سحاب- وهذا حالنا في رمضان ايام بيوت الطين

[محروم.كوم]

بسم الله صلى الله على محمد

---

الابذكرالله تطمئن القلوب لااله الا الله وحده لا شريك له

---

اللهم اتنا في الدنيا حسنه وفي الاخره حسنه وقنا عذاب النار ودخلنا الجنه مع الابرار ياحي ياقيوم ياغفار

اللهم وغفر لموتانا وجعل قبورهم روضه من رياض الجنه
اللهم سكنهم الفردوس الاعلى من الجنه برحمتك يا ارحم الراحمين
وغفر لنا ورحمنا الا صرنا الا ماصارو اليه

تشوفون رمضان باقي عليه يومين ويدخل الله من نفس مهيب لاحقته لا تحسبون الدنيا فيها خير منول يقولن العجيزات ترا الدنيا مهيب خلفه وخيبه للي هي له

---

فيه هكا الواحد والواحد الله في سماه العالي وكل ابليس مخزيه الله


---

يالله تحييهم وليا حيا كثر وليا كثر تنثر وليا تنثر تزبر بعد

بكبيركم وصغيركم وذكركم ونثاكم


ترانا منول الا اقبل علينا رمضان في شقراء وغير شقراء يبدون الناس يحطون الرواقات في المساجد ويفرشون للحريم والرواق قاطع يحطونه بين الرجال والحريم بالقماش ولا رواق خيمه
ولا دخل رمضان كلن مستاسع صدره مدري وشي ذيك الفرحه يحطها رب العالمين في قلوب عباده سبحانه وتعالى
ولا بدت صلات التراويح يبدن العجيزات وغير العجيزات يروحن للمساجد يطلبن رحمه الرحمن سبحانه وبعضهن ياخذ معه مدخنه فيها جمر وكسيره عود دخون علشان يدخنن الي يصلون ياجعل مثواهم للفردوس جميع
وياخذن معهن دله القهوه والقدوع او اتمر والشاهي والماء انتم خابرين الحريم مايستغنن عن دق الحنك والاكل والشرب ولو يسكتون عنهن جابن كراث وحب فصفص بس الكراث وحب الفصفص مخصص للايام العاديه يافي الضحى يعني الصبح ولا في العصر كراث وحب فصفص وشاهي ثمن ينسن اعمارهن مع ذا النعمه والسواليف

خل اعلمكم ترا بعض الحريم الا صارت في مجلس عند الحريم ومعهن وحده ماتواطنها تصير تناظرها بحقران وتنفث قشام الحب عليها او جهتها ويصير فيه مناضر بطرف العين يابين الي جالس منهن مع احد وهي تكرهه واضح وضوح الشمس
ونتم خابرين منول مهنا كراسي وكنبات نجلس عليهن مهنا الا حصير ولا مده يعني فرشه بلاستك نسميها المده
ولا على زوليه او بساط يعني يصيرن الحريم جالسات على الارض و اذكر مره كنت عند الحريم جالس لاني كنت صغيييير ماعني غطا ونا عاد كلي ملح وقبله اهول هولان بعد بسم الله علي من العين
تراي اهول منول مهوب هلحين بسم الله علي منكم بزرت عيونكم علي

المهم كنت في مجلس الحريم ونا اشوف وحده شيطانيه تناظر الثانيه بحقران وتنطل قشام الحب جهتها
والثانيه داريه عنها بس مسويه روحها ماقامت عندها ولا قعدت وتحرها بكثر الضحك المهم يوم جت تبي تروح لبيتها ذا القشرا وهي تجي وتاطا رجل الثانيه كنها ماشافتها ههههههههههههه وتكب بياله الشاهي على رجليها
وتقوم الثانيه وتمسك ثوبها من تحت وتجره بسرعه ولاها طايحه على ظهرها ويفكونهن الحريم وهن يقولن مادافع الله كان اعظم بس وشذا الي فيكن ماتواطنن بعض
هذي نفس ماصلت على النبي هههههههههههههههه

وبعض الحريم مايروحن يصلن في المسجد يصيرن لاهيات في بيوتهم وبزورهم ورجالهم مغير يصلحن الفطور ثمن يصلحن العشا ثمن يبدن بالسحور وهذا حالهن جعلهن للجنه امين
ويبدون العيال في ممارسه الالعاب الشعبه هذولا الجذاعين يعني الي كبار شوي
ويلعبون شرعد اكثر شي ولا يلعبون ام ثلاث وهي يخطون مربع على التراب ويحطون فيه خطين مثل علامه الزايد في وسطه ويلعبون
ولا يالعبون ام تسع وهي يخطون على التراب مربع وفي وسطه مربع وفي وسطه مربع ويقطعونهن بعلامه زايد ويلعبون بالحصا
ولا يلعبون لعبه الدشه وهي يرسمون مربع كبيييييير على التراب ويجون فيه الي يلعبون كلهم ثمن يطب عليهم واحد ينقز على رجل وحده ويلحقهم والي يطوله منهم يضربه برجله المنثنيه ثمن يطلع الي مضروب برا ويستمر يلاحق الباقين الين يضربهم كلهم ون طاح الي ينقز على رجل يطلع برا ويجي واحد غيره هذي هي لعبه الدشه

ترا تصير الشنبات طالعه بس ولو برائه وطاهره قلوبهم جعل ربي يوفقهم جميع


ولا يلعبون بالسكروب وهو المفك حق المسامير نسميه منول سكروب
كني مار جايكم من العصر الحجري كلش ماتعرفونه يالتوالي وكلش يبي ترجمه كني اكلمكم باللغه الحميريه القديمه ترا مهوب كلش يعني حمار لا هذي احد اللغات القديمه يالتوالي المايقين
المهم الي يلعبون بالمفك يجلسون على التراب ويجي واحد ويدفن في مربع علك ثمن يجون الي يتبارون وكل واحد يضرب بالمفك او السكروب داخل المربع والي يضرب العلك ياخذه له ينفخه من التراب ويحطه في بقه يعني اثمه ولا شافو من ربهم شر
ولا يلعبون طاش ماطاش
وهي يجيبون غرشه ببسي ويفتحونها ويحطونها على الارض وياقفون والببسيه بين مواطي رجليهم ومعهم حصات صغيره يسقطونها في وسط الغرشه ويقولون له طاش ولا مهوب طاش يعني ان طيحتا الحصات وسط الغرشه يبي يطيش الببسي ولا مايطيش وهو عاد يقول الي يبي ون طاشت وهو قايل ماطاش ياخذ الببسيه الي هو متباري معه وهو مايلهطها قايل لكم برائه
ولا يلعبون سبع الحجاره ولا يلعبون طق البير بس ماتصلح طق البير الا في نهار لياه يجيك العظم ويدخل في جبهتك ونت مادريتا

عاد البنات يلعبن بالمصاقيل ولا يلعبن الخطه ولا يالعبن حدارج يابدارج ان كل شيخن دارج حب يدك يامقص قبل يحبها بليس ثمن كلن يحب يده والاخيره تطلع برا

ولا يلعبن حقرا بقرا قلي ربي عد العشره ثمن يعدون من واحد الين عشره والي تطيح علىيها العشره يطلع برا

بس ترا مووووووبطي مانسهر واجد الا صلينا المغرب نقعد شوي ثمن نبدا نترنح دايخين نبي النوم يعني الجيد الي يجلس الا اذان العشاء او الاخير كلهن واحد
لان البزور صاحين من قبل تطلع الشمس ولازم عاد يرقدون مع الدجاج النوم يقواهم

وخل اعلمكم ترانا ماناكل المحلبيه ولا المكرونه اذكر منول يحطونها المكرونه في بليمات يعني بلم بس التصغير عند اهل شقراء واجد التمر تصير تميرات والرز رزيزه والجح جحيحه والجرو جريو ومريقه وخبيزات وجريشه ومريصيعات وشويهي ولبينه وقهيوه وفنيجيلات وبييلات وغظيرات وش تبون بعد حتا السياره صارت سييره ودوات المطبخ مويعينات ومويزات وبريدقينات وتفيفيحات الفمتو نسميه منول الشربيت او التوت المهم والله يعينا على المهم المكرونه والشربيت واللقيمات والمحلبيه مانذوقهن الا في رمضان بس

ياجعلهم للفردوس جميع قولو امين
وجعل الي حي منهم يمتعه الله متاع الصالحين قولو امين
تراهم هم نور الدنيا وسعادتها
ابا اطلبكم طلبه قولو تم ابيكم تدعون لي - تراها بلاش انا خابر حبكم للدراهم

وكملت ودملت وركبت حميرها وشنقلت

قولو امين الله يجمعنا مع والدينا وذرياتنا وجميع حبايبنا في الفردوس الاعلى من الجنه

والله يوسع صدوركم ويفرج همومك ويقضي الدين عنكم ويشفي مرضاكم قولو امين مهوب تقرون وساكتين
وسبحان الله العظيم
سبحان الله وبحمده
ولا حول ولا قوه الا بالله
عددخلقه وزنه عرشه ومداد كلماته ورضى نفسه

__DEFINE_LIKE_SHARE__