لفيت للمارد شمال وتعديت=دون النشيفه والبلاطه يساري

وامرحت باشطاب الضباع وتمشيت=حتى المغدا بين ذيك المذاري
غرب النجيل اشملت بالضلع واقصيت=لما بدا عرقين بطحا الضواري
اخذت يومين وضحى ليتي ابطيت=لكن قليل الوقت بالناس جاري
ما تاتي الدنيا على ما تشهيت=بارادت اللي فوق الاكوان باري
حدرت يم اشواق ذيك المكاشيت=اللي بها من ضلع اشيجع مواري
بقيت فيها يوم ما كني اضحيت=تجري بنا الساعات باقصى الصحاري
واجنبت لطوالن كما سود حليت=بها خضير الدوح ملفا الصباري
فيها الشطاب المظلمات المباهيت=غيرانها تضوي عليها الخضاري
تكيت فيها عصر يوم وتعشيت=بالليل توضي بين الاشجار ناري
قريت وردي في وطاها وسميت=واراقب نجوم الحلوك السواري
هذاك بردن دون لسعه تدفيت=وقودي شلوخ الغصون القصاري
واليوم يطرق جلدنا مكيف البيت=المركى جنبي بيني وبين جاري
ان قال سولافه لقوله توحيت=وان قلت سولافه علي استداري
نقضي حياة الصيف من دون تشتيت=ومجالس المطنوخ نسل الحراري