ياشباب حبيت من خلال هذا الموضوع نضع ابرز مشاكل الباترول عشان اللي يبي يشتري والا اللي في موتره مشكلة يستطيع الاستفادة من خلال هذا الموضوع.


طبعا نبي الكل يتكلم عن تجربه :

1- باترول 98 كلبريتر ، ابرز مشاكل اللي واجهتني هي الحرارة ،

وكان السبب تعبأة مياه المصلحه ، وبعدها غيرت نظام التبريد كامل ولا صارت الحرارة ترتفع ابد ابد

2- باترول 2009 بخاخ ربع : وعيبه الحرارة اللي تلازمه مهما سويت فيه ، مع المشي والوقوف مايتاثر ، لكن في النفود بدون تنسيم يحتر على طول بعكس الكلبريتر الاول ال98 ، والدخنه السوداء الخفيفه اذا طولت الوقفه والموتر حاااار

3- باترول 2009 ربع ونفس المشكلة في الاول بالاضافه ان الباترول البخاخ يبرد عزمه بالنفود بعكس الكلبريتر انشط بكثيير

واضافه على ذلك ، الكتاوت حقت الطرمبة اذا دخلها تراب تخرب على طول ، لذلك غيرها بالكتاوت الاخضر

5- باترول الموجود بتوقيعي وايضا نفس مشكلة اللي قبله وهي الحرارة بالنفود بدون تنسيم ،

بالاضافه الى مشكلة التفتفه والطفيه وهذي حلها بتغيير الخرطوش اللي بين القربة والثلاجة اذا كان مهتري وتنظيف الثروتل

ايضا اذا وصل البنزين قبل الاخير والموتر حار يقوم يقطع ولايمشي وهذي سببها طرمبة البنزين تحتر وماتدفع بنزين ، لذلك لاتخلي البنزين ينقص عن الثلث

مشكلة التانكي الاضافي مايحول ، وهذي حلها بفصل اصبع البطارية ونفخ الفيوزات اللي عند ركبة السواق او تغيير الفيوز الخاص به وماتشوف شر

ايضا مشكلة التكييف وهذي عيب مصنعي ؛ هو انك اذا شغلت المكيفين وانت واقف يضعف التبريد خصوصا الظهر

طبعا بعض النصائح :

انتبه على الباترول من الحرارة وحاول ان الموية والرديتر والليات وسلك السالب كلها تمام ، لان الباترول مايتحمل الحرارة وممكن تخسر المكينة

اذا دخلت النفود وحرارة الجو مرتفع نسم له عشان مايحتر ، وايضا لاتخليه واقف لمدة طويلة ايام الصيف

دايم واظب على التصفيه من بواجي وصفاية وفلتر هواء حتى تفتك من التفتفه والتقطيع

لاترهم اي شي اضافي ع الموتر وخاصة الاشياء الكهربائية مثل المراوح والزنن الى اخره وحاول اذا بترهم ان تبعدها قدر الامكان عن كهرب السيارة

المراوح السوبارو انا ضدها لانها ممكن اي وقت تفصل وتقب الحرارة فجأة ، والباترول يحتر بسرعه لو اختل اي شي من نظام تبريده

طبعا اذا فيه مشاكل اخرى بالباترول اتمنى الكل المجرب يشارك بها لتعم الفائدة