وافترقنا يا....(((سعود))) قصة حب كويتيه روووووعه

مطعون برمش العيون · #1 01-02-2009, 09:31 PM

السلام عليكم ورحمة الله وبركاته

طبعا هذي قصة وحده كاتبتها بصراحه شويه عليها كلمة رووووووعه
وللامانه انا نقلتها لكم من منتدى كويتيات من الكاتبه العضوه غوالي 76

يللا نبدا بالبارت الاول

((((( الجزء الأول )))))

بطلة قصتي إهي منار ... عمرها 17 بالثانوية العامة / القسم العلمي
بنت حلوه ونعومة فيها شبه كبير من المذيعة اللبنانية ( ريما مكتبي ) .. طموحة وشاطرة واااايد بدراستها يعني أم قلبين ..
حيل على نياتها .. وعيبها انها صريحة وما تعرف تجامل كلللللللش

اختها ( حنان ) الدبدوبة اللي كانت عكس منار .. يعني كسولة وتحب تنام واااايد وفالحة بس بالتلفونات يعني 24 ساعة تسده من وحدة وتكلم الثانية >> يعني عندها هواية التلفون
بس كان شوي عندها مغامرات !!!!!!!!!!! وطبعا منار كاتمة أسرارها صج ما كانت ترضى بهالشي بس ملت منها واهي تنصحها
وقبل لا أنسى حنان هذي بالغصب خلصت الثانوية ودشت معهد وبدال لا يكون سنتين كملت السنة الثالثة فيه .. يعني السنة الياية تتخرج من المعهد ....
وااايد تحبها منار لأن حنان قلبها أبيض وتموت على خواتها ...

ريم >>> اختهم العودة متزوجة وعندها بنت وولد .. وهذي لسانها متبري منها من كثر ما يزفها زوجها وحاكرها تحط حرتها بمنار .. وتتصيد عليها الغلط ..

ونروح حق لولوة >> هذي أصغر من منار بسنتين كانت حليوه بس مالها شغل بأحد .. منار كانت تحبها وتنصحها لأنها كسلانة حييييل بالدراسة وشاطرة بس بالمشاغبة في المدرسة وزبونة دايمة عند الأخصائية الاجتماعية ..

أخوان منار ناصر .. وفراس

فرعون .... قصدي ناصر >>>> يمااااي يخرع شراني وحجر ونوعه يحب يراقب ويتكم بخواته .. ويبي يكون اهو ريال البيت مع انه توه بأولى ثانوي ...
بس أبو ناصر مو معطيه مجال يتحكم طول ما اهو عايش بالدنيا

فراس .. العكس تماما واايد حليو ويحب خواته وحده كووووووول وديمقراطي
وفراس توه عنوني يعني بالمرحلة المتوسطة

أم ناصر ست بيت شاطرة بس عيبها ما تعرف شي اسمه قراءة وكتابة يعني مو مكملة إلا أولى إبتدائي .. وتاركة التدريس حق أبو ناصر لأنه كان وايد شاطر .. بس ظروفه ما خلته إلا يكمل الثانوية واشتغل على طول

مستوى أهل منار متوسط وناس بسيطين جدا وعايشين في بيت حكومة متواضع وعايلتهم خوش عايلة محافظة والكل يشهل لهم

نرجع لبطلتنا منار .. كانت حدها كشيييييييييييخة بس مو على حساب أبوها يعني كانت تيمع لها جم فلس وتروح تشتري لها من هالماركات الحلوه ..
((((( الجزء الثاني )))))

خلصنا تعريفنا بعايلة بطلتنا منار ...
وباقي الشخصيات راح تظهر أثناء سرد القصة ..

الوقت شهر 6 السنة 1995 م >>> يعني وقت امتحانات الثانوية العامة ...

منار شادة حيلها تبي تييب نسبة حلوه تدخلها كلية الطب >> حلم أبوها ولأنها كانت تموت على شي اسمه أبوها فكانت تدعي ربها ليل ونهار إن يوفقها وتحقق هالحلم وترضي أبوها وتفرحه ..
بس اهي كان طموحها الهندسة تحب تبني وتخطط وتصمم ..
بس كل شي يهون علشان خاطر أبو ناصر ...

الساعة 5 الفجر ومنار قاعدة على سريرها وبناء على أوامر الرئاسة العليا بالغرفة ((( حنان ))) تم إغلاق الإضاءة واكتفت منار بلمبة الأبجورة .. مسكينة شتسوي البيت صغير ومضطرة تكون مع حنان - اللي عكس شخصيتها- بنفس الغرفة ..

منار حدها مندمجة بالدراسة وحنان تتقلب مو عاجبها ليت الابجورة ودها تبط راس منار بأقرب شي عندها ..
ومنار تدرس وتدرس لأن ما بقي إلا أسبوع على الامتحانات .. ماوعت إلا الساعة 12 الظهر واهي مواصلة مانامت طول الليل وحست إنها حدها يوعانة ومشتاقة تقعد مع أهلها ..صار لها أكثر من اسبوعين واهي تشوفهم دقايق وعلى طول الكتاب ما يفارقها ..

صلت الظهر و راحت الصالة تحت ولقت الغالية امها تصلي ..
راحت المطبخ تشوف شنو الغدا لأنها مو قادرة تنام من اليوع ... وإلا تشوف مجبوس الدياي اللي يسوى .. وردت مرة ثانية الصالة ...

أم ناصر : هلا منورة حبيبتي تو ما نورت الصالة .. شفيج أعوذ بالله جنه ما أحد عنده امتحانات إلا أنتي .. عايشة على التوست وعصير البرتقال ..

منار : هلا يما .. وي شفيج الغالية كل هذا بقلبج لهادرجة ولهانين علي ..

أم ناصر : أكيد ولهانين عليج .. يالله يما قومي ساعديني خل نزهب الغدا ألحين بيرجع أبوج من الدوام وبتيينا ريم وعيالها عالغدا ..

منار : لا .. إييييييي حياها الله

أم ناصر : وشفيج تقولينها جذيه ؟

منار : لا ولا شي بس ريم إذا شفتها بتتنغز علي بحجي جنه السم وتغثني .. وأنا مالي خلق

أم ناصر : إنتي مالج شغل فيها .. كلميها عدل وإكلي معانا .. من متى ما تيمعنا ..

منار : إن شاء الله يما

راحت ام ناصر ومنار للمطبخ ..

وبنفس اللحظة تدخل ريم وعيالها خالد ونور .. مع ابو ناصر اللي كان توه راد من الدوام

منار دخلت الصالة واهي تأشر بيدها لخلودي اللي تموت فيه : هلا هلا بحبيب خالته .. ويركض خالد لحضن خالته .. وتقعد تبوسه وتلمه حييييل

ريم : ها شلونج منار ... وشلون الدراسة معاج .. إن شاء الله عاد تبيضين الويه مو تفشلينا ..

منار ساكته .. اهي واثقة بنفسها .. وبنص السنه نسبتها 95 % .. بس هذي سوالف ريم كله تحبطها ..

ريم :شفيج ماتردين ؟

منار : هاااااا لالا ولا شي ... بس أهم شي أحقق حلم أبو ناصر حبيبي

ريم : نشوف

منار طفشت وراحت لأمها بالمطبخ .. صج اهي مو شي بالطبخ .. ولا تعرف تفرق بين المقلة والجدر .. بس تبي تفتك من لسان ريم

وألحين الغدا جاهز والكل قاعد على الأرض .. أبو ناصر وأم ناصر .. ريم وعيالها ومنار منحاشة عن ريم قاعدة يم أمها

دخل فرعون ... أووووووه آسفة قصدي ناصر .. طبعا معطل ورايح مطعم مع ربعه .. يعني متغدي

ناصر : السلام عليكم

الكل : وعليكم السلام

ويروح ناصر يسلم على اخته ريم ويبوس عيالها ..

أبو ناصر : يالله ناصر حياك معانا ..

ناصر : لا يبا متغدي مع ربعي .. عن اذنكم باروح أنام مواصل من أمس
وصعد داره

وبنفس الوقت تنزل لولوه توها قاعدة من النوم ..وتقعد على السفرة تاكل بعد ما سلمت على ريم

وفراس الحلو قاعد بدراه يطالع التلفزيون ...
وحنان .. طبعا بدنيا ثانية إذا نامت 12 ساعة جنهم ساعتين .. يعني تو الناس عليها ما تقعد إلا المغرب .. معطلة وماعندها كورس صيفي ..
((((( الجزء الثالث )))))

بعد الغدا راح أبو ناصر علشان ينام شوي .. والحقته أم ناصر
اقعدت منار وريم ولولوة بالصالة ..

منار ودها تصعد بس دايما يقولولها لازم تجاملين الناس .. الصراحة ساعات تزعّل ..

منار أخذت خالد حبيب قلبها .. خالد عمره 3 سنوات واخته نور سنتين ما بينهم فرق بالعمر ..
قاعدة تلعبه وتبوسه .. وتوكله حلاو وعلوج وخرابيط ..

لولوة يالله تفج عيونها ..

ريم : هاو لولوة شفيج قاعدة ولا نايمة ؟

لولوة : ها لا ما فيني شي .. بس للحين ما صحصحت باروح ألعب كرة قدم ,,

وراحت يم الدرج تصارخ .. فرااااااااااااااااس ناااااااااااااااصر يالله تعالوا نلعب كرة

ريم : حشا لو مسمينج محمد احسن

لولوة بصراخ : شنوووووووو ريم شقلتي ؟

ريم : ولا شي بعدين عن الدفاشة .. خليج ناعمة شوي

لولوة : أنزين بالعيد .

تروح لولوة الحوش وينزل فراس وراها ويسلم على ريم
ويروح يلعب مع لولوة .. لعبتها المفضلة كرة القدم

منار وحيدة إهي وريم .. منار بينها وبين نفسها ( وااااي خلوني مع أم لسانين شاسوي
إذا رحت وخليتها بروحي ألاقي صوري بالجريدة ثاني يوم .. يا معود خل أقعد وأمري لله )

الساعة صارت 4 العصر .. ومنار حدها دايخة بتنام لحد الساعة 9 باللي وتقوم تكمل دراسه ... يعني ما كو وقت

نزلت حنان >>>>

منار : ما شاء الله الشمس من وين طالعة اليوم ؟ حنان قاعدة الساعة 4 غريبة

حنان : والله ما عجبكم قعد 4 ولا 5 ولا 6

راحت سلمت على ريم .. وشربت لها عصير .. واشتغلت تلفونات على كل الحبايب ما خلت وحدة ما دقت عليها

منار استأذنت وراحت دراها .. وانزلت أم ناصر وأبو ناصر وشربوا قهوة العصاري مع ريم

وحنان مستمرة بالتلفون ...

أبو ناصر : حنانووووو ... حنانووووو وصمخ ما تسدين التلفون
شهالحالة هذي ؟

حنان تخاف وايد من أبوها .. فسكرت التلفون على طووووووووول بدون لا تناقشه

وراحت باسته على راسه ..وقعدت تدلك ريوله .. طبعا أبو ناصر يحب التدليك حيل وخصوصا من إيد الدبدوبة حنان

يعني عارفة نقطة ضعفة .. بو ناصر يحب حنان بس ساعات تيننه بطلباتها اللي تكسر الظهر

واااااااااايد مسرفة ولا تخش لها فلس ينفعها ..

الكل قعد يضحك على حركتها .. حتى ريم اللي نفسها بخشمها اضحكت عليها

ريم كانت تتقبل حنان حيل .. بس مناااااااااار لااااا سبحان الله من الله جذيه ما يتوالمون

طلع أبو ناصر المغرب ..

وريم قاعدة مع أمها بالصالة ياكلون كيك ويشربون شاي ..

ريم : يما .. تتوقعين منار تييب نسبة تدخلها الطب

أم ناصر : إن شاء الله ليش لأ .. منار شادة حيلها حبيبتي .. وتدرس ليل نهار ، بس اليوم انزلت تغدت معانا لمن درت إنج بتزورينا ( أم ناصر تحاول ما تبعدهم عن بعض بكلمتها هذي )

ريم : معقووووووووولة منار تنزل علشاني ما أصدق .. هذي مغرورة وأنا مو عاجبتها ..

أم ناصر : لا يما منار قلبها نظيف وتحب الكل

ولولوة طبعا من طلع أبوها واهي شغالة تلفونات .. وأمها ملت منها وأصلا تعودوا على شكلها وإهي ماسكة التلفون ..

الساعة 10 .. ريم خذت عيالها وراحت بيت زوجها واهي طبعا عايشة مع أهله ومورينها الويل ...طباخ .. وكراااف ولا لها أي خصوصية عند حمولتها ..وزوجها كلش مو على قلبها
دايمن ينتقدها .. ومشغول عنها بتجارته اللي على قده

منار قامت مخترعة لأنها حاطه المنبه على الساعة 9 بس ما قعدت إلا 10 ونص
وااااايد وسواسية بالدراسة وتحس الدقيقة إذا ضاعت عليها بدون لا تدرس جنها دهر
بسرعة راحت الحمام وغسلت ويها وصلت اللي طافها وبدت تدرس على طوووووووول

يابت لها الخدامة بطل عصير البرتقال وتوست مع الجبن ..

أكلته واهي عينها مبققتها على الكتاب ... الساعة 3 الفجر .. خلاص حنان داخت من التلفونات
دشت بكل دفاشة على منار

حنان واهي تفتح الباب بقوة : قوووووووووة منار أم قلبين
منار : واي حنان حرام عليج خرعتيني
حنان : إي أكيد تخترعين .. وانتي مسوية إتحاد روحي مع الكتب
منار : قل أعوذ برب الفلق
حنان : عاد يالله منارو متى تخلصين من زمان ما سهرنا وسولفنا مع بعض ولا حتى طلعنا

منار : أدعيلي يا حنان أييب نسبة
حنان : يارب والله إنج تستاهلين يا بعد قلبي ..

ويت أقعدت يمها .. على السرير وتبوسها وتلمها
حنان : شوفي منارووووو أنا أول وحدة أصور معاج بالجريدة إذا تفوقتي

منار تضحك : تامرين أمر يا حنونة

حنان تطالع كتب ودفاتر منار الكيميا والفيزيا وفوق راسها علامة استفهام ؟

قطت الكتب وقامت مخترعة

حنان : والله يا منار لو يعطوني مليون دينار وقسما بالله ما أدرس هالخرابيط
منار : هالخرابيط بتطيرني فوق
حنان : يعني شنو راح تموتين اسم الله عليج

منار تضحك : يموت العدو .. لا حبيبتي يعني لمن أتخرج كل مكان أنقبل .. مو إنت خلصتي أدبي بأقل نسبة وبالغصب يالله قبلوج بالمعهد ..بعد شكلهم ودوج لجان رأفة علشان يقبلونج ههههاي

حنان : أقول مالت عليج يا دكتورة منار ، الشرهة مو عليج علي آنا اللي قاعدة أشد من أزرج

منار : حلوه أشد من أزرج .. وتحذفها بالكوشاية .. أقول ذلفي تحت لا أسبحج بالعصير

حنان : باي يالعقد

منار تحب حنان واااايد ولا عمرها زعلت منها ومن كلامها ..

مر الأسبوع هذا بسرعة وباجر أول يوم أمتحان حق منار .. وكان كيمياء
منار ما عندها مشكلة بالكيميا بس اللي ما تحبه الفيزياء .. ما نامت إلا الساعة 3 الفجر
ألحين الساعة 7 ومنار رايحة المدرسة متوترة وخايفة .. أول ما وصلت يتها مريم وأمل وماجدة وووووو
يعني تقريبا نص صفها يسألونها جم سؤال مو عارفينه واهي تجاوبهم بكل ضمير .. وايد تحب تساعد

الساعة 8 إلا ربع الكل دخل لجنته .. توزعت الأوراق وبدأ الهدوء يعم المكان .. كل وحدة مندمجة بالحل .. ما أحد يسمع إلا صوت كعب الأبلات المراقبات ..

منار حلت الورقة الأولى والثانية والثالثة والرابعة .. وبقى آخر ورقة

رفيجتها أمل تحاول تطل على أوراق منار علشان تلقط لها جم كلمة.. ومنار تضحك عليها

رن الجرس وخلص الوقت .. ومنار سلمت ورقتها
وطلعت وكانوا كلهم ناطرينها ..

أمل : منارو جان رفعتي شوي ورقتج .. يا نحسج
منار : لا والله .. وحضرتج ليش داشة الامتحان علشان تغشييين ؟؟

تهاني : منار شنو إجابة السؤال الثاني ؟
وتجاوبها منار .. وتهاني تضحك على عمرها .. إجابتها وين وإجابة منار وين

اركبت منار مع أبوها السيارة .. وإهي تشرح له شنو يابولها بالأمتحان وانها جاوبت عدل

وأبوها مستانس .. هذي اللي بترفع راسه
((((( الجزء الرابع )))))

اليوم الثاني اختبار اللغة العربية .. ووراه الإنجليزي .. والأحياء حدها شادة حيلها فيه علشان الطب ..

خلصت أربع مواد وباقي لها جم يوم وتخلص

اليوم راحة وباجر امتحان الطامة الكبرى (((((((( الفيزياء ))))))))) درجاتها كانت متوسطة بهالمادة .. بس إن شاء الله ما تأثر على مجموعها

العصر منار بدارها عاصره مخها عصار بالدراسة وباقي لها 4 فصول وتخلص الكتاب وقعدت تدرس وتدرس..

أبوها طلع من الديوانية مبجر حس إن مخنوق .. بس نوعه ما يحب يشكي لأحد حتى لزوجته ..

ركب سيارته .. وما قدر يكمل سواقة وطاح على السكان .. شافوه عيال الحلال ودقوا على الإسعاف وخذوه على طول المستشفى ..

وهناك بالمستشفي سعفوه لأنه كان كلش ما يتنفس .. وطبعا أهو في ربو

دقوا الشباب اللي يابوه من تلفونه وكان مسجل اسم ( البيت ) بتلفونه .. رن التلفون ورن ورن

حنان صامدة يم التلفون : ألوووووووووووو

واحد من الشباب : السلام عليكم

حنان استحت لمن سمعت صوت ريال وحطت في بالها إنه واحد من اللي تعرفهم وارتبكت لأن أمها يمها : عليكم السلام .. نعم

الشاب : أختي منو معاي ؟
حنان : نعم والله ما تستحي على ويهك منو تبي ؟
((( طبعا ذيك الأيام ماأحد عنده كاشف رقم بتلفون البيت إلا قلّه )))

أم ناصر تسحب السماعة من حنان
أم ناصر : ألو ..
الشاب : هلا خالتي .. خالتي حبيت أبلغكم إن أبوكم بالمستشفى بس ألحين أهووو...

ما كمل جملته إلا أم ناصر قامت تصيييييح شفيه أبو ناصر علمنى

الشاب ما قدر يكمل وقال لها إن شاء الله يكون بخير .. إهو بمستشفي ( --- ) وعطاها عنوان المستشفى
أم ناصر اخمطت عباتها وشيلتها ..
ودقت على ريم وعلمتها علشان تمرها .. طبا ما احد بالبيت كان يسوق .. عيالها كلهم صغار وحنان أخوها ناصر ما يخليها تسوق .. والأبو ساكت لأنه أساسا ما عنده يدفع لها قسط السيارة ..

وحنان كانت تسمع امها لمن كلمت ريم .. وبجي حيل
تذكرت ويه أبوها وشلون يعصب لمن تطلب منه شي غالي .. وشلون تراضيه وتقعد تدلك ريوله..

الأم راحت بدون ما تتكلم .. وحنان قاعدة بالصالة تبجي .. وبهالوقت نزل ناصر وشافها تبجي ولمن سألها شفيج بجت زيادة ... وقالت له عن أبوها

ناصر ميزته في وقت الشدة فيه خير .. وعلى طول دق على رفيجه علشان يروح لأبوه ..

لولوة وفراس يلعبون بالحوش ..

ومنار تدرس .. وبعد ساعة حست بالتعب ونزلت تحت ...كانت الساعة 11

حنان حاولت تمسح دموعها ما تبي شي يشغل منار عن دراستها ..
بس منار شافتها .. وإهي تعرف حنان أكثر من نفسها
منار : حنان اشفيييييييج ؟
حنان : لا ما فيني شي .. بس ضايق خلقي قاعدة بروحي
منار بخوف : لا حنان إنتي فيج شي .. علميني شصار .. وين أمي

حنان : منار شفيج قلت لج ما فيني شي ..

منار خافت زيادة وحست السالفة فيها إنّ ...

لولوة دشت مع فراس يضحكون على بعض ولمن شافوا حنان وعيونها حمره ومنار تصارخ تسألها شفيج .. سكتوا ولا كلمة

بس قاموا يطالعون بعض ومرة يطالعون ويه منار ومره حنان .. ..

بالمستشفي الكل بحالة ترقب الأم وريم وزوج ريم .. وكاهو ناصر وصل ومعاه رفيجه

الممرضات يركضون والدكتور مو راضي يطلع يطمنها .. الأم وريم يبجون
وناصر وزوج ريم ( أحمد ) ينطرون أي إشارة ..

بعد مرور ساعتين طلع الدكتور .. ..

الأم راحت له ركض ووراها أحمد وريم وناصر ورفيجه

الأم : ها دكتور بشّر
الدكتور : والله مادري شاقول بس بوناصر بوضع حرج وخصوصا إنه كان فيه سل من قبل وربو .. وصار معاه نقص بالتنفس والرئة مليانه ماي .. وألحين حاطين له تنفس صناعي وأهو مو واعي ألحين فياريت تروحون وترجعون باجر .. أدعوله

أم ناصر بجت حيل هذا حبيب قلبها لا حول له ولا قوة ..ناصر لمها
وريم مو قادرة تتكلم ولا قادرة تدخل بيتهم بدون ما تشوف أبوها ..

في البيت منار تبجي وتطق راسها بالطوفة وتصارخ .. هذا أبوها اللي درست وتعبت علشانه .. ما يدرون شفيه .. حاولت تدق على ريم وناصر بس ما يردون ..

منار : أكيد أبوي مااات أكيد راح منا الغالي .. ليش ما أحد يرد علي ليش

لولوة وفراس يبجون ويدعون الله إنه ما يصير فيه شي .. وحنان تلم منار وتهديها

دخل ناصر وريم ... منار راحت لهم ركض
منار : ناصر ... ريم ... أبوي وينه ليش ما يا معاكم ؟

ريم بجت ولمت منار .. وناصر قال لهم بس ادعوله ..

وصعد دراه .. أحمد ياب عياله حق بيت عمه بوناصر مع أغراض ريم .. لأن ريم راح تنام عندهم لأن أمها ما رضت ترجع معاهم.. وسهرت بالمستشفى عند أغلى البشر .. عند غاليها بوناصر اللي تحملت المر والضيم علشانه .. واللي فتحت عيونه عليه

بالليل يعني الساعة 2 منار مجابله كتاب الفيزياء ولا راضيه تدرس بس تذكر كلام أبوها وشلون كان يتمنى إنها يحضر تخرجها من كلية الطب .. كانت تتمنى باللحظه هذي إنها تكون دكتورة علشان تعالج أبوها حبيبها ..قاعدة بروحها بالدار ما تبي أحد يكلمها
وأصلا كل اللي بالبيت مالهم خلق حق أحد .. حتى فراس الصغير

بجت وبجت وبجت لحد ما نامت وكان باقي لها فصلين ما فجتهم كللللللللش ..

رن المنبه .. نقزت منار من مكانها كانت الساعة 6ونص

منار : أمبييييييييه اليوم امتحاني ولا حتى درست الباقي ..
مرت أحداث أمس على منار ...وردت بجت بس قررت ..

منار : حنان باروح أشوف أبوي بالمستشفى

حنان : منار بس عندج امتحان بعد شوي
منار : يولي الامتحان شهادتي ما تسوى عندي شي إذا راح أبوي .. وبجت

لمتها حنان .. وقالت لها بس هذي أمنيته .. لازم تروحين علشانه

فكرت منار وقررت بالنهاية إنها تروح خصوصا عقب ما كلموها ريم وناصر وحتى لولوة وفراس ..

وصلتها ريم المدرسة .. وراحت المستشفي ومعاها ناصر __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مشتاق للجنة - انشاد - لغازي الحماد كلمات -الامير : سعود بن خالد آل سعود	محروم.كوم	منتدى أخبار المواقع والمنتديات العربية والأجنبية	1	10-05-2011 02:17 PM
الحلقة السابعه من المقناص لقاء الامير بندر بن سعود آل سعود	محروم	برنامج المقناص الثاني 2 لعام 2009	7	10-05-2011 02:09 PM
المسابقه الإنشادية \| يارسول الله \| كلمات الأمير : سعود بن خالد الكبير آل سعود	محروم.كوم	منتدى أخبار المواقع والمنتديات العربية والأجنبية	0	03-03-2010 05:10 PM
صاحب السمو الملكي / الأمير سعود بن فيصل بن عبدالعزيز آل سعود	♕ وليد الجسمي ♕	الشيوخ و رؤساء الدول	11	06-05-2009 07:35 PM
[حصّري] آخر سكربتات Dev Team ! روووووعه×روووووعه	سَوّافْ	المسنجر وملحقاته , توبيكات , ماسنجر بلس , msn	44	01-29-2008 07:30 PM