قصه ابو نايف واخوياه في اول المقانيص (حقيقيه ) 2

محروم.كوم · #1 06-24-2010, 06:40 PM

السلام عليكم ورحمة الله وبركاته
اسعد الله مسائكم بكل بكل خير جميعا
فى سنه من السنين قبل 21 سنه تقريبا !!! انا وخويي عبد الله (صديق قديم مثل ابو خالد)
قررنا الذهاب الى الخرج لجلب نوع من النخل ولاكن لايوجد لدينا بكب لان سياراتنا وقتها صغيره (سيدان)؟؟
بحثنا هنا وهناك ووجدنا ضالتنا عند رفيق لنا اسمه ابو هلال وهي دادسون بكب ،،،،،،
(وش رايكم نجعلها باللهجه العاميه !! نعم لان في القصه السابقه شجعوني بعض الاعضاء مثل عجاج السناف وغيره)
المهم وين وصلنا ؟؟؟ نعم تذكرت اخذنا العراوي من ابو هلال جزاه الله خير ومشينا انا وعبدالله ومعنا واحد صغير غير محسوب ؟:good2:
وعلى الطريق مرينا صديق الطفوله ابو خالد في بقيق وحلف علينا بالعشاء ولاقدرنا نمشي من عنده لكرمه وحسن ضيافته الاالساعه11 ليلا
واتجهنا مع طريق حرض ،،، وبعد ماتعدينا العضيليه يمكن بــ30 كم وإذا بلنبة الدينمو تولع ووقفنا وإلا السير مقطوع!!!!!!!!!!
ندور سير ولا لقينا إلا بعظ العده واخذنا شوى وحنا نحوس وإلا براعي جيب شاص يسوق له ناقه موازي لنا وحنا نشر له بالكبس وهو يجي
ياولد نبغى سير قال ابشروا ويجيب لنا سير ولاكن ماركب على سيارتنا !!!!!!
وش الحل ياولد قال فيه عراوي قديمه مقلوبه وسحبتها صيانة الطريق شوي عن الزفلت واذكر فيها سير !!!!!
قلنا يا بعدي:good2: وينهي قال اركبوا قلت مشينا ،،، وجلس عبدالله عند سيارتنا وخوينا الصغير ؛؛ وبعد ماوصلنا السياره المقلوبه حصلنا سيرها

واخذناه وهو يابس من الشمس ورجعنا الى خوينا وإذا عنده اهل سياره جزاهم الله خير ويركبون سير من عندهم وبعده نشغل العراوي
والا هي تمام:good: :good: كائنها (كدلك)بعد السير وواصلنا مسيرنا حتى قربنا من الخرج ووقفنا لننام وفي الصباح وصلنا الخرج واخذنا فيها لفه ندور
على مطعم نبغى الفطور ؛؛ الا هنا الاهناك وولعت لنبة البانزين ؟ دورياعبدالله على محطه قبل الفطور فرينا شوي إلا نشوف علامة المحطه
وقبل نوصلها تقريبا بـــ 100 متر وتطفي السياره ؟؟؟
وحنا ندف السياره حتى وصلت المحطه ونعبي ونفطر وبعدها نمرالمزارع ندورالنخل ولالقينا النوع الى نبغاه !! وقبل الظهر وحنا نتلها لحرض
والمشكله السياره مافيها مكيف والجو حار:s والله المستعان !!!!!!!
المهم : سالفه مني وسالفه من خويي حتى وصلنا لـــ مطعم في حرض ونتغداء ونتقهوا الشاي في براد المكيف يالله من فضلك حتى صلينا العصر!!
قال عبدالله وش رايك اوريك الردميه (طريق غير مزفلت)الي تروح لقلمة ندقان وقريبه من حرض وترى حولها ارانب واجد (وانا ماكذبت خبر)
قلت توكل على الله ونطلع من حرض جنوب شرق مع ردميه وناخذ معها شوي ونلف علـى طعوس متفرقه وبينهن حزوم زينه للسياره وتسمى
(الهمل) وعصير نتمشى ونلقى ملاعب الآرانب واجد قلنا نبي نوقف وننزل العزبه وهي دافوروابريق وسكر وشاي وجركل ماء فقط ؟؟؟؟
ونظبط هك الشاهي الخادر في ظل الطعس الطويل الى مافيه احسن منه وسالفه تجر سالفه (وبعدين في البر نتذكر سولف مدري منين تجي)؟؟
المهم .... حطيت سهم بئتجاه الغرب لآن الأرض مانعرفها وذاك الوقت مافيه (قارمن)اعتمد على رأسك وإلا تروح وطي .؟؟؟
وبعد صلاة المغرب نضفنا القزازه حتى نشوف المحبوبه وركبنا الكبس على الولاعه ؛؛؛ والآن جاء دور خوينا الصغير ؟؟ :good2:
وهو سلقه عزكم الله اسمها (شله)وركبت شله وهى حاسه ان الليله لها دور كبير وحركنا ولفينا اول لفه وثاني لفه وإذا بالمحبوبه قدامنا نزلت شله
ومسكتها والثانيه والثالثه وبعدها قررنا الرجوع الى حرض واثناء خروجنا من الطعوس لاحضنا ان النور يضعف وولعة لنبة الدينمو قلنا غريبه
انقطع السير بس بسيطه معنا سير جديد المهم وقفنا وشفنا السير الا هو سليم ولاكن مرتخي هات العده ياعبدالله بنشد السير وتفأجئنا ان مسامير
الدينمو كلها طايحه ولاماسكه الا واحد هذه والله المشكله مامعنا مسامير ولا حولنا ديره؟؟:j المهم ليلنا كله نفك ونربط من الصدام ومن الغماره واخيرا
ركبناواحد وشدينا السير وكله تمام ونشغل المبروكه ولاكن :no2: ,,,,, قالت البطاريه فاضيه من كبسكم يوم تدورون المسمار ،،، ولاكن ربك رحيم
كانت وقفة السياره في حزم ماهي في رمل ؟؟ قلنا هيا ندف حتى ننتعها وندف اول مره والثانيه والثالثه ورابع مره نرجعها مسافه بعيده وندف
هك الدفه الي من قلب ,, والله يامرها وتشتغل يالله لك الحمد ونستانس ونضف قراشيعنا ونحرك من محلنا شوي ونضيع مانعرف الوجهه

ونوقف ونطالع للنجوم ولاكن ربعك مفتره روسهم بعد الكبس والفك والربط ..... ونتشاور ونقرر اننا نرجع مع اثرنا الي محل مصلانا المغرب
حتى نعرف الآتجاه بالمصلا وبالسهم الذي رسمته قبل الغروب ؟؟:good2:
(تصرف سليم ) نعم رجعنا ووصلنا محلنا المغرب ووقفنا السياره في محل مرتفع ونشب النار:f ونشوى ارنب ونتقهوا الشاهى ويوم صفت رؤوسنا
وعرفنا الآتجاه ونتلها للردميه ومن ثم لحرض وبعده للدمام ,,,,,,,,,
وسلامـــــــــــــــــــــــــــــــتكم
واعذروني على طول القصه ولاكن والله انها حقيقيه وهي من المغامرات الصعبه وقتها والشيقه حاليا ليؤخذ منها العبره لمن اعتبر..
وأمل ان تحوز على رضاكم وإستحسانكم
ملاحضه (تصرف سليم) ترى لها قصه مضحكه قديمه واذا اردتوها ذكروني بها بعد كم يوم
وتقبلوا تحيات اخوكم او شايبكم ..... ابو نايــــــــف
__DEFINE_LIKE_SHARE__