الفزعه بين الناس لاتفوتك (تغريزه يحبها قلبك )

محروم.كوم · #1 09-30-2011, 12:20 PM

السلام علاكم ورحمة الله وبركاته
اليكم هذه السالفه
القديمه جدا قبل خمس وثلاثين عام اواقل بقليل او ازود بقليل بس اتذكر اننا ساكنين بذاك البيت الطين وطالعين منه اكثر من الثلاثين سنه ومن هنا ربطت التاريخ واسف اذا اخطيت بالتقدير

وهي عن الفزعه
في سنة من السنين طلعنا في رحله بريه مع شباب ذلك الوقت شيبان في وقتنا الحاضر وكان الوقت شتاء والفياض مملوه بمياه الامطار وربيع وخير كل فيضه نجيها افضل من الثانيه وكنا في سيارتين جمس دفرنسين يعني دبل
والسياره الثانيه ددتسن ابيض اذكر ان مراتبه زرقاء مدري وش مضله
المهم تمشينا زين الفطور في روضه والغدا في روضه والنوم نبعد عن الفياض السماء كلها رعود وبروق شباب واذهان بالحيل متوسط اعمار نا 19 سنه الى ثلاثين او خمس وثلاثين سنه
ويوم جا يوم الخميس وحنا نجي بطرف ذيك الفيضه ونصلح غدانا ونستانس ونعين من الله خير ونتغداء ونصلح الشاهي ويوم جاء مع العصر قلنا يالله نمشي نتمشى وحنا نجي نبي نحمل العفش وهو يصقط الموتر الجمس بطرف الفيضه على وجهه شغل الدبل مافيه فايد نشغل المساحات هم مافيه فايده نفتح باب نصك باب قال هذا مكاني
الارض مع الحفر والدفن الماء وصل تحت السياره وفتحنا لنا فيضه جديده ماهي بالخارطه
اشوي يوم توسط الموتر بالماء نحاول فيه مامن جديد والجمس ثقيل لو انه الددسن زميناه زم الى الاسفلت او الى الديره اذا لزم الامر
وخذ يالحفر والدفن ونقل رمل بالددتسن من طعيس ماهو بعيد عنا وتجميع حجر من الضلع طبعا على الددتسن وصار الددتسن مثل عربية الافغاني ماغار سردادي مردادي
وفتحنا شغله جديده بنقل الرمل والحجر
اشوي الا ذيك السحابة السوداء القريبه اللي خلت النهار ليل وطامنه بالحيل لو تنقز ضربته براسك وصار براسك صعرور ويمكن تنفلق
يوم شفنا السحابه بالصراحه خفنا على انفسناء من سيلها قلنا يالربع نزلوا الخيمه اللي بالجمس والاغراض اللي نبا نحتاجها وحطوها بالددتسن ودوروا لنا ارض دعث وزينه وقريبة من عندنا وابنوها
اذا ماطلع الجمس وامطرت علانا جيناكم وراحوا ثلاثه وبقينا ثلاثه حاولنا فيه مافيه فايده وبرد وماء وطين والوقت العصر وسحابه علانا وتعب يحبه قلبك شوي يوم بدت تمطر يوم ضاقت صدورنا
اشوي الا هالدتسن اللي اقبل علانا وهو يوقف عندنا ويحول من الددتسن ذاك الرجال
اللي عمره بالستين السلام علاكم وعلاكم السلام ماغر ها لسلام ولاقال كلمه غيرها
وهو يطب بوسط الطين وينسدح تحت الموتر وخذ يالتبريح وخذ ياشغل والله الرجال شجعنا من جديد بس حنا تعبانبن والرجال ولا كلمه الا شغل ودفوا معي
حاول مافيه فايده وهو يدق سلف ويمشي من عندنا ويم ضاقت صدورنا عقب ماتشجعنا

دخل علينا الليل واضلمت العين
وفتر الحيل قلنا الليله نومنا هنيا يوم اخذنا 20 دقيقه يوم رجع علانا راعي الددتسن
ولاه محمل الددتسن بطانيات وفرشات وموكيت وهو يدخل تحت الموتر وخذ ياتبريح وحنا كل واحد ماسك له كفر وشيل من هالطين وغرف من الماء وهو يقرش هالبطانيات والموكيت تحت السياره يوم صار طريقها مسفلت لو تدفه من غير تشغيل طلعت قال شغل وانا اشغل وشوي يوم طلعت طبعن البطانيات والموكيت راحن تحت الطين ماعاد تشوفها يوم طلعنا وهو يدق سلف ومع السلامه وهو يمشي بس عرفنا اتجاهه منين جا وعرفنا ان بيته قريب منا

جلسنا ذيك الليله تعبانين ويوم صار من باكر وجينا نبا ندخل وحنا ندور على بيته بنفس الاتجاه الا وهذا بيته والددتسن عند البيت واقف ونصوت له يوم ردت علينا ذيك العجوز
قلنا وين فلان قالت ماهو فيه قلطو تقهووا قلنا لوالله ماشين نبي ندخل الديره
وحنا نجمع من الربع فلوس اللي يقول معي ميتين واللي يقول ثلاث واربع ونجمع مبلغ حليل ونزل فرشنا عند البيت قلنا ياخاله افلان ماقصر معنا فزع معنا فزعة مايسويها قبله ولابعده احد وندري ان فرشكم راحت بهالطين ويمكن تحتاجون فرش ولكن هذا فرشنا لكم وحنا نزلها بالارض
ويمكن تحتاجونه لو جوكم ضيوف وحنا نبا ندخل الديره وهذا الكيس عطيه فلان
قالت العجوز والله لو اشيل منكم ريال او اخذ من فرشكم ان يوصل حد طلاقي افلان واعرفه
انتم تبون تقلطون حياكم الله انتم تبون تحطون الفرش وتمشون تراكم بتسببون بزعل فلان علي اوطلاقي فلان اعرفه مايسوي شي يبي عليه مقابل الا من رب العالمين
ياخاله عدلي بدلي قالت يعيالي طالبتكم طلبه لاتتسببون علي بزعل فلان انتم سويتوا اللي علاكم وماقصرتوا اعتبروها رديتوا المعروف بجيتكم وجزاكم الله خير
قلنا ياخاله ان شاءالله ماتصل هالمواصيل
يوم احرجتنا وخجلنا منها اشد الخجل من زين كلامها وترحيبها
قلنا لوالله ياخاله مانبي اللي يكدر علاكم صفوتكم وجزاكم الله خير وسلميلنا
على فلان وبيض الله اوجيهكم عسى السعاده ماتفارقكم
وحنا نحمل فرشنا وندخل والله ياهو معروف ماينسي
تعتقدون نلقى مثل هاللحية الغانمه في هذا الوقت الحاضر او انقطع المعروف بين الناس
الله لايجيب هذاك اليوم فما زلنا بخير ان شاءالله ارجوا ان تكون السالفه اعجبنكم واسمحوا لنا
على التقصير
وشين التعبير
وفي الختام
سبحانك اللهم وبحمدك لااله الاانت استغفرك
واتوب اليك
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مقناص خفيف جرابيع يحبها قلبك	محروم.كوم	منتدى أخبار المواقع والمنتديات العربية والأجنبية	0	09-26-2010 10:50 PM
احلا مكرونة يحبها قلبك	محروم.كوم	منتدى أخبار المواقع والمنتديات العربية والأجنبية	0	07-24-2010 05:50 AM
الفزعه تكفونتكفون عندي وايت مغرز تغريزه قويه	محروم.كوم	منتدى أخبار المواقع والمنتديات العربية والأجنبية	0	06-11-2010 01:46 AM
محاشي يحبها قلبك	محروم.كوم	منتدى أخبار المواقع والمنتديات العربية والأجنبية	0	09-07-2009 06:00 AM
محاشي يحبها قلبك	محروم.كوم	منتدى أخبار المواقع والمنتديات العربية والأجنبية	0	09-07-2009 05:30 AM