لـيش ننتـظر الحفاى تصطي على كفوف الطير,,الوقاية خير من العلاج

محروم.كوم · #1 06-16-2010, 06:00 PM

السلام عليكم ورحمة الله وبركاته
مسائكم / صباحكم ..... خير وبركة بإذن الله

كلنا وقت المقيض نفكر ونحاتي الحفاه لانها تعتبر بدايه السمار وهي تعتبر غرريرنه للطير كفانا الله شرها والله يحمينا منها آآآآآآآآآآآآآآآآآآآآآآآآآآآآآآآآآمين

وخصوصا الطير المدبغ اللي فيه روز والثقل هو اهم اسباب الحفاه والماء ايضا من اسبابها
طبعا منتشر حاليا ومتعارف بينا ان وضع الطير على الرمل بوجهه العدو يبعد وصولها للطير
لكن هالكلام ليس بدليل من ناحيه خبرتي القليله والمتواضعه قد مرت علي طيور فيها حفاه وهي توضع على الرمل لاكثر من اربع شهور.

اليوم بقولكم شي انا استخدمه واتمنى ان الكل يحاول يجربه لما فيها صالح للطيور (( إذا ما نفع ما يضر بإذن الله ))

الاشياء اللي استخدمها بالبدايه هي عباره عن عجينه مكونه من :
1- الخوه جوه وهي ماده مثل عيدان القرفه لكن لونها عنابي وتباع عند الحواجين
2- المره واتوقع الكل يعرفها ويمكن يكون لها اسم ثاني واتمنى الشباب يذكرونه
3- زيت الزيتون الصافي
4- الحناء او السدر

بسم الله نبدا بالشرح .... تحملوني يمكن تحسون اني كاتب لكم طبخه ههههههههههه

أ- نضع الخوجوه مع المره وشوية زيت زيتون بوسط القدر ونخليه على نار هاديه لمدة عشر دقايق تقريبا .
لين يصبح مثل كذا

ب- نقوم بشخل الماء الاحمر او يعتبر الماده المستخرجه من جميع المواد المذكورة

ج- نجيب الحناء او السدر ونخلطه مع الماء الاحمر لين يتماسك
لين يصبح مثل كذا

نخليه لين يبرد شوي وبعدها نحطه على وكر الطير ويفضل ان تسكب على الكف من فوق

كما هو واضح بالصورة الطير بالبدايه يستنكر لكن مصيره يوكر عليه

الجير والله ما يدري وش السالفه هههههههههههههههه
بس الوحش فاطن لك حتى لو صد عنك عينه عليك هههههههه

الافضل انك تسوي هالكلام بعد العشاء
ويفضل انك تخليهم على الوكر الى اليوم الثاني وقبل المعشأ بثلاث ساعات تنزلهم عشان تنظف كفوفهم (( واذا تقدر تقطع لهم العلف وتعطيهم عن طريق اليد بيكوون افضل ))

كرر هالحركه في الشهر مرة او مرتين وجرب اذا نفعت زين على زين واذا ما نفعت مراح تخسر شي

_____________________________________________

الفصل الثاني من الموضوع

طبعا الكل عنده دواء للحفاه واكيد نفع معه وانا بصراحه عندي دواء للحفاه مفعوله ممتازه بامر الله

وهو بسيط ولا يحتاج شي وليس مكلف بالقيمه مع ان الصقار وده يدفع كل شي ولا يشوف طيره مريض الله يكفينا ويكفيكم شر المرض آآآآآآمين
وهذا العلاج يستخدم في بدايه الحفاه لاني ماقد جربته بحفاه صاطيه

نحتاج الى استخدام العلاج ثلاث اشياء رئيسيه :

1- مطهر يباع بالصيدليه البيطريه وسعره مايقارب 30 ريال

2- كريم ضد البكتيريا ويباع بالصيدليه البشريه وسعره مايقارب 10 ريال

3- وكر صاجه ويضع عليه قطعه من القماش

ويفضل استخدام عشبه الاكنيشيا لتزيد مناعه الطير >> للي مستحب فقط وزياده الخير خير
او استخدام مضاد حيوي

طريقه العلاج
أ- اذا عشيت الطير خله ينظف باقي العلف الموجود بكفه وحاول انك تساعده بتنظيف منسله
وخله يريح شوي لمدة تزيد عن عشره دقايق

ب- برقع الطير بشويش وحطه على الوكر المخصص للعلاج
ج- رش على الطير من بخاخ المطهر من الخارج ومن بطن الكف وعطه كم دقيقه لين يجف شوي

د- خذ من المرهم وحطه ببطن الكف واكثر عليه من ناحيه النقطة السوده بؤرة الفساد
ويفضل انك اذا خلصت من وضع الكريم انك ترش عليه بالمطهر بعد

وخله الطير لمده مابين عشر دقايق الى ربع الساعه بعدها نزل الطير من وكره وشيل الوكر عنه

وكر هالسواة لين تلاحظ انها بدات تتقشر وبإذن واحد احد انه يطيب

نصيحه مهمه جدا **

1- ابعد حوض الماء عن الطير خله يشرب فقط ولا يستطيع انه يدخل بوسطه
2- بدل السبق يعني اذا كان سبق طيرك بالكف اليمين والحفاه بنفس الكف يفضل انك تنقله الى الكف الايسر
3- جمع زباره رمل بوجهه العدو وخله يوكر عليه .

هذا ما لدي وهذي طريقتي بالعلاج ويمكن يكون فيه اخطا واتمنى انكم تنصحوني

والشباب الباقيين فيهم الخير والبركه حيث انهم اكبر مني بالسن واكبر مني بمجال الخبرة

ملاحظتين مهمات جدا :
1- الداء والشفاء بيد الله سبحانه وتعالي وهو الشافي والمعافي فقط
2- انا مجالي بالصقارة بسيط جدا لكني حبيت اشاركم وتعم الفايده لي ولكم
واتمنى ان باقي الاخوان ما يقصرون ويذكرون النواقص

وانا اصبت من الله وانا اخطات من نفسي والشيطان

تقبلو فائق احترامي لكم
اخـوك:تـقـوى الهجـر
__DEFINE_LIKE_SHARE__