سحاب - وسوالف ايام الطيبين

[محروم.كوم]

السلام عليكم ورحمه الله وبركاته

هلا بالغالين ومرحبا والله يحملكم الصبر علي وسواليفي ههههههههه

يسئلني اخوي الغالي خوي مخباته عن الجني الي انا ذاكره في السالفه الي قبل هذي وهو جني ساكن في راس وحده من النخل ويقول هو يوذي

لا مهوب يوذي ابد يبن حلال الظاهر انه يشتغل مع الهيئه الا اذن الفجر ونت نايم ماتدري الا بالباب يطق ثلاث مرات ولا فتحتا الباب مهنا احد بس جزاه الله خير يوقض الواحد للصلاه لانه يدخل يصلي في مساجد الديره وخص الفجر
تدري اني مره كنت صايم ذاك اليوم وكان حررر وقوم وحط كرسي بلاستك قبال النخله وشغل الدينمو وحط الي بكربه النخله وخليه يصب علي ونا في حوض النخله الي فيها الجني واتميلح يبن حلال جايين اخواني عندي وذا الكلام الظهر ومسوي نفسي منيب اخاف ونا والله العظيم اكذب اذرق مني ماشفت المهم ورفع راسي وقول يالجني ماودك اتراد انا وياك في الشعر ونوسع صدورنا ثمن قلت انا ابا ابدا وقلت

ياساكنن عندنا وتسكن بعالي الجنا

الله محيـيـك كـانك راغبـن عـنـدنا


كنه عاد مشاورني يسكن ولا لا هههههههههههههه المهم ومادريت الا بالعسيب الي يخرفش عند اذني ورقبتي وجيك منطلق منحاش ونا اقول يمه يمه هههههههه اجل عود هذا كبري وقول يمه يمه وش خليت للبزور اجل ههههههههههه و يالله اقوا اركض مغير اتظوكع وماعلي الا حق السنه ههههههههههه - اثر واحد من اخواني الله يصلحه جايني من وراي ومعه عسيب نخل ونا مادريت عنه وهو قايل للباقين من اخواني شوفو وش يبي يسوي هلحين وهو يتميلح على الجني وروعني وبغيت انهبل صدق والهبال عاد يبي شي خن بط ولاك منهبل وبس الله يدفع البلا- انتهت سالفه الجني وهذي عاد سالفه قلت اوسع صدوركم ليله خميس


تذكرون العجوز راعية الكليجا اللي دارها تخلي المجباب وراء ظهرك والمجباب يالغالين سوق يجي فيه 4 او 5 دكاكين ومعروف في شقراء المهم كنك تبي تروح لسوق المجلس او الماقفه وسوق المجلس هو سوق شقراء الرسمي منول ثمن تجيك سكه على اليسار وتروح معها ويجي بيت العجوز راعيه السالفه الله يغمد رويحتها في عليين على اليسار لها باب كبير يعني مهوب كبير مره لا وسط المهم رحت اتلحوس عندها ابي كليجا هههههههههه ويوم جيت عند بابها ولاها صجه في الحوش شاريه عنز مع عيالها وتيس وش كبره واطق الباب يم فلان يم فلان قالت جابك الله ادخل وادخل واصك الباب ولاها تبي تحلب العنز والتيس ما خلاها وقالت لي تعال ياوليدي اخر ذا التيس عني ما خلاني احلب العنز غاثني واجي وامسك التيس مع قرونه واجره عنها وتبحل بعيال العنز ما خلوها تحلب ههههههههههههههههه وكل شوي ترجف واحد برجلها تخرهن عنها ههههههههههه ماحدها الله على الغثى ولا حطت لهن بيت ولا حطت لهن رباط نربطهن فيه لا مخليتهن في هاالحوش سرداد مرداد المهم وهي تحلب قلت يم فلان قالت يالبيه قلت ماسويتي اليوم كليجا وراك

قالت نبخت ايديني من التنور قاعده ارصع فيه مراصيع وكواني قلت ولا عندك شي من المراصيع قالت انت ورا ماتسكت انا يمك ولا يم هاالعنقان اللي مبحلاتني ماخلني احلب تقصدعيال العنز المهم حلبت ذيك السعبوله من الحليب قالت خلاص فك التيس الله لا يعقله وافكه عليه قرون وش كبرهن قالت ابا اطلبك طلب قلت وشو قالت ابا اروح انا وياك هالحين لحد الحيطان علشان نحش للغنم قلت ابي كليجا طيب قالت ياصبر امك عليك انت وحراره بطنك ههههههههه ثمن قالت خل نروح ونحصد للغنم ثمن الا جينا ماكان الا خير قلت قوه يالله وتلبس عباتها ياملا الجنه ونطلع من بيتها ونروح من عند المجباب ويجي دكان الدهلاوي والدهلاوي رجالن اعما وله دكان يوسع صدره فيه الله يغفر له وقبله مشاكل مع البزورويوم فضنا على دكان الدهلاوي الله يغفرله ووالدينا وكل مسلم وهو ينطلق علينا تحليت ماتسمع الا خبط الجمش في الجدران والجمش الطين اليابس وبغا يخبط راس العجوز بذيك الجمشه حفت راسها بس اشوا ماجتها وننطلق انا والعجوز ننحاش طبعا هي ماسكتني ماتبيني انحاش واخليها واذكر وانا اركض انا وياها تقول الله يغربله روعنا عسا ما يجي ورانا طبعا انا وهي ما علينا نعال حافين اصلن مانعرف الله يكرمكم النعال وركضه ثم يجينا السابوط حق المجباب ويجينا دكان ابن سعيد الله يغفرله ويرحمه على اليمين ثمن يجي دكان السليمي ياملا الجنه البارده بعد على اليمين عقب دكان ابن سعيد ونروح انا وياها طايره عباتها كنها سوبرمان والدهلاوي ياملا الجنه حسه يهوش
المهم رحنا للحياله اللي ورا حجرة السكور وحجره السكور هذي يالغالين هي عباره عن غرفه صغيره فيها سكور الماء لان شقراء كانومادين لكل بيت ماصوره وذا الكلام على اواخر ايام الصدر -المهم هي معها محش وانا معي محش ونقعد نحش من الشجر اللي في الحياله ثم قالت تعال خل اللي معك فيذا وقوه انا وياك للشعبه اللي وراء بيت ابن احمد الله يغفر لميتهم ويسعد حيهم وكل مسلم والنعم والله فيهم المهم ونروح للشعبه ونجلس نحش من الشجر اللي فيها وكل شوي اقول لها هذي تصلح والا لا اعاني الشجر الصغيرات قالت تراك ابحلتني كل شوي هذي اللي تصلح هذي اللي تصلح
احصد وبس كلش يصلح
طبعا الشعبه هي اللي تمر من عند صبخه السالم ثم الصبخه الثانيه ثم تروح لخيس صعب وكل المزاغير حقت البيوت اللي على الشعبه تصب فيها وش المزاغير هي الفتحه اللي يطلع منها الماء من البيوت وتكون عاده مسمته بسميت وصايره الشعبه كلها شجر طماط وحامل قالت لي القط الطماط وخل الحصاد عنك قضينا قلت طيب واقطع من الطماط واحطه في شقي ما معنا زبيل ولا شي وشالت الحصاد هي وجمعته مع اللي في الحياله اللي وراء حجرة السكور وربطته اذكر بطريده قطعه خلق وتشيله على راسها وانا رافع شقي مليان طماط ونروح لبيتها ويوم وصلنا دكان الدهلاوي جعله للجنه قالت لي افطن له لا يشلخ راسك بحصاه قلت طيب ويوم مرينا وهي تسلم عليه ورد السلام وحطت حزمة العلف وقعدت عنده وانا قعدت بعد قالت له وش فيك يابوفلان ترجمني انا ووليدي بالحصى من ساعه قال هو انتم اللي مارين

قالت ايبلاه انحن قال احسبكم اجل بزورن جو وغثوني عسا ماجاكم شي
قالت ستر الله علينا والا باغي يجينا وييزينا الروعه الله يهديك تقعد كل من مر تبي تحلته تراك تبي تبلش مع الناس
قال مايخالف وقامت ورحنا لبيتها ودخلنا في الحوش وتهد علينا الغنم يبن ياكلن وهي شايله العلف اللي حصدناه فوق راسها ويجي التيس ويحط ايديه على بطنها يبي علشان يطول العلف وتتكرفس يعني تطيح هي والعلف ههههههههههه جدعها التيس كني اشوفها تدحوست ضعيفه وتمسك فيني وهي تقول ها التيس مدري وش اسوي فيه قلت اربطيه قالت مهنا الا هو ودخلت وسط البيت واجي وراها وتحط الطماط اللي في شقي في قدر وقلت انكان عندك كليجا عطيني والا مراصيع قالت انا ماناب في حالك هالحين خل ادور رباط للتيس
واطلع عند الغنم وامسك التيس مع قرونه واركب عليه ويدلي يركض بي في الحوش بسرع شي وانا مبسوط وركض وانا متمسك بقرونه وهو مغير يبابي جاه شي مايدري وشو الله لا يلومه ماتعود
المهم طيران وانا متجود وينصابي الزير ونجدع الزير وينكسر وينكب الماء اللي فيه صار الحوش خويضه وحوسه وطحت من عليه وارتعت الزير انكسر وامتلا ظهري ماء وطين قلت ام فلان يم فلان قالت يالبيه قلت تيسك رقا على الزير وجدعه وانكسر وهي تجي طايره تركض وانا قعدت على الارض ههههههه وين تبي تقعد فيه بعد اعاني روحي ههههههه وجلس على الارض كني ماسويت شي ملقي الجدار ظهري علشان ماتشوف الماء والطين الي في ضهري ثمن تدري انه مني قالت وشذا وشذا وش اللي كسر الزير قلت شوف عيني التيس اللي رقا عليه وجدعه قالت كسر الله عظمه مار هين والله لاربطه ولا عاد اطلقه منهبل مار هو وقرونه قلت ما جبتي لي لا كليجا ولا مراصيع تراي جايع قالت هماي قايله لك منبخه يدي من التنور يوم اسوي مراصيع قلت عطيني من المراصيع قالت ما عنديش قضن انت ماهمك الا بطنك قلت هماك يومنا نروح نحصد تقولين الا حصدنا ما كان الا خير قالت ايه ماكان الا خير ما كذبت تبي من الحليب اللي حلبت عطيتك قلت لا ماابي حليب اجل ابا اروح قالت بصرك اجل ولقيها ظهري ابا اطلع يوم دريت وهي تنطلق علي تعال تعال وش ذاالي في ظهرك وشذا الطين وانطلق منحاش وهي تلحقني بغت والله تمسكني عند الباب ويفكني الله منها واطلع في السوق قالت التيس اللي جادع الزير اجل اثره انت قلت انا انا راكب على التيس ومخليه يركض بي في الحوش ومتجود في قرونه بعد وجدعنا الزير انا وياه واللي عندك هاتيه ولا ابي كليجا اصلا انا شبعان قالت هين يجيبك الله
انقلبت الصداقه هواش وادلي احرها وانا امشي اقول كسرت زيرك ولا عاد عندك ماء تشربين يوم بغت تطلع تلحقني بليا عباه وانحشت وخليتها عاد السالفه لها بقيه بس بعدين قصرت ونتم بعد قصرتو ههههههههههههههه وفي النهايه اقول

سبحان الله وبحمده سبحان الله العظيم عدد خلقه وزنه عرشه ومداد كلماته

واستغفر الله العظيم لي ولكم وصلى الله على نبينا وحبيبنا محمد

__DEFINE_LIKE_SHARE__