راعي العجراء والصيد في رمضان

[محروم.كوم]

السلام علاكم ورحمة الله وبركاته
اليكم هذه السالفه
في سنة من السنين واعتقد عام 96-97 13هــ
كان موسم الصيد في رمضان صيد الدخل وكان ذاك اليوم جمعه قلنا نطلع الصبح نصيد ونرجع الساعه عشر
المهم طلعنا ذاك الوقت لبنبان وكان يجيه صيد طيب وكلن صيده له ونصيد على 100 دخله تنقص تزيد من شخص لخص اللي يتعب روحه واللي ابواردي المهم صيدنا ودخلنا لبيوتنا تقريبا الساعه 11,5 قرب موعد صلاة الجمعه وانا اغتسل واذهب الى المسجد ولكن نصفي نوم عيوني حمر تقول عيون حصني تحت عوشقه وكاشح عليه النور
دخلت المسجد ولا المسجد مليان مصلين ويشتغلون في توسيعه دور ثاني مثل اللي يحطونه الحين للنساء وباخر المسجد صقايل خشب صابين السقف وانا ادورلي محل بين الخشب
وانا اصلي ركعتين واقعد المكان اللي انا فيه ظلام مافيه نور شغالين فيه
قعدت افكر لو تطيح خشبة من هالصقاله علي اوتطيح الصقاله كلها على هالزحمه في المسجد ياهي بتذبح ناس وخذ من هالهواجيس وانت ماشي لعلي غفت عيني من السهر وانا افكر بالصقاله بين نائم وبين صاحي
خلصت الخطبه وانا مادريت ماسك درب بالهواجيس قال الامام للمؤذن اقم وانا على غفوة العين والهواجيس
اشوي يوم اقام الامام وقال الله واكبر الله اكبر بصوت عالي وانا اطمر من مكاني وتصفقن هاك الخشبه احسب الصقاله طاحت المصلين قاموا للصلاة انا احسبهم بيهجون ابهج معهم
عيني على الباب وانا انطلق واطيح على ناس مابعد قاموا واصتدم بهذا وتعثر بهذا وركضه للباب الموت ياشامان وادري انهم يقولون الحمدلله عليه قل صح وانا ماعلي كل صح علي قل نوم
المهم رجعت وصليت عقب ماركدت شوي يوم خلصت الصلاة وانا اروح للبيت واخر علمي يوم شفت فراشي الظاهر اني نمت قبل اوصل الفراش
اذن العصر وانا على نومي اذن المغرب واناتوي مابعد انقلبت على جنبي الثاني الوالده الله يرحمها تصحيني مافيه فايده ترسل اخواني يصحوني وانا على نومتي
قالت الوالده مايصح الا الحين مابعد صلى العصر ولا المغرب ولابعد افطر روحوا عطوه على الاقل هالتمره وكاس العصير على الاقل يفطر
جو اخواني حاولوا يصحوني مافيه فايده عطوني التمره واكلتها وانا مدري والعصير مدري عنه بالرغم اني عطشان وانا ارجع وكمل نومي يوم تمت الساعه 10 بالليل وانا اصحى من نومي واحس بشي في افمي بس مدري وش اللي فيه ماخبر شي ولاها الفصمه او العبسه حقت التمره ماطلعته من افمي يوم اكله وانا اخذه وحلته واقوم اغسل واصلي ثلاثه فروض ومن عقبه لو يجي الصيد ماهوب في بيتنا لويجي داخل غرفتي ماصيدته وانا في رمضان

انتهت السالفه وارجوا ان اكون وفقت في طرحها لكم والله يحفظكم
وقبل الختام
سبحانك اللهم وبحمدك لااله الاانت استغفرك واتوب اليك
مع تحيات اخيكم راعي العجراء
منتدى مكشات

__DEFINE_LIKE_SHARE__