قصه الطير والام والمال الحلال

محروم.كوم · #1 01-22-2010, 05:30 AM

السلام عليكم ورحمة الله وبركاته
يالربع انا سمعت قصه من شايب وحبيت انقلها لكم لما فيها فايده للجميع
القصه كانت بالبدايه كنت جالس بمجلس واحد يقرب لي وكانوا الصقارين يجتمعون فيه بعد الدعو يعني بعد صلاة المغرب مباشرة ودخل علينا واحد من ربعهم وكان مهموم المسكين لان طيره ضايع كم يوم ولا حصله

ومع السوالف قام شايب ويعلمنا قصه قديمه حصلت مع واحد قريب له من عشر سنوات:
يقول : كان واحد يتيم وحالته على قده وعاطل عن العمل وكانت امه هي اللي تكد عليه وعلى خواته بااشغال يدويه تبيعها وتترزق الله والام لاحظت تعلق ولدها الشديد بالطيور والمقناص لانه كان يأخذ طيور ربعه وينقلها ويتعب عليها وفي احد المرات كان الولد ومعه طير خويه كان الطير وحش وكانو ربعه يستغلون تعلق صديقهم ويعطونه الطيور علشان يسهرها ويصقرها لهم يعني يخذون مصلحتهم منه ويستغلون حبه للطيور
وكان الولد يقول والله حرام فلان يبيع ذا الطير هذا طير مسكت والله حرام يبيعه قالت امه كم يبي يبيعه قال مدري عنه قالت روح اسئله وعلمني , راح الولد وسئل صديقه وقال ببيعه ب 4000 ريال(ايام الرخص )
الولد علم امه بالسعر اللي يبيه صديقه قالت خلاص انا بشتريه لك , الولد مصدق وطار من الفرحه وراح لصديقه وقاله انا اللي بشتريه منك , المهم الام راحت المسكينه وباعت شي من ذهبها وزادت من عندها لين كملت المبلغ وعطته صديق ولدها.
الولد طاير من الفرحه واخيرا حقق الحلم واشترى طير وكان الولد جاهد روحه على تربيت وتعليم الطير وفي احدى المرات وحصل اللي غير متوقع وفي الدعو اعرضت للطير حمامه ولحقها الطير واخفووه على الحمامه
الولد حاول يحصله لاكن فص ملح وذاب
تعكر مزاج الولد وتكدر خاطره ورجع البيت وهو مهموم وحالته كسيفه سالته امه: وش فيك قال : قال الطير ضاع ولا حصلته , قالت الام : لا تزعل ولا تحزن والطير راح يرجع لك لانه مال حلال
الولد حاول يقنع نفسه لكن عارف ان الطير مافي امل يحصله ومن سوء الحظ مافيه حجل يعني اغسل يدك
وتمر الايام ويقنصون الناس ويخلصون مقناصهم ويربطون ويجي الزمان اللي بعده وينقلون الناس طيورهم ويقنصون ويخلصون من مقناصهم ويربطون
والولد خاطره تعبان وحرم على نفسه يشتري طير ثاني الا من فلوسه الخاصه
ومع بدايه الموسم كان واحد من ربعه يبي له طير وقال لخوينا تعال معي السوق وخلنا نتفرج يمكن نحصل شي زين وفعلا راح الولد مع صديقه للسوق وخذو يتفرجون بالطيور وصدفه الا الولد يشوف طيره مركوز على وكر داخل اماكن الطيور الغاليه طبعا الطير تغير شكله لانه يوم ضاع كان فرخ ويوم شافه كان سنه ثنو لاكن الضقار مايضيع طيرة لو بعد 100 سنه
الولد استغرب وراح يسئل العامل في المحل قال هذا من طيره قال : طير راعي المحل وبيجي بعد شوي جلس الولد ينتظر راعي المحل لين وصل ساله الولد : وش علم ذا الطير قال راعي المحل : صيد وطلع ولحوق وكل الطبوع الزينه فيه قال الولد : كم مسيوم قال : 25 الف ريال قال الولد : كم تبي فيه ,
قال راعي المحل : ماهو للبيع لانه مو طيري , ساله الولد : وشلون مو طيرك قاله راعي المحل : انه قضب الطير قبل سنتين يوم كان فرخ واعلن عنه ولااحد جاه وقنص فيه وصاد وصار من ابرك الطيور واني كل ماجيت ابي ابيعه احس في شي يردني عن بيعه واحس ان صاحبه بيجي يوم وياخذه مني
قال الولد : انا صاحب الطير واعطاه كم ماريه فيه يوم كان فرخ وطابقت الوصوف
قال راعي المحل : انا بشتريه منك بالسعر اللي تبيه لان الطير عزيز علي بالحيل
قال الولد : وهو لك لانك رجال خايف من الله وقدرت اموال المسلمين ولك انت بنزل لك خمسه الاف من اخر سومه وخذاه راعي المحل بعشرين الف ريال واخذ الولد الفلوس ورجع لامه يبشرها وقالت له : شفت انه مال حلال والحلال مايضيع .
صدقت الام عز الله الحلال مايضيع
هذا القصه نقلتها كما سمعتها واذا نقص شي فالعتب على الراوي
واعذروني على الاطاله ولكم جزيل الشكر
اخوكم بارود 22 __DEFINE_LIKE_SHARE__