واشيب عيني مابقى بالجسم حيل.......

محروم.كوم · #1 07-18-2010, 01:30 PM

احيانا يمر الانسان بفتره من الملل حيث تضيق النفس في كل ماحولها من الاشياء وكثيراً منا من يمر بهذه الفتره.
(شرح الله صدوركم ويسر اموركم).
وانجع علاج لمثل هذه الحاله هو الاكثار من ذكر الله:

واشيب عيني مابقى بالجسم حيل = ولابـقـى بالعـيـن دمـعٍ تـهــلـــــه

ولابقى عزمٍ يساعد على الشـيــل = عـزمي تردى والخـفـايف تـفـلـه

ولابقى وقـتٍ نعـدل به الـمـيـــــل = والـنـفـس صارت كـل شيٍ تـمـله

صارت تمل من السهر والتعاليل = وتمل من شوف الرموش المظله

وماعاد تبغى لابسات الخلاخـيــل = ولاعاد له خلقٍ على شوف خـلـه

ولاعاد له خلقٍ على القال والقـيل = مـلـت سواليف الـمـخـالـيـق كـلـه

ولاعاد له كيفٍ على البن والهيـل = ولاتشتهي قرصٍ على جال مـلــه

ولاعاد يعجبها السفر والتراحـيـل = امن الوهن صارت تحـب الأظـله

امن اولٍ تسري على النجم بالليـل = ومـافـيـه دربٍ بالخـلا مـاتـدلـــه

واليوم ماتشفق على شوفة السيل = حـتى ولا شوف الربيع بمـحـلـه

لولا الأمـل في مابـقى من مقـابيـل = مـلـت مـن الـدنيا بـدقـه وجـلــه

ولولا صلاة الفجـر بين الرجاجـيل = تصير دنيا النفـس سـودا مـمـله

مالـوم نفـسٍ عـذبـتـهـا الغـرابــيـل = دنيا تـقـلـبـها عـلى كـل مــلـــــه

تـلـوعـهـا الـدنـيا بكـثـر البهـاذيــل = والنفس ماتقوى على الظيم لـله

يارب صبرها على الـظـلم والـويـل = يالله طـلـبـتـك كـل عـقــدٍ تـحـلـه

يارب وفـقـنـا لـدرب الـتـسـاهــيــل = يارب خـل نـفـوسـنا مـسـفـهـلـه

يالله بحسن الخـاتمه لاوفى الـكـيـل = يامحصي احساب الفلك والاهـله

ألا بـذكـر الله وكـثـر الـتهـالـيــــــل = تـسلى النفـوس وتنجـلي كل عله

احمد بن عبدالرحمن العريفي
(نديم المجره)
__DEFINE_LIKE_SHARE__