في هالبلاد الي اردى من هذا تشوفينه في كل حته

حور : ههههههه.. اقنعتني..

عبيد: غصبن عنج..

حور: هههههه..

ونشوا يكملون مشي هذا آخر يوم لهم في هالمكان.. اليوم الثاني من الساعه 6 الصبح راح يروحون المطار عشان يردون البلاد..

.. ..

مجد: خاينه انزين..

خلود: هههه شو مليت من شيفتج كل مره اظهر وياج خل اتخقق في اخوي شوي ..

مجد: هههه لو تدري امج بتقصبج..

خلود: لا حياتي مب امي الي بتعصب وانتي الصادقة.. هاي يدو الي بتقصب لي رقبتي لو درت..

مجد: عيل يبتيها لنفسج.. ومنو الي بيخبر يدوو.. أكيد مجوود تدرين فيني ماخش شي عنها..

خلود: ههه لوتيه تدور مصلحتها.. انزين يلا جلبي ويهج خليني اخذ راحتي ويا اخوي..

مجد: هههههههه جليبووو .. انا براويج..

خلود: ههههههه يالله مع السلامه ..

خالد: ماتستحين ترمسين بنت خالج جيه؟؟

خلود: لا عادي .. نحن ربع احين واكثر بعد.. يعني تخيل خلال فتره اسبوعين ونحن جي ويا بعض..

خالد: الله لا يغير الحال ان شاء الله

خلود: آمين يارب..

ورن تليفون خالد في هالوقت وكان أحمد..

خالد: اتصل الدب احمدوو.. __DEFINE_LIKE_SHARE__

نعيمي وافتخر · 03-06-2009, 02:27 AM

قصه واايد رووعه وتسلمين عليها __DEFINE_LIKE_SHARE__

غاايه · 03-06-2009, 02:30 AM

فهاللحظة تذكرت خلود الموضوع وتغير ويهها وتمت تتسمع كل المكالمة تبا تفهم شي.. بس مب عارفة شو..

خالد: ههههههههه انزين يالهرم.. خلاص انت تخبر ربيعك عن الموضوع وشوف شو بيقدر يسوي..

أحمد: هههه ان شاء الله.. هو انا كلمته قالي تمام.. الله العالم شو بيسوي..

خالد: انزين بس اخبرك مره ثانيه لا غيرت رقمك خبرنا عاد مب تخلينا ندور عليك شرق وغرب..

أحمد: هههه ان شاء الله فالك طيب..

وبند الخط خالد عن احمد... وتمت خلود سرحانه ... يعني التليفون مب عنده... هو غير رقمه... والله حسيت ان في شي مب طبيعي..

خالد: حوووووه ارمسج انا انتي وين ؟

خلود: هههه لا ماشي سرحت شوي في هالمحل عنده اشيا حلوة شكله..

خالد: خلاص عيل سيري وتنقي الي تبينه وعلى خويج الدفع..

خلود: لا عاد بس.. بثقل عليك جي انا..

خالد: خلاص برايج انتي الخسرانه

خلود: ها شو.. لا خلاص غيرت رايي..

خالد: ههههههه البنات صدق مايعرفون يجاملون

ودخلت خلود المحل وتنقت لها كذا شي ودفعت خالد وطلعوا.. وردها البيت..

شيخه: عنبوو كل ها درب من الجامعه للبيت؟

خالد تم يطالع خلود بطرف عين وهي تتطالعه وتضحك: ماشي بس كنت يوعانه قلت له يريقني على حسابه..

شيخه: اقول انا بعد خلود ترد البيت على طول مستحيل.. ان شاء الله استانستي..

خلود وهي تهف وتهمس لخالد: الله ستر.. هيه وايد استانست..

وصعدت خلود لغرفتها..وأول ماوصلت إتصلت في مجد..

خلود: تعالي اليوم بيتنا مايخصني..

مجد: مابا نسيتي انج قايله مليتي من شيفتي

خلود: اسوي وياج سوالف عاد..

مجد: مابا مابا..

خلود: يالله عاد والله عندي موضوع ضروري وياج..

مجد: اوكي بس ماعندي حد يوصلني..

خلود: دبري عمرج مايخصني..

مجد: اوكي.. يالله باي..

ومن بندت سارت مجد ورمست ابوها.. وبعد عناء وافق : خلني اتريا احمد يوصل بعدين بوصلج..

من سمعت مجد طاري احمد احمر ويهها من الغيض وطلعت من المكتب وصعدت فوق.. شو ها صار ايي بيتنا وايد هذا.. وابوي وايد مهتم به.. لو يدري عن سوالفه جان مادخله البيت.. الهرم اكرهه.. صار طاريه متأصل بكل شي في البيت..

وتزهبت وقعدت تتريا ابوها لغايه مايفضى.. ومن بعد ساعه وداها ابوها عند خلود ونزل وياها عشان يسلم على اخته ونسيبه.. وصعدت مجد بعد ماسلمت عليهم عند خلود..

مجد: ها خبريني شو السالفة؟

خلود: خيبه طاع الملقوفه.. سلمي بالأول..

مجد: مابا شبعت منج..

خلود: ههههه خيبه للحين حاطه في خاطرها.. انزين يلسي السالفة ماتنقال وكل وحده فينا واقفه على ريولها.. اقعدي وهدي وبفهمج الموضوع..

مجد: افففف ماحب حرق الأعصاب..

وبعد ماقعدوا.. ودخلت عليهم شيخه ويابت لهم العصير وطلعت..

مجد: هاي قعدة وقعدت.. وشربت عصير.. يلا خبريني..

خلود: عرفت عن احمد..

قاطعتها مجد: دخيلج لا تيبين طاريه بس.. فالبيت اسمع اسمه واحين يايه عندج بعد تيبين طاريه.. واذا بتقعدين ترمسين عنه والله ترا بطلع من الغرفه وابوي تحت برد البيت وياه..

خلود: انتي اسمعي السالفة انزين وبتفهمين كل شي..

مجد وبعصبيه: مابا اسمع شي عنه مابا ماباااااااااا.. افهميني...

خلود: خلاص هدي نفسج الظاهر بعده السالفة مأثرة عليج يوم ثاني برمسج في الموضوع..

مجد وبغصه: لا يوم ثاني ولا عاشر دخيلج.. مابا اسمع عنه شي مابا اسمع اسمه ولا شي.. مابا شي عن هالإنسان مابا.. (وبدت اتصيح).. مابا افهميني كارهته كارهته..

تقربت خلود من مجد ولوت عليها: خلاص مابييب طاريه بالمره بس لا تسوين بعمرج جي مايسوى عليج والله..

مجد وهي تهدي عمرها: سخيفه يارتني من بيتنا عشان هالإنسان التافه..

خلود: شو اسوي متولهه عليج فقلت لج جي.. وبعدين مب عشان هالتافه انا متولهه عليج بعد..

مجد: لا والله دبه

خلود: هيه هاي هي مجد.. انزين يلا فجي هالثم اشوف هالضروس الحلوين..

مجد ابتسمت لها ..

خلود: تعالي اخبرج .. تدرين رسمتج كانت بتوديني في داهية

مجد فاجه عيونها: وكيف ان شاء الله؟
خلود وتمت تخبرها السالفة.. ومجد تضحك عليها.. وفرت عليها خلود صورة خالد.. : هاج رسميه الأخ يباج ترسمينه..
مجد: اخبرج قولي له ماشي ببلاش..
شلت خلود التليفون واتصلت في خالد..
خالد: ها بعد شو عندج
خلود: ها ترحيبك في دلوعتك..
مجد ماتعرف خلود ترمس منو.. تمت تتطالعها مستغربه..
خالد: ههههه لا بس مستغرب..
خلود: ولهت عليك فيها شي؟؟ لا قول فيها شي..
خالد: خيبه خيبه بتاكلني.. لا مافيها شي ..
خلود: انزين اسمع الخبر التالي ترا بنت الخال تقول ماشي ببلاش..
فجت مجد عيونها ودها اتدوس خلود في بطنها ..
خالد: اكيد ترا تعلمت هالشي منج ولا هي مايخصها انتي علمتيها عشان تتجاسمين البيزات وياها..
خلود: بل.. شو ها المثل يقول انا واخوي على ابن عمي وانا وابن عمي على الغريب.. بس احين انجلب الموضوع..
خالد: هههههههههه.. كيفي مليت منج.. عطيني اياها بتفاهم وياها..
خلود : هاج بيرمسج..
مجد وهي فاجه عيونها وتهمس: شو ارمسه تخبلتي..
خلود: البنت تستحي..
خالد: شو تستحي تراني ولد خالتها وحسبة اخوها العود.. يلا عاد قولي لها عن المستحى...
خلود: هاج مصر الأخ..
شلت مجد التليفون وهي تحايس بثمها: السلام عليكم..
خالد: وعليكم السلام.. اشحالج بنت الخال؟
مجد: بخير طاب حالك انت اشحالك؟؟ عساك بخير؟؟
خالد: بخير يسرج حالي الحمد لله.. ها شو السالفه سمعت تبين بيزات عشان ترسميني..
مجد: هههههه.. لا ماعليك تخرط عليك هي تبا البيزات بس تعق السالفه علي...
خالد: وانا قلت جي بعد..
خلود: الله وأكبر.. جذاااااااااابه..
خالد: ههههههه.. اشحال خالي ومرت خالي؟
مجد: الحمد لله بخير يسلمون عليك..عاد انت موول مانعرف شكلك زورنا على الأقل..
خالد: ان شاء الله بس خل يرجعون المعاريس بنزوركم انا ومروه..
مجد: يعني عشان خاطر المعاريس ونحن مالنا خاطر..
خالد: افا والله .. تاج راسي كلكم..
وبعدها بندوا الخط وتمت تسولف ويا خلود ويرمسون والضحكة ماتفارقهم ومستانسين من الخاطر..
.. .. ..
فيصل كان قاعد وياها في هالوقت ويحاول يقنعها وهي شوي مب قادرة تقتنع بالسالفة..
فيصل: يلا عاد مابا شي منج رمسيها اونج امي..
رقيه: انت ماتشبع.. البنات الي اييبهن لك شحلاتهن.. تقعد تركض على قوم الرخص هاييل..
فيصل: يلا عاد شروف.. وبعدين انتي ماتسوين شي ببلاش..
من شافت البيزات رقيه تمت تحايس ثمها: هات التليفون .
شلت التليفون من بعد ماتصل فيصل .. : لحظه بقول لها امي تبا ترمسج..
ضحكت رقيه وضربته على جتفه: عنلاتك يالشيطان..
فيصل أشر لها انها تسكت: هلا بالقلب.. هلا بالروح.. هلا بغناااااتي
فطوم: هههه.. جان استحي.. اشحالك حبيبي؟
فيصل: بخير .. انزين اقولج في وحده تبا ترمسج؟؟
فطوم بإرتباك: أمك.. أويه .. قول والله
فيصل: هيه يالله رمسيها..
رقيه وهي تحايس بثمها: الو .. السلام عليكم
فطوم وبحيا: وعليكم السلام..
رقيه: اشحالج بنتي عساج بخير..
فطوم: الحمد لله بخير .. انتي اشحالج؟
رقيه: بخــــــير الحمد لله.. وشحال فيصل وياج لا يكون معذبنج؟
فطوم: هههه شوي مو وايد.. يوم يتغلا بس..
رقيه: يلا ان شاء الله بتستوين مرت ولدي صح..
فطوم: اذا الله راد ان شاء الله..
رقيه: يلا عيل يابنتي.. حطي بالج على ولدي ماوصيج لا تزعلينه تراه الغالي..
فطوم: هههههه ان شاء الله.. لا توصين حريص
رقيه: يلا مع السلامه.. سلمي على اهلج..
فطوم: ان شاء الله..
ومن عقبها بندت الخط.. تمت فطوم متيمده مكانها وتتذكر الموقف وساكته.. اااااه ياربي احبه.. احبه
فيصل في هالوقت كان ميت من الضحك..
رقيه: يلا هات تبا تقص علي شو؟
فيصل: انتي ماتنسين عنبو .. ولا تشبعين..
رقيه: هههههه.. هاي شغلتي وبعدين لي افضال عليك ولا
فيصل: لاحوووول ذلتنا هذي.. انزين امي عرفنا ان لج افضال علي وعلى نصور..
رقيه: هيه وافديت نصور.. الخير الي عندي كله من عنده..
وطلع فيصل من عند رقيه ورد اتصل في فطوم..
فيصل: شو شعورج..
فطوم: طايره من الفرحة.. مب مصدقة الي صار..
فيصل: هههههههه.. انزين بغيت اذكرج بشي انتي ناستنه..
فطوم: عيد ميلادك مانسيته.. باقي له 3 ايام..
فيصل: انزين وشو بتييبين لي هديه
فطوم: امممم.. انت لا تحاتي بتوصلك الهدية..
فيصل: اتذكري شي واحد.. ترا مب أي هديه ترضيني.. واذا تبين اتسهلين على عمرج في هديه وحده اتمناها منج

فطوم: هيه فديتك قول..
فيصل: اشوفج واظهر وياج..
فطوم انصدمت وتمت ساكته..
فيصل: فطوووومتي.. حبيبتي.. شو قلتي؟
فطوم: امممم.. حبيبي مايستوي كيف اطلع
فيصل: افا يا فطوم تكسرين بخاطري في يوم ميلادي..
فطوم: بس..
فيصل وهو يسوي عمره زعلان: خلاص خلاص.. بعد كل الي سويته لج رمست امي وانتي بعدج على رايج.. شو تبين زود عشان اخليج توثقين فيني.. جرحتيني..
فطوم تمت متلومه والدمعه في عينها مب عارفه شو تقول.. : انزين خلاص اوكي بدبر لك طلعه يومها.. بس المشكلة ان اخوي مايخليني اظهر بليا منوو اختي...
فيصل: فديتج حاولي دبري.. قولي بسير بيت ربيعتي ولا أي شي..
فطوم: ان شاء الله.. يصير خير ليومها..
فيصل: هيه هاي فطوم الي تحبني وتموت علي وماتقدر ترد لي طلب..
فطوم: هههههههه فديتك
.. .. .. .. ..
يوم الإثنين
عالساعه 11 فليل وصلوا المعاريس بالسلامه.. والكل في المطار ينتظر وصولهم عشان يستقبلهم.. مجد كانت مستانسه من الخاطر لأنها صدق تولهت على حور وافتقدتها وايد.. وكانت واقفه على جنب ويا خلود ومروه ويسولفون وهي ماسكة باقه ورد حمرا .. كان شكلها طالع رقيق مع الباقه الي ميودتنها.. هي والورد كنهم وجهين لنفس العملة.. مروه تمت واقفه تأمل مجد وملامحها.. صدت صوبها وبكل عفوية..
مروه: تدرين ان ملامحج جذابة وايد..
استحت مجد ونزلت راسها.. ومن عقبها صدت وابتسمت وويها محمر من الخجل وحركت راسها بعفوية.. (مستغربين كيف مجد ماتغشت وهم في مكان عام... المشكلة الي صارت انها بعد ماطلعت من البيت اكتشفت انها لابسه الشيلة الغلط.. محروقه فماتقدر تتغشى.. بعد ما استئذنت من ابوها واحتشر عليها تمت على هالشيلة بس الصوب المحروق كانت داسته .. ولافه الشيلة بطريقه مرتبه ومحلتنها بزياده.. ).. حركت راسها بكل عفوية على طرف اليسار شافته.. ارتبكت.. انخبص كل شي في جسمها... حست بحراره غير طبيعيه.. تمت تتطالع ايدها المجبسه وتتلمسها بأطراف صبوعها كأنها تحس به هو.. ابتسم له وتقرب صوب ابوها..
محمد: السلام عليكم ..
عبدالعزيز: اوه الدكتور.. يا هلا والله.. شو هالصدفة العجيبة..
محمد: هي والله فرصه سعيدة.. اشحالك عساك بخير؟؟
عبدالعزيز: بخير طاب حالك.. انت اشحالك؟
محمد: الحمد لله بخير.. اشحال بنتك شو ايدها؟؟؟
عبدالعزيز وهو يصد صوب مجد: على حالها ماتشكي باس..
محمد: يالله الحمد لله على كل حال.. الا شو يايبنكم هني؟
عبدالعزيز: والله يايين نستقبل بنتي وريلها توهم معاريس رادين من شهر العرس..
محمد: ماشاء الله بالبركة ان شاء الله...
عبدالعزيز: الله يبارك فيك ان شاء الله.. وانت شو يايبنك هني؟
محمد: واحد من ربعي الي يدرسون برع البلاد متخرج وياي استقبله..
عبدالعزيز: هيه... الحمد لله على سلامته..
ومن عقبها ابتعد الدكتور عن عبدالعزيز ووقف بعيد عنهم بس كان يشوف مجد ولا يشل عينه من عليها كل ماتحصل له الفرصة..
خلود: شوفيج انتي ايه ارمسج؟؟
مجد وهي منزله راسها وترتجف: هذوووه.. يدامي __DEFINE_LIKE_SHARE__

غاايه · 03-06-2009, 02:31 AM

ومجد طول الوقت تمت ساكته وسرحانه بالدكتور.. يعني طلع ربيع عبيد.. ياسبحان الله.. ولا بعد من زمان والروح بالروح.. بس احمد ليش ماعرفه يوم شافه بالمستشفى..؟؟.. اصلا شافه ماذكر.. اوه مايخصني هذا لازم يدخل في كل شي عنبوه يني..

حور: شو الإستعدادات لملجة خلود؟
مجد: بتكون عائلية أكثر من جي ماشي استعدادات كبيره وايد
حور: احسن بعد.. الله يوفقهم ويهنيهم يارب..
الكل: آمين يارب..
عبيد: الفال لك ياأحمد..
أحمد: ان شاء الله بس خل نخلص دراسه وعسى الله ترضى فينا
حور: ليش في حد في بالك؟
أحمد: لا تعليق..
عبيد: هههههههه احمد ومايكون حد في باله مستحيل..
مجد وفي خاطرها.. حتى اخوه عارفنه.. اكرهه.. الله لا يقول حاط عينه علي بجلعهن له..
رفع عينه احمد وتم يطالع مجد شافها منزله راسها وهي تعدل شيلتها .. تنهد وهو حاس بغصه في صدره.. وده يعيش لحظات حلوه وياها بس مب قادر يعدل الوضع..
وصلوا بيت بوعبيد ونزلت حور وياها عبيد ورن تليفون مجد في هالوقت..
مجد: هلا ابويه..
عبدالعزيز: انتي وين سرتي؟؟
مجد: انا سرت ويا حور.. تحريتها بتيي عندنا البيت احين ماعندي حد اييبني..
عبدالعزيز: منو وصلج؟
مجد: أحمد.
عبدالعزيز: خلاص خليه يوصلج عيل..
مجد انصدمت: هااااا شو..
عبدالعزيز: شوبلاج.. تراه ولد عمج مب غريب.. والا بيوصلج شو بتسوين وراج كلية باجر..
مجد وهي تحايس بثمها: انزين انت اتصل فيه وقول له انا ماقدر ارمس..
عبدالعزيز: خلاص ان شاء الله..
وبندت عن ابوها وسارت عند حور وسلمت عليها وعلى عبيد..
مجد: عاد تعاليلنا باجر..
حور: هيه انزين ترا باجر على الغدا بكون عندكم.. اقول ماعندج اخبار عن خولة؟
مجد: لا الخاينه بس اتطرش مسجات ماتتصل..
حور: هههههه.. حليلها تولهت عليها بتصل فيها باجر..
عبيد: وانا ولهت على خلووف..
حور: اصلا قول ولهنا على سوالفهم وحشرتهم..
عبيد: مابقى شي وبنرد للشقا..
حور: لا دخيلك لا تذكرني.. زين منهم يوم وافقوا على اجازتي هاي..
أحمد: مجد جاهزه عشان اوصلج؟
حور: بتسيرين ويا احمد؟
مجد وهي تبلع ريجها غصب.. : هيه لأن مافي حد ثاني يوصلني..
حور: زين يالله روحي بالسلامه وسلمي على امي وابوي.. وقولي لهم باجر بيي..
مجد: على الرحب والسعه..
ومشت ورا احمد الي سبقها للسياره وقعدت ورا.. وتمت صادة صوب الجامه رافضه انها تنطق بأي كلمة.. وهو ساكت نفس الشي..
أحمد.. : اقول..
مجد ونفسها في خشمها: هلا..
أحمد: كم سنه باقي لج؟
مجد: سنتين..
أحمد: يالله بالتوفيق.. عيل انا بخلص قبلج يعني..
مجد: ان شاء الله.. بالتوفيق..
أحمد: وياج..
وسكتوا لفتره.. واحمد ماقدر يمسك نفسه اكثر.. : ممكن اقولج شي؟
مجد: قووووووووول..
أحمد في خاطره.. : بل.. شديدة.. (صد صوبها من الجامه وهو يشوفها).. انتي ليش تكرهيني؟
مجد: أكرهك؟؟ ليش؟؟ لا ماكرهك ولا احبك.. عادي..
أحمد تضايق شوي بس ماحب يبين لها شي.. : اهااا لا بس احسج ماتردين علي شرات ماتردين على عبيد ولا على خالد اليوم يوم سلم عليج..

مجد: لا عادي ماقصد شي.. هذا اسلوبي..
أحمد: اهاا.. يالله عيل سلمي على عمي ومرت عمي وايد..
مجد: يبلغ.. مع السلامه..
ونزلت من الموتر وبندت الباب بقوة وراها.. غيض احمد زود .. عفان الله حتى ماجاملت تعال اشرب شي تقهوى.. شدييييدة..
ودخلت مجد البيت وهي تتذكر الدكتور ابتسمت.. وصعدت غرفتها.. كانت في هاليوم هاديه وحاسه بالراحه شوي.. يمكن شوفة الدكتور فتحت نفسها .. وعطتها امل هي بعدته عنها.. وأحمد في هالوقت ماكان قادر يشيل مجد من باله
ملاحظة بسيطة:.. بالنسبة لشخصية رقيه.. مقتبسه من الواقع.. للأسف مريت في بإنسانه مثل هذي وانهدر دم احدى البنات الي اعرفهن بسببها.. الله يرحم البنت .. ويجازي هالإنسانه.. طبعا اسمها مب رقيه غيرت الإسم لزوم القصه والتمويه.. وعلى فكرة رقية حرمه كبيره في السن.. شغلها أماكن تجمعات النسائية.. أعراس وغيره.. وتتنقى بنات وتوديهن للشباب.. شرات مايقولون (دلاله).. عفان الله
معرفة عبيد للدكتور.. هل راح يغير شي؟؟
مجد بتعرف انها ظلمت احمد بظنها ولا راح تظل على هالحال؟؟
أحمد بيعترف بشي.. أو بيعرف عن موضوع اتصال مجد؟؟
خلود وجاسم.. اسمحولي ماكتبت ملجتهم بس الوقت ضاق علي وماقدرت اكمل..
فطوم.. بتطلع مع فيصل؟؟
شو نوايا فيصل من ناحية فطوم؟
ناصر على شو مخطط؟؟ __DEFINE_LIKE_SHARE__

غاايه · 03-06-2009, 02:34 AM

المشاركة الأصلية كتبت بواسطة نعيمي وافتخر

قصه واايد رووعه وتسلمين عليها

ربي يسلمك
مروورك الارووع والله
تسلم واتمنى اتاابع وياانا __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ان فقدته فقدت الدنيا	بنت البلاد UAE	شعر و خواطر	2	03-12-2010 11:00 AM
عسى ألاقي فجنتي كل ما فقدته بحياتي !!!!	بطبعي مزوحي	شعر و خواطر	8	03-14-2009 09:14 AM
لاتندم على حب عشقته	انت محبوبي	المواضيع المكرره	2	01-27-2009 06:46 AM
لاتندم على حب عشقته	انت محبوبي	المواضيع المكرره	0	01-27-2009 02:11 AM