سالفة: حناي ونغارت البنات..قوافي

[محروم.كوم]

مشرفينا الكرام

أخواني ،،أخواتي الأفاضل ،،زوار مكشاتي الغالي وخيمتي الحبيه

السلام عليكم ورحمة الله وبركاته

حينما نتلقى عزائنا بغالي فقدناه ،،يمر أمام أعيننا شريط طويل يحمل كل مانستطيع من ذكريات ومواقف معه وعنه..

رحم الله امواتنا واموات المسلمين

من قريب توفت إحدى الغوالي وكان لي موقف قديم وأنا صغيره معها مازلت اتذكره وكأنه الأن:

كانت أمي أطال الله بعمرها مريضه ،،وجت الغاليه وهي إحدى قريباتي وقالت انا ابي انام عندكم لين تطيب الوالده..

وجايبه معها حنا للشعر ومايسمى محلب،،وهو يحط مع الحنا لتحنية الشعر،، والمحلب يقولون يصلح الشعر ،،وأنا أقول:يغمت القلب!!

يوم جا بالليل عجنت الحنا مع كاتم الأنفاس وأنا أناظرها وخايفه تقول بحني شعرتس بكره!! كلش إلا ذي..

واللي توقعته صار يوم جا من بكره الضحى اصرت انها تحنين وانا ما أحب الحنا موب عاد حنا ومحلب ،،قعدت تسوي إغراء،،

البنات لين شافوتس متحنيه ينغرن منتس ،،وينغرن عند البنات شي كبير ،،ودلت تمدح لين صابن او جان جنون العظمه ..

حطيتها براسي وريحة الحنا تعج عج بكل مكان..

طلعت العب مع البنات عند الباب بكل غرور وثقه بأني الأجمل وانا متأكده أن هاك اليوم ما قربن لا نامس ولا ذباب ولا أي حشره كأني مبيد متنقل ..

البنات كل ما قربت لوحده راحت بعيد هن متأذيات من ريحة المحلب قويه وانا أحسب غيرانات من حناي اللهم لك الحمد..

المهم قعدنا نلعب دبق وهي لعبه قديمه يلعبونها البنات عباره عن حفره صغيره بالارض وادوات اللعب اي شي زرار قزاز ملون كبك خاتم وقد لعبت بخروصي (خماخم) وراحن علي..

بهاك اليوم لاحظت اني اغلب أو أهزم البنات ويوم أغتريت قلت :

أنا غلبتكم ماتعرفون تلعبون وكل يوم بفوز عليكم؟؟؟

ردت وحده من البنات:

وععععع عسى إن شاء كل يوم بتحطين هالريحه ترانا تركناتس تفوزين عشان ريحت الحنا مانبي نقرب لتس

شششششششش

انا انصدمت :وععععع

طيب الغاليه قالت ينغرون موب يقرفون ،،وعلى الغسيل الفوري وكانت أخر مره ..

لكم مني أجمل تحيه وتقدير..

..قوافي..

__DEFINE_LIKE_SHARE__