قصص من تاريخ سديرآوي , مع ضبآن المجمعة سقاها الله ..(عدة قصص لاتفوتك)

محروم.كوم · #1 01-19-2010, 11:00 PM

السلام عليكم ورحمة الله وبركاته

مسيتو بالخير يالذيابه

بشرونا عنكم عساكم بخير

وش أخبار الامطار:r بدياركم مابه مكاشيت زينة حولكم ...

بحكم ان هذي أول مشاركة لي بهالمنتدى حبيت نفتتحها بهالمجلس بالمبارك مع هالوجيه الطيبه عند هالضو :f..

أقدم لكم بعض من تاريخ أخوكم سديراوي مع ضبان المجمعه بعد خبره سنين دامت فوق
( 25 سنة ) في صيد الضبان ذقنا المر والحلو من صيدات زينة ووناسه وقرصات عقارب وديبان قشرا ..

بسم الله :

قصتي الأولى كانت قبل 20 سنة تقريبا كنت أجمع ضباني العزيزه في سطول كبيرة وثقيله في السطح كان يجيبها لي الوالد الله يرحمه ويغفر له .. وواحد من السطول مليااااان لراسه , قبيلة ضبان كاملة داخله , المهم مرة واحد من أخواني الصغار الملاقيف يرقى السطح ويفتح السطل والضبان قامت ترافس وينرج السطل واخوي طيح السطل بالغلط والله إلا والجماعة ماصدقوا خبر ويطامرون ويحطون رجولهم من السطل ( يجي لهم فوق 35 ضب تقريبا ) وأخوي حط رجله وهج وانا عاد هاك اليوم راجع المغرب من كشته مستانس ومعي ضب بحطه بمركز الأبحاث المتطور حقي إلا والقى السطل مقلوب والضبان بعضها متخبي تحت العفش المغبر وبعضها تطامر وبضعها مدري كيف جاي المهم انهبلت واجمع كل الي بالسطح وانهد حيلي وانزل بصلي العشا إلا وشوف لي ضب بالمجلس وضب بالصالة وضب بالمطبخ هههههه حتى واحد لقيته بالبرحة قدام بيتنا , وانتشرت بالحاره , طبعا بحكم إني تربوي واستخدم أساليب تربويه حديثه ماضربت أخوي أبدا أبدا لدرجة إنه يومين ماقدر ينام ,,

بعد هالحادثة تطورنا شوي واعتقت بعض الضبان لوجه الله وبعضها خليناها بالعزبة لاطفرنا وقت الزنقات طبخناها ,,

القصة الثانيه:

قبل عدة سنوات كنت طالع مع اثنين من الأصدقاء على طريق الكويت بهايلوكس غماره والصندوق عليه الرواية (خزان ماء مطاطي كبير ) معبيه مويه فل , طبعا كان لي فوق سنة ما مارست هوايتي المفضلة بسبب ضروف هالدنيا لذلك كنت متحمس جدا , والحمد لله الامور
مشت تمام وصدنا حول الـ40 ضب والله ويوم انه اظلم الليل بعد المغرب ونرجع وبالطريق شفت لي هاك الجحر ماعمري شفت زيه كبر فيه يروع يدخل فيه رجال ,وانا اقول لازم اشوف وش بداخله واشوف الروايه ولا باقي فيها دون الربع بشوي

يعني تكفي لتغريق 10 جحور تقريبا والله ونصب وحفر ونصب ونحفر والجحر شكله
عميق ونازل ولافيه حركة يوم الميوه قضت وجيت بمشي وركبت الموتر إلا واسمع مطافش خفيف نزلت ولا هذا راسه طالع أعوذ بالله من كبره والله وانزل انا وخوياي نبي نلحق عليه ويدخل بالجحر وادخل يمناي بالجحر ولا هذا راسه واسحبه واسحبه ويجي خويي ويسحبني
ويالله طلعناه بدون مبالغه كان أكبر ضب رأيته في حياتي وكل من شافه كل مثلي طوله من راسه لاخر ذيله أقل من المتر بشوي , والله واحطه بخيشه بالصندوق ومشينا شوي وراه طامر من الصندوق بالخيشه ويركض والحقه والحقه لين مسكته أثاريه قاطع باظافره شي بسيط من الخيشه طلعت من يديه ونحطه بخيشه ونلف عليه كم خيشه احتياط ونحطه بمكان مايقدر يتحرك فيه زياده لانك لو شفت اظافره بلعت العافيه , والغريب اننا يوم رجعناه الصندوق سمعنا صوت نهيق حمير وانا ما اذكر اني شفت حمير بالمنطقة ولا قبل يمسي الليل والصوت تحسه وقت يكون بيني وبينه مترين ووقت بينك وبينه 100 متر يعني يعلا ويقصر وما اشوف شي ويوم جيت امشي نورت عالي حولي ولابه شي والله ونسمي ونقرا ذكارنا ودخلنا الديره ورحنا العزبة وننزل الضب وواحد من العيال يوم شافه ماقعد معنا من الخوف ومشا ههههههههههه وواحد مجهز السكتون خايف يطب على واحد من الشباب ,, والله من قوته انه اذا هاج وانتفخ ورفع راسه إني ارمي عليه نعالي باقوى ماعندي ويشوتها بعكرته بقوة ويطيرها هههههه ( قولف قراوة ),, وبصراحة ما رتحت لهالضب عقب نهيق الحمير وكان وقت مغرب يوم نصيده والضب لونه يميل للسواد ,, واطلقناه بالبر حول المكان الي لقيناه فيه والله اعلم وش كان هالضب ,,

هذا شي بسيط من ابرز الي اذكره من مغامراتي مع ضبان المجمعه ,,

ولا تنسونا من ردودكم ياشباب >> أول مرة أكتب بهالمنتدى موضوع :d ,,

وأبشروا بكم سالفة بكرة ان فضيت ان شاء الله وفيه كم سالفة اذكرها عن الابل لعيون الأخ الي يبي سوالف عنها قبل كم يوم ,,

واعذرونا عالفصاحة الزايده باللغه >> هذا وهو مدرس عربي خخخخ ,,

وأكرمكم الله يهل المجلس ,,

والسلام عليكم ورحمة الله وبركاته __DEFINE_LIKE_SHARE__