~» .. غريبه وســط أوطــاني .. «~

بنوتة من العين · #1 02-17-2010, 10:41 AM

السلام عليكم ورحمة الله وبركاته

عندي لكم قصة { تجنن ع قولتكم ووايد حلوة ربيعتي كاتبتنها و احداثها كاملة حقيقية ومستوية عندنا فالعين واصحاب القصة وابطالها

موجودين ... بس الاسماء متغيره }

المهم اخليكم مع القصة

~» .. غريبه وســط أوطــاني .. «~
>تــدري وش الغربة إني داخـل أوطــاني .. وأعيــش مثل الغريب بديرة الغـــربه <

ليت الليالي ماقست على موّد وموّده .. وليت الزمـن ماجار ع احباب واحباب
قصةٍ كتبتها وبها ألف سـدّه .. تحوي بها أسرار لأقراب واغراب
دنيا غريبه والمصايب بها عـدّه .. يا ما قست ع الناس وانقطعت ارقآب !
بحكيها وبكل وضوحٍ وحدّه .. بكل مافيها من افراح واكراب
ماهمني من قـال ماني بـ قده .. ماني من اللي من خفيف العقل يرتاب !

&* الجــزء الـــــأول *&

في امرييييكا .. قبل سبع سنواااااات ..

عقب انتظار دام ساعتين الا ربع وقفت جدامي سياره بكل هدووء .. رفعت راسي .. استغربت .. انتفض جسمي من أوله لأقصاهـ .. لا أنا أكيد أتوهم .. أكيد هذا واحد من أحلامي اللي أحلمها كل ليله .. دوم أنا أحلم بهالحلم شمعنى هالمره يعني بيكون حقيقه ؟ لا انا أكيد أحلم .. فركت عيوني .. وطالعت مره ثانيه شفت نفس الشي ! لا عيل انا ما أحلم .. !

هالسيـارهـ عليها رقم من الامـــارات !! لا ومن بوظــــبي بالــذات . . وايقــت داخل السياره . . ماشفت حد . . التفت على يميـني . . شفت شــاب طويـل واقف عدالي وشكــله أبدا مب "أمريكـــي" مثل الاشــكال اللي اشوفها يومياً ..

كان لابس جاكيت طويل لونه بني غامج ولاف وشاح بني فاتح على رقبته .. وطاقيه بنيه بعد ع راسه .. و لابس بنطلون جنز .. عمره تقريباً في آخر العشرينات .. شكل ويهه كان قريب من ويوهـ الناس اللي كنت عايشه وياهم قبل 6 سنين في "الامارات" بلاديه آآآهـ فديت ثراها .. متى برد لها يارب متى ؟

لفيت حجابيه عدل يوم شفته تقرّب .. طالعت في ويهه وعقدت حيّاتيه اترياه يرمس لأني انا ماعرف شو اقوول !

رمس هو يتأتأ وانجليزيته مب ذاك الزود : can I helb you ?

قلت له : يا حافظ helb ? الناس يقولون help ياريال !

ضحك على عمره وخلاف قال: انتي شو ميلسنج هنيه ع الشارع لايكون طلاّبه (طراره أو شحاته أو اللي تبونه ) وانا مادري ؟ أول مره اشوف طلاّبات في أمريكا ..

ضحكت وخلاف قلت : لا بس مطروده من البيت .. وماحصلت تاكسي هالوقت .. قلت ايلس ع الشارع يمكن يخطف تاكسي خلاف ..

طالعنيه باستغراب وقال: اقول ركبي ركبي بوصلج وين تبين حشا كيف استحملتي هالبرد ..

وقام وتوجه صوب باب السايق وركب جنه كان متأكد اني بركب .. اما انا ماكان جدامي خيار ثاني غير اني اركب لأني لو ماركبت بتم هنيه لين الفير واكيد بتحنط من البرد ! رديت طالعت رقم سيارته .. كان ثلاثي .. ونفس الرقم هو اللي مكرر ..

ركبت وانا احس بأعصاب جسمي تمددت من حسيت بدفا السياره ..

طالعنيه فتره وقال: انا حمد ..

قلت: وانا حمده ..

حمد: تنطنزين ولا صدق ؟

حمده: لا صدق .. ليش مستغرب يعني ؟

حمد: كل شي يخليني استغرب .. مواطنه ويالسه على رصيف واحد من شوارع شيكاغو .. وفي هالبرد وتقول مطرودة من البيت .. واسمها مايفرق شي عن اسميه غير الهاء اللي في آخر الاسم .. !

حمده: أول شي انا هب مواطنه انا عنديه الجواز الامريكي وثاني شي انا انطردت من البيت لأنه اميه شافتني أصلّي ! كفختني وتم تسب وتشاتم و تلاعن وآخر شي فرتنيه من باب البيت .. وبس ..

حمد: امــج خبــله ولا شو ؟

حمده: مريضه نفسيه عااادي طايحه فيّه تكفيـخ .. كمن مره دخلت مصحه ..

سكّت شوي وانا أحس اني قلت شي المفروض ما اقوله وانتبهت اني ارمس بطنازه بعد شكلي وايد ماخذه الموضوع بالسااهـل .. والله حاله .. بس هاي هب اول مره انطرد من البيت ! بس هالمره شكلها جااايدهـ !..

غيّرت الموضوع وقلت : الا اقول انته شقايل يبت سيارتك من الامارات لين هنيه ؟

حمد: عادي شحنوها فـ سفينه لين هنيه .. انا عني ماروم استغني عنها هاي أغلى شي عندي ..

حمده: آها ..

حمد: انزين وين تبين اوصلج ياااا ..... شو يسمونج هنيه ؟ اكيد مايقولولج حمده ..

حمده: لا يسموني هانا ..

حمد: حيالله هانا مونتانا هع .. الا اقول وين تبيني أوصلج هانا مونتانا ...

ضحكت شوي خلاف قلت : مادري أي مكان اروم ارقد فيه بما اني ماروم ارد البيـت ..

حمد: ماعندج ربايع أهل أي حد اروم اوصلج عنده ؟

حمده: عندي خالي اللي في نيو اورليانز وأكيد ماتروم توصلنيه صوبه .. !

حمد: محد اقرب ؟

تنهدت وقلت : للأسف لا ..

قال حمد بابتسامه: شرايج اقطع لج تذكره واردج الامارات !

ضحكت وقلت: جانك تبا فضايح فالمحاكم الامريكيه وبرامج دكتور فيل و اوبرا كلها ترمس عنك سو جذيه ..

حمد: اوف اوف لهالدرجه !

حمده: جيه ماشفت ذاك الاردني مادري فلسطيني مادله من وين ضاوي .. المهم .. يوم خذ وحده امريكيه فضحوه في كل بقعه .. تبا يستويلك جذيه ؟

حمد: لا يبوج .. انزين انتي ماعندج ربايع امره ؟

حمده: عنديه .. جودي .. بيتها عقب ثلاث شوارع ..

حمد: زين بعد يوم طلع لج حد .. انزين انتي شو سالفتج .. ؟ كل شي فيج غريـب !!

حمده: منو انته عشان اقولك اسرار حياتيه ؟

حمد: ما عليه لاتقولين الحين .. بس انا مابفج عنج مستحيـل اخليج !

حمده: ليـش ؟ لهالدرجه انا مهمه ؟ ترانيه حيالله وحده شفتها فالشااارع !

حمد : وانا هاي أول مره اشوف وحده فالشارع بما انه البنات مايظهرن فالشوارع وييلسن ع الارصفه الا جان عاد طلابات !

ضحكت بطنازه وقلت : مشكـــور الشيــخ ع التوصيـله والاهانــه ..

حمد: انا هب قصدي جذيه بسس .....

فهاللحظه وصلنا عند بيت جودي . . نزلت ورقعت بالباب ورايه . . والله انه مايستحي ع ويهه مسود الويــه ! حشا أول مره أشوف حد ماعنده أسلوب جذيه ..!

دقيت الجرس مره مرتين ثلاث . . وخلاف طلعلي يارهم وقال انهم مسافرين عشان يقضون اجازة عيد >الكريسمس< عند اهلهم في دالاس . . بما انه الكريسمس باقي له 3 ايام . .

تأففت ومديت بوزيه يلست ع الرصيف مره ثانيه وجتفت ايديّه .. الا بسيارة حمد ترد مره ثانيه وتوقف جداميه .. نزل الدريشه وقال: اركبي ..

حمده: مابا ..

حمد: يابنت الحلال اركبي هب زينه يلستج فالشارع جذيه ! واايد برد واحتمال ينزل ثلج بعد .. يالله تعالي ..

ركبت وانا مضطره .. صديت الصوب الثاني عنه وهو يبتسم .. حط اغنية وطوّل عليها .. ماعرفت منو هاللي يغني بما اني من زمان ماسمعت اغاني عربيه بس هاي عيبتني واااايد ..

لا تعاتبني على مزحي معاك .. وتعتبر مزحي وسيله للجفا
لو خطاي ومزحتي كانت خطاك .. كان قلبي ياحبيبي قد عفا
لأن قلبي مقصده يكسب رضاك .. وعاهدك يا صاحبي عهد الوفا
عاهدك مايعشق انسانن سواك .. وعن جميع الناس شايم واكتفا

حمده: منو هاللي يغني ؟

حمد: هذا اسمه عباس ابراهيم ..

حمده: سعودي ؟

حمد: هيه ..

طالعت الدرب وقلت : وين سايرين نحن ؟

حمد: بيتيه ..

انصدمت وقلت بصوت عالي : شوووووووووووووهـ ؟ لا يكون اتحسبني وحده من خايساتك ياللي ماتستـ ......

مـاواحـيت اكـمل الا وهـو يضرب بريك ويـوقـف السيـارهـ عـلى طـرف الشـارع ..

حمد: كملي ليش سكتّي هذا يزايه اني ابا اساعدج ؟

حمده: الله يغنيني عن مساعدتك جانها الا جذيه .. أوقف لي تكسي وادوّر أي فندق انخمد فيه أبرك !...

وييت بنـزل بس مسـك ايديه بقوه وماخلاني انزل ..

حمده: فج ايديه احسن لك ولا ترانيه بفج الدريشه وبصااارخ وبقول انك خاطفنيه !

حمد: جان ترومين سويها !

وبحركه سريعه مادري كيف سواها مد ايده الثانيه ومسك ايديه اللي كانت على وشك انها تفج الباب .. مسك ايديّه وقال وهو يطالع عيونيه: دخيلج لا تسيرين !

كان يقولها بترجي .. طالعت عيونه .. حتى عيونه كانت تترجاني .. ماعرفت شو اسوي

تميت ساكته فترهـ وعقب قلت وانا متردده : بصراحـــه .. لو كنت فالامارات الحين واستوا لك هالموقف كنت بتسوي نفس الشي ؟ ولا بتخاف من الفضايـــح ؟

فج ايديّه وقال : اكيد كنت بسـوي نفس الشـي .. هذا واجب عليـّّه اني اساعد أي حد يحتاي هالمساعده .. بعدين قولـيلي انتي عندج مكان تباتين فيه ؟

هزيت راسي بـ لا ..

حمد: عيل اكيد لو نزلتي بتباتين فالشوارع صح ؟

هزيت راسي بـ هيه ..

حمد: هيه عـيل خلاص تعالي عندي فالبـيت .. انا محد عنـدي والبيت واسـع تقريباً .. فيه اربـع حـجر .. واذا ماتبـيني ارقد فالبيـت حـاظر بدور لي أي فندق ..

سكت ومارديت .. عدم اعتراضيه دليل على موافقتيه ..

ابتسم هو يوم شافنيه ساكته .. آآآآهـ الله يقطع الحايه اللي خلتني ابات في بيت واحد ماعرفه .. !

وصلنا عند بيته .. كان عادي مثل بيوت باقـي الامريكـان تعرفونها شقايل .. نزل وانا تميت فالـسياره مـتردده انزل ولا لا .. بعــدين شفته وهو يفج لي الباب ..

حمد: تفضلي الشيخه مادريت بج من قبل ولا جان فجيت لج الباب ..

استغربت انه ماكان يقول هالشي بطنازه !

نزلت بـ سكوت .. مشينا كمن خطوه لين وصلنا الباب .. فجه بالمفتاح .. وأشر بأيده ..

حمد: تفضلي .. ليديز فيرست ..

دخلت .. كان البيت مظلم .. بس خلاف هو ولّع الليتات .. كان البيت رووعه من دااخل أثاثه غير شكل .. أول مادخلنا جابلتنا الصاله بألوانها الهاديه .. والليتات اللي مسويه عليها جو عجيب .. سار و شَب الضو حسيت اني فعالم ثاني .. بيته فيه شي غريب .. حسيت بـ راحه وهدوووء يوم دخلته .. كان في طرف الصاله الدري اللي يودي على فوق ..

حمد: شوفي الغرف كلهن فوق فـ أنا بييب قشاريه وبرقد فالصاله أوكيه ؟

حمده: بس هذا بيــتك ! شقايل ترقد فالصاله ؟

حمد: عشانــج ولا انتي عندج راي ثاني ..

حمده: لا ماعندي ..!

حمد: شوفي هذا اللي ع اليسار المطبخ وهناك حجرة الغسيل وشي صاله صغيره ثانيه وهذا اللي ع اليمين مكتبيه .. وهذا الباب الزجاجي يودي ع الحديقه اللي ورا والمسبح ..

و عقبها رقينا فوق .. تم يراويني الحجر .. كان شي اربع حجر .. حجرتين بس هن اللي مفروشات .. حجرته والحجره اللي عدالها .. طبعاً انا اخترت الحجره اللي عدالها .. دخلت وقفلت على عمريه وماسألت فـ أي شي ثاني كل همي كان اني ابتعد عنه وبس ..

أوووووووووووووووبــس ! ماعندي بجامه كيف برقد .. مشكله هالأم يوم تطرد ماتخلي الواحـد يشل شي امره بس ترفســــني برا الباب وما تسأل فيّه !

عقيت الحجاب و الجاكيت وبلوزة الصوف وتميت بالبدي الاصفر اللي بدون كم و الجينـــز ..

انسدحت ع الشبريه وتلحفت ما امدانيه افكر في شي الا وعيونيه تغمض .. رقدت بسرعه من التعب واليووع .. خاصةً انها الساعه 2:30 الحيـن !

وعيت على صوت دق ع الباب فتحت عويناتي شوي شوي .. انتبهت ع المكان .. انا هب في حجرتيه .. عيل انا وين ؟ فركت عيونيه وتثاوبت وخلاف تذكرت كل اللي استوا امس .. يعني هذا حمد اللي يدق عليّه ! نقزت بسرعه الحمدلله انه الحجره فيها حمام .. دخلت وتسبحت بسرعه وولبست ثيابيه مال امس وطلعت ولفيت شعريه ولبست حجابيه وطلعت وانا شاله جاكيتيه فـ ايديه لأني ماحسيته وايد برد ..

نزلت تحت بسرعه وانا ناويه اشرد قبل لايجوفنيه .. بس يوم التفت صوب المطبخ انصدمت انه كان مزهّب الريوق وحاطنه على طاولة المطبخ .. وواقف يتريانيه ..

حمد:صباح الخيــر ..

قلت باستغراب : صباح النور ..

طالعت شكله المبهدل لابس بجامة سماويه وشعره معتفس شوي وعيونه ناعسه شكله فيه رقاد ..وخلاف تثاوب وابتسم .. ياربي شكله يجنن .. اوووه هذا هب وقت شكله بس شسوي آآآآخ ياقلبي .. وش ذا الذي عيني تشوفه .. حوه شو يانيه بغني من صباح الله خير ؟.. أصلاً كيف يت فباليه هالاغنيه ؟ ييييييييه شكلي تخبلت .. بس هب جنه هالحمد شكله مألوف ع قولتهم ؟ انا مادري وين جايفتنه قبل !

طالعت الساعه اللي كانت ع اليدار كانت توها 7:30 .. كنت بطلع بس وقفني صوته وهو يقول ..

حمد: هاه هاه وين سايره جانيه الحين انا قايم من الساعه 6 عشان اسوي لج ريوق والحين بتظهرين عني ؟ لا والله ماكان ..

سحبنيه من ايديه ويلسنيه ع الكرسي مال طاولة المطبخ .. شكله هذا تعوّد على ايديه لازم انا اقوله مايمسكها مره ثانيه !

تميت اطالع كل شي محطوط ع الطاوله .. كان مسوي بيض ومصخّن توست وحاط قوطي العسل والمربى والجبن وقوطي الكورن فليكس والحليب و عصير البرتقال وكوبين قهوه .. كانت الطاوله متروسه وانا كنت يوعانه ..

حمد: شو بتّمين اطالعين الاكل جيه ؟ كلي .. ولا تستحين مني يعني ؟ خلاص بطلع اذا مب مرتاحه ..

حسيت اني بكون انانيه بهالتصرف هذا بيته وله الحق انه ييلس وين مايبا وانا ماليه حق اطرده .. وبيني وبينكم انا كنت ابا امتع عيوني فيه .. كان شكله عذاااااااااب .. آآآآهـ ويلي !

مديت ايديه ع كوب القهوه شربت منه شوي .. وخلاف تميت آكل من البيض اللي محطوط جداميه .. وهو تم ياكل بعد ..

عقب ماخلصنا قام و رقا فوق .. حصلتها فرصه عشان أظهر من البيت .. حاولت افج الباب لكنه كان مقفول .. ترييته لين ينزل عشان يفج الباب واطلع أوقف لي أي تكسي .. مستحيل هالمره اخليه يوصلنيه ..

رحت عند الستاره فجيتها طالعت الجو .. كان الثــلج ينزل بكثافه .. بس البيت دافي أكيد دامنه شاب الضو ورافع درجة حرارة المكيفات ومخلنها تدّفي المكان .. حسيت بالبرد بـ مجرد ماشفت الثلج .. لبست جاكيتيه وتقربت من الضو ويلست عدالها في انتظار حمد ..

نزل وهو لابس بلوزة صوف سوودا وجينـز .. وشال جاكيته الكحلي الطويل ..

حمد: غريبه ماشردتي !

حمده: وانته مخلنّيه أشرد تراك قافل الباب !

حمد: تصدقين نسيـت أبطله ! سوري ..

لبس جاكيته وطاقيته وظهّر مفتاحه من مخباه .. وفج الباب وظهرنا .. انا كنت أحس اني بتجمد من كثر البرد .. تمينا انا وهو نتنافض ..

حمده: ياخي تصدق جو الامارات لين الحين مأثر فيّه ..!

حمد: شوفي انا ابا اسمع سالفــتج كلها .. متى بتخبريني ؟

حمده: يوم أحس اني أثق فيك وتثبت لي حسن نيتك ..

حمد: شو أسوي يعني ؟ انا مستعد أسوي أي شي ..

حمده: لا تسوي شي تصرّف على طبيعتك وهالشي بيخليني اعرف أي نوع من الناس انته .. بس انته ليش تبا تعرف كل شي ؟ يوم بت عندك ليله وحده هالشي ماحط صوره مب زينه عني عندك ؟

حمد: بالعكس انتي ماسويتي شي غلط .. الغلط كله من امج اللي طردتج تالي هالليل .. بعدين البنات في أمريكا يسوّن ألعن من جذيه ..

حمده: بس أنا ما أعرفك عشان أبات عندك طول هالليل .. انا ربعي اللي فالجامعه واللي أعرفهم من سنين ماقد شفت حتى بيوتهم شقايل .. الحين تي انته اللي ما أعرفك وتبانيه أبات في بيتك وما أحس اني مسويه شي غلط ؟؟

حمد: بس انا ماكنت أقصد شي شين انا بس حبيت اساعدج ..

حمده: مشكور يزاك الله خير .. وخلاص انتهى الموضوع ما ابغي منك شي ولا اباك اتخبّرنيه عن سالفتيه مره ثانيه لأني ما اعتقد هالشي يخصك .. وهيه صح نسيت .. ايديه لا عاد تلمسها مره ثانيه ..

مشيت بعيد عنه وقلت : باااي ..

مشيت مبتعده عن بيته و طلعت من الحاره وقفت لي تكسي وركبته وتوجهت صوب بيت اميه ..

وصلت عند البيت ودفعت حق التكسي ونزلت .. وأول ما فجيت باب البيت .. انصدمت باللي شفته !

صرخت : Mom !

يلا عاد اتريا تعليقاتكم هالله هالله بردودكم ترا القصة وايد حلوة
__DEFINE_LIKE_SHARE__

Bebo ~ · 02-17-2010, 02:49 PM

ناااايس القصة ..
ربي يعطيج الف عافية ^^

ننتظر يديدج =) __DEFINE_LIKE_SHARE__

راعي استاندر · 02-17-2010, 03:02 PM

كشخه القصه

كملي كملي __DEFINE_LIKE_SHARE__

كسر الخواطر · 02-18-2010, 09:16 AM

القصه طرررر

يلا عاد اترياا التكمله

^^ __DEFINE_LIKE_SHARE__

بنوتة من العين · 02-18-2010, 09:40 AM

افا عليكم اتريا الردود بس

&* الجـــــزء الثـــآنــي *&

غراش الخمر طايحة ع الارض ومكسوره .. ريحه معفنه .. قطرات الدم مطبوعه على الارضيه .. و السجّين اللي متحوّل لون حديدها للأحمر .. والانسانه اللي طايحه ع الارض وفاجه عيونها بكل شراسه .. وايديها اللي متقطعات شرايينهن .. والدم عدالها مثل الانهار .. ماقدرت أصدق انه هاللي طايحه جدامي

"أمــــــــــــــــــي" !!!!!

بسرررعه دقيـت حق 911 .. ماعرفت شو اسوي !

يلست على واحد من الكراسي البعيده بدون أي حراك .. وتميت أصيح بكل اللي اقدر عليه ..

وصلت الشرطه والاسعاف .. دخلوا و شلتها الاسعاف .. والشرطه تموا يحاولون يسألوني بس انا ماقدرت أسكت من الصياح .. هذي كلها آثار حالتها النفسيه .. يمكن هذا عقاب من عند الله حقها لأنها قطعت عليه صلاتيه وطردتنيه برا البيت .. الله اعلم لكن يبين من ملامح ويهها انه الله غاضب عليها وتتعذب .. الله يرحمج يا امي لو انج ماتستاهلين الرحمه !..

منو لي عقبها ؟ و كيف بعيش فهالدنيا ؟ انا وحيده .. لا اخوان ولا اهل .. حتى اهليه اللي فالامارات ماعرفهم ولا اعرف وين ساكنين .. تذكرت حمد .. بس هذا كيف بيساعدنيه ؟ بس ع الاقل أكيد يعرف حد يقدر يساعدنيه .. بتخبره وانشالله يساعدنيه ..

هديت شوي وتميت اجاوب عن اسئلة الشرطه ويوم قلت لهم اني كنت عند حمد طلبوا انه يشهد .. المشكله اني ماعرف غير اسمه ورقم سيارته وبيته ! هيه صح ! يوم انا ادل بيته بدليهم به ويسيروله ..

خبرتهم اني أدل بيته ركبوني فـ سيارة الشرطه ووقفوا جدام بيت حمد .. وعشان مايزيغ سرت انا ودقيت الباب ..

فج الباب وهو كشته ناقعه ماعرف شو مسوي بها هالكثر !

حمد: حمده؟ شو صاير ! ليش عيونج جذيه ؟

قلت بحزن : امي انتحرت ..

حمد: شوووووووووووووووووووووووووووووووووووووووووهـ ؟؟؟؟

حمده: والشرطه يبون شهادتك اني كنت عندك البارحه ..

حمد وهو بعده هب مصدق : انزين لحظه بلبس الكوت وبييج ..

وسار ولبس جاكيته ويا .. ركبنا سيارة الشرطه وودونا المركز ..

تخبروه الشرطه و رد عليهم بلهجته المكسره اللي طالعه عسل من ثمه .. بالله عليكم هاي رمسة وحده توها امها منتحره !

وخلاف عقب ما خذوا شهادتنا فجونا وقالوا بيحددون متى انتحرت عقب التشريح ..

ظهرت ويا حمد من مركز الشرطه وقفنا تكسي وركبنا وانا تميت طول الدرب اعتذر منه ..

حمد: خلاص والله عادي بعدين هذا واجبيه لا اتمين تعتذرين ..

قلت بفرح: يعني هب زعلان ؟

حمد: لا وليش أزعل أصلاً .. الا ماقلتيلي شو بتسوين عقب امج ؟

حمده: والله مادري .. شكلي برد الامارات بس ماعرف حد هناك حتى اهليه ماعرفهم ! اباك تساعدنيه ..

حمد: هب لازم أوّل تخبرينيه قصتج ؟

حمده: انزين بخبرك وأمري لله .. بس هب فالتكسي ولا في بيتك ..

حمد: خلاص لاتقولين .. انا بختار المكان ..

وتم يخبر راعي التكسي بالمكان ..

حمد: هب حزينه على امج ؟

حمده: تبا غير الصياح اللي صحته جدام الشرطه ؟ تميت ساعتين اصيح وهم الا يهدون فيّه يبونيه ارمس بس انا هـب رايمه .. خلاف سكت شوي ورمست .. خلاف قلت يمكن الله غاضب عليها وخذ روحها جذيه .. ودام الله غاضب عليها انا ليش أحزن عليها ؟ أصلاً ماشفت منها خير عشان اذكرها به .. يوم كنت صغيره كنت كله ويا ابويه وهي عاشت هنيه في امريكا ..

حمد: وبعدين ؟

حمده: اصبر خل شي حق يلسة المطعم ..

تنهد عقب قال : انزين بصبر ..
ح
وصلنا فهاللـحظه وصلنا عند المـطعم .. نزلنا ودفـع مد حق التكسـي حلـف عليّه ما ادفـع .. وخلاف دخلنا المطـعم اللي شـكله كان مـطعم راقـي وغـالي ..

يلسنا في مكان منعزل شوي .. وطلبنا كوفي عشان نصحصح عقب كل اللي استوا وعشان انا اروم اقول سالفتيه بكل تفاصيلها ! وصلت الكوفي شربت منها شوي وخلاف قلت ..

حمده: بقول كل شي بالتفصيـــــل الممل .. ببدا بالاسم .. حمده علي مبارك الـ ...... .. وعمريه 22 مواليد 13-10-1987 ..

سكت يوم شفت ويه حمد تغيّر .. بس أشرلي اني أكمل ..

حمده: ماظن يهمك الاسم فالجواز الامريكي .. المهم انا انولدت في العين ما اذكر أي مستشفى بالضبط .. بس اكيد اسمه موجود في شهادة التطعيم اللي بعدني لين الحين محتفظه فيها تخيّل ! ..

ضحكت على عمريه شوي وشربت من الكوفي ..

وخلاف كملت : عشت فيا ابويه في ابوظبي .. هو كان ماخذ اميه بالسر بدون ما اهله يعرفون .. اهله كانوا فالعين اما نحن فـ بوظبي .. اميه عقب ماكملت انا 4 سنين ردت صوب امريكا وتمينا مانشوفها الا فالاجازات .. ابويه ماتجرأ يرد صوب اهله .. لأنه يعرف انهم بيتبرون منه اذا دروا .. عشنا فـ بوظبي .. وكان مرات يرد العين ويخلينيه عند اليران .. لكني فحياتيه ماشفت حد من اهل ابويه ..

ويوم كملت 16 مات ابويه .. لكن يوم كان فالمستشفى شفت ريال غريب دخل عنده لكنه طلع معصصصب .. وولده تم مبحلق فيّه مادري شو فيه حسيت بنظراته غريبه ..

سكت وخلاف كملت ..

من عقب موت ابويه ماعرفت شو اسوي واميه يوم درت يت هنيه وشلتني اعيش وياها هي وحالاتها النفسيه ! وخلتني آخذ جواز امريكا غصباً عليّه .. وهاذي حالتيه من 6 سنين .. وهاذي قصتيه من انولدت لين اليوم من اولها لـ تاليها ..

تم حمد ساكت وهو يطالع ويهيه زين كانت نظراته غريبه .. وخلاف قال وويهه فيه ابتسامه غريبه ..

حمد: وين شهادة ميلادج وشهادة التطعيم اباااااهن بسررررعه ..

حمده: فالبيــت ..

حمد: يالله تعالي عيل لازم نسيــر بيـتكم ..

حمده: لا أخاااااااااااف .. كله دمممم ...

حمد: انا وياج لا تخافين ..

حمده: بسس .....

ما واحالي أكمل الا وهو يسحبنيه من ايديه .. الظاهر انه نسى أني قلت له لا يمسك ايديه بس شكله تعوّد .. !

وقفنا تكسي وتوجهنا صوب البيت .. وصلنا ونزلنا .. فج حمد باب البيت بعد موافقة الشرطه اللي كانوا واقفين عند الباب .. وقفت انا عند الباب مارمت اهبط ..

حمد: انزين غمضي عيونج وانا بقودج اذا هالكثر تخافين .. !

انا الصراحه كنت مستعده اسوي أي شي بس ما اشوف ذاك الدم اللي تارس المكان .. غمضت عيونيه وهو كان ماسك ايديه ويسحبنيه وراه .. وصلنا عند السلم فتحت عيونيه .. ورقينا فوق .. هبطت حجرتيه وهو ورايه ..

حمد: الحين هاي حجرتج ؟

حمده: هيه شو هب عايبتنك ؟

حمد: شو الفايده تراج مابتعيشين فيها عقب اليوم صح ؟

حمده: صح ..

سرت وفجيت واحد من الدروج وظهرت منه بوكس مقفول بـ قفل .. فجيت القفل .. وظهرت شهادة الميلاد وشهادة التطعيم وصوره عن جوازي الجديم .. جواز الامارات ..

تم حمد يطالع فيهن وانا كنت الم اغراضيه اللي بحتاجهن في شنطه ..

حمد: وأخيــــــــــــــــراً ...!!!

حمده: شو وأخيراً ؟

حمد: هاه ماشي .. خلاف بخبرج ..

وظهر بسرعه .. وانا شليت شنطتيه وربعت وراه .. طلعت من باب المطبخ بما اني مابا اشوف الدم .. ولحقته وقف تكسي وركبت وياه .. تميت اطالعه مستغربه .. اما هو كان طاااااااااااااير من الفرحه ..

وصلنا عند بيته .. شفته يلم قشاره .. نزلت عنه تحت وتميت اترياه ..

عقب ماخلص نزل تحت وقال ..

حمد: شكلي مايذكرج بـ شي ؟

حمده: والله انا اقول شكلك مألوف ماعرف وين شايفتنك قبل ..

حمد: وأخيراً ماصدق يا حموده ماصدق ..

حمده: وأخيراً شو ؟ وماتصدق شو ؟

حمد: عقب شوي بتعرفين .. لا تستعيلين ..

وسحبنيه من ايديه مثل عادته وركبنيه سيارته وحط شنطنا فالدبه .. وتم يسوق والابتسامه مافارقت ويهه .. وخلاف صاح تيلفونه رد عليه بسرعه ..

حمد: لقيتها لقيتها .. والله يابويه .. الله يطوّلي بعمرك يابويه .. يالله امره الحين ياينك .. بنركب الطياره ويايين صوبك .. يالله فداعة الله ..

حسيت انهم يرمسون عنيه ..

حمده: الحين بتخبرنيه شسالفه ولا والله يا انزل ..

حمد: يوووهـ صبـــرررري .. شفيج ماكله قرصج ني !

سكت عنه .. تميت اطالع الدرب وخلاف طرا فباليه شي خلاني احس بنفضه .. تذكرت وياليتني ماتذكرت .. يعني حمد هو هذاك اللي كان ويا الريال عند ابويه فالمستشفى ؟ أكيد .. هو حمد .. تميت اطالعه .. عرفت الحين بـ شو يذكرنيه شكله .. بس شسالفه ياربي اموت واعرف .. رديت وطالعته مره ثانيه .. يعني انته يا حمد تعرفنيه حتى قبل ما تشوفنيه هنيه وانا اقول شو سبب كل هذا .. ! ثرها السالفه جيه ..!

وصلنا المطار .. بس قالولنا كل الرحلات توقفت عشان العاصفه الثلجيه ..

تأفف حمد و تغيّر ويهه .. كان بيحجز طياره خاصه بس قالوله انهم مايرومون ايطيرون أي طياره فهالعاصفه ..

يلسنا فالكوفي شوب مال المطار .. ما تجرأت ارمس وياه لنه شكل ويهه ماكان يشجع ..

يلسنا مجابلين بعض نتريا هالعاصفه اللي مادري وين تهدا .. كان متوتر ويهز ريوله وكل شوي يطالعنيه ويبحلق فيّه و خلاف يوم انتبه له يلتفت و يسوي عمره يطالع أي شي ثاني ..

وخلاف تعبت من اليلسه .. قمت عشان امشي ..

حمد: على وين ؟

حمده: بسير اتمشى عيزت من اليلسه .. أصلاً شكله ماشي رحلات اليوم كل شي توقف وماشي فايده من الانتظار .. يالله عن اذنك بسير افجج ريوليه ..

حمد: عيل يالله انا بعد بسير وياج .. انتي امانه عنديه ..

حمده: امانه ؟ دخيلك حمد خبرنيه شسالفه .. دخيــــــــــلك ..

حمد: مثل ما لوعتيبي لين خبرتينيه سالفتج انا بعد بسوي نفس الشي ابا انتقـم كيـــفيه !!!

سكت وبرطمت وضحك هو عليّه .. وأخيراً خليته يضحك !

تحوطنا فالسوق اللي كان فالمطار .. ماخذنا شي بس كنا نفجج رويلاتنا ..

وخلاف صاح تيلفون حمد .. ورد عليه بسرعه ..

حمد: ألووو .. هيه وصلتك الاخبااار .. ماشالله ابويه cnn .. الا اقول خبرت عميه ؟ لا تخبر حد لين نتأكد ميه فالميه .. أدري بس لازم عشان مانخلي مجال للشك .. شفيكم كلكم طايرين جذيه اركز ياخي .. لا تحلــم وايد عن تنكسر رقبتك انزين خويــلد ؟ انته تدري اني مستحيل اتخلى عنها .. عشان تثمن رمستك يوم تعقها انته تعرف رمستيه وحافظنها وتدري اني مابغيرها لو شو يستوي لا اتم تعيد وتزيد فيها.. انزين يالله فداعة الله .. وسلّم عليهم ..

انا كنت واقفه بعيد عنه شوي بس سمعت كل رمسته طبعاً .. تميت اتحوط بعيد عنه شوي وما حسيت الا وهو يمسك ايديه ويرص عليها .. وجنه مايبانيه ابتعد عنه .. طالعنيه وقال ..

حمد: حمودهـ .. لاتخلينيه .. دخيلج ..

خلاف رخا ايده وكانت مسكته خفيفه لكن مادري ليش ماخوزت ايديه .. يمكن لأني تخدرت عقب الرمسه اللي سمعتها .. انا اروحي ذايبه فيك ياخي وبعدك تقول هالكلام .. شو اسوي بعمري انا ؟.. شوفولي حل .. !

ماكنت اعرف شو اللي يستوي حوليه وماكنت اهتم .. اللي كان يهمنيه هو ذيج اللحظه .. حسيت انه محد فهالكون غيرنا انا وهو .. خلاف نطق عقليه حكيم زمانه وقال انه اللي اسويه غلط .. وانا طبعاً صدقته .. فجيت ايديه من ايد حمد وابتعدت وانا احس ويهيه محترررق ..

تميت ساكته وما تجرأت ارمس عقبها .. ردينا صوب الكوفي شوب ويلسنا .. استوى فلّيل بس مادري الساعه كم .. مليت بالقوو وخلاف حسيت بعمريه نعسااااااااانه .. حطيت راسيه فوق ايديّه اللي كانن ع الطاوله .. وغمضت عيونيه .. ورقدت بدون ما احس ..

وعيت على حد يهزنيه .. رفعت راسيه وطالعته .. كان حمد ..

حمد: قومي يالله بتكملين نومتج فالطياره ..

حمده: كم الساعه الحين ؟

حمد: 2 الا ربع .. يالله ..

قمت وانا اسحب عمري سحاااب .. وقفنا فالطابور مال الجوازات وكنا آخر شي .. كنت نص راقده وما احس باللي حوليه .. وبدون لا احس لويت على ذراع حمد .. وحطيت راسيه على جتفه .. كنت ادوّر أي شي ارقد عليه وكانن ذراعه وجتفه هن اقرب شي !

مادري كم مر من الوقت .. لكني يوم وعيت شفت جدامنا مال الجوازات وهو يختم حوازاتنا .. صلبت راسيه وتميت متقبضه في ذراع حمد .. وتميت امشي وياه مغمضه عيونيه وانا متقبضه بذراعه .. شكلي كان أكيد يضحـــك .. بس ذاك الوقت على ما أظن انه المطار ماكان فيه وايد ناس ..

خلاف ركبنا الطياره و يلست على الكرسي أخيـــــــراً .. رديت راسيه على ورا وكملت نومتيه سمعت حمد يرمس بس بصراحه من كثر الرقاد مارمت اميّز شو يقول ..

فتحت عيونيه .. شفت اني فالطياره .. كيف وصلت هنيه ؟ حاولت اتذكر .. عصرت مخيه .. وخلاف شهقت .. فز حمد اللي كان راقد ..

حمد: بسم الله عليــج شياااج ؟

حسيت ويهيه ذاب ماتم منه شي .. وخيت و حطيت راسيه بين ايديّه وتميت اهزّه .. حمد شكله عرف انا على شو يالسه اسوي جذيه .. تم يضحك .. الا مات من الضحك ..

قلت له بعصبيه عقب مارفعت راسيه ولفيت الصوب الثاني : انته تضحك وانا اللي محترق ويهيه هنيه !

كمل ضحك وخلاف قال : ياخي لو ماكان فيج رقاد كان لي حساب ثاني وياج !

نزلت راسيه وقلت : بـــسسس انزين خلاص ..

رد يضحك مره ثانيه .. شكليه استويت مطنزه صدق اليووم !

عقب ماشبع من الضحك رد يرقد .. وتميت انا اطالع الناس حوليه .. كلهم امريكان .. شكلنا نحن بس اللي عرب هنيه .. وخلاف غمضت عيونيه ورقدت مره ثانيه بما انه ماشي فايده من القومه !

وعيت مره ثانيه على اشارة ربط الاحزمه .. ربطت حزاميه .. وحمد نفس الشي .. نزلت الطياره وبدوا الناس ينزلون .. نزلنا ووقفنا سنه عند مال الجوازات .. وخلاف خلصنا .. لكن الغريب اني ماعرفت نحن وين بالضبط ؟!

ما سألت حمد بما اني لين الحين مفتشله من الموقف اللي استوا .. ركبنا التكسي .. وصَّلنا عند مكان ووقف .. نزلنا .. رفعت عيونيه شفت اللوحه اللي مكتوب عليها "سفارة دولة الإمارات العربية المتحدة" .. هذا ليش يايبنيه السفاره ؟ الله اعلــم !

مسك حمد ايديه كالعاده .. ودخلنيه داخل .. مشينا في كمن ممر و خلاف وصلنا عند مكتب قال حمد انه مكتب ابوه .. استغربـــــــــــــت بالقووو .. ابوه يشتغل فالسفاره ..؟ عشان جذيه قاله بنركب الطياره ويايين صوبك .. اها ..

دخلنا المكتب .. وأول مادخلنا فج حمد ايديه .. وقف لنا الريال اللي كان هناك .. وايهه حمد .. اما انا فـ تميت اطالع الريال و هب فاهمه شي ..

ابو حمد: افا يا حمده ماعرفتيـنيـه ؟؟

حاولت وحاولت اتذكـــر .. هيـــه هوووه .. نفس الشكل بس هنيه مبتسم ..

قلت باندفااع : انته اللي كنت فالمستشفى وطلعت من عند ابويه معصب .. !

هز راسه بـ هيه ولوا عليّه !!

__DEFINE_LIKE_SHARE__