سالفة:حفر ومطبات..قوافي

محروم.كوم · #1 08-18-2013, 09:40 AM

صبحكم /مساكم الله بالخير
سالفه من زمن الطيبين
هذا واحد عنده مزرعه وتخبرون منول مافيه حراثات وكل شغل المزرعه باليد ..
بيوم مر واحد من أهل القريه ويلمح اللي معه مسحاته وتضرب بالارض ومعطيه ربي من العافيه والنشاط والجمال..
جا ونشد اللي حوله منهي ؟؟
قالو بنت راعي المزرعه لكن به شوي من الصحاحه وعجز عنه ابوه يخفره (ماتطلع من البيت) وكل ما غفلو عنه شوي طلعت للمزرعه..
جازت للرجال وراح لحرمته وكانت حرمه كبيره وقاله انه يبي يعرس ويبيه تروح وتخطب له بنت الفلان ..
حرمته فرحت يوم درت انه صحيحه وقالت أيه هذي مهيب مرةٍ ينخاف منه،،همن ردت وقالت :
سم أبشر من باتسر الضحى بروح لامه واطلبه..
تم العرس والمعاريس قعدو اسبوع ببيت اهل العروس وجا اليوم اللي يرجعون فيه لبيتهم وعند حرمته..
هلت الحرمه ومسهلت برجله وحرمته وهي متأكده ان قعدة عروسهم ماراح تطول أكثر من شهر..
طلع الرجال لشغله وقامت ومسكت العروس وخذ ياناصايح تودي ورا الشمس..
والنصايح هي :

لين جا قبل الفجر بساعه قومي واحمسي القهوه وبالنجر دقيه(أطحنيه) وعقب الهيل ترا ابو فلان ياخذ فنجال قهوه قبل صلاة الفجر،، ومع أذان الظهر زيني الغدا وقطعي الحبحر (فلفل) وحطيه مع الغداء وهو يطبخ،،ابو فلان يحب الحار،، ولين جا قبل اذان العصر بنص ساعه أدخلي مدخنة العود وحطيه بغرفته عشان يصحا ويروح للصلاة ما يتأخر،،وثوبه لين غسلتيه حطي مع الصابون قاز حتن يبرق من النظافه..
(كل اللي وصته عليه عكس )..
قامت الضعيفه من قبل الفجر وادهرت حمست القهوه همن:
طن طن تررن ،،،،طن طن تررن
قام الرجال وش هالزلزال اللي بالارض!! وسمع صوت النجر طل بغرفة القهوه ولا ريح القهوه يشق الراس والنشميه قاعده وبدت بالهيل على ماتطبخ القهوه ..
قال والله انه سنعه تقهوا وراح للصلاة وعقب الظهر وحطت كبسته المفلفله بالفلفل وأول لقمه ضربة فيوزه من الحراره وشوي أكل الصحن ولو يوكل الصحن أكله ومرته تناضر ماصار مثل اللي تبي،،والعصر أخذت الضعيفه المدخنه وفتح عيونه على الريح الزين واستغرب ؟؟من يقول صحيحه ؟؟
وأخذ ثوبه من على المعلاق ولاه يبرق توصت به زين والقاز كمل الوصايه وصار يبرق بصدق والريحه طارت مع النشر بالحوش والدخون بالغرفه طير الباقي..
حرمته طيبه ومابه شي لكن كبرت وتعبت وكل يوم تشكى ورفيقنا يمدح وهي تحتري انه تسمع بطلاق الجديده يوم شافت ان الدنيا روحت والهوى شمالي
قامت قبل الفجر :
وطن طن تررن،،طن طن تررن
قام الرجال وش هالصوت مهوب مثل الزلزال الاول لكن فيه صجه ولجه والعروس نيمه ..
يوم طل بالقهوه ولاه عجوزه ضحك لين انشقت الخشه وقال:
أم فلان انتي بعد عليتس قل صح !!!!؟؟؟؟؟
قالت ايه وعطن ثوبك أغسله..
تحياتي وتقديري واحترامي
..قوافي..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة:من خاف سلم..قوافي	محروم.كوم	منتدى أخبار المواقع والمنتديات العربية والأجنبية	0	01-20-2013 01:40 AM
سالفة:جني اللوري..قوافي	محروم.كوم	منتدى أخبار المواقع والمنتديات العربية والأجنبية	0	08-08-2012 07:50 PM
سالفة:رسب ثمن سقط..قوافي	محروم.كوم	منتدى أخبار المواقع والمنتديات العربية والأجنبية	0	07-07-2012 01:20 AM
سالفة:ضبع الحديقه..قوافي	محروم.كوم	منتدى أخبار المواقع والمنتديات العربية والأجنبية	0	12-12-2011 10:30 PM
سالفة:طين جدي.قوافي	محروم.كوم	منتدى أخبار المواقع والمنتديات العربية والأجنبية	0	10-11-2011 08:30 PM