السالم معزول والحبارى الخريش مقناص العام الفائت (( مذخور ))

محروم.كوم · #1 07-03-2012, 01:40 AM

بسـم الله الرحمن الرحيـم
السلام عليكم ورحمة الله وبركاته
واسعد الله اوقاتكم بكل خير
اخواني الاعزاء الكرام ارحب بكم اجمل ترحيب
يسرني ان اشارككم بموضوع متواضع عن مقناص هذا الموسم
وذلك خلال الفتره من 2011/11/1الى 2012/3/31
ارجو لكم قضاء وقت سعيد مع هذه الصور
كما اشكركم مقدمآ على ماتبذلونه من جهد بمواضيعكم الراقيه
فأنتم من شجعني على الاستمرار بطرح مواضيعي
اشكركم كثير الشكر
كلي امل ان نجد الفائده والمعرفه والمتعه
التي تروي عطشنا من مواضيع الاخوه الكرام
والذين لهم بصمه واضحه بهذا المنتدى فأهلآ وسهلآ بكم
سوف اوجز قدر المستطاع
خصوصآ وانكم كلكم اعرف مني بما يجري للصقار خلال القنص
ولكن سوف اشرح ماصاحبه احداث تستحق الذكر
لكي لايصيبكم الملل
سوف استعرض أولآ مقناص الحباري بهذه الحلقه ولعله يكون
(( الجزء الأول ))
طبعآ خلال فتره المقناص وفقنا الله بعدد (11) احدى عشر حبارى
تم صيد (8) ثمان وسلم عدد (3) منهن
لم يهد عليها وهذا بيت القصيد
(( الاولى ))
وهي اول حبارى بالموسم نادانا واحد من الربع
ابشرو لكم بجره تجمع الربع
وكنت انا واثنين من الربع ثلاث سيارات
اخر من جاء وكنا جايين من جهة الشرق نشوف ربعنا
حوالي الكيلو
قالو تراه موجهه حروتكم قصرنا شوي
وجادعين روسنا بالشغايا قال اللي يبارين عندي جرته جديده
وجهو لمنا
بجيتهم وكان معي العامل قال شوف شوف طارت
اثره راحت شمال ماهو لمنا
هد
هذي بالج عن الطير
الطير ماطلع
عندكم راح
وانا اطرد من بعيد مخليه مجنب
يالله
هديتو
صاكين الربع كلهم
رحت معه حوالي 8 كيلو يوم توعرت الارض وقفت
ادربل لين اخفيته
ضحينا
وجهنا حروته لكن ماقسمه الله
والحمدلله من بكرا يعوضنا الله بدجاجه غفل
قامت درج وجابه الله

(( الثانيه ))
كنت مشغول ولم يتسنى لي الخروج مع الربع هذا الاسبوع
ونتواعد انا واحد الاخوه توه شاري له طير فجر الجمعه
بنتمشى لعل الله يرزقنا لو بكروان يبي يشوف فعل الطير
مشينا ونتناجا انا واياه وسواليف ونحلت ارواحنا بكل تلعه وشغيه
يوم جا الظهر ماشفنا شي يالله دبرك المباركه
تقهوينا وتلينا
ويامرن العزيز الحكيم اسوق قلت له ابروح شوي وبيننا الجهاز
وخلك على الوجهه وسواليف ويعلق علي واعلق عليه
هو وطيره تخبرون المعاند والعياره بين الربع
وكل شغيه اجدع راسي به يوم طار عقلي
جرة خرب يمكنه يناضرن بدون مبالغه
ابوعبدالله ابشرلك بحبارى مهوب كروان
كفو
كفو
يالله تعال بسرعه
وين انت
من حس الحظ الجوال شغال بالمنطقه وصفت له
لاني لايمكن اعطيه احداثيه بالكنود
وصل قلت يابو عبد الله طيرك مجهول وكفاخ
واذا خرب بليه خل اتصل بربعي كانهم قريبين انتظرنا
والا شفنا لنا حل
اتصلت بالربع وكان عندهم كراوين ومن حسن الحظ كانو قريبين
بحدود 130 كم والطريق كله مسفلت
طبعآ انتظرنا حوالي الساعه والنصف
شبو على الحديد
وصلو واحد تلو الاخر
قلت لهم رفيقي معه طير مجهول الهدد لك يابوعلي
وان جابه الله نبي نعزله تعال عندي جرته الحين ترص
يوم اقبل ابوعلي طبعآ مادرينا بالسالفه ذي الا عقب
اثره طلع طيره عليه ولاهد
طلعت من الشغيه لوعر
ولكن حنا كثار حوالي 15 سياره
ونخجرناه لين جابه الله مسيان متاقيه بريض طلحه
وطارت قدام واحد من اربع وطبت شوف
تجمعنا
هذا مطبه وكان فيه هواء شديد
معه خالفتنا بارض ماتثر وجانا الليل وصارت معمعه
يوم جانا طير ماندري منين قضبناه
وعلى فالنا ندوره
رقينا لنا حزيم والحقيقه كنا شاكين انه تروح
لانه قريب للخط والسيارات رايح وجاي
لكن الظاهر انه ماهمه احد
اول ماشفينا مع الحزم قال
ابو خالد طارت عندك طارت
ويماسح واظلمت العين
مالله اراد وراح عيني عينك
وقفنا وصلينا المغرب والعشاء يوم جانا هاك الموتر طاير
اثره راع الطير
قلنا ابشربه
قال انا هاد على حمامه وقلعه الهوا
الحمدلله على العقلان
وراح بعض الربع الفجر ولكن لم يجدوا له اثر
(( الثالثه ))
وقت الكراوين بتاريخ2/3/2012م شهر مارس
قمنا كالعاده وكل وجه لجهازه
هذا عندي شوف
وهذا جره وهكذا
اليوم الجمعه
اتفقنا نقنص وجهه أي جهة الديره
فيه ثلاث سيارات بيننا وبينهم السريع
كلمناهم بالجوال وقلنا تعالو نبي نوجه من عندنا مقناص
مشينا
حروت العشره كيلو قال ابو براهيم ابشروبه
وشو
ابشروبه
ابرتفع اكلم الربع ضعيفه تغطيه الجوال
قربت لمه انا وثلاث سيارات من الربع
وهو يبي يرقا على راس الحزم
طارت طارت
امنت بالله
انت اللي مرتفع
ايه جوالك شغال
نعم
كلم الربع
وجهو مع السريع
يوم اعترض امن الطرق لواحد منهم
على جنب
معك سلاح
ايه وهذي رخصته
تكفى
ماتكفى ربعي عندهم حبارى
خذ السلاح واللي تبي واجيك لاهدينا
لكن !!!!
راح معه للمركز
وقلنا ماحنب هادين لين يطلع رفيقنا
اتصالات من ومنا
واثناء ذلك
كنا رافعين الموتر براس الحزم
اللي اخفاه صاحبنا فيه ومفرعين عن الطير
ونتعاقب كل شوي يروح واحد يجلس بالموتر
اراد الله يوم قالت معين اجيكم غربيه مابعده غربيه
ونعجز نتقهو وننحاس ويجي رفيقنا الساعه 2
وناكل المقسوم ونقوم عليه والجو مايشجع
والا يومكم هذا تبخرت
الله يخلف علينا وعليكم

(( وهذي قصة احدى الحباري اللي تم صيدها ))
نادنا اخونا ابواحمد على جره اول الصبح وكنا حول بعض
تجمعنا
ارتفع يابوخالد (( سعد )) خلك جاهز
طارت
ماهد صاحبنا وكدناه لين طبت
على الوجهه
على حروته والى والله يوم طارت
هدينا يوم وصله الطير وهي تشغل التيربو
يالله دبرك المباركه
جذبنا الطير
وبعض الربع ساقو معه وكدو حروة محله
تجمعنا
ماخلينا شي ولكن مالقينا له اثر
جانا وقت المغدى
عين خير
وعقب قمنا عليه
منا
ومنا
قال اخونا ابوهاني ابشروبه
ترفع ياراعي الطير
قلت شوي ابرتفع عند خوينا ابصور
وانا متجه لمه يوم طارت بيني وبينه
هد طارت
ماشاء الله معه معه ويتخطفه
والله ايه
تخبرون لاابطى الطير مع الحبارا والله يوم طرح (حل)
واسوق معه حول 3 كيلو والله يوم جاه بلا الموتر ( له قصه)
وانا اقف براس حزم وادربل ومعي اثنين من الربع
قلت وكدو معي تكفون
يوم حولت
كلمنا الربع
تجمعنا مثل كل مره
والله من المرات اللي نبي نتجمع عنده
ترى ذي حروته يالربع أي والله يوم اخذنا شوي
وننصل على راسه يوم طارت هد يابو احمد
ماهد
وشوف طبي قريب
يالله جميع وخلك والم يابو احمد
وفعلآ شوي
ويبحره ابو عمر

اوقفو اوقفو هذه قدامكم
يوم طارت
الغريب انه ماتدرج ابد كلش طيار
هد يابو احمد هدد السعد ماخلا شي نتفه تنتيف ولكن براسه شي
كل ماخالطه ارتفعت
وبالأخير خلاه
ومعه ويهد واحد من الربع طيره وحنا نسوق
هاه
عطونا العلم
الطيور مهيب لمه
يالله يابوواصل سق معنا هذاه قدامنا
هد هد هد
وين هي
بوجه الموتر
فرع بالطير يبي يشوفه
بسم الله هديت
ماشاء الله ماشاء الله
الطير يرقى ماشاء الله عازم عليه
ارتخت الحبارا وبدت تحول والطير رادم له
والله يوم صفق جناح بجناح وانصرم عليه
وينتهي الفلم قبل المغرب بدقائق
ويجيبه الله
بعد ماكسفتبنا
والحمدلله على كل شي
نرجع لقصة الموتر
الموتر الله يسلمكم سفاري فتك
وحنا نطرد ادوس ويحن الموتر ولا يمشي
بسم الله الرحمن
ياعيال الموتر عيا يمشي
حولت اويق تحت الموتر الى الزيوت بكل محل
آمنت بالله
خلينا العامل عنده لين طرحنا الحبارا
لقينا لي زيت القير اللي يجي من الاديتر هو اللي يهرب
ضاربته حصاه ورزق من الله عند القفيز
صلحناه واتصلنا من الثريا على واحد من الربع بالديره
قلنا جب زيت قيراوتماتيك
لانه مايوجد الا بالوكاله وغالي
والا حق BMW مناسب وسعره رخيص العلبه 35 ريال
ولازم محقان ابوخرطوش طويل اصغر مقاس
لان فتحة التعبئه صغيره ويجي صاحبنا الفجر
ونحط علبتين لان مامعنا عيار
نقيس على تبديل الموتر
واسف على الاطاله
وهذي الحباري وماتفعل
اتمنى لكم وقتآ ممتعأ
كما ارجو للجميع المتعه والصحه والعافيه
وان ينال الموضوع على اعجابكم
وانتظروا تقريري عن الكراوين لاحقآ
تحياتي للجميع ودمتم بخير
هذه بعض الصور ومن كثرتها الحقيقه اختلط الحوا مع البسباس
ولكن سوف انقي مايعجبكم ان شاء الله

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نسيج \| في مثل هذا الوقت في العام الفائت تم مداهمة منزل الرمز الاستاذ	محروم.كوم	منتدى أخبار المواقع والمنتديات العربية والأجنبية	0	03-17-2012 04:10 AM
نسيج \| في مثل هذا الوقت في العام الفائت تم مداهمة منزل الرمز الاستاذ	محروم.كوم	منتدى أخبار المواقع والمنتديات العربية والأجنبية	0	03-17-2012 03:20 AM
مقناص الساحل الغربي 2011 جديد (( مذخور ))	محروم.كوم	منتدى أخبار المواقع والمنتديات العربية والأجنبية	0	12-13-2011 10:30 PM
حباري الروياء والحبارى وبيضها (( مذخور ))	محروم.كوم	منتدى أخبار المواقع والمنتديات العربية والأجنبية	0	06-28-2010 12:50 AM
يتقاضى مليون درهم عن بطولة مسلسل الوسمي: لا خلاف مع الجسمي وهذا ما حصل لي مع أحلام العام الفائت!	{ مجنــۈنه .."	أغاني, كلمات الاغاني , صور فنانين, فيديو كليبات	28	02-11-2009 03:37 AM