في المعارض .. شفت العجب العجاب

محروم.كوم · #1 08-26-2013, 05:00 AM

السلام عليكم ورحمه الله وبركاته

كتبت موضوع قبل كذا اشاوركم فيه كنت ناوي على شراء سيارة

توكلت على الله و بديت ادور بمعارض النسيم الاسبوع اللي راح يومياً كل عصر اتردد عليها

طبعاً ماعندي ذيك الخبره بالمعارض ولا لي صولات و جولات فيها حديث عهد على السيارات

شفت اشياء بالمعارض ماتسر ابد .. اشياء تغبن الصراحه

كـ مثال بسيط يعني

باجيرو 2007 .. قيمته حول قيمه لاندكروزر 96 !!

الكامري تسام بقيمه اكثر من قيمه الالتيما مع ان الالتيما افخم منها و كل السيارتين اعتماديه

نجي للطامه الكبرى !!

واقف على هايلكس غماره 2005 ماشي 300 الف وكسور و واصل سومه 49 و عيا يعلمني عن البدي يقول مايخلا من الرش على الفحص .. قلت يمكن هذا الهايلكس حاله شاذه و قفت على واحد ثاني 2002 غماره و العالم متجمعه حوله و واصل السوم 51 و يقول مانيب بعيد حيل ما فاصلت معه ولا سألت قلت الله يرزقك ومشيت .. سعره كان جديد غماره جي ال مكيف 2005 بـ 55 و ارجع اشتريها مستعمله بعد 11 سنه باكثر من قيمتها جديده و هي اساساً قمه الفخامه فيها المكيف ؟

لا تقول لي موتر يكد و من الكلام ذا السوق مليان مواتر تكد بس ماتوصل للاقيام ذي واللي يسوم هذا شخص جاهل مع احترامي له

طبعاً كلامي ذا ماهو من باب حسد ولا غيره الا الله يرزقنا و يرزقهم لكن سوق السيارات المستعمله عندنا جداً سيئ و لا فيه اي عدل

ناس تشتري سياراتها بقيمه و قدرها و تباع بالمعارض باسعار زهيده و هي نظيفه وش السبب ؟ هل هو بسبب المافيا اللي تدير المعارض و تمشيها حسب مصالحهم ؟ وعلى حساب غيرهم ؟

جلست في امريكا سنه ونص و مريت بعض المعارض و اعجبتني طريقتهم .. كل معرض له حوش مشبك و اللي بيبيع سيارته يجي لهم و يتفاوضون على السعر و انتهينا و المستخدم يجي يدور بالمعرض و كل سياره تاخذ حقها بالسعر ماعندهم كلام مايودي ولا يجيب ذا كوري ذا تايلندي ذا امريكي و فوق هذا كله مصداقيه في البيع و لا تاخذ السياره الا مع تقارير كارفكس بالتشييكات كامله اللي جرت للسياره اما هنا شختك بختك و حتى محلات الفحص تصيب وتخيب حظك نصيبك

و القوم الآخر قوم ( مرغوب ) , من يوم يتغير شكل السياره او حتى يغيرون مسمار فيها بدأت الاشاعات تطلع منهم ان الجديد فيه و مافيه و يعذرب يخليك تعافه ولو يجيك بخمس الاف ماتبيه من كلامه و يطير سعر القديم و كل هذا في صالحهم عشان تمشي سوق السيارات اللي عندهم

هل يضطر الواحد يشتري السيارة اللي تعجب شريطيه المعارض عشان اذا جاء يبيع تجيب له قيمه ؟

يعني لا جيت اروح الوكاله اخذ معي شريطي يختار لي اللون و النوع ؟

حتى الهنود و البنقاليه حقنوهم بالخبث و صارو اذناب للشريطيه لا بارك الله فيهم

و الملامه توصل لبعض الناس المستخدمين تلقاه مشفوح لا شاف موتر اعجبه بالمعارض يزاود عليه و يوصله للقمر و راعي الموتر بيطمع و هكذا

زبده الكلام المعارض عندنا زنبليطه

هل من حلول لها ؟
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
العجب العجب ما بين جمادى و رجب /حالة مناخية غير مسبوقه /امطار تاريخيه الاسبوع المقبل	محروم.كوم	منتدى أخبار المواقع والمنتديات العربية والأجنبية	0	04-22-2013 11:10 AM
48 ساعه رحلة الى الشاطي الشرقي رصدت فيها الكمراء العجب العجاب !!!!	محروم.كوم	منتدى أخبار المواقع والمنتديات العربية والأجنبية	0	10-01-2012 04:30 PM
العيب ماهو في الزمآن , العيب ف نفـــِوس البشر	Royal Ľ ♥ v ề ~	عدسة الاعضاء , كاميرا الاعضاء	8	09-12-2010 12:59 PM
العجب العجاب	محروم.كوم	منتدى أخبار المواقع والمنتديات العربية والأجنبية	0	08-19-2010 08:20 AM
طول الغياب	سـ ع ـيد	شعر و خواطر	4	07-19-2008 11:10 PM