يا زمان الطير جتك القرنسه=عقب سجات الخلا الوافي ربيط
جانا حمو القيض والعشب حمسه=لين صار القاع مجدوبن لحيط
يرقد الصقار داخل مجلسه=مقتفي نومه شلافيح وغطيط
القنص باشباط قام يهوجسه=بين دعب الرمث واشجار السنيط
حبرش بفكره وشاله وافرسه=يصعد لروس العوالي والهبيط
بين بيبان الضماير محبسه=تمشي سبوت الكناين كالشريط
ميه وعشرين يومن معمسه=تشوي بكبده مقابيس الشويط
لين شاف سهيل قبل المدرسه=واحد وخمسين يومن باتحطيط
يمسي الطير برفاده مرمسه=يبدا بالتدهيل والمدعا البسيط
لابتدا نجم النعايم يدعسه=من خليج عمان لاحدود المحيط
بالفيافي من تلوع لمخفسه=يرسم سهول المقاصي بالخطيط
ينزل الوديان ناره يقبسه=حولها الرسلان مع تمر العبيط
يذن بنابي ولا هو يهمسه=يهرب الشيطان الامرد له ضريط
فاح صيده بالمشاوي حسحسه=تلقا ضيفانه على الدسما قليط

يدلج البر البعيد وينكسه=من فغانات اليا شرقن عن وسيط
طامع برب الخلايق يحرسه=ما مشى درب الضلاله باتخبيط
يطلف حجاج السخا ما يعبسه=مبتداه الخير ما قيل السليط