السلام عليكم ورحمة الله وبركاته
ذكريات من ايام الدراسه في العصور الوسطى قبل 35سنه اذكر مره يوم وزوعو الشهايد وانا مكمل بعشر مواد كله دوواير حمر الله يجيركم من النار صايرتن الورقه حمرا وشف عاد الحظ من اول يوم اني رحت للبيت الا ابوي الله يرحمه كان موجود بالبيت من الخوف اشوف سيارته عند البيت وانا توني بالحاره اللي جمب حارتنا ويمغصن بطني ثنين وسبعين مره ما ادري وين اروح احس لو جارنا شاف شهاتي رمانن بشوزن ام سيلان عاد شلون ابوي وقعدت احسب ذنوبي بالدراسه كل دويره بدالها خمس كفوف واضرب عشرة في خمسة يساوي اثنين واربعين يعني الوجه وارم لمدة اسبوع ما اقدر اطلع عند خوياي العب معهم
المهم مالكم بطويله -شباب اللي عنده شغل يروح يخلصه ويرجع ههه - يلقاني توي قاعد اكتب واثناء وانا افكر عند باب البيت برا طلع ابوي وشاف الورقه معي احس انها اعظم من ورقة الطلاق قال جبت الشهاده ودي اقول لا من الروعه بس بيدي ما اقدر اكذب قلت لا ايه ايه هذي هي قال عساك نجحت عاد جت لحظة الصفر ودي ادخل من تحت الباب وازبن بالروشن عندي امي بس امي تبي تربطن بحبل ودوديني عند ابوي يعني ما استفدنا شي ،، وقبل اجاوب مر قدام عيوني ايام السنه كلها اني لعبت واني واني ولا من الزين كل ما سألوني ابوي وامي وشلون الاختبار اليوم اقول زين اذكر امي تقول عسا وابوي احس وده يقول شف وجه العنز واحلب لبن نرجع لاجابة السؤال حق ابوي عند الباب وانا اتماسك اعصابي ولا ارد واعطيه الشهاده واقول في نفسي ان شاء الله اني غلطان بالحساب وخمسه في عشره يساوي احدعش كف واشوف تعابير وجه ابوي تغيرت والحواجب انعكفت ويحك لحيته وهو يقراء الشهادة ويطالع فيني هذا اللي زين زين ادوختنا بكلمة زين وهذا اخرته ارجوكم ياشباب لا احد يتخيلني صرت زي الزبده اللي ضاربته الشمس وساحت احسنوا النيه ،، انا احتري بس من وين تجي الكفوف ..خلاص خربت قال ابوي اركب السياره وانا ابلع ريقي ولا يوقف الا بصبع رجلي الوسطي من الخرعه ويركب ابوي سيارته الوانيت ويصفق بالباب بقوه انا هاك الساعه ودي اركب بالحوض ما ادري وين يبي يوديني هو يروح للبر ميه وخمسين كيلوا وينزلن ويرجع علشان اضيع بالبر والا يجدعن بوسط قليب والا مصلوب بطلحه وانا اركب معه بالغماره ولاصق عند الباب وماسك عروة الباب قلت ان شفته بيطلع من الديره اطبح واركض بالشوارع ولا اضيع بالبر ياروح مابعدك روح . المهم وهو يمشي ولا يوقف الا عند باب مدرستي ... ياحبيبي ويلتفت علي ابوي وقال لا. تتحرك من السيارة وهو ينزل ويدخل المدرسه وانا طايرتن بهوتي ما ادري وش بيصير وانا جالس احس الدقيقة ثلاث تشهر من البطا والغلقه شوي يوم طلع ابوي لحاله ومعه ورقة طلاقي اقصد شهادتي وهو يركب ويجدع الورقه بوجهي ويقول هاك خليتهم ينزلون لك من الدواوير وشد حيلك وانجح بالاكمال وانا اشوف الشهادة الا نقصت الدواوير من عشر الى ست فقط لاغير بقدرة قادر سبحان الله قلت يبه شلون كذا قال كلهم اعرفهم وطلبتهم وما قصروا .......والواسطه فوق القانون ههههه........الى اللقاء ارجو التقييم والنقد ,,,شكرا لكم وابشركم اكملت وبرضو سقطت وعدت السنه من جديد
__DEFINE_LIKE_SHARE__
 | 
09-07-2013, 07:50 AM
العرض المتطور
المواضيع المتشابهه 
