بديت باسم الله عظيم الجلالي=الواحد اللي مجرى سيحون والنيل
احس في قلبي دبيب النمالي=اليا تهامت للدسم كالمحابيل
اوجس قريصن في شراشيف بالي=يشضى الحناوي في ظليمن من الليل

نحب سرد القاف مع كل غالي=نبدا عمد شطره بحمدن وتهليل
تقول يالصاحب بوصف الشمالي=تشهد لك القيفان وضرب التماثيل
راعي هوا بالصيد باول وتالي=وراعي الولع ما له عن مناه تعديل
ذكرتني باوقات ذيك الليالي=يوم الارانب بالدعايب مداهيل
حزة وفير الصيد في كل جالي=ما به مكاديرن ولا به بهاذيل
مير اختلف بالساس فيّ الظلالي=وش بالشمال اليوم غير الغرابيل
اليا تناطينا لحمر التلالي=نلقاها جردات الدعوب المماحيل
امست شجايرها عليها رمالي=ما غيره العشرق وعود الفحيحيل
حتى الطيور اللي بذيك المفالي=ما من حسيسن غير قوبع مقاليل
فيها الصباري حاجراتن قحالي=تبي علفها لين صارت مهازيل
وليا بغيت ظلال في دو خالي=تشوف بالطلحه مزوع السرابيل
نصبر على العجفات سودن توالي=يمكن تجينا من الليالي مقابيل
انت تذكر ايامن بسفح العوالي=في قاع خبرا مستفيضه من السيل
من شرق عرنانن وحمر الجبالي=لما طرف عرقين وذيك النوازيل
عصر الربوع نسير ويا الرجالي=نمد في خوة زحولن حلاحيل
نبي العشا في بطن اشيجع نزالي=فيه الحطب له خمسة اعوام ما شيل
سرحان بالوادي بصوته يلالي=حمار عيونه مثل نور القناديل
والجيب واقف دون جرفن هيالي=والنار تشبه عاليات المشاعيل
عليها قدرن تستحفه دلالي=وامركدن فيها جميع المعاميل
رغبتنا كله لام اذانن طوالي=نبي لاسرمد ليلها ننهض الحيل
تقافت ايامه وصارت خيالي=مثل المواطي لامسحتها الهماليل
نساير الاوقات مرّن وحالي=تسكب لنا الذكرا سروبن شهاليل
نلحق سراب الوقت ما به مهالي=نلوذ في صمتن عن القال والقيل
ما لك من الاوقات رجعه ولا لي=سنه كتبها الله بطيات سجيل
ولا بد من يومن نشد الرحالي=نروح لابلادن سواة الرحاحيل
في ساعتن تفلت جميع الحبالي=ما غير لك حبل الرجا بالتساهيل
في حزتن ما فيها عزوه ومالي=روحن رهينه بالعمل عنه ما تميل
وصلاة ربي عد وبل الخيالي=على النبي عداد خطو الهشاشيل