مريتها شفقان قبل الزوالي=اريد اقيل ولا على البال خله
لقيتها ترقد على غير حالي=الا حداها الضيم وانزال ظله
ذاقت غثا الصحرا وعبث العيالي=جتها النهاية بالخواتيم عله
هذا جزاها عقب مد الظلالي=نزيحها وانقول هذا قضا له
لو تنشد النجاع ينبيك قالي=ما كنها الا بالخلا جدار فله
كم راح من طول السنين الخوالي=وهي على بطحا الوطا المستقله
يومن يجيها البرد واحيان لالي=واحيان تلسبها البروق المسله
كم بات فيها من صنوف الرجالي=على لهيب القيظ كلن يدله
لين استدار من الزمان الختالي=واتاها مجرود البلا في محله
بالاوله تنثير عفن الزبالي=والثانيه بالنار في قاعتله
واخرها تقشير اللحا لين عالي=لين الغصن مكثور الاوراق هله
ونهاية المشوار جاها الميالي=صار الشعيب المنحني مرقدله
ما غيرها بالدو باول وتالي=الطلحه اللي بالخلا ما نمله
لوهي تعاد لقفرها بالريالي=كان اشتراها واحدن راغبله
الشكوا للي دك صلب الجبالي=يزيل عنا بالخفا كل زله
الله يهديهم كفوف الخلالي=روس العبايث مخلفين الجبله
واتلا المطاف مجهزين الحبالي=من بعدها الطربال الاخضر نفله