يا هني بنات البدو يرعن بقفره*قصه من الموروث الشعبي *محمد الظاهري

محروم.كوم · #1 11-23-2011, 01:20 AM

السلام عليكم ورحمه الله وبركاته
اخواني .اعضاء وزوار ومشرفين
حياكم الله في سالفه جديده
ومن عمق ماضينا العريق وماضينا الجميله
والتي ترسم لنا في ذاكرتنا قصصهم وخيالهم وقصائدهم
الرائعه
لا اطيل عليكم واترككم مع هاذي السالفه
واتمنى انها تحوز لكم
يقولون العرب من اول ان فيه رجال متزوج وعنده بنت
والبنت عمرها صغير حول الخمس سنوات
عاشت هاذي الفتره مع ابوها وامها وبعدها في فتره
ام البنت جاها مرض وماتت ,الله الدايم
وصار الرجال وبنته عايشين والرجال عنده غنم وعنده طرش
الرجال صار مهموم في تربية بنته وحطها عند اخوه
واخوه متزوج وعنده ولد واسمه صقر
المهم ارمست السنين وفكر الرجال ابو البنت انه يحج
وراح مع هاك القافله على ذيدانهم
وبعد فته رجعت القافله بس الرجال ما رجع
راح اخوه يم كبيره وقال اخوي وينه
قال اخوك مرض في الروحه وحج معنا
وفي الرجعه زاد عليه المرض ومات
وانصدم اخوه في وفاة ابو البنت وصار يحب البنت لئنها
من ريحة اخوه الي مات ربها عمها على احسن تربيه
وكان يدلعا من اقصى الحدود واذا البنت بكت يبكي ورها
لئن ما يحب انه يشوف البنت حزينه
وكان يلبسها ازين الثياب مرت السنين ومرت والبنت وعمها وصقر ولد عمها كبرو
وقام عمها وزوجها لولده صقر ولد عمها
وعاشت معه سنين قليله وكانت ما تبيه لئن صقر فيه خمول
ولا فارس ولا هو بخيال
والبنت من اول يحبون الولد الفارس والشجاع والي يذكرونه اهل الديره
وفيه يوم من الايام راحة البنت لعمها وجلست عنده
وقالت يا عم قال سمي
قالت انت ابوي والله مدري وش اقول
قال يا بنتي وانا ما ودي تزعلين والي تبينه انا اوفيه لك
قال يا عم صقر ما عاد لي فيه هواة وهو ما يروح ولا يطلع مع الناس ولا شي
قال عمها ايه والله مدري وش اسوي فيه
قالة انا ابي اتطلق منه يا عمي والسبب مثل ما قلت لك
قال ابشري انا اخليه يطلق ويوم جاء صقر قال طلق البنت
انصدم الولد ولزم عليه ابوه وطلق البنت
وكان فيه وااحد يجي للديره وتاجر يبيع البدو ويسمونه ابو بكر العنقري
وكان الناس يحترمونه ويقدرونه وله مكانه
وسمع بالبنت انها مطلقه وبعد فتره راح ابو بكر
لعم البنت وطلبها ووافقة عليه وتزوجها
والسالفه صارت في القيض
ويوم جاء الوسم وريحة الامطار عزمو اهل الديره انهم يشدون يدورون الربيع ويتبعون حلالهم
وتئثرة البنت في شديد اهلها والديره وحزنت على الحياه الجميله
وتذكرة مراتع اهلها من اول ومنازلهم القديمه
وهي سكنة في بيت الطين
وصار صقر ولد عمه فارس وخيال والناس ما عندها إلا صقر
راح صقر رجع صقر وصار شجاع
وهي في هاك اليوم راحت ورقة سطح البيت تبي تمد نظرها
لديار اهلها في البر واطراف مشارف ديارها القديمه
المهم
هاضة مشاعر البنت مثل ما يقولون
وما تدري ان ابو بكر يسمعها
وتقول...
يا شيب عيني من قعودي بقرية === ومن بيقرانٍ ربطها في حلوقها
يا عنك ما سيّرت فيها لجارتي === ولا سيّرت رجلي لبيعات سوقها
هني بنات البدو يرعن بقفره === ريح الخزامى والنفل في غبوقها
شوفي بعيني للبيوت هدمت === والزمل شالوا غالي القش فوقها
شفي بهم (صقر) تباريه عندل === ربيقيةٍ در العرابا علوقها
أيضا إلى شدوا تباريه هجمه === حم الذرا ما يحلب إلا شنوقها
ورد العنقري عليها بسرعه
وقال
روحي مني إلى (صقر) عطية === عطية عنقري ما لها من يعوقها
قالت البنت يا بو فلان انا اسلي خاطر وابي اتونس
وقلة القصيده بس

قال لا وطلقها العنقري عشان يحفظ على كرامته
وعلى قصيدته الي قالها جت البنت تبي تزين وتعدل لكن ما فيه حل
قام يسئل العنقري عن ديار اهلها الي اتجهو يمه
وحصلهم وارسل البنت لهم ويوم ثالث ووصلت للديره
وبعدها في فتره قام عمها وزوجها صقر ورجعة له
وبعد فتره راح العنقري لديار البنت واخذ معه ناقه جربا يبي يختبر اهل البنت
وكئن العنقري فقير ويوم اقبل على البيت وإلا ينطحه صقر ويرحب فيه
ويقرب الناقه عند البيت وقال العنقري انا ما عندي غير الناقه هاذي يا فلان
ومدري وش قال ابشر في الابل يا ابو بكر
ويوم رجع العنقري لديرته ارسل كم ناقه للعنقري
ويوم وصلت العنقري قام عليها وحملها من اناعم الله عيش وسكر وقهوه
وغيرها وقال رجع البل لصقر

اخواني سالفتي انتهت
ارجو ان السالفه نالت لكم واعذروني اذا حصل اي تقصير
كتبتها لكم على عجل
هاذا ما اعرفه عن سالفت البنت وهاذا ما اعرفه
واتمنى ان لا يكون اي تقصير
واذا فيه اعذروني
وتقبلو تحيات
محبكم
محمد الظاهري

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لاواعشيري دروب العجـز غونهوقصه من الموروث الشعبي من اخوكم محمد الظاهري	محروم.كوم	منتدى أخبار المواقع والمنتديات العربية والأجنبية	0	10-19-2011 09:00 PM
مــن روائع قـصص العشق قصه من الموروث الشعبيمـحـمد الظـاهـري	محروم.كوم	منتدى أخبار المواقع والمنتديات العربية والأجنبية	0	09-14-2011 11:00 PM
محمد الظاهري مشرفاً لخيمة السوالف الشعبية	محروم.كوم	منتدى أخبار المواقع والمنتديات العربية والأجنبية	0	08-31-2011 02:50 PM
محمد الظاهري: عودة نحو 900 مواطن من مصر	الـدانـة	اخبار محلية و عالمية	6	02-01-2011 10:26 PM
من الموروث الشعبي	محروم.كوم	منتدى أخبار المواقع والمنتديات العربية والأجنبية	0	06-05-2009 06:00 PM