سلام علاهم

اسعد الله اوقاتكم بكل خير

بـ قول لكم قصتي مع استادنا المصري

البداية

كنا ندرس بمدرسة في قرية تبعد حوالي 30 كيلو الخط بر وجلد وكنت انا واخواني ثلاثه

نروح مع ابوي لأن أبوي يعمل بهذي القرية بـ ( خوي بالأماره ) وقتها !

نمشي عقب صلاة العصر من يوم الجمعه ونجلس بالقرية طول الأسبوع نظراً للبعد والمشوار

تقريباً هاك السنه في صف خامس ابتدائي . وكنا نجلس من طول الأسبوع عند مقر عمل ابوي


ويوم الأربعاء بعد الصرفه نرجع للديره حقتنا اللي تبعد حوالي 30 كيلو عن القريه والخط كان

وعر جداً مايروح غير سياره قويه جيب أو موتر نشيط !

الوكاد مالكم والطويله هاك اليوم وحنا مداومين قعد الأستاد المصري كان يدرسنا بالرياضيات

وكان يجلدنا جلد بالعصا في يوم من الأيام وحنا بالفصل كان الأستاد يسألنا عن لبن الغنم

وكيف يعملونه وكيف الطريقه ؟ مدري وقتها وش جاب سالفة البن بس شكل المصري كان فايق

طلع اخوي الكبير قال يا استاد حنا نسوي اللبن ونجهّزه ونبيع سمن ( يبي يسلّك الأستاد )

المصري الأستاد ماصدّق خبر ! طبعاً شاركت اخوي وكمّلت وقلت انه طازج ماهوب مثل ( لبن المخيض ) !!

وقتها لبن المخيض ولبن الطائف هي اللي عليها طلب بالسوق ؟ قلنا للاستاد المصري والله لو تشرب

منه تترك لبن الطائف

وعقب يومين من هالسوالف وبعد انتهت الحصه جاء الاستاد واخذنا على جنب انا واخواني

قال ابي لبن غنم من عندكم ؟ قلنا أبشر بعزك ( بنسلّكه ) عشان يضبطنا بالدرجات !

الوكاد قال ابي جركل بجرّبه قلنا خلاص الأسبوع الجاي نجيبه ! وعقب اسبوع وحنا نجيب له اللبن

يوم السبت عقب الدوام واخذه وقعد يشرب منه هو وجماعته واهله

شكل اعجبهم طعمه ! اليوم الثاني يوم الأثنين جاء وسألنا متى بتطلعون لأهلكم ( يبي اللبن )

قلنا ممكن بكره يا استاد ؟ نقصد يوم الثلاثاء لأن وقتها يوم سألنا كان يوم الأثنين !

قال خلاص يعني بتغيبون بكره وتداومون يوم الأربعاء ؟ قلنا نعم بكره بنغيب ونحضر يوم الأربعاء

لأن وقتها الشايب الحلال ماعنده ضرمه قال اليوم عقب المدرسه بنطلع لأهلكم نتعشى عندهم ونروي

الحلال ونجيب له ( علف ) وعقب العصر نرجع لأن عندكم مدرسه الأربعاء !

الوكاد المصري وصّانا باللبن ويوم جينا بالديره حقتنا وحنا نروح لم الوالده قلنا الجركل هذا للاستاد

يبي لبن ؟ ماقصرت الوالده اعطتنا اللبن وحنا نحط الجركل ورا المرتبه حقت الوانيت .

رجعنا للقريه اللي ندرس فيها وداومنا الأربعاء والمصري كان مستأذن من المدير سألنا عنه قالوا

اليوم ماداوم ؟ ياولد وش نسوي باللبن !!!

قال اخوي الكبير نخليه ورا المرتبه واذا داومنا يوم السبت نعطيه ( على نيّاتنا ) .

طلعنا يوم الأربعاء ورجعنا لديرتنا وجلسنا خميس وجمعه ورجعنا للقرية اللي ندرس فيها !

السبت داومنا والمصري داوم واول ماشافنا يسأل جبتو لبن ؟ قلنا نعم يا استاد

( اللبن ) وراء المرتبه له اربع ايام !!!

بعد الصرفه اعطيناه اللبن واخذه ! داومنا يوم الأحد وهو ما داوم والأثنين بعد ما داوم

والثلاثاء ماداوم والأربعاء ماداوم ؟؟

الوضع الى الان عادي ماندري ! أثاريه متسمم هو وعياله وجماعته من اللبن

يوم جاء السبت وهو يمسكنا وجلد وجلد وجلد في الفصل

يقول بغيتو تذبحوني انا وعيالي ومامتي

الزبده هاك السنه سقطنا في الرياضيات

وسلامتكم

عسى القصه اعجبتكم ..