وقت الساعه حسب توقيت الاحباب المحلي

0oبركان الغلاo0 · #1 07-23-2008, 04:05 PM

مرحبا ..
اخواني وخواتي الاعضاء ..

شحالكم ؟!! ربكم الا بخير وسهاااله ان شا الله ..

اليوم يايبتلكم قصه يديده .. من ابداع ربيعتيه ( راقي الذوق) .. هي تقول بدايات وما تبا تنشر اللحين بس مب ع كيفها .. انا قلتلها اني بنزلها .. وطبعها حقووق النشر محفوظه ..
بنقراها انا وانتو مع بعض .. هي بتطرشلي البارتات وانا بنزلها لكم .. عاد ان شا الله تعيبكم عشان اكملها وياكم ..

البارت الاول ..

عايله بوخلفان ..
بوخلفان ( محمد بن خلفان الـ....) 60 سنه وهو اكبر اخوانه .. ماخذ بنت يرانهم (ام خلفان .. لطيفه سالم الـ ... ) 54 سنه .. بجرهم خلفان 26سنه معرس من سنه وماخذ بنت عمه شما وخلفان ماااخذ الحلااه كلها ..طول بعرض وعبيون تذبح وخشم كنه حد السيف وعارض رهييب .. وسالم 24سنه يدرس برع .. يشابه خلفان شوي بس خلفانا حلى وكلهم يشابهون ابوهم .. وروضه 22 تدرس بالجامعه وملكه جماال العايله وطوايفهم كلهم .. وهم عايشين فالعين ..
عايله بوسلطان ..
بوسلطان ( أحمد بن خلفان الـ.. ) 58 سنه وهو عقب بو خلفان .. ماخذ بنت عمه (ام سلطان .. موزه سلطان الـ..)54 سنه .. بجرهم سلطان 25 سنه معرس وماخذ اخت ربيعه من سويحان واسمها رفيعه .. وعنده توم ولد وبنت ( احمد وموزه,,عمرهم سنه) هو وايد ويا خلفان بس هو معرس قبل خلفان بسنه ..حتى سلطان وسييم وعليه عيون تعق الطير من السما من حلاتها .. وعقب راشد 23 سنه مدير شركه العايله .. شخصيه ولا اروووع .. مسنع الكل ..حازم في شغله واللي يشوفه ما يعطيه هالعمر .. وهو واااااايد يشابه خلفان بس شخصيته عاطتنه هيبه اكثر .. وعقب راشد ..لطيفه 20 ما عليها قصور من الحلاه وهي وااايد ويا روضه .. وعقب ميره 18 سنه .. ثنويه عامه (علمي) فرفوشه وحبوبه وحليوه وشاطره ,, واخر العنقود .. محمد 15 اول ثنوي .. تقريبا هو شرات راشد ووايد يحب راشد ودوم وياه ..
وباقي الشخصيات بعرف عنهم وقت ما ايي دورهم

فزت شما من نومها تزاااااعج ..
شما : خلفاااااااااااااااااااااااااااااااااااااااان .. آآآآآآآآآآه خلفااااااااان
خلفان نازل ع الدري بيسرح الدوام سمع صريخها ورد فوق بسرعه .. وع زعيجها طلعت روضه من حجرتها وشافت خلفان يركض للحجره .. وركضت وراه
دخلو ع شما وهي تصيح وماسكه بطنها ..
روضه: بلااج شماااني
مسكها خلفان من يدها ووقفها
خلفان: روييض هاتي شيلتها وعباتها بسرعه .. ونزلي بسرعه عند امي خليها تلبس عباتها
روضه : عطني السوييج .. بجدم السياره للباب
طلع خلفان السويج من مخباه وفره ع روضه ,, خذت روضه السويج و طلعت عباه شما من الكبت وعطتها اياها ونزلت تركض تحت عند امها تقولها تلبس عباتها لان شما تعبانه وبسيرون المستشفى وركضت برع شغلت السياره وطلعتها من الكراج وريوستبها للباب .. وردت داخل وكان خلفان نازل وهو مساند شما وهي تصيح ..
ام خلفان : فديتج امايه لا تصيحين ..
شما تلوي ع عمتها وتصيح : اماااااااااايه بموووووت والله
خلفان: يلااا يلااا ..
وطلعوا وروضه واقفه عند الباب تشوفهم .. نزل خلفان جامته يرمس رويض
خلفان: رويييض اتصلي بعمتيه خليها تسبقنا الدختر
حرك خلفان صوب الدختر وروضه دخلت واتصلت بيت عمها ورمست حرمت عمتها وقالتلها ان شما تعبانه وساروبها الدختر ..
سكرت روضه عنها وسارت فوق تبدل ثيابها ,, وام سلطان من سكرت عن روضه قامت بتيب عباتها وهي طالعه من حجرتها تتصل بالدريول سمعها راشد وهو نازل
راشد: ياااااالله بصباح خير وين بتسرحين بعد من غبشه
ام سلطان : متفييج انت تتطنز ,, ختك تعبت وودوها الدختر ,,لازم اسيرلها
راشد: شماااني ؟!!
ام سلطان: هيه
راشد: شو بلااها
ام سلطان منرفزه : رشووود شو هالفاقه اللي انت فيها .. تشوفني في وقت اسئلتك هاي اللي مالها معنى ,, خووز عني

راشد: هههه بلاج فديتج ( ويحبها ع راسها) صباح الخير يا احلى ام
ام سلطان: اففففففف رشووود خووز عني
وظهرت ام سلطان .. ولحقها راشد وهو يضحك بس يوم لفت وخزته بنظره ..يود عمره
راشد: ام راشد فديتج انا بوديج ,, بنزلج ع دربي وبطمن عليها بعد,, الدريول خليه الحين بناتج بيسرحن جامعاتهن والمدارس
ام سلطان: هيه صدقك .. فاااااروق ., خلاص برايك انته راشد بيوديني انت تريا البنات اللحين بيسيرن الجامعه
فاروق: ان سا الله ماماه انا في سوي انتزاار بناات >> (ان شا الله ماماه ,, بترياهن)
راشد: خس الله هالرمسه اللي لك يا فاروق .. خلصت عيش الدوله ولا تعلمت ترمس عدل
ام سلطان: خل عنك فاروق يلا اركب خلنا نروح
روحوا راشد وامه .. وصلها الدختر وشاف انه ماشي وقت ينزل يطمن بيتاخر ع الدوام وقال لامه تتصله تطمنه وروح عنهم .. وخلفان بدوره بعد نزلهن ودخل وياهن وعقب طلع بسرعه بيضرب كرت بالدوام وبيرد عليهن ,,
راشد من حرك عن الدختر بعد ما نزل امه اتصل بروضه
روضه : هلااا والله
راشد: اهلييييييين وسهلين وبوستين ع الخدين
روضه: هههه شحالك
راشد: دامني سمعت هالصوت اكييد بخير وسهاااله
روضه: يعله مديييم
راشد: وياااج .. رواضي
روضه: لبيه
راشد: لبيتي في منى .. بلااها شمووه ؟!!
روضه: ما ادري .. نشت تزااعج وتتويع ووداها خلفان الدختر وامايه بعد سارت
راشد: الله!! .. العيايز كلهن سارن !!

روضه: هههه لازم يسيرن وياها .. عيل يخلنها روحها
راشد: انزين طمنيني عليها .. اا قلت لمايه بس اكيد بتنساني
روضه: خلاص اوكي ,, واللحين لو سمحت خلني لاني بسير الجامعه
راشد: يلا انزين .. انا بمر عليج اوديج
روضه: نعم انته !! وين تبا ؟!
راشد: بلااج .. ختيه وبوديها الجامعه ..شو فيها ؟!!
انصدمت روضه من كلمت راشد وبلعت ريجها
راشد: بلااج روويض
روضه: هاا ؟!! لا ماشي ... خلاص يلا برايك بتاخر ع الجامعه
سكر عنها راشد وهو بعد كان واصل للدوام .. روضه من سكرت عنه نزلت دمعه من حرقتها ,, مسحتها ونزلت تحت وركبت السياره وروحت وهي طالعه من البيت اتصلتلها لطووف بنت عمها ..
لطيفه : صباااااااااحوو
روضه : هههه صبااحوو
لطيفه: سرحتي والا بعدج ؟!!
روضه: عند لفت البيت .. توني ظاهره
لطيفه: زين ,, يلا عيل مري عليه
روضه: يلا ظهري انا عدال بيتكم اللحين
وصلت روضه بيت عمها وصيحت هرن وطلعت لطيفه وشافت فاروق واقف
ليطفه: انته هنيه؟!!
فاروق: انا في انتزار انتي وميره >>( انا اترياج انتي وميره)
لطيفه: عيل وين ماماه؟
فاروق : روح مع راسد >>( روحت ويا راشد)
لطيفه: يا الله عليها .. وين تهوم من الصبح
ردت روضه وصيحت لها هرن مره ثانيه ,, فزت لطووف وهي تضحك
لطيفه: يلاا فاروق انا بسير مع روضه .. انت تريا ميرووه
فاروق : اوكي
ركبت لطيفه وروضه تطالعها بنظره ..نقزت عليها لطووف وباستها
روضه: يااالله عليج .. مكاااره
وحركت روضه ..
لطيفه: هههه فديتج والله .. بس اتخبر عن امايه .. يوم ما لقيتها تحريتها سايره مكان واتصلتلها وان فونها فالبيت ما شلته .. عاد اتخبر فاروق عنها .. هو مدير اعمالها يعرف وين هي
روضه: ههههه وقالج مدير اعمالها وين هي
لطيفه: يقول سارت ويا راشد
انتفضت روضه يوم سمعت اسم راشد .. وحست لطيفه بـ هالشي
لطيفه: رواضي .. فيج شي !!
دمعت عينها يوم قالتلها لطيفه رواضي ( محد يزقرها رواضي الا راشد) ومسحت دمعتها بسرعه وكملت دربها ساكته ولطووف تتحرطم تبا تعرف روضه شو فيها .. وصلوا للجامعه نزلت روضه ولطيفه بعدها قاعده تطالع روضه .. وقفت روضه جدام السياره وتاشر للطيفه (يلاا ) نزلت لطيفه وهي تتحرطم على روضه ,, قفلت روضه السياره ودخلت ولطيفه تلحقها وتتحرطم
لفت روضه على لطيفه ..
روضه: لوولوو ,, خلااص مافيه شي بس فكيني .. وقت ما ابا ارمس بيج وبقولج ,, اللحين خليني
لطيفه: خلااص اوكي ع راحتج
روحت روضه لكلاسها ولطيفه بعد روحت لكلاسها وهي مستغربه من روضه بس طنشت .. شافت ربعها وسولفت ونست السالفه ..

يا ترا شماا شو فيها ؟!! وروضه شو سالفتها ويا راشد ؟!! وشو بيصير بين شما وخلفان ؟!!

اتريا ردوودكم ..
ودمتم بود .. __DEFINE_LIKE_SHARE__

0oبركان الغلاo0 · 07-24-2008, 03:22 AM

طرشتلي البارت الثاني .. وما رمت ما انزله
بس بليييييييز .. اذا عيبتكم البدايه ردوو عشان تكمل ..
انا عيبتني بس ما طاعت تكملها لي .. قالت لو عيبت مجموعه لا باس بها وردو ان البدايه حلوه بكمل ..
تراها هي تشوف الموضوع ..

البارت الثاني ..

في الجامعه ..
لطيفه قاعده في الكانتين ويا ربيعاتها ..
ريم: لوولوو وين رويض ؟
لطيفه: اممم .. عندها كلاس ع ما اعتقد
سلامه: لا شوفي هاي ساره اللي دوم وياها وكلاستهن رباعه .. اكيه يالسه ع الطاوله اللي مجابلتنا
ظهرت لطيفه فونها من مخباها وتوها بتتصل بروضه وانها يايه صوبهم
روضه: مرحبااااااااااااااااااا
البنات : هلاااا والله
لطيفه : عمرج طويل .. توني بدقلج اشوفج وين
ريم : انا بسير اخذلي عصير .. تبون شي

روضه: عصير برتقال لو تسمحين
لطيفه :وانا بعد
سلامه : وانا فراوله
مريم : وانا بقوم وياج
ريم: يلاا
قعدت روضه وصاح فونها يوم شافت الرقم انجلب ويها والكل لاحظ .. قامت بعيد عنهن وردت ع التلفون
راشد: هلا والله برواضي
روضه: هلا اخويه
حس راشد انها نغزه بس طوف : علوومج
روضه: طيبه
راشد: عوذ بالله بلاج ترمسين جيه ..مب انتي رواضي الاوليه
روضه: الله لا يبلاك .. مابلاني شر .. بس عند البنات كيف تباني ارمس
راشد: المهم .. اخبارها شمووه ؟ اتصل بامايه ما ترد عليه
روضه: امك ناسيه فونها فالبيت
راشد: شدراج ؟
روضه: لوولوو قالتلي
راشد: منووو؟؟
روضه: لطووف
راشد : لووولووو ..هههههه اسميه ما يركب عليها
روضه: يركب ما يركب ها مب شغلك
راشد: ادري انه مب شغلي .. انا شغلي مدير
روضه: رااااااااشد
راشد: هههههههه انزين انزين ..ما تتحاجين اليوم
روضه: اخلص عااد .. شو تبا ؟
راشد: اتخبر عن شما
روضه: انا روحي نسيتها ..يلا برايك بشوف امايه والا خلفان وبرد عليك
راشد: اوكي
سكرت روضه عن راشد واتصلت بامها
روضه: مرحبا امايه
ام خلفان: مرحبا فديتج
روضه: ها بشري عن شما
ام خلفان: والله بعدها .. لين اللحين محد ظهرلنا
روضه: الله يعينها .. طمنيني عليها فديتج
ام خلفان : ان شا الله
سكرت روضه وردت للبنات
سلامه: ما يستوي تغازلين جدامنا
روضه: تراج قلتي اغازل ..ماباكن تسمعني
ريم ومريم يايات
ريم: امففف .. منو يغازل بعد
روضه: شدراني عن سلامي وسوالفها الفاضيه
لطيفه: لا صدقها ..والا ليش سرتي بعيد ولفيتي بعد عشان ما نشوفج وانتي ترمسين
مريم:اسميكن بلشه .. خلنها ع راحتها
روضه: قولي انتي !! عافداتلي في حلجي
سلامه: انزين طمني قلوبنا وقولي ترمسين منوه
روضه: ارمس امايه اطمن ع شما
فزت لطيفه وكانها تذكرت شي : اماايه سارحه لشما ؟!! ليش شما شو فيها ؟!!
روضه: اووه انا بعد نسيت اقولج ..شماني تعبانه وودوها الدختر الصبح
كفختها لطيفه ع جتفها
لطيفه: كيييف تنسين ؟
روضه: بعد ربج
لطيفه: واللحين شو شمااني .. ربها بخير
روضه : والله الحمدلله .. وتذكرت راشد وطرشتله مسج
شربن البنات عصيرهن وكملن سوالفهن وعقب ريم وروضه راحن لان باقلهن كلاس ,, اما مريومه وسلامي ولطووف تمن قاعدات لان الدكتور غايب ..
في الدختر ..
ام خلفان : الله يهديج يا ام سلطان .. لا توترين عمرج ..يسير يرتفع عندج الضغط والا شي
ام سلطان: ما اروم ما اتوتر واحاتي ,, ما سمعتي الدكتور شو قال !! قال انها ما تتحمل ,, قلبها ضعيف
ام خلفان : الله بيعينها ان شا الله
طلعت النيرس من الغرفه وزقرت ام سلطان
ام سلطان : ختيه لطيفه .. تعالي ويايه
ام خلفان :يلااا
دخلن عند شما .. وعقب خمس دقايق يا خلفان وما لقا حد في الممر ..
خلفان: وين سارن بعد هالعيايز
سمعته النيرس
النيرس: استااز ؟!! عم بدور ع المرتين اللي كانو هون ؟
خلفان: هيه .. شفتيهن ؟
النيرس: فاتو لجوو عند المدام
خلفان : اهاا .. اوكي مشكوره
نرد للجامعه ..
الساعه 12 خلصت روضه كلاساتها واتصلت بلطيفه عشان تلاقيها عند الباب بيروحن ..
طلعن البنات من الجامعه .. وهن فالدرب
لطيفه: رويض ..خلينا نمر ع ميره نظهرها من المدرسه
روضه: ماشي باقي ع الدوام ساعتين وبترد البيت
لطيفه: انزززين ..ما تحيدينا نحن كيف كنا نستانس يوم نظهر ..لو الحصه الاخيره
روضه: عاد اختج علمي ما بتطيع
لطيفه: لا ما عليج منها .. ع الشله تراها
روضه: خلاص عيل .. بنتغدى برع اليوم
لطيفه: عاااشت المرووقه
روضه: لا تطنزين وتخليني اغير رايي
لطيفه: لا لا لا .. اسولف والله
مروا المدرسه وظهروا ميره وسارن يتغدن وناسيات سالفه شما المسكينه اللي فالدختر ..
وهن يسولفن ويضحكن صاح فون روضه وردت
راشد: حي الله العمه
روضه: الله يحيك .. بس اول مره تعترف اني عمتك وتاج راسك
راشد: ههههههه لاا فهمتيني غلط .. انتي من اليوم .. لا اقصد من قبل دقايق استويتي عمه محمد بن خلفان اللي انا استوي خاله
روضه تزاعج وناسيه عمرها انها في مطعم وناس حولها : شماااااااني ربت!!
لطيفه: ربــــــــــــــــــــت؟!!
ميره مب فاهم السالفه ؟!!
راشد: ههههههه طريتي اذني .. هيه ربت .. انا بخلص وبسير صوبهم
روضه: اوكي .. نحن اللحين بنسير
راشد: انتن منو؟
روضه: انا ولطوف ومياري
راشد: هن وياج؟
روضه: هيه اليوم خلصنا من وقت ومرينا ع مياري وسرنا نتغدا
راشد: يااااسلاام .. بدوني ؟! ,, هنالج تاكلين بدوني؟!!
روضه: طبعا .. وكان وايد لذيذ
راشد: انزين يلا يلا .. جلبي ويهج ..اونها تغايض
روضه: ههههههههه
راشد: اقوولج
روضه: هلا
راشد: لا تقولين اني انا اللي ارمسج .. بتصرطني لطوف .. بتقول بشرت روضه قبلي
روضه: ان شا الله بوسنيده
لطيفه: رااااااشد؟!!
راشد: الله يقطعج .. يلا بااي
روضه: ههههههه باي
سكرت روضه عن راشد واشرت للنادل ايب الفاتوره
لطيفه: كنتي ترمسين راشد ؟
روضه: ههه هيه
لطيفه: السبال ..والله براويه .. يتصلج انتي وانا ما يتصلي يبشرني
وصاح فون لطيفه .. شافت الرقم وسكرت في ويهه ..وروضه تضحك ,, دفعت الحساب وقامن
ميره: محد بيتبرع ويفهمنتي السالفه ؟!!
روضه ولطيفه :هههههههه
روضه: حليلج .. نسينا نخبرج
ميره: شوو؟
لطيفه: شما من الصبح تعبانه وفي الدختر وامايه عندها
ميره: هيه ,, ما حصلت امايه الصبح
لطيفه: واللحين بشرنا راشد ان شما ربت (ولفت ع روضه) ماقالج شو يابت؟
روضه: محمد بن خلفان
ميره: واااي فديتها والله .. بنسيرلها؟؟
روضه: هيه
ركبن السياره .. وصلن ميره البيت تبدل ثياب المدرسه ومرت روضه بيتهم تيب شنطه شما لان امها قاتلها وسارن الدختر توها بتدخل الباركنج جان يعرض راشد سيارته
روضه: سخييييييييييييييييييييييييييف
لطيفه: لا تقولين جيه عن اخويه
روضه : روحي زيييين انتي واخوج
ريوست اونها بتلف وعدل راشد سيارته جان تجدم مسرعه وتدخل الباركن ..
ميره ولطيفه : هييييه عااشت روووضووه بن سليم
روضه: هههاي ..شو تتحرون بعد .. بيقص عليه اخوكن
ريوس راشد وعرض سيارته ورا سياره روضه ..يعني ما تقدر تطلع الا اذا راشد حرك,, نزلن البنات يضحكن ع راشد وهو بعد نزل من سيارته ..ومشوا بيدخلون داخل
ميره: هههههه قصت عليك بنت محمد .. اونك يعني بتلعوزها
راشد: كسرت خاطريه عشان جيه خليتها
روضه: واااي وااي
راشد: جب جب .. طوفن جدامي
دخلوا وساروا صوب حجره شما .. ولطيفه طول الوقت ساكته اونها مغيضه ع راشد
وصلوا الحجره .. وروضه كانت جدام جان يدزها راشد
روضه: ااااه يالدفش شوف جدامك
راشد: خوزي عن عمج .. خليه يطوف جدامج
روضه: تخسي
ودخلت روضه وراشد وراها بيزخها لكن حشم يوم شاف خلفان رافع حياته ويطالعه
راشد والبنات: السلااام عليكم
الجميع: وعليكم السلام
وكلهم حول شما يحبونها ويباركولها ويشوفون البيبي وخلفان يروغهم عن ولده ويزاعج
راشد: اييييييه انته .. محد ياب عيال غيرك .. هاته ها ولد ختيه
خلفان: وختك من وين يايبتنه ؟
سكتوا كلهم ..
ام خلفان: يالله بالستر .. خلفااان !! ,, شو هالرمسه بعد؟
خلفان: تخبريه هو .. عيل يقول ولد ختيه .. ها ولديه انا
ام خلفان: صدقه انزين ولد خته بعد
خلفان : ماباا اعطيه اياه .. ها دفش
راشد: ماابااه .. فديت عيالي ,, بشلهم وبحبهم ,, الله يخليهم لي ولا ابا عيال حد غير
الكل استغرب من رمسته
ام سلطان: شوووووووه؟؟
راشد شافهم مب فاهمينه قال باستعبط عليهم : دامنها يت عاد السالفه ..انا بخبركم واللي فيها فيها
روضه طلعت >> صدقت مسكينه
حسبها راشد ووده يضحك بس ماسك عمره ..وخرط عليهم سالفه ,,انه معرس وعنده ولدين وبنت وسوالها سالفه عووده
راشد: ......واللحين هي تحن عليه تباني اعرفها عليكم .. ودامنكم عرفتو بالسالفه ,, خلاص الامور طيبه بيبها باي وقت
راشد يرمس والكل يطالعه باستغراب والكل مساكين مصدقينه لانه يرمس وشكله جدي .. ام سلطان ماسكه راسها وعقب ما خلص راشد كلامه رفعت راسها وطالعته
ام سلطان: اطلع برع
خلفان : استهدي بالله يا عمتيه .. الامور بتنحل بالتفاهم
ام خلفان: أي تفاهم اللحين ,, يوم قده 3 يتبعونه
وراشد مكمل مسرحيته وياهم .. وطلع بسرعه قبل لا ينفجر ضحك
حط خلفان الولد فالمنز ويا بيلحقه لكن ام سلطان حلفت محد يلحقه ,, ورد قعد
راشد من طلع ومشى فالممر نقع ضحك .. وروضه كانت قاعده ع الكرسي تمسح دموعها يوم انتبهلها سارلها ..اول ما قعدل عدالها وهو يضحك وقفت روضه بتسير .. انقطعت ضحكت راشد وزخ روضه من يدها وقعدها ..
راشد: بلااج؟
روضه: .........
راشد: رواااضي
روضه: مافيني شي
راشد: اشوف عيونج
وخت روضه وصاحت
راشد: حيااتي رواضي شو فييج؟
روضه وهي تصيح : ما تدري ؟!!
راشد تذكر ورد يضحك : هههههه ايه انا اسولف والله
لفت روضه تطالعه وهو يضحك ويضحك ويضحك
راشد: اسميكم مصخره ..هههههههه .. صدقتي ؟!!
روضه تكفخه ع جتفه: سبااااااااااال والله .. خربت علينا فرحتنا بالبيبي
راشد: غبياااات لانكن ,, مع احترامي لامي وامج طبعا
روضه: وشدرانا انك تسولف
راشد: انا اقصد عيال المستقبل بس يوم شفتكم مب فاهمين كملت
روضه: وقفت قلبي
راشد: سلامت قلبج .. مستحيل اصلا اخذ وحده غير اللي تختارلي اياها ختيه وحبيبتي رواضي
حست روضه بصعقه اقو ى من اللي قبلها ودارت بها الدنيا .. راشد ولا انتبه وقام بيدخل عندهم يخبرهم انه يمزح ولا يعكرلهم وناستهم ..دخل وخبرهم وحصله كم هزبه وكم سبه وطلع هو وخواته وامه بيسيرون البيت ورفيع هيت بتقعد بدال امها وام خلفان لانهن من الصبح لين الظهر وقت ما ربت شما وهن واقفات ع ريلهن ويحاتنها ,, وام خلفان طلعت مع خلفان .. وروضه روحت روحها ..
وصلت روضه قبل امها واخوها,, بدلت ثيابها ورقدت ,, وصلوا مها وخلفان وع طول روحو يرقدون ونشو العصر كلوهم شوي وعقب سارو لشما وروضه بعدها راقده ..
نشت المغرب ونزلت تحت مالقت امها ,, ردت فوق بتيب فونها عشان تتصل بامها ولابها عشان تكمل بروجكتها ,,

طلعت الفون واللاب من الشنطه وشفت 7 مسدكوول ,,5 راشد و2 لطووف وشافت مسج فتحته وانه من راشد ..
(( رواضي غناتي ترا شكلج اليوم موول مب عايبني ,, لو بتدسين ع الدنيا كلها عليه انا ما بترومين ,, ولا حتى اسلوبج ويايه ,, احسن شاربيه اذا كان كلامي غلط ,, واتمنى انج ما رديتي عليه لانج راقده لان لو عرفت انج شفتي اتصالتي لكن سويتلي طاف ما تبين تردين يا ويلج ))
ردت عليه (( المشكله انك فاهمني .. بس مب كل شي اقدر اقولك اياه .. ولا تخاف انا اصلا ما اروم اسويلك طاف وما ارد عليك ,, بس صدق كنت راقده))
راشد توه ظاهر من متسبح وسمع صوت المسج .. قراه ورد عليها
(( دامه يريحج انج ما تقوليلي انا راضي .. بس مابا اشوف رواضي اللي شفتها اليوم مره ثانيه ))
ما عرفت شو ترد عليه ..وشلت قشها ونزلت ..

احدااث يديده ومشوقه بين راشد وروضه ..بتعرفونها في الجزء الثالث __DEFINE_LIKE_SHARE__

هيام القلب · 07-24-2008, 07:24 PM

السلام عليكم ورحمة الله وبركاتهـ ..

مشكوووووورهـ انج طرشتيلي وقلتيلي اقرا هالقصهـ ^^

والحين بقراها فديتج^_^ __DEFINE_LIKE_SHARE__

‏εïз الجآدلـٌ‏ ّ ! · 07-25-2008, 02:58 AM

تسلمين ونشاااء الله نتبااع وتسلم ربيعتج __DEFINE_LIKE_SHARE__

MaT.7bk · 07-25-2008, 03:44 AM

اللهـ عيبتني القصهـ دخيلج قولها تكملها والله القصهـ حلوه حرآآم ما تنشرهـا هذا بيدل على انها مبدعة ولها مجال في الكتابة رمسيها دخيلج قوليلها تكملها .. !! __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وقت الساعــة حسب توقيت الاحباب المحلي	reemoooh95	قصص و روايات	9	11-20-2011 12:42 PM
وقت الساعــة حسب توقيت الاحباب المحلي	reemoooh95	قصص و روايات	3	01-23-2010 02:11 PM
طلب امر لضبط توقيت الساعه بالنود	محروم.كوم	منتدى أخبار المواقع والمنتديات العربية والأجنبية	0	10-03-2009 03:20 PM
وقت الساعه حسب توقيت الاحباب المحلي] ~	!!ـنونه	عدسة الاعضاء , كاميرا الاعضاء	22	10-23-2008 04:45 PM
وقت الساعهـ حسب توقيت الاحباب ] ~ CuteClocks	sєdυcтivє ғoosнєүa	اثاث و ديكور المنازل والمطابخ والصالات	5	08-30-2008 01:52 AM