دخلووووووووووو لا يفوتكم

عشقي دار زايد · #1 06-29-2013, 02:40 PM

أيام قليله وبيهل علينا شهر رمضان اليوم حبيت اكتب لكم عن رمضان أيام زمان. رمضان أيام الحواري القديمة ببيوتها البسيطة
أتذكر قبل رمضان بيوم كانت الحريم واليهال يتولفون وكل واحد ينظف السكيك اللي تحوط ببيته. وداخل البيت الحرمه تزهب

حصونها ومواعينها رغم بساطتهم. ويا الله يوم ينقع المدفع معلنا ان بكره رمضان تشوف العيال في السكيك منتشحين فرحانين ويلعبون والحريم متولفات ويتباركن لبعض يصلون ويتقهوون وبعدين كل وحده تروح بيتها وتزهب سحورها. رمضان زمان رغم بساطة كل شي فيه بس كان له طعم ثاني طعم يميزه عن رمضان الحين. الكل فرحان من كبير و صغير كان يميزه روح الالفه والمحبه والتعاون واكثر شي كان يميزه اللمه. فطورك ماتفطره بروحك بيتك وبيت أخوك وأخوك الثاني وجارك يتجمعون الحريم بروحهم والرياييل بروحهم الأكل مب وايد شي بسيط بس لذيذ لأنك ماتحصله دايما الا في رمضان والمناسبات مب مثل الحين كل شي والحمد لله متوفر وفي أي وقت يتولفون وكل واحد مسوي أكله ويايبنها وياه اللي مسوي ثريد واللي مسوي لقيمات
والعصيده والمحبه وما أنسى الفرني والعرروط والفييمتو الي كانو يسمونه في فلاص ويكسرون الثلج ويحطونه فيه لان ماكان فيه كهربا في كل البيوت وحتى اللي عندهم كهربا ما عندهم ثلاجات ليتات ومرات زياده تلفزيون وما يلتقط الإشارة بعد يجيبون قوالب ثلج كانت في ناس فاتحه دكاكين وتبيع ثلج والناس من يستوي قرب المغرب كلهم عند دكان الثلج. المهم يتولفون ويفطرون ويصلون ويردون يتقهوون ويأذن لصلاة التراويح يصلون الرياييل يرسمون رباعه والحريم يسون قهوه ويتقهون كل ليله عند وحده والعيال طبعا مازرين السكيك لعب وصراخ الأهل يرسمون والعيال يلعبون وعقب كل واحد يرد بيته ويرمس ويا عياله وحط راسه
ونام لين يوعيهم ابو طبيله او المسحراتي على قولة إخوانا يتسحرون ويصلون ويحطون راسهم ويرقدون. والصبح العرب تنش وكل واحد يروح شغله والحرمة تسوي شغل بيتها مب مثل الحين تنام لين الظهر تخم البيت والحوش وتروي يعني تجيب الماي حق الطبخ والشرب من الطوي اللي في البيت ولا من اقرب ثقبه وان كان عندها جاهل بتسبحه وبتاكله وكان عندها ثياب
غسلتهن ومن غير أنها تشوف دبشها وتخلص الضحى ويتولفن هي و جاراتها وكل وحده جايبه شغلها معاها محد يقعد فاضي
اللي تخيط والي تسف تلي واللي تقرض براقع واللي تخدم لها بادله واللي تسف لها عازف ولا مكبه ومرات يتولفون ع شغل
واحد لين يخلصونه وطول يلستهم ضحك وسوالف والظهر كل وحده بترد بيتها يصلون ويبلون شراشف الشربت والسواري ويتلحفونها بديل للمكيف وكل واحد يدور له شجره وينبطح تحتها والعيل في الفلج والنخيل متفللين في ماي الفلج ويوم يردون
بيوتهم يردون بالخلال واللومي والامبا الحامض اللي بعده صغيروني وما مداله يستوي هذا رمضان زمان الا ليت الزمان يعود يوما. __DEFINE_LIKE_SHARE__

Miss Rumithia · 06-29-2013, 05:35 PM

تسلمييين اختي على الموضوع
ولا تحرمينا من يديدج ..^^ __DEFINE_LIKE_SHARE__

عشقي دار زايد · 06-29-2013, 10:09 PM

العفو ومشكورة فديتج على المرور __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عرض لا يفوتكم	محروم.كوم	منتدى أخبار المواقع والمنتديات العربية والأجنبية	0	10-06-2012 07:50 PM
لا يفوتكم	محروم.كوم	منتدى أخبار المواقع والمنتديات العربية والأجنبية	0	05-10-2012 12:50 AM
x6 لاا يفوتكم 2009	محروم.كوم	منتدى أخبار المواقع والمنتديات العربية والأجنبية	0	06-01-2010 11:30 PM
\|\| الكـــرواســونـ \|\| ؟؟؟؟؟لا يفوتكم	غلاك فـ قلبي	فن المطبخ والطبخ	9	01-22-2009 11:22 PM
لا يفوتكم	^_^ز	الشعر المنقول	1	12-28-2008 11:39 AM