فــيديو قرص التاوه وبــكل نقاوه >> هــاي لـكزز

محروم.كوم · #1 01-14-2010, 06:32 PM

السلام عليكم ورحمة الله وبركاته

تحيه طيبه معطره بريح الزعفران والهيل لأعضاء
هذا المنتدى الغالي
من زمان ولي نيه انزل موضوع عن قرص التاوه ولعدة أسباب
اولاً: الطعم الخوورافي
ثانياً : سهله للعزووبي
ثالثاً : ممكن تصلح منها اكثر من طبخه مثل
مفروك قرص( بالحم)
أو بالكشنه
رابعاً : تقدم مع التمر أو العسل أو المربى والاخير هو الأحلى
بالعربـي وجبــه كامله وصحه دايمه -إذا بدون بصل وطماط-
خامساً ممكن تصلح قرص فيه بصل وطماط وحبحر ويجي جنااان

نصائح وإرشادات قرص التاوه

1-نوع التوه المستخدمه
تكون من النوع الممتاز مو مهم تيفال المهم تكون جبره
و أبد ما تصلح بـ مقرصة المراصيع
ولك ان تجرب .
2- يستخدم البر اي نوعيه مثلاً الي يجي كيلوه بـ 1.5ريال
3- العجينه مهم تكون زي الي بالفيـديو وقت فرشها على التاوهيعني لا شاده ولا طريه تكون سهله .
4- الزيت يحمى على التاوه ثم يصب في - باديه -
وبعد ما تفرش القرص ترجع تصبه على الاطراف .
5- اجمع بيدك شوي ماء - على راحت يدك -
وخذ العجينه وفرشها بكل سهاله المويه تسهل العمليه
جداً جداً .
6- لا تتوقع تضبط معك الا بعد ثالث أو رابع عجنه تعجنها
و يمكن بعد خمس مره تفرشهاعلى التاوه
فخذ الأمور بسهاله - يا ربي لك الحمد على نعمتك -
7- لا تكبر القرص في البدايه وحاول ان تجعل العجينه بتاوه مثل سماكت خبز المفرود في البدايه او اجبر شوي وهو الأفضل .
8- لا تستعجل في فرش العجينه بتاوه وخذ الموضوع بسعة صدر يعني ابعد التوه عن النار وفرشها على مهل
والعجين الزايد في جهه وزعه على قد ما تقدر
9- بعد تطبيقك العملي قــلي رايك او على الأقل
ادع لـي ولوالدي و لوالديك يا غالي .

10 - انت الأن معلــم قرص تاوه فستغني عن الإرشادات
وتبع طابعك الفنـــي يا بااشاا ^_^

الأكله هذي لها أهلها ونا حاولت أني اوصل طريقة عمل القرص باليفيديو

ولكل مجتهد نصيب فستغليت الفرصه وكانت

يوم الجمعه الموافق 21- محمرم -1431هـ كانت كشتتي لروضة خريم عسى الله يمطرنا برحمته بس *_*
المميز في الطلعه الصمله العجيبه الي جت معي ومع رفيقي ابو عبدالله فقررنا نفطر على قرص تاوه وبكل نقاوه

والمميز بعد إني استخدمة راس دافور بعينين تو وين من بريمس الي عمره يزيد عن 25 سنه وهو هديه من الوالد الله يديم عزه

مالكم في الطويله هذا رابط الفيديو على اليوتوب

اتمنى تـتـحـفـونـي
بمشاركاتكم
أرائكم
نقـدكم البناء

للأسف ما قدرت اصور الصوره النهائية
وسبب يعود إلى أمتلاء الذاكره

لكن انا متأكد أن الفكره بتعجبكم وتطبيقها سهل

وهذي صوره من موقع الحدث كـ تذكار خر لهذه الرحله
وعندها الختام الله يحسن خاتمتي وخاتمتكم
مشاهدة الصور
__DEFINE_LIKE_SHARE__