ابقرنا هكالسنه ياكل موز !!!!!!! ( النبهاني )

محروم.كوم · #1 10-10-2012, 11:50 PM

بسم الله الرحمن الرحيم
السلام عليكم ورحمة الله وبركاته
اخواني واخواتي مشرفين واعضاء وزوار مكشات

أسعد الله أوقاتكم بالخير والمسرات

هذه السالفه الله يطول باعماركم على طاعته جرت علي وانا عمري ثمان او عشر سنين يعني مع جدي له سنين ودنين
كانن الحرّيم مجتمعات قالن لي انا وعم لي الله يرحمه كان حولي بالعمر روحوا واشروا لنا برتكان (برتقال) وموز من البلاد 00 والبلاد هذا هو قلب الديره الدكاكين والسوق فيه 00لاننا حنا ساكنين بالحيطان ( المزارع )
رحنا للبلاد ودخلنا دكان راعيه شايب الله يغفر له وسلمنا عليه وقلنا نبي برتكان وموز وقام الله يرحمه و وزن لنا كيلوين وكيليون بميزان ابو كفتين اللي الكيلو حقه عن عشر كيلو من ميزان هالحين عاد انا شفت موز خضر وتعحبت من لونه وقلت يابو فلان حط لنا من الاخضر قال ياوليدي هذا ما استوى ما هو زين قلت ابد حط لنا منه قال بكيفك 00وتراي ناسي بكم الكيلو لكن اللي اذكره ان الريال هكالوقت يجيب سبع فشق ربع وان بغيت فشق شوزن يجيب لك خمس 00الله المستعان
اخذنا اغراضنا ومشينا يوم انتصفنا بالطريق عند شعيب البلاد ونجي بهكالسهله اللي ما عندك ازين منه وحنا نتربع ونفك الاكياس اللي ماهي مثل اكياس هالحين بلاستك لا 00كانت اكياس ورق مشرنفه مع افمه مثل اكياس السمنت ونقوم نبي ناكل الموز الخضر والاه قاسي ونقوم ونتنقا منه الاصفر وناكله وما بقى الا الخضر ونكمل مشوارنا ويوم وصلنا الحريم ونعطيهن الاغراض وشافن الموز الخضر وجوا يبون ياكلونه والاه قاسي مثل الحبش الذره اللي يشوى ماكول حبه
ويقومن الحريم يهاوشن انتم دبش ما تعرفون تشرون ضحكوا عليكم 00 والرجال ما قصر الله يرحمه قال لنا تراه ما استوى ماهو زين بس حنا ماعلمناهن المهم اكلوا البرتكان وجدعوا الموز للبقر ماخلنّه يستوي وضاعت كلمة دبش ما ادري منهي له 0
وكل ما تذكرت السالفه قلت الله يابقرنا هكالسنه من قدّك تاكل موز !!!!!!!!
وانتهت السالفه اللهم اغفر لنا

محبكم
النبهاني
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
النبهاني ورحلة بالطياره	محروم.كوم	منتدى أخبار المواقع والمنتديات العربية والأجنبية	0	07-02-2012 12:40 AM
سالفة المحظوظ بس ماهو النبهاني	محروم.كوم	منتدى أخبار المواقع والمنتديات العربية والأجنبية	0	05-18-2012 04:10 PM
سالفة الاصدقاء ( النبهاني )	محروم.كوم	منتدى أخبار المواقع والمنتديات العربية والأجنبية	0	04-16-2012 09:40 AM
جديد - أحمد النبهاني - يسألوا عني	محروم.كوم	منتدى أخبار المواقع والمنتديات العربية والأجنبية	0	03-02-2012 03:00 AM
(( إذا جاع ما يناظر لا يمين ولا شمال! ياكل ياكل قصة / صور ))	محروم.كوم	منتدى أخبار المواقع والمنتديات العربية والأجنبية	0	01-30-2010 10:40 AM