وقت الساعه حسب توقيت الاحباب المحلي - الصفحة 14

دمعة المشتاق · 08-12-2008, 03:59 AM

تسلمين اختي ع القصه الصراااحه طر

يعطيج العافيه

ونتريا البارت __DEFINE_LIKE_SHARE__

MaT.7bk · 08-13-2008, 04:14 AM

????????????

we are waiTing .. __DEFINE_LIKE_SHARE__

دمعة المشتاق · 08-14-2008, 02:07 AM

ويــــــــــــــــــــــــــــــــــــــــــــــــ ــــــــــــــــــــــــــــــــــن البارت حبوبه؟؟؟؟؟؟؟ __DEFINE_LIKE_SHARE__

0oبركان الغلاo0 · 08-14-2008, 04:27 PM

السموحه ع التأخير __DEFINE_LIKE_SHARE__

0oبركان الغلاo0 · 08-14-2008, 04:27 PM

البارت 12
راشد وروضه قعدوا يسولفون ويتغازلون ويضحكون ..وميره وسالم ساااااااااااااكتين ..
سالم يطالع الارض وايديه وينقع اصبوعه وميره عقب ما قعدت تطالع المكان وتتريا سالم يرمس ..طلعت فونها وشغلت الافم ام وحطت سماعاتها وقعت تسمع وكل شوي تلتفت تطالع سالم وهو بعده سرحااان ..
مرت نص ساعه وهم ع هالحال ..
عقب بندت ميره الفون ونقزت ..كان ودها تنبه سالم وهو فز من حركتها ..
ميره: اللي ماخذ عقلك يتهنابه
سالم: محد ماخذنه
ميره (تدلع): حليلي ..من نص ساعه يالسه عدالك وانت سرحان ولا ترمسني
ابتسم سالم ونظراته كلها حب لهالانسانه اللي من اول ما شافها اسرته: السموحه منج الشيخه
ميره: السموحه حاااااافه !!
سالم بخبث : والله الود ودي انها ما تكون حافه ..بس تقدرين تقولين اني محشم شوي
كفخته ميره على جتفه : انززين حشم .. انا قصدي اباها بارده .. يعني مع ايس كريم لو تسمح
طالع ساعته: باسكن مسكر اللحين
ميره: منو قالك اني ابا من باسكن ..ودني الدكان
سالم : دكاان ؟! تبين ها مال نص !!
ميره: يااااااااااااالله ما قد كلت منه
سالم: ههههه لا بس من زمان ما سمعت به حتى
ميره: انزين يلا عاد .. ودني الدكان
سالم: بتمشين ؟!
ميره: مب بعيد ؟!
سالم: لا مب وايد بعيد
ميره: اوكي يلا عيل
سالم: اول هاتيلي ماي
ميره: اكيه السياره تراك متساند عليها .. هاتلك ماي روحك
سالم: عيل ماشي سيره
ميره: ساااااااااااااالم
سالم: عيونه
ميره: يلا عاد .. ترا بسير روحي
سالم: جربي انتي بس
ميره: ههههه انزين يلا
مشى سالم : هاتيلي دبه ماي وقفلي السياره ولحقيني
بطلت باب السياره وخذت دبه ماي من الثلاجه وقفلت السياره ولحقت سالم ,, مشوا ميره وسالم سايرين صوب الدكان .. تخرطفت ميره وتيودت في سالم عشان ما تطيح على ويها وتعرفون طبعا البنات لازم يصرخن

سالم: سلمتيييييي ,, شي عورج ؟!
ميره(ترص على شفايفها) : لا عااادي
سالم: صدق والله ؟!
ميره: مافيه شي ..بسيطه
سالم: متاكده ؟!
ميره تهز راسها(هيه)
كملو دربهم وميره تسحب ريولها لانها وايد تعورها ..جان توقف وتصيح سالم كمل دربه ولا انتبه انها وقفت ..عقب انتبه ووقف ولف يطالعها .. حصلها قاعده على حصاه وميوده ريلها وتصيح .. ردلها بسرعه
سالم: بلاااج ميروه ؟!
ميره: ريولي تعورني ..ما اروم ادوس عليها
سالم: الله يهديج قلتلج شي يعورج قلتي لا (ووخى على ريلها) اشووف
يوم شاف ريلها حصلها مجرووحه جرح غزير شوي ووايد تصب دم .. صب عليها باقي الماي اللي فالدبه ومط سفرته من على راسه ونظف ريلها عن الدم
ميره: بتخيس سفرتك
سالم: عنبو ,,الا هي سفره .. تفداج
وطوا ريلها بالسفره ووقف ومد ايده لها عشان توقف
سالم: ترومين تمشين لين السياره والا ايبها لين هنيه لج؟؟
ميره: بتخليني روحي ؟!
سالم:عيل بتمشين؟!
ميره وهي تمسح : شوي شوي
ابتسم لها سالم : انزين يلا ..(ويرمسها شرات اليهال) تاااااته تاااااته
ميره ترمس بدلع وهي تمشي : سااالم
سالم:عيوون سالم ,, روحه ,, حياته ,, قلبه ,, امري
استحت ميره : بس عاااد
ضحك سالم ومشوا صوب السياره خلاص ما بيسيرون الدكان .. سالم يمشي شوي ويوقف شوي عشان تلحقه ميره لانها ماخلته يمسكها ويمشيها .. يوم وصلوا للسياره شافوا روضه وراشد يتريونهم
راشد: وين سرتو؟!
سالم يطالع ميره ورد يطالع راشد : حتى نحن سرنا نتغازل
ميره اطالع باستغراب (ها شو يقول لاخويه!!) وروضه ضحكت ..وحتى راشد ضحك لان عرف ان سالم يتطنز عليه
راشد:انزين يا روميو .. عطني السويج خلنا نروح لان حرمتيه موول مب ويه مازل
سالم: افاا
راشد: والله ,, انا في وادي وهي في وادي ..كل ما اقولها شي قالت لا تتعب عمرك ع الفاضي انا مسطله وما استوعب شي
كفخته روضه وضحكوا الكل ,, حط سالم يده في مخابيه ولا لقى السويج ولف لميره
سالم:السويج عندج؟!
هزت راسها ميره بمعنى ( هيه ) ومدلته السويج .. ركب سالم هو اللي بيسوق وركب راشد عداله والبنات ركبن ورا وابتبهت روضه لريل ميره
روضه: اوووووه مياري بلاها ريلج ؟! رب ما من شر !!
ميره:الشر ما ايج .. تخرطفت وتعورت ريولي شوي
مر سالم عالدكان وخذ كرتون ايس كريم .. وعطاه ميره وروضه احتشرت حتى هي تبا ايس كريم .. تونه راشد في صفها ويواجع عشان يعطونه ..
سالم: البنيه اللي تعورت مب انتو
ميره: انزين بعطيكم ماباكله كله
سالم: لا لا تعطين حد
راشد: لا تعلم ختيه البخل .. خلها دامنها كريمه وبتعطينا
ميره: حرام سالم .. عقب بطني بيعورني
سالم: هيه صح .. خلاص عطيهم
وزعت ميره عليهم الايس كريم ويلسوا يتلحسون ويسولفون لين ما قربوا من بيت بوخلفان
راشد: اييه ززلف لف ..بنزل ميره قبل
سالم: اسميك جحا .. يعني ننزل ميره عقب نسير نحن بيتنا عقب ترد انت البيت!!
راشد: هيه
نقعن ضحك البنات وسالم على ذكاء راشد
سالم: الله يعينج يا ختيه على غبائه ..جحااا
راشد: شدراني
وصلوا البيت نزلت روضه ونزل سالم وراشد بعد نزل عشان يبدل مكانه .. دخلت روضه وتوه سالم بيسير عنهم رن فون راشد وانتبه سالم لرد راشد ورد يسمعه ..
راشد: هزاع الـ.. ؟!! هيه نعم .. شووو ؟!! .. أي مستشفى ؟! .. اوكي يلا ياينكم
سكر راشد وركب السياره بسرعه ووقف سالم عند جامته
سالم: رب مامن شر ؟! شو صاير
راشد: والله شدراني .. بس هزاع مسوي حادث والشرطي يقول مب قادرين نتعرف على جثه واحد من ماتوا في الحادث لان 2 كانو وياه .. ها غير السياره اللي دعموها والله اعلم كم فيها..واتصلوا عليه لان رقمي اخر رقم في تلفون هزاع
سالم: وهزاع شي فيه ؟!
راشد: ما ادري اللحين بسير لهم
سالم: بسير وياك
راشد: يلا اركب
ركب سالم بسرعه وريوس راشد
ميره: وانا ؟! بتودوني البيت
راشد: اوووه وين فيه اللحين الف ع البيت بعد (جدم السياره ودخل الحوي ) نزلي ..باتي اليوم عند روضه
ميره: اوكي
نزلت ميره تسحب ريلها ودخلت البيت شوي شوي وهم شخطواا السياره وطاروا للمستشفى
وصلوا المستشفى ودخلو قسم الطواري وسالوا عنهم ودلتهم النيرس وينهم .. لقوا لمه شرطه عند باب الرفه وسارلهم راشد وسالهم وخبرهم انهم هم اللي متصليبه عشان ايهم .. وودوه صوب الغرفه اللي كانو حاطينهم فيها ..
دخل راشد وسالم ووياهم الشرطي بس طبعا سالهم اول شي شو يقربون لهزاع وقالوله انهم ربعه ويرانه ..
كشف الشرطي عن ويه الريال الاول وانصدمو الاثنينه وقامو يطالعون بعض ويذكرون ربهم ويترحمون عليه وعيونهم تغرغر من الدموع .. وكشف الشرطي عن ويه الريال الثاني وكانت المفاجاه او المصيبه الاكبر ..
صرخ راشد ومسك الريال من جتوفه وتم يصارخ والشرطي يدزه وسالم تصنم في مكانه
راشد ودموعه تسبق كلماته : اييييه لا تستهبل .. ووووين بتسير وبتخلي عيااااااالك .. سلطاااااااااان .. لا تكسر ظهريه .. لا تخليني روحي يا خويه انا ما اروووم
الريال الاول كان ربيعهم هزاع والثاني كان سلطان اخو راشد وفي غيرهم بعد واحد .. بس راشد يوم شاف اخوه وانهار الشرطه طلعته بسرعه من الغرفه وطلع سالم وراه بخطوات ثقيله وبصمت وصدمه ..
حاولو يهدون راشد وسالم قعد على الكرسي مجابل راشد يطالعه ودموعه تنزل بس بكل صمت ..
وعقب ساعتين يت النيرس لسالم لانهم ماقدروا يتفاهمون ويا راشد
النيرس: اخوي انت تقرب للي سوو حادث ؟!
سالم بصوت خانقته العبره: ولد عم سلطان
النيرس: انزين اخوي ,, كانت وياه حرمه فالسياره
سالم: حرمته .. شو حالتها هي ؟!
النيرس: والله ما ادري شو اقولك .. اخوي الحرمه حالتها خطيره وهي في غيبوبه اللحين لان الضربه يتها بالراس
سالم: غيبوبه ؟!
النيرس : ادعولها انتو .. عموما اخوي .. الدكتور يباك بخصوص هالمريضه
سار سالم صوب الدكتور
سالم: هلا دكتور .. انت زقرتني ؟!
الدكتور : ايوه يا ابني .. انت بتأرب للست اللي كانت فالحادث
سالم: هيه
الدكتور: والله يا ابني مش عارف أأولك ايه .. بس مافيج داعي اني الف وادور
سالم: خير دكتور ؟!
الدكتور: الست حالتها خطيره وهي فالعنايه دلوأتي نحن مش قادرين نعملها أي حاجه دلوأتي.. بس لبكره الصبح احتمال ندخلها العمليه .. وانا ما اظمن لك انها هتعيش لان الضربه أويه فراسها
سالم: وليش ما ادخلونها العمليات اللحين؟!
الدكتور: ما نأدرش لان دأاات ألبها ضعيفه أوي وما بتتنفسج كويس والعمليه هتكون صعبه ..نحن هنعمل اللي نأدر عليه
سالم: خير لبكره الصبح ا نشا الله
الدكتور:خلاص انا استأزن بأه عشان اشوف المريضه
سالم: اوكي .. وطمني دكتور
الدكتور: خير انشا الله
سار سالم وقعد عدال راشد ..راشد منهار ع الاخر مب رايم يوقف دموعه ويهاذي باخوه .. لوى عليه سالم وصاح بس سالم يبا يكون قوي قدامه عشان ما ينهار اكثر .. وتذكر اخوه خلفان وقام عن راشد واتصل بخلفان ..
الساعه 4 الفجر .. خلفان يوم سمع صوت سالم قفز وطلع عن شما من الحجره
خلفان: هاا بوغنيم ..شو بلاك ؟!
سالم (ما يروم يرمس): بو أحمد ..يا خلفان ..بو أحمد رااااح
خلفان: شو تقول انته .. منو بو أحمد ؟!
سالم والصوت مبحوح : سلطان
خلفان: شو تقووول !! سلطان !!
سالم: الله يخليك خلفان تعال الدختر ما اروم انا روحي هنيه
خلفان: وراشد؟!
سالم: راشد ويايه لكن ها روحه انهار يوم درا عن اخوه
خلفان: اوكي يلا ياينكم
سكر عنهم خلفان ودخل بسرعه الحجره ولبس كندورته وشل سويجه وطلع ونشت شما على قرقعته سالته شو السالفه وع وين رايح ما رد عليها .. نزل يركض وركب سيارته وشخطبها وروح للدختر .. تروعت شما ونشت وميره وروضه كانن واعيات يوم سمعن صوت السياره طلعت روضه وشافت ان سياره خلفان مب موجوده .. وسارت صوب حجرته .. فتحت الباب شوي شوي وشافت شما رايحه راده فالحجره ودخلت
روضه: شو السالفه شمووه ؟! شو فيه خلفان ؟!
شما : ما ادري .. ياه تيلفون وربع
تذكرت روضه انم يره قالتلها ان راشد وسالم سارو لربيعهم مسوي حادث وطلعت بسرعه صوب حجره سالم ولقت فراشه مثل ما هو يعني ما رد البيت للحين ..يعني احتمال هو اللي اتصل بخلفان .. بس مب اكيد
ردت حجرتها وشلت فونها واتصلت بسالم وما رد عليها.. مره مرتين ثلااث ما رد وعقب اتصلت براشد ونفس الشي بعد ما رد عليها .. وحاولت مره ثانيه تتصل بسالم بس هالمره رد عليها ..
سالم: الوو
روضه زات من سمعت الصوت: شو بلاك سالم ؟!
سالم (يحاول يعدل صوته): ما فيه شي .. شو تبين ؟!
روضه: وين انت؟َ!
سالم: مشغول شوي .. برد ارمسج عقب
روضه: انزين خلفان ليش طلع من البيت اللحين مسرع .. انت اتصلت له
سالم: هيه .. خلاص رواضي برمسج عقب
سكر عنها بس ما ارتاحت حست ان في سالفه وراهم وسارت صوب شما تخبرها ..
خلفان وصل الدختر وبسرعه صوب سالم وراشد .. راشد خلاص هلك وودته النيرس لغرفه عشان يريح شوي وسالم وقف ويا خلفان ويلس يخبره بالسالفه
خلفان: وحرمته بعددد ؟!!
سالم يهز راسه (هيه)
خلفان: الله يعين .. لا حول ولا قوه الا بالله
ياالدكتور صوب سالم وقاله ان الحرمه توفت وما قدروا يسعفونها او يسولها أي شي .. عقد على الكرسي وحط راسه بين ايديه وتم يستغفر وهو يصيح وخلفان سار صوب الشرطي وشافت شو السالفه وشو الاجراءات .. وقالهما نهم بيدفنونه هو وحرمته الصبح .. ورد لسالم يرمسه ولحقه الشرطي ووقف يرمسه .. وطلع ان الحرمه مب رفيعه حرمت سلطان ..سلطان كان وياه نسيبه اخو رفيعه وهو توفى بعد ..وهزاع كانت وياه حرمته وتوفت هي وريلها .. ما عرف خلفان يفرح والا يزعل على رفيعه ..
أذن الفجر وقامو سالم وخلفان يصلون .. وخلفان خذ التيلفون عن راشد عشان ما يتصل بابوه ويخبره .. هو اتفق وياهم انه بيسير يصلي في المسيد وعقب بيرد البيت عند ابوه وبيخبره وبيسير وياه عند عمه ..
سالم سار المسيد اللي فالمستشفى يصلي وخلفان روح بيصلي فالمسيد اللي عدال البيت عشان يلاقي ابوه وعمه هناك ,,
عقب الصلاه طلع خلفان ووقف عند سيارته يتريا ابوه .. وعقب ما خلص بوخلفان سار صوب ولده
بوخلفان: صبح الخير
خلفان يحب ابوه على راسه: صباح النور
بوخلفان يحط ايده على راس خلفان اونه بيمط شعره : شو ها يا بويه .. ناش دهمان ما تحط السفره على راسك
ابتسم خلفان ودمعت عينه
بوخلفان: اللهم صلي على محمد .. شوبلاك يا بويه
خلفان: الله لا يبلاك .. ماشي .. اركب بنرد البيت
بوخلفان: لا انا بمشي ..برايك انت سير بسيارتك
خلفان : خلاص عيل .. نتلقى فالبيت
ركب خلفان ومسح دمعته وريوس وسار للبيت وبوخلفان بعدمشى صوب البيت .. قعد خلفان فالمنصه يتريا ابوه ويوم وصل ابوه وشافه تروع .. حس ان في شي مستوي .. سار صوبه ويلس عنده ..
وشوي وياب الطباخ الدلال للشيبه وخلفان يتحنحن ويعدل يلسته ومب عارف يتصرف اصلا ..
حس عليه بو خلفان: خير يا بو محمد .. شعندك؟
خلفان: والله يا بويه ما ادري شو اقولك .. لكن هاي هي الدنيا .. ما تدوم لحد
عدل بوخلفان يلسته وكانه يتريا يسمع شي من خلفان بس خلفان سبقنه دموعه وما رام يرمس
بوخلفان: لا تطير لي عقلي يا بويه .. شعندك؟!
خلفان : سلطان ولد عمي أحمد
وقبل لا يكمل خلفان رمسته قطعه بوخلفان: لا حول ولا قوه الا بالله
خلفان: راااح خويي يا بويه .. راااح
بوخلفان : انا لله وانا اليه لراجعون .. هاي هي حال الدنيا (وقف بوخلفان ووقف وياه ولده) حادث؟!
خلفان يهز راسه(هيه)
بوخلفان: وشو منفد العرب الا هالسياير .. لا حول ولا قوه الا بالله
ودخل بوخلفان ولحقه خلفان
خلفان: انزين ابويه .. عمي ما عنده خبر
بوخلفان: لا يا بويه انا ما اروم اخبره .. سير انت لعمك .. اعفني من هالشي
خلفان : لا يا بويه دخيلك .. لوانت ما رمت اقولك اياها الا بطلوع الروح .. عمي كيف بقوله
بوخلفان: عيل اصبر لين الساعه 7 .. وبنسير رباعه
خلفان: انشا الله
دخل بوخلفان حجرته ياخذ حبوب الضط والسكر وخلفان سار فوق .. دخل حجرته وحصل شما منسدحه على الكرسي فالصاله وراقده .. دخل الحجره واتصل بسالم وقاله يرد البيت وايب راشد وياه لان قعدتهم ما منها فايده هناك لين يخبرون بوسلطان وعقب بيسيرون كلهم وبيغسلونه وبيدفنونه ..
سار سالم لرفه راشد واقنعه انهم يردون البيت يريحون شوي وعقب بيردون للدفن .. وسار راشد وياه ..
وصل سال بيتهم ونزل ودار وفتح الباب لراشد ونزله لان راشد كان سرحانه بس جيه يمشي .. سار ويا سالم فوق حجرته .. وانسدح على الشبريه وانسدح سالم عداله ومن التعب ماحسوا بعمهم الا راقدين .. وخلفان قعد عند راس شما ويمسح عليها لين نشت
شما: حبيبي وين سرت ؟!
خلفان يبوسها : خلج من وين سرت .. قومي ابا اقولج شي
قعدت شما: امر
خلفان: لا اول تسلي وبدلي وانا بنزل تحت عند ابويه شوي وبردلج
استغربت شما وما عارضت قانت تتسل وهو سار لحجره سالم قبل يشوفهم اذا يوا والا ولقاهم رقوود ,, طلع عنهم ونزل تحت .. وما لقى ابوه ,, يعني بعده ما طلع من حجرته ..ورد مره ثانيه فوق ولقى شما تصلي الصبح ..
قعد فالصاله ويوم خلصت سارت وقعدت عداله
شما: خير بومحمد شو بلاك ؟!
خلفان : حبيبي انتي انسانه عاقل وتفهمين وتعرفين ان كل شي بايد الله ..صح
زاغت شما : صح
خلفان: وتعرفين ان الله اذا اراد شي ,و لا بايدي ولا بايدج نقدر نرده

شما: خلفان حرقتلي دمي .. قول شعندك؟!
نزل راسه وسكت لثواني ورد يطالعها : سلطان سو حادث
شما وايدها على قلبها : شو فيه اخويه ؟!
خلفان بصوت خانقتنه العبره : مااات
شهقت وتمت تطالع خلفان باستراب تحاول تستوعب شو يقول .. عقب دفنت شما عمرها بحظن خلفان وصاحت .. لوى عليها خلفان وحاول يهديها شوي .. وعقب دقايق بعدها عن حظنه وباسها وهي تمت مثل الصنم دموعها تنزل بس بدون صوت ..
قام عنها خلفان بيطلع جان توقف وراه وتلحقه
شما: لا تخليني خلفاااان
رد خلفان ولوى عليها : حبيبي .. لازم اسير لابوج .. برد لج حياتي
شما تبتعد عن خلفان وتمسح دموعها : اوكي
نزل خلفان عند ابو ولقاه يترياه فالصاله .. قعد عداله وقعدوا هم الاثنين محتارين كيف يسيرون ويخبرونن بوسلطان عن ولده

يتبع .. __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وقت الساعــة حسب توقيت الاحباب المحلي	reemoooh95	قصص و روايات	9	11-20-2011 12:42 PM
وقت الساعــة حسب توقيت الاحباب المحلي	reemoooh95	قصص و روايات	3	01-23-2010 02:11 PM
طلب امر لضبط توقيت الساعه بالنود	محروم.كوم	منتدى أخبار المواقع والمنتديات العربية والأجنبية	0	10-03-2009 03:20 PM
وقت الساعه حسب توقيت الاحباب المحلي] ~	!!ـنونه	عدسة الاعضاء , كاميرا الاعضاء	22	10-23-2008 04:45 PM
وقت الساعهـ حسب توقيت الاحباب ] ~ CuteClocks	sєdυcтivє ғoosнєүa	اثاث و ديكور المنازل والمطابخ والصالات	5	08-30-2008 01:52 AM