انا والعجوز - والتيس - سحاب نجد-راعي شقراء

محروم.كوم · #1 09-01-2012, 03:10 AM

السلام عليكم ورحمه الله وبركاته

معليش يالغالين هذي السالفه فيها بعض المسميات الشقراويه
هذي السالفه قدييييمه مره ايام بيوت الطين ونا كنت توي صغير اذكر اني رحت لعجوز ياحبي للعجز يا المسلمين تراهن حبيبات ولا اوصيكم يالي عنده اميمته ولا ابيه طع شوري طع شوري بر فيهم لا تحسف بعدين نروح لسالفتنا هذي عجوز اعرفها رحت يمها في بيتها ونا توي بزر

لها باب كبير يعني مهوب كبير مره لا وسط المهم رحت اتلحوس عندها ابي كليجالانها من الي يصلحن كليجا منول الله يرحمها ويوم جيت عند بابها ولاها صجه في الحوش شاريه عنز مع عيالها وتيس وش كبره واطق الباب يام فلان يام فلان قالت جابك الله ادخل وادخل واصك الباب ولاها تبي تحلب العنز والتيس ما خلاها وقالت لي تعال ياوليدي اخر ذا التيس عني ما خلاني احلب العنز غاثني واجي وامسك التيس مع قرونه واجره عنها وتبحل بعيال العنز ما خلوها تحلب ههههههههههههههههه وكل شوي ترجف واحد برجلها تخرهن عنها ماحدها الله على الغثى ولا حطت لهن بيت ولا حطت لهن رباط نربطهن فيها لا مخليته في هاالحوش سرداد مرداد المهم وهي تحلب قلت يام فلان قالت يالبيه قلت ماسويتي اليوم كليجا وراك

قالت نبخت ايديني من التنور قاعده ارصع فيه مراصيع وكواني قلت ولا عندك شي من المراصيع قالت انت ورا ماتسكت انا يمك ولا يم هاالعنقان اللي مبحلاتني ماخلني احلب تقصدعيال العنز المهم حلبت ذيك السعبوله من الحليب قالت خلاص فك التيس الله لا يعقله وافكه عليه قرون وش كبرهن قالت ابا اطلبك طلب قلت وشو قالت ابا اروح انا واياك هالحين لحد الحيطان علشان نحش للغنم قلت قوه يالله وتلبس عباتها ياملا الجنه ونطلع من بيتها ونروح من عند المجباب ويجي دكان الدهلاوي على اليسار ويوم فضنا على دكان الدهلاوي وهو رجالن اعمى الله يغفرله ووالدينا وكل مسلم وهو ينطلق علينا تحليت ماتسمع الا خبط الجمش في الجدران والجمش الطين اليابس وبغا يخبط راس العجوز بذيك الجمشه حفت راسها بس اشوا ماجتها وننطلق انا والعجوز ننحاش طبعا هي ماسكتني ماتبيني انحاش واخليها واذكر وانا اركض انا واياها تقول الله يغربله روعنا عسا ما يجي ورانا طبعا انا وهي ما علينا نعال حافين وركضه ثم يجينا السابوط حق المجباب ويجينا دكان ابن سعيد الله يغفرله ويرحمه على اليمين ثمن يجي دكان السليمي ياملا الجنه البارده بعد على اليمين عقب دكان ابن سعيد ونروح انا واياها طايره عباتها كنها سوبرمان والدهلاوي ياملا الجنه حسه يهوش
المهم رحنا للحياله اللي ورا حجرة السكور وهي معها محش وانا معي محش ونقعد نحش من الشجر اللي في الحياله ثم قالت تعال خل اللي معك فيذا وقوه انا واياك للشعبه اللي وراء بيت ابن احمد الله يغفر لميتهم ويسعد حيهم وكل مسلم والنعم والله فيهم المهم ونروح للشعبه ونجلس نحش من الشجر اللي فيها وكل شوي اقول لها هذي تصلح والا لا اعاني الشجر الصغيرات قالت تراك ابحلتني كل شوي هذي اللي تصلح هذي اللي تصلح
احصد وبس كلش يصلح
طبعا الشعبه هي اللي تمر من عند صبخه السالم ثم الصبخه الثانيه ثم تروح لخيس صعب وكل المزاغير حقت البيوت اللي على الشعبه تصب فيها وش المزاغير هي الفتحه اللي يطلع منها الماء من البيوت وتكون عاده مسمته بسميت وصايره الشعبه كلها شجر طماط وحامل قالت لي القط الطماط وخل الحصاد لان شجر الطماط معنقد كله طماط احمر مستوي قالت خل الحصاد عنك قضينا وجمع الطماط قلت طيب واقطع من الطماط واحطه في شقي ما معنا زبيل ولا شي وشالت الحصاد هي وجمعته مع اللي في الحياله اللي وراء حجرة السكور وربطته اذكر بطريده قطعه خلق وتشيله على راسها وانا رافع شقي مليان طماط ونروح لبيتها ويوم وصلنا دكان الدهلاوي جعله للجنه قالت لي افطن له لا يشلخ راسك بحصاه قلت طيب ويوم مرينا وهي تسلم عليه ورد السلام وحطت حزمة العلف وقعدت عنده وانا قعدت بعد قالت له وش فيك يابوفلان ترجمني انا ووليدي بالحصى من ساعه قال هو انتم اللي مارين
قالت ايبلاه انحن قال احسبكم اجل بزورن جو وغثوني عسا ماجاكم شي
قالت ستر الله علينا والا باغي يجينا وييزينا الروعه الله يهديك تقعد كل من مر تبي تحلته تراك تبي تبلش
قال مايخالف وقامت ورحنا لبيتها ودخلنا في الحوش وتهد علينا الغنم يبن ياكلن وهي شايله العلف اللي حصدناه فوق راسها ويجي التيس ويحط ايديه على بطنها يبي علشان يطول العلف وتتكرفس يعني تطيح هي والعلف جدعها التيس كني اشوفها تدحوست ضعيفه وتمسك فيني وهي تقول ها التيس مدري وش اسوي فيه قلت اربطيه قالت مهنا الا هو ودخلت وسط البيت واجي وراها وتحط الطماط اللي في شقي في قدر وقلت انكان عندك كليجا عطيني والا مراصيع قالت انا ماناب في حالك هالحين خل ادور رباط للتيس
واطلع عند الغنم وامسك التيس مع قرونه واركب عليه ويدلي يركض بي في الحوش بسرع شي وانا مبسوط وايركض وانا متمسك بقرونه وهو مغير يبابي جاه شي مايدري وشو
المهم طيران وانا متجود وينصابي الزير ونجدع الزير وينكسر وينكب الماء اللي فيه صار الحوش حوسه وطحت من عليه وارتعت الزير انكسر وامتلا ظهري ماء قلت ام فلان يام فلان قالت يالبيه قلت تيسك رقا على الزير وجدعه وانكسر وهي تجي طايره وانا قعدت في الارض كني ماسويت شي ملقي الجدار ظهري علشان ماتشوف الماء ثمن تدري انه مني قالت وشذا وشذا وش اللي كسر الزير قلت شوف عيني التيس اللي رقا عليه وجدعه قالت كسر الله عظمه مار هين والله لاربطه ولا عاد اطلقه منهبل مار هو وقرونه قلت ما جبتي لي لا كليجا ولا مراصيع تراي جايع قالت هماي قايله لك منبخه يدي من التنور يوم اسوي مراصيع قلت عطيني من المراصيع قالت ما عنديش قضن انت ماهمك الا بطنك قلت هماك يومنا نروح نحصد تقولين الا حصدنا ما كان الا خير قالت ايه ماكان الا خير ما كذبت تبي من الحليب اللي حلبت عطيتك قلت لا ماابي حليب اجل ابا اروح قالت بصرك اجل ولقيها ظهري ابا اطلع يوم دريت وهي تنطلق علي تعال تعال وش ذاالي في ظهرك وشذا الطين وانطلق منحاش وهي تلحقني بغت والله تمسكني عند الباب ويفكني الله منها واطلع في السوق قالت التيس اللي جادع الزير اجل اثره انت قلت انا ونا راكب على التيس ومخليه يركض بي في الحوش وجدعنا الزير انا وياه واللي عندك هاتيه ولا ابي كليجا اصلا انا شبعان قالت هين يجيبك الله

انقلبت الصداقه هواش وادلي احرها وانا امشي اقول كسرت زيرك ولا عاد عندك ما تشربين يوم بغت تطلع تلحقني بليا عباه وانحشت وخليتها __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سحاب نجد راعي شقراء - والعجوز - وبنات الجن	محروم.كوم	منتدى أخبار المواقع والمنتديات العربية والأجنبية	0	08-16-2012 07:11 PM
سحاب نجد- راعي شقراء - والعجوز ياملا الجنه	محروم.كوم	منتدى أخبار المواقع والمنتديات العربية والأجنبية	0	08-15-2012 11:50 PM
سحاب نجد - راعي شقراء - وسالفه راعي الكحه ولسان الثور	محروم.كوم	منتدى أخبار المواقع والمنتديات العربية والأجنبية	0	08-10-2012 03:50 PM
قصيده سحاب نجد راعي شقراء	محروم.كوم	منتدى أخبار المواقع والمنتديات العربية والأجنبية	0	08-03-2012 02:50 AM
سحاب نجد راعي شقراء جاكم ظيف	محروم.كوم	منتدى أخبار المواقع والمنتديات العربية والأجنبية	0	08-01-2012 08:50 PM