بسبب طيري كادت ان تدهسني الشاحنات

محروم.كوم · #1 05-30-2009, 09:30 PM

السلام عليكم ورحمة الله وبركاته

مسيتم بالخير يأهل مكشات وشلونكم عساكم طيبين اليوم ابي اسولف لكم عن قصه جرت لي في رمضان يوم اني ضيعت طيري الطراد

نقلت طيري تقريبا من نصف شهر شعبان وانا عارف ان البعض بيقول ان هالرجال مستعجل في نقله للطير لكن هذي سواة كل طاروح يدربون طيورهم من بدري قبل طلوع اسهيل بشهر تقريبا علشان الطراد يجهز تماماً وتكون لياقته فل هذا اذا صفى الطراد بدري والبعض مايهمه اذا بقي في الطير ريشه او ريشتين او ثلاث ناقله ناقله والله لا يعقب شرهههههه ماهو متحريه الين يصفي, الطير المهاجر بيعبر وهو ماجهزه نرجع لسالفه المهم كنت اهد طيري يوميا في منطقه في الساحل الغربي وكل يوم الطير في تحسن وكل ماهديت له حمامه ماتطول عليه جايبها جايبها خلاني الطير انسى وش هو التنتيف وفي ثاني اسبوع في رمضان وكانت طول هالمده اجواء رائعه بمعنى الكلمه كل ماجيت في مكان المدعى لقيت الارض ممطوره والرشاش متقطع وطول هالاسبوعين ماعرفت الفطور فالبيت وش احلى من هالاجواء هدد في اجواء ممطره ومقبلين على مقناص تسوى عندي الدنيا ومافيها ويازين هاك الديره ويازين هاك السمره اللي كنت دايم افطر بجانبها عزالله انها تبري العله ذيك الايام والله يعيد لنا رمضان اللي يوسع صدور كانت بها

الضيق طرى علي بيت لشاعر مايحضرني اسمه يقولـ

الطير والخضراء والماء والبرد ....اشوفها عندي مناظر ساحره

المهم قلت لنفسي ابي امسك لطيري حمام الولع هذه تسميته عندنا او حمام الابيار او السوادي علشان تعرفونه واجيبه واخذ من كل جناح ثلاث

واهد عليها الطير ويردم عليها وياخذها في مطراد ويحول بها ماشالله تبارك الله عليه واروح للبير وامسك منه واجيك في اليوم الثاني ذاك اليوم

المشهود وافك الحمامه وخليتها ترتفع واهد الخوي , الحمامه يوم شافته شغلت السير عندها طارت طيار عجيب ومرتفعه قلت انا طيري بيصفح

عنها ويرجع والحمامه مروحه شرق واختفت عن ناظري والطير بدأ يردم ويردم الين ارتفع ارتفاع ماهو طبيعي قلت في بالي ماهو انت اللي

تحوم وشوي صك جناح على جناح طلب الحمامه ياجماعة الخير اطرد وانا لحالي مره اطالع يم الطير ومره في الارض مطراد حوالي خمسه كيلو

والحمامه ماعاد اشوفها ويالله يالله ادرك الموتر والطير وهي لحظات وانا قاطع الخط السريع وانا مادري عنه ,الله وقتها انزل علي الرحمه من ذاك الخط

اللي كله شاحنات احمد الله ساعتها بغيت اروح وطي من السيارات والشاحنات والطير دخل ديره كلها عقوم وشبوك والقصيده تشكي حالها

الحمد لله على عقلان ردام

كلمه وارددها صبـــح وعشيــه

يوم انه غدى على ولع الحمام

وموتري سايقه بلا مرحميـه

في مطراده انا بغيت اروح احطام

احمده يوم سهل الدرب ليه

اقبل على ديرة(ن) متحزمه احزام

بشبوكها اللي كنها محميـه

هذا السبب اللي جعلها بالاقسام

عقب ماكانت جردى جرهديه

نطلت بالملواح وشمرت الاكمام

والطير مقفي ورى ذيك البليه

راح يردم وراها فوق يم الغمام

صامل بالحيل وعزومه قويـه

وزهمت بالكنود يافلان ردام

غدى واحرق الاشواق فيــه

غدى وخلى بقلبي سيوف واسهام

خلاني وحيد في الديار الخليه

قال اصبر ويجيبه مسير الايام

الاله المعبود اللي نصر نبيــه

والشمس غابت عني وانا صوام

غابت وحان وقت المغربيـه

ضاع الامل وضاعت كل الاحلام

ونفسي غدت مالها معنويــه

والصبح كلن فزع والكل همام

ودجنا في حراويه وكل نيه مطيه

يامكشات دورنا عليه جنوب وشام

وسندنا عنها شرقيــــه وغربيه

وبعد الضحى الجهاز ذعذع كالاعلام

ارسلات ندأ من صاحب ليــه

يا ذراع الذيب لقينا اللي عنك ماحام

ردام لقيناه في ذيك الابرحيه

الله اكبر هذا مدعاي من ايام

وشلون مانكر مكان خويـــه

هذا اللي حصلي في شهر الصيام

اسبابها ممشى الدروب العضيه

والحمد الله على عقلان ردام

كلمه وارددها صبـــح وعشيـــه

والطير دورناه في المنطقه اللي ضاع فيها مالقيناه راسلت خوياني قلت لهم ابحثو عنه في المدعى ان شالله تحصلونه وانا ابي اروح لمنطقه فيها مزارع

وانظر في الساعه وهي الساعه عشره قلت الله يستر ويجيبه قبل لايحوم دقايق وخوي يراسلني باعلى صوته ماكنه الاحصل طير وحش قال ابشر بردام تراه عندنا

في المنطقه الفلانيه جيتهم وحصلتهم جالسين تحت السمره اللي كنت دايم اجيها سلمت على خشم كل واحد منهم يستاهلون الطيب نشدتهم وين وكيف حصلتوه

قالو حصلناه في هذا الجذع فهالسمره تشوش راسي من هالطير اللي مانكر مكان خويه اللي تعود عليه من حوالي شهر وخصوصاً السمره وهو كنه ينتظرني فيها وافعال الطيور هى اللي تجيب الغلا بينها وبين

راعيها مثل الرجال وسلامتكــــــــــــــــــــــــــــــم و(انتظروا سالفه ردام مع الشيهانه الوحش)
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كايب تاون تودّع البطولة	محروم.كوم	منتدى أخبار المواقع والمنتديات العربية والأجنبية	0	07-07-2010 11:50 PM
كادت ان تسقط الطائرة بسبب خناقة بين امرأتين‏ .!!	محروم.كوم	منتدى أخبار المواقع والمنتديات العربية والأجنبية	0	08-21-2009 05:40 AM
كسرت عود كادت تكلفنى الف يوورو	محروم.كوم	منتدى أخبار المواقع والمنتديات العربية والأجنبية	0	06-21-2009 11:10 PM
مأساة الكسعي كادت أن تتكرر	محروم.كوم	منتدى أخبار المواقع والمنتديات العربية والأجنبية	0	06-18-2009 02:10 PM
دربيل كايت الياباني	محروم.كوم	منتدى أخبار المواقع والمنتديات العربية والأجنبية	0	05-12-2009 09:40 AM