حب الطفوله

محروم.كوم · #1 10-10-2012, 08:11 AM

السلام عليكم :biggrin3:
هذا اول موضوع لي هنا + اول روايه لي اتمنى تعجبكم : heartpump

نبداء( بسم الله الرحمن الرحيم )
___________________________

كانت مندمجه وتطالع فلم الرعب القديم ( عروسة تشقي )
البيت كان ما فيه جنس مخلوق كلهم طالعين زوارت خميس بس هي رفضت تروح معهم ...
كانت تاكل فشار وتشرب عصير وهي خايفه ...
وشوي الا وهي تسمع صوت بالبيت خافت كثير ...
وصارت تقراء المعوذات وتسمي ...
قالت تكلم نفسها : يمااه وش ذه الصوت ...
اخاف حراامي ولا دبدوبي صار يتحرك مثل هالعروس ( متاثره الاخت بالفلم ههه )
لزوم اتشجع واطلع واشوف وش ذه الصوت ..
بس ما راح اطلع من دون ما يكون معي شي احمي نفسي به شنو اخذ معي ؟؟؟
امممممممم ايه عرفت باخذ هالكرسي واحمي نفسي به ولو حرامي بصكه بذه الكرسي لينه ميت ( مو قلت لكم متاثره بالفلم الله يخلف بس ههه اسفه ع المقاطعه نرجع لروايه )
وطلعة من غرفتها ومعها الكرسي وحست ان الصوت يزيد بالمطبخ ودخلته لقت الثلاجه مفتوحه ...
واخذت تمشي بشوي شوي وبهدوا لين وصلت لباب الثلاجه وترفع الكرسي بتضربه ع راسه الا وهالشخص يقوم و جات الضربه بكتفه وقال : اااه اي
هي خافت لما عرفت هالشخص كان ولد عمها مو حرامي
هي ما عرفت ايش تسوي تنحاش ولا تساعده
وصارت تبكي وتقول : اهي اهي قتلت سعد اهي اهي يماه بيحطوني بالسجن اهي اهي والله مو قصدي اقتله اهي اهي
سعد وقتها ما يعرف يضحك على كلامها ولا يبكي من قوت الضربه الي جاته
قال لها : ههههههه طسي طسي ما فيني شي ههههههه
أمال من صدمه وتذكرت انها واقفه قدامه من دون طرحه
ونحاااااشت بسرعه لغرفتها وقفلت الباب ..
( احم احم اعرفكم بالشخصيتين
أمال : شعرها طويل لحد خصرها ولونه اسود وعيونها بنيه ووساع وبشرتها بيضى وهي قصيره ووزنها متوسط الي يميزها غميزتها الي عند فمها كل من يعرفها يحبها بسرعه ويحب هبالها عمرها 19 سنه وقريب بتدخل العشرين ...
سعد : طويل وجسمه معظل يعني فيه عضلات وبشرته حنطيه وشعر بني وعيونه كحيله وقت الفله يفلها بس وقت الجد ما يعرف المزح اذا عصب بعدو عنه الكل يعتمد عليه عمره اربعه وعشرين سنه ...
نرجع لروايه )

دخلت غرفتها وهي خايفه وقالت : يمه كنت بقتل سعد
كنت بسوي جريمه
يا قلبي قلباه الله يقطعك من فلم كانك كنت بتورطني مع اهلي
وراحت عند المرايه وشهقت ذيك الشهقه لان شكلها كان متعفس شعرها منفووش وبجامتها الورديه محيوسه
وتجمعت الدموع بعيونها قالت : اهي اهي اكيد كان يضحك ع شكل اهي اهي ورحت ع سريره ونامت من القهر ...
اما عند سعد فرجع لغرفته وهو ميت من الضحك ع كلامها وكان كلما يضحك يوجعه كتفه ويقول : اي هههههه الله يغربل ابليسها امالووه هذي ما تخلي عاداتها
( ايه صح نسيت اقولكم ذه وش اسمه ترا عايلت ابو سعد وابو متعب عايشين ببيت واحد كح كح نرجع لروايه )
انسدح ع سريره وتذكر شكل امال كان شكلها برئي
وبتسم وقال : ما تغريتي يا امولتي مثل ما كنتي ونام وامال مرسومه بباله ...
تررررررررن ترررررررررن تررررررن
قامت ع صوت ازعاج جوالها : اااف من هالسامجه الي تتصل بذه الوقت قامت واخذت الجوال وردت: الوه
امها : امالووه
امال خافت تحسب سعد قال لامها عن الي صار
امال وهي خايفه : ل ل بيه يمه
قومي افتحي الباب زدلي ساعه وانا اتصل عليك
امال ارتاحت لان امها ما عرفت بالسالفه
امال : ان شاء الله يمه
واخذت طرحتها وطلعت وفتحت الباب
ودخلت اختها الصغيره جودي وتعلقت برقبت اختها
وقالت : احتي امووول اثتقيت لث = اختي امول اشتقت لك
امال : هههههههه حتى انا
جودي : تئلي ادولث وث ثار = تعالي اقولك وش صار
ودخلو ثنتينهم الغرفه و جودي ما خلت امال تنام من كلامها الي ما يخلص
وجاء الصبح ...
وقامو كلهم الا امال في ساابع نومه
وما قامت الا الظهر بعد ما كبت عليها امها المويه البارده ( تعذيب هههههه )
سعد كان جالس عند التلزيون وماسك كتفه
ومعقد نواضره ومندمج مع الفلم
وخلت امال وهي خايفه
ولما مرت من عند سعد
سعد تذكر الي صار امس وضحك بصوت عالي عشان يقهره
قالت بنفسها : ضحكت بلا سنون قال امين
سمعت ام سعد تقول له : سعد وش فيه كتفك
سعد يبي يخوف امال : ايه يمه ما عرفتي وش صار لي امس
امال قلبها بيوقف من الخوف يا ويلي اكيد بخبر امه
سعد امس كنت بالمطبخ وفاتح الثلاجه وشوي الا
امال تتشهد ع روحها من الخوف هههه
كمل سعد الا ويرن جوالي وتذكرت ان صديقي خالد يبيني بموضوع مهم وركضت وصك كتفي ب الباب
امال انصدمة كذب ع امه !
ام سعد : ياويلي ويلاه خليني اشوف كتفك لزوم تروح للمشفى
سعد : هههههه رجعتيني لايام الطفوله يمه عادي بلا ضربه بسيطه
امال في نفسها : اي ضربه بسيطه كنت بفقع راسك بالكرسي

امال طلعت لغرفتها لانها انحرجت من سعد
وسعد طالعها وهي تروح ابتسم
وشوي الا ام سعد تغمز لام امال
وقالت : الا قولي لي قلتي ل امال عن الخطاب الي جاينها
سعد انصدم بلي سمعه واختفت الابتسامه من وجهه
ام امال : ايه قلت لها وقالت بتشوف
سعد وهو معصب : اي خطاب تتكلمون عنهم وليش انا الوحيد الي ما اعرف ؟
ام سعد وهي كاتمه ضحكتها : هذي الله يسلمك ام تركي خاطبه امال لولدها ليش ما قلت لك حسبتني قايله لك
سعد حس الدنيا مسوده بعينه وقام من مكانه وطلع برا البيت واول ما طلع
ضحكو الثنتين ع شكله وعصبيته
( والله مهوب هينات ذولي العجز ههههههه )
وامال المسكينه ما تعرف وش يصير من وراها
بعد عشر ساعات بالضبط رجع سعد للبيت وعلى طول راح لغرفت امه ودخل وهو عصب وقال : يمه ابي اتزوج
ام سعد فرحت كثير لولدها لانها زد لها سنه وهي تحاول فيه بس مو راضي قالت له : مبروك يا ولدي متى تبيني اخطب لك ؟
قال : انا ابي امال بنت عمي
ام سعد ابتسمت وقالت : بس امال راحت ل
توها بتكمل الا و سعد يكمل
انا اولى بها من الغريب والله يمه لو ما تخطبي لي امال ما اتزوج
ام سعد : هههههههههههههههه
سعد استغرب من امه ليش تضحك ؟
قالت له : والله وطلعت تحبها هاه
تحسبني ما اعرفك واعرف طبايعك
انا عارفه انك من صغرك وانت تحب امال
وانا كلمت ام امال ووافقت
وقالت بتاخذ شور ابو امال وخذت شوره وقال انه ما راح يلقى احسن منك لبنته
ولما سالت امال قالت انها بتفكر وتستخير
سعد وقتها الدنيا مو شايلته من الفرح
وراح وباس راس امه وطلع من الغرفه
اما امال فكانت منصدمه لما قالو لها عن الخطبه
تذكرت اشياء حلوه صارت مع سعد لما كانو بزران كان يحميها وكان يمنعها من انها تلعب مع العيال
مر اسبوع وامال ما ردت عليهم
وسعد كان خايف ترفضه
يوم الجمعه راحت امال لامها وقالت لها
يمه انا ....
راحت ام امال لام سعد وخبرتها بقرار امال
نده ابو سعد ع سعد وقال له : يا وليدي الحياة قسمه ونصيب والبنت يا وليدي فكرت وخذت قرارها
سعد قلبه عوره ونزل راسه وكانه ينتضر ان ابوه يقول انها رفظته
قال ابو سعد : مبروك عليك يا ولدي امال من نصيبك
سعد ما صدق الي قاله ابوه وفرح كثير وصار ينطط بالبيت ويصرخ
وحددو موعد الملكه وتملكو
كانت لبسه فستان كحلي وكان عليها يجنن
دخلت ولقت ع الكرسي الي بتجلس عليه ورد احمر اخذته وقرت البطاقه مكتوب عليها من مجنونك
ابتسمت امال من خجلها
ووقتها دخل سعد وشاف امله به الحياة
وبعد ما خلصت امال من الجامعه
لبسة ذاك الفستان الابيض انزفت ودموع الفرح تنزل ع خد امها ...
جلسة ع الكرسي تنتظر الي حبته من طفولتها تنتظر الي كان يحميها من كل شي ...
دخل وهو فرحان دخل الزفه وعلى زغاريط امه و فرحتها دخل وهو كله شوق ليشوف امله الي يحلم به كل يوم ...
انزفو ع اغنية ...

هلا ياللي تمنيتك نصيبي
ألا يافرحي وسعدي وطيبي ..

ألا يانصفي الثاني هلا بك
هلا باللي أناديه بحبيبي ..

جمعنا ربي العالم بحالي
جمعنا الخير ودعوات الأهالي ..

وأنا والله يا أم العيالي
شكرت الله بإنك لي نصيبي ..

أنا كملت نص ديني ياحبي
لقيت اللي يماشيني بدربي ..

لقيت الطيب وإخلاص وتفاني
لقيت اللي غدا دائي وطبيبي ..

عليم الله يا أجمل وأطهر
وأشرف حب يحيى بي ويكبر ..

بأنك في وجودي شي أكبر
من إني آخذ أنفاسي وريقي ..

انتهت قصة سعد وامال
جمعهم النصيب والقدر والحب
ربي اجمعنا بمن نحب اللهم امين
تم وبحمد لله
اتمنى تنال اعجابكم :Nail-Biting:

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
~ّّ....فزاع منذ الطفوله....ّّ~	!!بنت العـــــز!!	الشيوخ و رؤساء الدول	7	06-15-2016 01:40 AM
عن سنين الطفوله	محروم.كوم	منتدى أخبار المواقع والمنتديات العربية والأجنبية	0	01-08-2012 07:10 PM
براءة الطفوله و صور لأعضاء في أيام الطفوله	محروم.كوم	منتدى أخبار المواقع والمنتديات العربية والأجنبية	0	04-08-2010 05:10 PM
الطفوله	غالية الثمن	الإستراحه العامة	6	06-21-2009 03:56 AM
صديق الطفوله	سلمى	الحوار والنقاش - الرأي والرأي الآخر	26	11-21-2008 09:36 AM