|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام عليكم ورحمة الله وبركاته اليكم هذه السالفه القديم بالحيل على وقت بيوت الطين والنوم بالسطوح وان شاءلله تعجبكم سنة من السنين على وقت بيوت الطين كان الناس ينامون بالسطوح بالصيف هو عليل والاناره بالديره كانت ضعيفه تقول لمبه سهاريه والنجوم عد وغلط كل النجوم تشوفها من صفاوة الجو ماكنا نسمع الا صوت مكاين الكهرباء اللي عند المعهدالملكي الفني بالملز بالرغم بعد المسافه بينا عشرات الكيلوات والظاهر ان مكائن منول كناديسها حاطينها مع الاسلاك ويجينا صوتها مع الاسلاك الى البيت بس صوتها يطربك يخليك تنام لو مابك نوم ماغير تحن تقول خلوج والنهار مانسمع صوتها موليه نعود لسالفتنا حتى ماتزعلون على تطويل السالفه والا انا ودي اقطع بكم نفود الدهناء ريوس بالسواليف المهم كنت انام انا وواحد من اخواني في قاطع للسطح لاسرير ولا كمادينه الفراش مطرحه مشجره قطن ومفرش يسمونه عبروص او هو برنوص مثل كذا وشرشف مشجر واحيان ناخذ جلال صلاة الوالده الله يرحمها خفيف وزين النوم فيه قمة الاناسه انتهاوش عليه واذا جينا ننام اخذنا طاسه ماء من الزير والا القربه ونحط الطاسه بيني انا وخوي ومرات كاس قزازاللي ضد الكسر اللي يجي ثلاثه الوان اخضر وبني وابيض وثقيل بدون ماء ويوم صار ذيك الليل وانا اصحى من النوم نصف الليل تقريبا الساع 6 بالغروبي ماكنا نعرف الوقت الا بالغروبي وشوي شوي بدوا الناس يغيرون ساعاتهم بالزوالي وانا احسب الزوالي الفرشات واستغرب وشلون يغيرونه بالزوليه وشلون مدري والساعه 6 غروبي تعادل 12 تقريبا وانا اصحى شبعان نوم وانا اتلفت يمين ويسار مثل اول مايصحى الواحد لازم يتلفت يجس نبض الجو المحيط به وانا اشوف على فراش اخوي بستين قطوتين يعني كاو بالعنقليزي يعني بسه وانا اعرك عيوني شوي ابي النظر يصفاء شوي وانا احول ابعدهن عن فراش اخوي لايوسخن عليه وجلال صلاة الوالده ماخذه اخوي وانا اصوت لهن بس كش بش وهن ماغير يتحركن وعيين لايروحن احاول ابعدهن وهن في محلهن ماغير يتحركن رادات بي وانا اخذ الكاس واتويقع عليهن وانا اطوح به عليهن وهو يفز اخوي مع صرخه هه وشفيك علي قلت فيه بستين على فراشك وخفت يوسخن اثاري البستين رجلين اخوي يحركهن وهو نايم وانا احسبهن بستين زاد امنهن عيين يروحن وانا احط راسي واخوي ماسك رجليه لا من قوة الضربه جت في عرش الرجل ويوم صار الصبح اشوف رجل اخوي تقول منكب عليها حبر من الزراق والاورام واذا بغى يمشي يعرج الحمدلله ان ماكان معي الشوزن كان ناخل رجلين اخوي نخل كان الماء لاشربه ماغير يخرخر من رجليه انتهت السالفه وارجوا ان اكون وفقت في سردها لكم وقبل الختام سبحانك الله وبحمدك لااله الاانت استغفرك اللهم واتوب اليك وهذي لكم هديه __DEFINE_LIKE_SHARE__ |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
راعي العجراء والعسيب | محروم.كوم | منتدى أخبار المواقع والمنتديات العربية والأجنبية | 0 | 04-23-2012 07:20 PM |
راعي العجراء الذهين | محروم.كوم | منتدى أخبار المواقع والمنتديات العربية والأجنبية | 0 | 02-15-2012 01:40 PM |
عرس راعي العجراء | محروم.كوم | منتدى أخبار المواقع والمنتديات العربية والأجنبية | 0 | 09-26-2011 02:30 PM |
من سواليف راعي راعي العجراء (ثوب العيد والخياط الباسكتاني ) | محروم.كوم | منتدى أخبار المواقع والمنتديات العربية والأجنبية | 0 | 09-16-2011 02:10 PM |
من سواليف راعي العجراء (عزيمة القعوس لراعي العجراء ) | محروم.كوم | منتدى أخبار المواقع والمنتديات العربية والأجنبية | 0 | 09-10-2011 01:40 PM |