حزام الأمان ... ابو الشبرميات

محروم.كوم · #1 06-24-2012, 03:10 PM

بسم الله الرحمن الرحيم
الأخوة والأخوات الاعضاء والزوار الكرام
السلام عليكم ورحمة الله وبركاته

قبل كم سنة أصدرت إدارة المرور قرارات مهمة لسلامة المواطنين والمقيمين
منها تطبيق ربط حزام الأمان
وصاروا الناس يربطونه عند الإشارات فقط
او اذا شاف رجل الامن يدور عند الاشارة
سحبه على جسمه ومسكه بيده اليمين لين يعدي ويبعد عنه
يعني لو يجيه رجل الأمن ويطلب منه رخصة او استمارة
كان انطلق الحزام بقوة راجع لمكانه
وممكن يلخ وجه الموظف من قوة الرجعة

المهم كنا معزومين على عشاء عند واحد من الربع في البديعة ومرني واحد من الربع
معه فورد قديم يمكن انه موديل 92 او حولها
المهم ان الحزام من المصنع ما احد سحبه الى ذاك اليوم
ركبت معه ويوم مشينا والا قدامنا تفتيش في ظهرة البديعة
قالي الرجال اربط الحزام لا يعطونا قسيمة
أنا كنت متعود أربطه في السفر أما في الديرة فمثل باقي المواطنين
قلت لخويي ابشر وانا اللي اسحب الحزام واربطه
تركته لين وصلنا لربعنا فكيته ونزلنا يوم دخلنا على الضيوف والا المجلس مليان
وهم يقومون يسلمون وكل واحد يسلم علي يقولي عسى ما شر ؟؟؟
أنا احسبهم يسألوني عن التأخير ارد وأقول : ما يجيك الشر مثلك خابر الزحمة وتفاتيش هالمرور في كل ربعة
خلصنا مسلمين على المعزومين وجلسنا نسولف معهم
يوم خذنا شوي قال اللي جنبي : عسى ما شر ؟؟؟
قلت : وشو شره ؟؟؟
كل الربع يقولون مثلك
قال : انت ما شفت ثوبك ؟؟؟
قلت : توني لابسه وجديد وأول لبسة له
قال : فيه خط من الكتف لين الوسط بشكل افقي
وخط ثاني على منطقة الخصر
كنك لابس لك مجند
وانا اللي اناظر والا هاك الخط اللي متكون من غبار وزيت حق حزام الأمان
وإنّا اللي اكعها ضحكة والا خويي راعي السيارة مقابلني ويضحك
قلت له : إيه اضحك لكن الثوب والله ان تغسله ويرجع جديد زي ما كان
والا الله يعينك تفصّل واحد ثاني بداله
أنا قايل لك ما نبي نجي في موترك ذا الكحيان

وانت اللي اصريت قال : الله يعافيك اللي نظفت لي حزام الأمان
أربطه اذا رجعنا ولك عندي 100 ريال فوق الثوب
وراحت ذيك الليلة والربع ما لهم سالفة الا ثوبي وحزام الرجال
وسلامتكم
...

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تسجيل 877 مخالفة عدم ربط حزام الأمان في العين	♕ وليد الجسمي ♕	اخبار محلية و عالمية	2	12-24-2011 10:26 PM
أهمية ربط حزام الأمان	محروم.كوم	منتدى أخبار المواقع والمنتديات العربية والأجنبية	0	09-02-2011 05:40 AM
45 ألف مخالفة عدم ربط حزام الأمان بدبي خلال 6 أشهر	محروم.كوم	منتدى أخبار المواقع والمنتديات العربية والأجنبية	0	08-13-2011 04:50 PM
((أهمية حزام الأمان في السيارة))	محروم.كوم	منتدى أخبار المواقع والمنتديات العربية والأجنبية	0	08-12-2010 04:40 PM
توقيف انذار عدم ربط حزام الأمان لأي مرسيدس أو bmw	محروم.كوم	منتدى أخبار المواقع والمنتديات العربية والأجنبية	0	03-28-2010 05:50 PM