|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
بسم الله الرحمن الرحيم السلام عليكم ورحمة الله وبركاته اخواني واخواتي مشرفين واعضاء وزوار مكشات أسعد الله أوقاتكم بالخير والمسرات من أجمل ما سمعت من قصص الموروث الشعبي قصه مشهوره ومنشوره احببت ان اوردها في هذه الخيمه العزيزه علي هذا محيسن الربشان عشق له بنت شيخ من قبيله غير قبيلته فتقدم وطلبها زوجة له ولكن رفضوه وعيو عليه بسبب التحجير او بسبب ثاني المهم ان البنت ماحصلت له ويوم انه ماحصلت راح يم الشيخ خلف بن دعيجا وخلف شجاع وفارس وشيخ له جاه ودخل محيسن على خلف وقال ياراكب حمرا من الني تبني = ومردوم غير الدفوف السنامي ترعى زهر نوار برق جذبني = مرباعها مابين شرق وشامي وعيونها جمر الغضا يلتهبني = والا سراج مروطنين الكلامي تلفي لبيت كنه الحيد مبني = راعيه قطاع الفرج والمضامي لا ياخلف يكفيك همّ ركبني = حيثك على الشدات رجل تحامي غش العراق الله يجيرك ضربني = وقام يتساوق مع مفاصل عظامي على حبيب بالموده سلبني = سلبة عباة في يدين الحرامي همن قال ياشيخ انا داخل على الله ثم عليك انك تلبي طلبي وتطلب لي البنت الفلانيه من القبيله الفلانيه حليلة لي 00 سكت خلف بن دعيجا شوي لانه يعرف هالقبيله وابو هالبنت شيخ القبيله والاهم ماهم على وفاق والطلب صعب انه يلبيه قال خلف يامحيسن خذ ابلي وبيتي وفوقهن بندقي بس اعفني من هالطلب 00 قال محيسن ياطويل العمر مالي طلب غير اللي علمتك به ولاني رايح عنك الا اذا لبيت لي طلبي محيسن برا جسمه من العشق وحالته قامت كل يوم اردى من اللي قبله 00 خلف نوا يتفدوى وركب ذلوله وراح يم قبيلة البنت لان محيسن عنا له ودخل عليه ولازم خلف يلبي طلب محيسن ويوم وصل خلف لقبيلة البنت تنكر واخذ فتره عندهم وهو يفكر وشلون يطلب لمحيسن البنت وجلس يتحرا الطريقه والفرصه الموافقه وبيوم من الايام غارت قوم على قبيلة البنت واخذوا حلالهم وقامت الفرّيس بمطاردت القوم وتحركة الشجاعه والنخوه عند خلف ودبر له فرس وشارك الفريس بمطاردت القوم وصال وجال وجدع روس رجال وردوا الحلال ويوم رجعوا قالوا الرجال انت فارس لكن علمنا وش سالفتك ترك خلف التنكر وبان لهم وقالوا خلف بن دعيجا قال نعم قالوا وش جابك وش اللي حدك على هالعمل قال لهم أنا بلون الناس وأنا تبلويت = وصارت عليّه من كبار البلاوي ذا لي ثلاث ميه وخمسين مضيت = وأنا بسببها عند اهلها فداوي وسالفتي كيت وكيت وابي بنت الشيخ لمحيسن الربشان قالوا ابشر باللي نقدر عليه وراحوا معه لشيخهم جاهيه يطلبون البنت لمحيسن ويوم وصلوا الشيخ علموه بسالفة خلف كله من اولها لتاليها وطلبوا البنت فوافق الشيخ وجهزوا البنت على ان خلف هو الوكيل وارسلوا البنت برفقة ناس مع خلف على انه عروس لمحيسن وخلف مرتاح طابت له يوم انه قدر يلبي طلب محيسن ويوم اقبل خلف على بيوت ربعه ومعه البشرى لمحيسن شاف ناس براس الحزم يدفنون لهم ميت نشد خلف واحد من ربعه ياولد وش هالجنازه قال هذا محيسن الربشان توفى البارح انصدم خلف وهو يلتفت على خويا العروس وقال لهم انتم شفتوا وسمعتوا انكسوا الله يخلف علينا وعليكم عقبه قال خلف هالقصيده قيفان من صدر الفهيم انهذبني = لولو ومرجان ملاوي كلامي ياراكب اللي للبلد ما جلبني = قطم الفخوذ معربات الاسامي ما لا فاتن عن اول الذود لا بني = وما لا فاتن للحشو يوم الفطامي من نسل هرش بالهدد له يجبني = يطلق عليهن يوم كلن ينامي وما قيضن يرعن رمام وتبني = ولا صفرن قاع الجوى والوخامي مرباعهن (فيحان ) ثم اقتلبني = يرعن زهر نوار عشب الوسامي يلفن على اللي من ربوعي ندبني = ياجايبين العلم دمتم ودامي ان كان ذودي للحبيب يجبني = دونك نياقي قد لهن بالتمامي دونك قعود البيت والبيت وابني = وبي قلة العقلا علينا حرامي مع بندق لفظات فمها يصبني = ولها على الضد المناحر مرامي البيض قبلك يامحيسن لعبني = لعب الهوى برهيفات الخيامي ياما سرحن بالقلب وياما عزبني = تاتي دلى القلب منهم مضامي والبيض جعل البيض ما يرتحبني = هويهن يرمى عليه التهامي يصلني بالبير من لا جذبني = صل الرشا من فوق هدف المقامي علم لفاني يامحيسن رعبني = وعيت عيوني من الوجلا تنامي محيسن على حوض المنايا عقبني = حثرب على الجمه قليل الرحامي وانتهت السالفه اللهم اغفر لنا محبكم
__DEFINE_LIKE_SHARE__
النبهاني |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
الف مبروك الوسام البرونزي للاعضاء في خيمة الموروث الشعبي | محروم.كوم | منتدى أخبار المواقع والمنتديات العربية والأجنبية | 0 | 03-25-2012 05:10 PM |
فعاليات الموروث الشعبي الكويتي ( الثاني)-----مخاوي الذيب----- | محروم.كوم | منتدى أخبار المواقع والمنتديات العربية والأجنبية | 0 | 03-01-2012 03:50 PM |
قصص من الموروث الشعبي . | محروم.كوم | منتدى أخبار المواقع والمنتديات العربية والأجنبية | 0 | 02-22-2012 12:10 PM |
قصه من قصص الوصيا **من الموروث الشعبي العريق***محمد الظاهري | محروم.كوم | منتدى أخبار المواقع والمنتديات العربية والأجنبية | 0 | 01-18-2012 01:30 PM |
من الموروث الشعبي | محروم.كوم | منتدى أخبار المواقع والمنتديات العربية والأجنبية | 0 | 06-05-2009 06:00 PM |