سالفة مرسول العشاء ( النبهاني )

محروم.كوم · #1 12-16-2012, 11:40 PM

بسم الله الرحمن الرحيم

السلام عليكم ورحمة الله وبركاته

حياكم الله يالمكشاتيه

هي ذكريات من الماضي اكثر من هي سالفه

الكندره حي مشهور بجده ( الكندره عاصمة جده وكيلو ثلاثه بساط الريح ) دايم يغنونه شباب الحاره وفيه شارع اسمه ش عمرو بن العاص ينتهي من جهة الغرب بالصحيفه ومن جهة الشرق بشارع المطار – الملك خالد – عند الكف الاخضر كان هذا الشارع هو الشريان بالكندره فيه السوق وفيه البيزان والسوق فيه كل شيء البقالات ودكاكين الخضره مثل ابو طربوش ومحلات المعصوب والفول مثل عم سعيد واللبان المشهور عم داوود وهو المسرح اللي حدثت فيه سالفتنا

متعود انا اللي اجيب العشاء من السوق كنت بسادس ابتدائي او اولى متوسط ما اذكر المهم هكالليله نمت عقب المغرب يوم اذن العشاء وهم يصحوني اهلي قم جب عشاء وابطيت ماقمت الا عقب ماصلوا

المهم قمت ولبست نعولي الله يعزكم وطلعت وانا ما شوف من النوم واروح لمحل اللبان – عم داوود – واقول عطنا كم وقيه حلاوه طحينيه وكم وقيه جبنه بيضا وزيتون اخضر وطرشي ( كنا نسميهن المنتخب ) وبعض المرات آخذ خبز شريك

المحل مليان من الناس المهم وانا احتري المقاضي الا وفيه واحد من عيال الحاره عقب ما سلم قعد يضحك يوم زاد ضحكه وقام يحني ظهره ويده ببطنه ويرفع راسه ميت من الضحك

وانا اقول هذا وشبه – يافلان وشبك مارد علي ميت من الضحك والناس تشوش بنا

يوم قام يشر على تحت مايقوى يتكلم من الضحك

واناظر واثري لابس نعول الله يكرمك حقات حريم اللي يقولون لهن تليك يجن ملونات ورديات وحمر وخضر وزرق

حنا حاطينهن للحمام الله يعزكم والحمام بجنب باب الشارع اثري لقطتهن وانا على عيوني النوم مادريت المهم اني تفشلت يوم شفتهن وزاد الفشيله هالمقرود بضحكه بغيت اطوحهن وامشي حافي لكن باقي العيش - الخبز - من الفرن والخبز كان شامي وصامولي كبير وصغير

ريحته تعطعط بخشمي لهالحين الله على زمان اول

المهم جبت العيش والمنتخب العشاء ورجعت للبيت بخفي حنين

انتهت السالفه الله يغفر لنا ولكم وكل مسلم

محبكم

النبهاني
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة سيل شارع شرق المطار 00 (النبهاني )	محروم.كوم	منتدى أخبار المواقع والمنتديات العربية والأجنبية	0	10-16-2012 10:10 AM
سالفة الوصايا الثمينه ( النبهاني )	محروم.كوم	منتدى أخبار المواقع والمنتديات العربية والأجنبية	0	09-14-2012 03:50 PM
سالفة تمثيلة النبهاني والصعوه	محروم.كوم	منتدى أخبار المواقع والمنتديات العربية والأجنبية	0	06-20-2012 12:10 AM
سالفة المحظوظ بس ماهو النبهاني	محروم.كوم	منتدى أخبار المواقع والمنتديات العربية والأجنبية	0	05-18-2012 04:10 PM
سالفة الاصدقاء ( النبهاني )	محروم.كوم	منتدى أخبار المواقع والمنتديات العربية والأجنبية	0	04-16-2012 09:40 AM