السلام عليكم ورحمه الله وبركاته

يا المسلمين يازين منول وبس اقصد ايام بيوت الطين

لا احد يلومني على كلامي

اذكر منول اروح اجيب خبز من الخباز ولازم يصير معي علاقيه حقه الخبز يجن منول ملونات يعني يجي الوجه لون والي ورا لون والجنوب لون واالالوان عاده تجي غامقه وكانو كل الناس عندهم علاقيه خبز وذا الكلام يوم 12 خبزه بريال وتراه قد صار بعد 16 خبزه بريال ونحطه في العلاقيه مهوب مثل هلحين يحطونه في كيس باغه تراها مضره يالمسلمين ونشتري فول بقرشين اوب 4 قروش ذاك الي كبر الفرانسي قدر صغير مليان فول بقرشين من يصدق ذا الكلام يعني يكفي 6 او 7 اشخاص ويمكن يبقا منه بعد ثمن الا قعدنا نفطر في الحوش نقعد نقطع من الخبز وننطله على الدجاج الي حول ما يشاركنا في الفطور هو ويا الارانب والدجاجه الي راجنه على البيض نحط عليها قفص نسويه من عسبان النخل على شكل هرم وهي محفوله ومكفوله نحط عندها الماء والاكل ولا جيت احط لها الماء ولا الاكل تنقرني بعد هذا جزاتي هههههههههههههههه ولا فقست فراختها نطلعهن وهن يركضن ورا امهن يازينهن تكفون ويازين عيشتنا اول وبس ودي اصيح بس مهوب هلحين ههههههههههه وسبحان الله منول في بيوتنا عنبه هلحين ما تلقا احد حاط في بيته عنبه ولا عنقدت العنبه نحط العناقيد في كيس قماش على شان العصافير ما تنقره -
ولا جا مسيان يعني عقب العصر انتعشى ولا ذاك قالت لي امي جعلها للجنه وكل مسلم ياسحاب ياسحاب
عاد انا ارد عليها سمي او لبيه شوفو الولد المؤدب ههههههههههههه منيب اقول هاه -
المهم تقولي امي رح ياوليدي وفرش المراقد في الطايه يعني السطح وقول ان شاالله يا ماما اكذب منيب اقول ياماما لا اقول ان شالله يمه وروح ورقا مع الدرجه ونصير حاطين المراقد في كسره الدرجه عقب البارح ورقا وفرش البسط جمع بساط الي يجن مقلمات وحط فوقهن المطارح وحط على المطارح شراشف ايه ترانا عيال نعمه ههههههههههه نحط شراشف على المطارح ثمن احط الوسايد الي مكتوب عليها تصبح على خير وفيها ورد احمر تصدقون ما كنا ماندري ان فيه ورد حقيقي نحسبه على الوسايد والشراشف بس هههههههههههه ولا خلصت فارش المراقد احط عليهن شراشف يجن مقلمات ببيض وسماوي ومرسوم عليهن ورد بعد الا شفتا مراقدنا تقول محل ورود ههههههههههه المهم ولااوحيت حس العائله الكريمه يرقون مع الدرج اقوم ورقد على كل المراقد كلها اتدحرج عليهن ونا منسدح علشان اخذ برادهن هههههههههههههههههههه ثمن ترقا امي جعلها للجنه معها سحله او غظاره فيها ماء ترا ذا الكلام بعد صلاه المغرب يعني سكن الليل ولا رقت امي بالسحله تغطيها بشيله علشان اللواحيس مثل البراصي او القطاوه ما يجن يشربن من الماء -


نرقد مع الدجاج ونقوم قبل العصافير وحيانن يجينا مطر ترش علينا ونحن نايمين وتغطى بالشرشف الين يخمر يعني يمتلي مطر انتم تدرون منول الا قالو بكرا دخول الوسم قصدي وسم الامطار انها تمطر الليله ما يتئخر المطر ابد رحمه ربي وسعت كل شي سبحانه وتعالى -
وغلب مطر نجد يجي في الليل ولا امطرت تعال شف ها الفلاليح كلن يحط على راسه خيشه والخيشه كيس الرز او السكر انتم تدرون ان كيس الرز منول 100 كيلو تراي صادق والسكر بعد 100 كيلو المهم يقوم الفلاليح ويدخلون الخيشه في بعظها الين تصير مثل ثياب المغاربه او مثل القحفيه حقه البزور ويحطونها على روسهم ويد فيها مسحات ويد فيها سراج ويروحون يسيلون يسمونه كذا وحيانن يحجرهم السيل ولا يرجعون لبيوتهم الا من بكرا ونصير حاطين في سطوحنا كم لبنه طين علشان الا خر علينا شي نسده به والمثاعب من خشب الاثل ينحتونها
تصدقون كان عندنا بقره ما تخلي اي مخلوق يحلبها الا امي جعلها للجنه تجي امي وتقعد على ذيك الحصاه حقه السواري نسميها الخرزه كنا حاطينها جنب رباط البقره ولا جلست امي تصدقون انها تجي البقره من نفسها وتلبق مثل تلبيقه السياره جنب امي ثمن تحلبها -
ياشين البقره الا دخل كفر سياره في رقبتها يجيها شي تنهبل هبال وهي الي تصير تنطح الكفر الين يدخل في رقبتها ولا تقدر تخره يردنه قرونها وتعنفص نسميها كذا منول الا قامت تطامر نسميها تعنفص تصدقون كان بينا وبين الحيوانات والدجاج منول لغه مفهومه من البهايم والطيور يعني الا بغينا البقره تجي نقولها تعه تعه تعه ولا قامت تطامر نقولها تسف فنقر ما عرفت اكتبها هههههههههه والا بغينا الدجاج يجي نقوله ديدي ديدي ديدي ولا بغينا الغنم يجن نقولهن يحي يحي ارررر ارررر ارررر يحي يحي والحمار الله يكرمكم الا ركبنا عليه وحطينا عليه الوثاره والوثاره مثل الخيشه الي فيها مثل القطن او الخياش لان بعض الحمير يصير له دبره توجع الواحد مقعدته ونحط الوثاره وقات ولا بغيناه يمشي نقوله حر حر حر ولا بغيناه ياقف نقوله اش اش اش ويسمع الكلام حر يمشي اش ياقف وذانه صايرات مثل الرادار المتحرك ههههههههههههه ندري ان في السكه احد قبل لا ندخل السكه من اتجاه اذان الحمار -
يازينا ويازين حميرنا منول ههههههههههههههههههه

عساكم ماتشرهون علي بس والله العظيم اني اسرح بفكري وتدمع عيني

وهذي كم بيت شعر كاتبها بمناسبه السواليف وهي على قد حالي بس شي في قلبي وقلته

كنت اسولف وقام من عندي الي انا اسولف عليه بدون ما يعلمني وخلاني اسولف على روحي هههههههه
وطلعت ذا القصيده وقول فيها




باكـــر امــوت ثمن تحسف عليه


والله ماتلـــقى احــد فــي مكانـي


ربي عطاني الطيب مع حسن نيه


ومالي هدف غير الي قاله لساني


قالـو تسولف قلـت وش في يديـه


والـي مضى منساه لوهـو نساني


يسرح بـي الهوجاس دنين خفيـه


وذكــر قـديم الوقت ويرتاح بالـي


وسـج سـجاتـن تجـيــني قــويــه


وعيش ماضي الوقت لوني لحالي


سحاااب نجد - راعي شقراء


سبحان الله وبي حمده سبحان الله العظيم

عدد خلقه وزنه عرشه ومداد كلماته