سالفة راعي العجراء والباص (خط البلده)

محروم.كوم · #1 09-24-2011, 10:20 AM

السلام عليكم ورحمة الله وبركاته
اليكم هذه السالفه القديمه جدا اربعين سنه او ازود
راعي العجراء وتوبيس خط البلده
بس ماهو خط البلده الاصلي اللي انتم خابرين
كان خط البلده بالرياض ياخذ على الراكب اربع قروش ومركزهم تجمعهم البطحاء
منهم اللي يصوت للشميسي واللي يصوت للعمائر الملز واللي يصوت لمنفوحه والمطار
مافيه عليا ولا سليمانيه ولا حتى النسيم
وكان مطار الرياض يبعد عن المدينه سبعه كيلو يعتبر بعيد جدا ولكن الوزارات في طريقه
المهم كان معي ابن خالي جاي من الديره ولامعنا سياره والساعه يمكن 10 مساء العالم هاجده فيه حركه بس قليله وكان ليله جمعه
قال ابن خالي وين نروح الليله ودنا نطلع ملينا البيت ودنا نتمشى قلت مايخالف ابشر
معي ريالين يوم الريال له عراوي يالله تشيله من ثقله
لوتبين اطلعك سطح القمر بهالريالين طلعتك بس لايضيق صدرك وانا ابو عجراء
ونطلع من بيتنا بالشميسي الاوذاك الباص خط البلده ونشر له وياقف ونركب معه بالمرتبه الخلفيه ونقعد نسولف والركاب اثنين او ثلاثه معنا ولكن صاحب الباص ماعنده مشكله في الروحه للبطحاء يروح حتى يمسك سرا بالمواقف للصباح كالعاده كل مابكر احسن له يضمن الركاب بالصباح الباكر
المهم وصلنا البطحا عطيناه ريال ورجع الباقي اخذ طبعا 8 قروش ورجع لنا 12 قرش
حولنا من الباص الا فيه باص يقول صاحبه المطار المطار المهم ونحول من هالباص
اللي جاي من الشميسي ونركب الباص اللي رايح للمطار صاحب الباص العاده في هذا الوقت المتاخر ماياصل المطار ينزلون الركاب قريب مافيه سكن بالمنطقه حول المطار والوزارات ومقفله ليل وباكر جمعه اذا مشى كيلو نزلوا الركاب وعود للبطحاء
المهم حنا راكبين بالمرتبه الاخيره ودق سواليف مفتحين القزاز والهواء براد ودق حنك
نزلوا الركاب مابقى الا انا وصديقي ابن الخال
السواق ماغار يتلفت علينا كل شوي يبينا نقول له على جنب وننزل وحنا ماغار نسولف
السواق طال عليه مشوار المطار وصاحي بدري جاه النوم ولازم يرجع الباص للمواقف بالبطحاء وحنا ماغار نسولف المهم وصلنا المطار وقبل الدوار قال انزلوا حاسبناه ونزلنا
هو يبي ياخذ الدوار ويرجع للبطحا ء واذا لقى معه ركاب على الطريق اخذهم
المهم نزلنا وقطعنا الشارع نبي الباص اللي راجع للمطار يبي البطحاء يرجعنا للبطحاء ثم باص الشميسي المهم اشوي الا هذا الباص جاي نشرله وهو يوقف بطحاء قال ايه البطحاء يالملعن طول الليل وانا في مشواركم للمطار على بالي بتسافرون وانتم تبون امشيكم 8 بثمان قروش انقلعوا لابارك الله فيكم
الحين احول عليكم واصفق كل واحد بكف حتى يستدير راسه ماعاد يدل بيتهم اثر الرجال منحشر حشرة ورر
غاديات خدوده من القهر والسهر قفى عود ناظم الغزالي وعيونه تقول سفتي دوريه
وخذ يانحشه وحنا نزبن المطار يوم اكدنا انه راح ولا نام على دركسون باصه ونطلع للشارع حتى لقينا باص ثاني فرح بالركاب الجدد يعني رايح رايح للبطحاءوعلى دربك خذ خشبه
انتهت السالفه وارجوا ان اكون وفقت في اخراجها لكم والعذر والسموحه على القصور
وقبل الختام تسلم علاكم عمتي منيفه
وبعد الختام
سبحانك اللهم وبحمدك لااله الا انت استغفرك واتوب اليك
محبكم راعي العجراء
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة راعي العجراء والحصني	محروم.كوم	منتدى أخبار المواقع والمنتديات العربية والأجنبية	0	09-23-2011 05:10 PM
من سواليف راعي العجراء ( قصة الخروف والشماغ )	محروم.كوم	منتدى أخبار المواقع والمنتديات العربية والأجنبية	0	09-17-2011 01:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM
من سواليف راعي العجراء (الشايب الحمقي والقميريه)	محروم.كوم	منتدى أخبار المواقع والمنتديات العربية والأجنبية	0	09-08-2011 05:20 PM