اذا المراجل لبسة شماغ وعقال قل للعذاري يلبسن العمايم

ماعاد يفرق زول حرمة ورجال دام الفعايل تشبه البعض دايم

المرجلة ماهيب كلمة وتنقال وتروح ماراحت هبوب النسايم

ولا خشونة صوت اورفع الاثقال او رزة صدور وفعل الزلايم

ولاهي بعد مفتاح موتر وجوال والا ردى لسانن حديثة شتايم

المرجلة شيمه عن القيل والقال رفيع نفسن حر بالجو حايم


المرجلة عقل وزن وزنه جبال ودون العقل وش فرقنا والبهايم

يامسندي لومايل الوقت بي مال ياولد أبويه ياعظيم العزايم

يامعرب الجدين من العم والخال يانخوة المفزوع وقت الهزايم

المرجلة ياخوي هي طولة البال هي العزم هي الصبر فالظلايم

فيها الكرم عزة دله وفنجال فيها الكرامه عن ردى الطبع شايم

والدين لامنه خذا القلب منزال مشى طريق الحق وابليس نايم

ومن لاعرف ربه في طيب الحال لابد وقت الضيق بالهم هايم

حتى صلاتك مع جماعات ورجال في خيرها ياخوي نعم الغنايم

ولامن نصف ليلك قم صفي البال ياعظم اجرك بين ساجد وقايم

ولامن رفع ربي له كل الاعمال حسن الذكر لاقالوا فلان صايم

وخلك شريف القصد ياطيب الفال سوء المقاصد فالبيوت الهدايم

واحذر تبيع النفس في درب الأنذال وتتبع خوي ابليس راع النمايم

النفس خيل لك اذا كنت خيال ومن لاقوى نفسه قوته الهزايم

ولاصرت ماتدري لوش انت رجال?? والله خسارة فيك ذبح التمايم