سالفة البيجو والكراوين

[محروم.كوم]

السلام علاكم ورحمة الله وبركاته

اليكم هذه السالفه والقديمه جدا

كان معي سياره بيجو موديل 69 سيدان فل كامل مراتب مخمل فتحه قير ارضي لونها خضراء لاشفتها من بعيد تقول حزمة كراث على ساقي توه محصود وكان هذا الكلام بالتقريب عام 1395 وفي يوم من ايام خرب السلف وسلفها مايوجد الا بالوكاله عند السليم بالبطحاء وتعرفون الوكاله سعرها غالي والمخباة مافيها الاثلاثين ريال

المهم رحت بالسياره للكهربائي قال سلفها خربان بس ابحاول ادور لها سلف او الفق لها من ومنا عطني مهله يوم اويومين انت رح بالسياره بدون سلف انشغلها لك بالدف قلت يصلح كذا قال ايه بس لاطفيتها ماتشتغل الا دف قلت بسيطه صلح بسلاكها اللي صلح ودفيناها واشتغلت ورحت للبيت

وعند ماوصلت للبيت مرني واحد من زملائي وقال ان غدير الحصان فيه كراوين

وينك ياغدير الحصان الحين اعتقد انه الان في حي النهضه حول شارع سلمان الفارسي شمال حسب اعتقادي وبالصحيح والله مدري وينه الحين بس حي سكني

ومن اول نهاية الرياض دوار الاحساء وطريق خريص يبدا من هذا الدوار والباقي بر

ماغير شبك المطار يباريك شوي ويقطع عنك

قلت بس السياره مابها سلف وماتشتغل الا دف قال بس هي تشتغل اليا دفيناها قلت ايه

اي دفه تشغلها

قال اجل مشينا علاها قلت اخاف توهقنا وبعدين نبلش قال ان شاء الله ماهي مخالفه خلنا نقول لواحد من العيال يروح معنا نحتاجه وقت التشغيل (دف) مرينا عليه وقلنا له السالفه بالبدايه عيا يقتنع معنا يروح والسياره مابها سلف حاولنا فيه
قلنا له فيه صيد كراوين ورمي وفلة احجاج والكراوين يذكرن بالفروق وخذ من هالحكي الرخيص ووافق الرجال واتفقنا على بكره الصباح مرينا الرجال وركب معنا وحملنا عفشنا ومشينا وصلنا غدير الحصان دجنا ذاك اليوم ماحصلنا ولا قوبعه نطعم بها غشانا يعني غدا عشاء

المهم اذا بغينا نوقف حطينها برفاع تسهيل للدف وماخالفت طول ذاك النهار

اضلمت علينا العين وحنا مابعد تعشينا والسياره برفاع وحنا تحت مولعين علينا النور العالي مدري الواطي ثم اروح للسياره ادحدرها وتشتغل علشان ماتفضى علينا البطاريه

شغلتها اكثر من مره بهذه الطريقه وماخالفت

يوم تعشينا وضفينا العزبه وهو يروح لها رفيقنا الاول راعي الكراوين يبي يشغلها حتى يقربها للعفش وهو يدحدر بها حتى وصلت الارض الدعث وهي ماشتغلت ولا يحطها الابذاك الشغيه اللي كلها رمل ونقعد بها والخط بينا وبينه اللي هو طريق خريص من 13 الى 15 كيلو المهم قلنا لازم نمشي رجليه نبي الخط مشينا وخلينا السياره والعزبه وبنادقنا دفناها بالارض وتوكلنا على الله ساعه ماتعدينا السياره والليل خرمس ماتشوف خويك من الضلام وبرد الاواعزكم الله الكلاب نبح علينا مع كل جهه وحنا نتبالش معهن طول الليل

المهم مشينا لنا 12 كيلو ونشوف هذاك الكنب مقر شركه وحنا نمشي لها ويوم وصلنا لها ونلقى عند الباب حارس ندخل ماندخل المهم اتصل بشخص وجانا نعم قلنا له السالفه قال ماقدر افيدكم بشي ولكن مدير الموقع هو اللي يقدر يساعدكم طيب وينه قال ادخلوا معي

دخلنا الشركه وقابلنا المدير شنباته مثل شنبات راعي العجراء من الجنسيه القبرصيه

قلنا له السالفه قال والله السيارات ممنوع تطلع في الليل ماتطلع الا ساعات العمل ولكن ابساعدكم شوي ابوصلكم للخط وبسرعه ورجع قلنا مايخالف باقي كيلوين خله تنفع

ركبنا معه وهومعه جيب شراع تايوتا وهو يطير بنا بين السماء والارض يوم وصلنا الخط

قال مايخالف ابتقدم بكم شوي ابنزلكم عند وزارة المعارف علشان تلقون تكسي يشيلكم

قلنا بيض الله وجهك ماقصرت وهو على سرعته وهو ينزلنا والسياره يمكن مابعد وقفت من سرعته وهو يديور ويرجع

وخذ من التعليق من صاحبنا اللي عيا يروح معنا ومازلنا نتذكر هذه السالفه حتى يومنا هذا

وللمعلوميه انا القعده فيهم

انتهت السالفه وامل ان تحوز على رضاكم

وفي الختام تسلم علاكم عمتي منيفه

وتقبلوا تحياتي

__DEFINE_LIKE_SHARE__