يالله حي الجميع والسوالف الممتعة ابي اشاركم بسالفة وقعت ايام الطفولة هذا سلمكم الله كنت ناجح من صف ثالث ابتدائي وكان الوالد الله يرحمة ويرحم اموات المسلمين وعدني بهدية النجاح للسفر يم خوالي الساكنين بمدينة لاننا ساكنين بقرية المهم وصلت المدينة عند خوالي وبعد يومين من قدومي وجدت زميلي وجاري هاه وش جابك قال ابد جيت عند اخوي صار اخوه بنفس الحارة الي اسكن فيها عند الخوال حضر خويي وذهبنا للمسجد مع الرجال وجلسنا بالمسجد الا وذاك المطوع يحضر لنا ويقول عشتو عيالي الي يصلون عطانا خمس ريال لكل واحد وين الخمس ريال ذاك الوقت المهم فكرت انا وخويي وش نسوي بالفلوس قلنا نروح للمراجيح الي بوسط الحارة و المصنوعة من خشب واصحابها من العبيد كلنا عبيد الله قلنا لهم نبي نلعب قالو الساعة بخمس ريالات تقل يدرون ان الي معنا خمس ريال وافقنا بعد مرور خمس دقائق قالو خلاص انتهى الوقت طبعا هم اكبر منا بالسن الواحد بالعشرين تقريبا صرنا نبكي من الموقف الفلوس راحت والعب ماحصل الابذاك الشاب الي عمره بالعشرين مهندز نفسه الثوب الجديد والكعب العالي الله يكرمكم والعطر الي تشمة من مسافة مئة متر شكل الرجال ينصب الله والعالم وش فيكم علمناه بالقصة قال افا والله لادعس على خشومهم دلوني مكانهم اتجهنا مع خوينا الزير كانواصحاب المراجيح بداخل دكان صغير مقابل المراجيح وعند الاقتراب طلعو الثلاث من الدكان قلنا لخوينا ابى الفزعات هذولا هم قال هم ولا الرجال خوينا يطش الله يكرمكم جزماتة ويعطي الهواء جناح وحنا وراه والاشخاص يطردونا ويردد خوينا انحاشو هذولا امس ضربوني انحاشو وفكنا الله منهم وخوينا من ذيك السالفة ماشفناه امل ان السالفة اعجبتكم وسردت القصة بالكلام العامي بدون تكلف تقبلو تحياتي