بداوي روحي بروحي وبتم فيني جروحي ..

العيون العسليه · #1 11-02-2008, 12:21 AM

الســلامن عليكم والرحمه ..

هالقصه ممن كتاباات ربيعته " امورة دبي "

وان شااء تعجبكم ..

||×× بـداوي روحـي بـروحي و بتـم فيني جـروحي ××||
×للكـــاتبـه× ||أمورة دبي||

انا جيت اعشقك نبض و مشاعر ما اعشقك ( تمثـال )
انا جيت اسكنك واحيــــــــــاك , و ابقى فيك وابقى لك

××فـ الطيـارهـ××

قبل الاقلاع بربع ساعـهـ .. كانوا الناس سايرين رادين مثل النمـل .. الي يدور مكانه و الي يحط شنطته و الي و الي و الي .. كان من بين هالناس ^عزوز^ يالس يرمس امه فـ التلفون و يطالع اخوه حارب الي يتصارع ويا شنطة الجيتار مالت عزوز .. غيض عزوز و هوه يرمس امه: ان شالله امايه ... لا توصين ... ان شالله ان شالله ... يبلغ ... و انتي بعد سلمي ... الله يحفظج

بند عن امه و قام صوب حارب: ايييه اييه شو تسوي

حارب بتحرطم: كل ماحط الشنطه اترد اطيح شو هاا

عزوز يشل عنه: قوم لا بتكسره الله يغربلك

حارب يلس ع الكرسي: سير لااا الناس اتسافر عسب تستانس مب اتلصق جيتار ع ظهروها

عزوز: اقول انطب بس

حارب: عزوز؟ بلاك معصب؟

عزوز: ماشي قلتلك اسكت

حارب: اوف انزين .. رشود وينه سار و مارد؟؟

عزوز: بسير اشوفـه

بعد ما حط الشنطه سار فـ نص الزحمه يدور رشود ولد عمه .. شنطه كانت محطوطه ع الارظ و تخرطف بس ماطاح و دعم بجتفه البنيه الي جدامه و طاحت شنطة البنيه .. شل الشنطه و توه بيعطيها اياها .. انصدم مكانهـ من شافهـا...!؟!؟! كان بوده الارظ تنشق و تبلعه ويهه حمر و اتغيريت ملامحه ماتوقع ابد انـه يشوفهـا .. امـا هيـه...؟!؟ حست بحرارتها مرتفعه و ويهها محمر من الصدمه و حست بعوار فـ قلبها بس بسرعه سحبت شنطتها من ايده و هيه تحاول قاومت هالشعـور الي هوه باختصار " الشـوق " ..

ردت لمكانهـا و هيه الدمعه فـ عينها .. جان تقولها فطامي بنت خالها: هنود بلاج؟

هنادي: ماشي وين جواهر؟؟

فطامي تعدل عكازها: جواهر سارت الحمام ..

هنادي: اهـا ..

ميود: فطوم يودي هالككاو و حطيه جدامج

فطامي: ها مال جواهر؟

ميود: هيه .. ياحظهم قوم اميه حصلو مكان فـ البزنس والا نحنا دوم حظنا نحس

فطامي: مثل ماقلت دوم ..

لفت هنادي الصوب الثاني و مسحت دمعتها و تحس بحزن مخلوط ويا فرحـه انها ردت اتشوفه مره ثانيـه مع انه جروحهـا تزيد و تزيد من تذكـرهـ .. بس لين الحينه عهدها على نفسها بيتم عهـد .. بداوي روحهـا بروحهـا و بتـم فيهـا جروحهـا..........؟!؟!؟!؟؟؟؟

نرد لـ سنـهـ طافت عليهـا مثل الدهـر .. كلهـا احداث و احزان و افراح و طيبه و جحود بس ارادتهـا خلتهـا تصبر ع هالاشياء و تتغلب ع حالتهـا النفسيـه الي ادهورت .. اخليكم ويا الاحداث الي طافت .. و من هنيـه تبدا القصهـ ..

نبـدا القصـهـ ..

××.. الجــزء الاول ..××

قبـل مرور سنـه ....؟!!!

ظهرت هنادي من حجرتها و نزلت و هيه تركظ ع الدري عسب اتسير بسرعه صوب مايد و هيه ع آآخر 3 عتبات من الدري طاحت ع اختها العوده جواهر قالت جواهر: هييي هييي بلاج

هنادي اتقوم بسرعه: ماشي بسير عند ميـود

جواهر: هيه عسب التلفون؟؟ حشى مب تلفون يخليج تراكظين جي

هنادي: مب وقتج والله

و سارت تركظ صوب الباب بس انصدمت ما شافت ميود حطت ايدها ع خدها: اويه وين سار؟؟

دشت داخل و يلست ع الدري و هيه تتـأفف .. تريته ما يا جان تقبظ تلفونها و تتصل فيـه: ميووود انته وين؟؟

ميود يستعبط: ان الميود الذي طلبته ليس موجود حاليـاً يرجى الاتصال فيما بعد

هنادي: ميوووود وين مبايلي؟؟

ميود: حشى مب مبايل هاذا عسب تصيحين عشانه؟؟

هنادي منقهره: ما صحت انا يلا وينـه؟؟

ميود: شو هوه؟

هنادي عصبت: تستعبط؟؟ مبايلي اليديد وينووه؟؟

ميود: ههههههه ما اشتريته

هنادي انصدمت: شوو؟؟ والله انك حمار

صكت فـ ويهه و هيه مغيظه .. "والله اراويك يا ميود تقص عليه" .. سارت صوب المطبخ و شربت ماي من الغصه سمعت صوت باب ينصك حطت القلاص ع الطاوله و سارت صوب الباب مالقت حد .. اتصلت فـ ميود بعد مره مارد عليها عصبت من الخاطر و سارت فوق حجرتها و هيه تسمع صوت باب حجرة ميود يتسكر .. توها بتسير صوب حجرته بس دشت حجرتها عسب تحط مبايلها فـ الجرج ..
شافت جيس لونه وردي كله عليه ورود .. سارت صوبه بطلته شافت داخله بكس مغلف طلعته من الجيس و بطلته شافت المبايل الي كانت تباه زاعجت مستانسه جان تظهر برع الحجره صوب حجرة ميود و دشت على طول جان يزاعج ميود: ابدل الله يغربلج

طلعت هنادي من الحجره و ماتت من الظحك: ههههههههههههههههههههه

شوي و بطل الباب و هوه اونه معصب: نعـم؟

هنادي باسته ع خده و اطالعته بنظرات بريئه اونه: مشكوور ع المبايل

ميود: هيه الحينه مشكوره و توه حمار

هنادي: ههههههههههه فديتك ياخوي

ميود: هههه انزين يلا جلبي ويههج ابغي ارقد

هنادي: سير ارقد الله يهنيك فـ رقادك ان شالله

ميود يبند الباب: لازم لازم الحينه حصلت الي تباه

ظحكت هنادي و هيه سايره حجرتها: مب شرط لول

دشت حجرتها و حطت البطاقه فـ المبايل ويا البطاقه و حطته فـ الجرج شويه و وصلها مسج "تعال شاركني شوق لك كتمته .. وفي ضلوعي اسمك والله نقشته .. وبوسط الحشى خيالك رسمته .. وفي عيوني طيفك اللي لمحته .. ومبسمك اللي كلام منه سمعته .. فيك شي يجذبني لك وما عرفتة ؟"

ابتسمت و حطت التلفون ع الطاوله و سارت حجرة امها و دقت الباب و دشت شافت امها يالسه تتدخن: ماماا؟ وين سايره؟؟

ام مايد: سايره بيت عمتج ساميه

هنادي: ليش عندهم عزيمـه؟؟

ام مايد: عازمين وحده من هل العين ربيتعتنا لانها راده من لندن

هنادي تتدخن ويا امها: ليش؟ بلاها

ام مايد: اسميج فظوليه .. مسافره علاج حق ولدها

هنادي: احلى شي فيني فظولي اصلن .. انزين ماما ابغي بيزات حق الرصيد

ام مايد: لا اله الا الله ييبي بوكي

هنادي سارت يابت بوكها و عطتها جان تعطيها امها 50 و قالتها: ما عندي خرده الحينه .. خلي هاي عندج .. مب اتيني عقب 3 ايام تقوليلي رصيد حشى ترمسين منو هالكثر

هنادي ترمس لبناني: رفيآآتي ماما شو بكي؟؟

ام مايد: تفداج البيزات دامج يبتي هالنسبه الزينه

هنادي: فديتني

ام مايد: لو كنتي داشه علمي وايد بيكون احس

هنادي: خليت العلمي حق جوجو

ام مايد: يلا ماباقي شي و تبدا الدوامات .. صح متى بتسجلين؟؟

هنادي: اويــــــه نسيت اقول حق ميود

ام مايد: ميود؟ ميود بتطين لين ما يتعنالج و يسير

هنادي: خلاص بقول حق بابا

ام مايد: هيه ابوج اي شي منه مب ميود

هنادي ظهرت من الحجره و سارت صوب حجرتها شافت جواهر تدور شي فـ مكتبها ..

هنادي: شو ادورين؟؟

جواهر: اوراقي قلت يمكن البشاكير حطوهم عندج

هنادي: شو من ذكاء عليج شوو بييبه حجرتي؟؟

جواهر: ترا حطيته فـ الصاله

هنادي: مادري .. المهم بسير بيت خالي حميد

جواهر: سيري الحقي ع الظرايب بين حريمه

هنادي: وييييدييييه بعدج راقده؟؟

جواهر: ليش؟

هنادي: الحينه خالي ان وحده اظاربت ويا الثانيه حالف يطلقها و كل وحده ميوده عمرها عن تظارب ويا الثانيه ..

جواهر: اويـه .. امسات سايره المستشفى شفت لطيفه هناكي

هنادي: شو مودنج المستشفى؟؟

جواهر: لا بس كنت سايره ويا خلود المستشفى لانه ظهرها كان يعورها

هنادي تلبس شيلة البيت: هيــه

جواهر: وين سايره؟؟

هنادي: بسير عند فطامي

جواهر: هيـه

هنادي: ههههههههه تعالي وياي

جواهر: ليش تظحكين؟؟

هنادي: خاطرج تسيرين اعرف

جواهر تغير السالفه: يلا متى بتسيرين تقدمين ع السواقه

هنادي: ههههه مشكله الي يغيرون السالفه .. عقب اسبوعين

جواهر: اوكي

هنادي تغمزلها: ابلغ سلامي للحبيب؟؟

جواهر تعدل نظارتها الطبيه: سيري ولي لااا

هنادي ظحكت و قالت:يلا برع

جواهر: صبري بدور اوراقي

هنادي: مب وقتج يلا برع

جواهر: اووف انزين

سارت هنادي صوب تلفونها و غلقته و خلته فـ الجرج .. زقت البشكاره و سارت مشي صوب بيت خالها ويا البشكاره ..

بيت خالهـا حميد و خالها ثاني و بيتهم فـ نفس الفريج بس بينهم مسافات شويه .. و عندها خاله اسمها بشرى و بنتكلـم عنهم عقب ..

...

××عايلـة بو مايـد××

بو مـايد .. سـالم .. حياته شغل فـ شغل بي يحاول قد ما يقدر انه ما يقصر ع عايلته الصغيره حنون و طيوب ..

ام مـايد .. شمسه .. حرمه عاقلـه و تحب عيالها بس فـ نفس الوقت تحاول تكون شديده ويا عيالها عشان يصطلبون .. و دوم ويا ساميه اخت ريلهـا .. تشغل اخصائيه فـ مدرسه ..

مـايد .. 22 سنـه .. حبووب راعي سوالف .. يدرس فـ جامعة الشارجه الامريكيه .. و حالياً يقنع هنادي اتي وياه ..

جواهر .. 19 سنـه .. عاقلـه ع امها تفكر بعقلانيـه .. تقدر تتحكم فـ عواطفها عكس هنادي الي عواطفها تحركهـا .. تدرس فـ جامعة الغرير ..

هنـادي .. 18 سنـه .. مرحـه كله تظحك ماتخلي للحزن مكان فـ حياتهـا .. فظوليـه لول .. رومنسيه لدرجه فظيعه و حالميه وايـد .. خلصت الثنويه العامه بنسبة 91.2 ادبي ..

...

وصلت هنادي بيت خالها حميد و هيه داشه البيت كان باب الحوي مفتوح و شافت سيارة هزاع ولد خالها تشتغل .. روحت البشكاره .. و مشت ولا جنه شي مستوي مره وحده ردت السياره ع رييوس بسررررررررررررعه .. زاعجت هنادي لانه كانت بتدعمها و طاحت ع الارظ قبل لا توصللها السياره وحست براسها يدور و غمظت عينها فجأه .....!!!!

××نهـاية البـارت××

__DEFINE_LIKE_SHARE__

احب وخاطري حساس · 11-11-2008, 08:52 AM

اونه

حلوة بس مش لهاك الزود __DEFINE_LIKE_SHARE__

دبدووب · 11-19-2008, 03:53 PM

يسلمووووووووو على الطرح __DEFINE_LIKE_SHARE__

$شخصيات مهمه$ · 11-19-2008, 08:57 PM

شكراااااااااااااااااااااااااااااااااااااا __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
\\ومن يشفي جروحي..!غير خالق روحي \\	♕ وليد الجسمي ♕	الإسلام والشريعة	7	07-19-2010 12:41 PM
من يشفي جروحي غير خالق روحي؟؟؟	محروم.كوم	منتدى أخبار المواقع والمنتديات العربية والأجنبية	0	04-29-2009 01:30 PM
(¯`•._.•[ ( من يشفي جروحي غير خالق روحي ) ]•._.•´¯)	الاميرهـ الصغيرهـ	الإسلام والشريعة	8	01-08-2009 02:14 PM
من يشفي جروحي سوى مالك روحي	بوالجازي	الإستراحه العامة	22	10-11-2008 08:05 AM
...{ من يشفي جروحي سوى خالق روحي }...	عيناوي حبتين	الإسلام والشريعة	14	08-11-2008 03:30 PM