الحويمه او الحوامه ( منافعها واضرارها للطير ) وطريقة الهدد عليها

محروم.كوم · #1 01-11-2010, 02:30 PM

بسم الله الرحمن الرحيم

حبيت اشارك في موضوع مهم بالنسبه للصقاقير

وهو عن الحويمه او الحوامه وهي نوع من انواع البوم يجي مهاجر اوقات عبور الحبارى

ويتواجد دايم في ظلال الرمث والعاذر وفيه بعض الصقاقير يهدون عليها طيورهم وماتتعدا مكانها ابد

لما تلقاها الساعه سبع الصباح وترجع لها العصر تلقاها بنفس شجرتها وماتطير الا بالليل ..

منافع الحويمه هي :

1_ انها تعلم الطير للارتفاع .

2_تبيّن الطير الشجاع

3_ تعرف ان طيرك يهد على الحبارى والا لا اذا هي مقفيه بالذات وطلبها هذا دليل انه يعرف الحبارى

لكن اضرارها :

1_انها تتماسك مع الطير وفيها مخالب ولما يعلقها الطير تحاول انها تدخل مخالبها في قنيصا الطير

والطير الغشيم تذبحه على طول

2_ بعض الطيور لما يسلم من الحويمه ماتقتله وتصوبه صواب من بعدها مايهد على الحبارى ولا الحويمه.

وطريقة الهدد عليها : تخلي واحد من خوياك يطيرها ويخليها ناطحه الهوا على بعد كيلو واقل شي نص كيلو

وتكون انت في مكان مرتفع او موازي لها عشان الطير يقدر يآخذ مجال بالارتفاع

ولما يطقها الطير تصير هي اللي تلحقه والطير يروح عنها ويشر ذنيباه ويرجع لها ويطقها وبعدين هي اللي

تلحقه ويتحاوم هو وياها يعني مايحتاج تطرد وراهن هن اللي يتطاردن فوق ماعليك سوا التثبيت

اذا راحت مع الطير بأرتفاع بعيد واذا صادها الطير اول مايطب هو وياها الارض لازم تجيها وتقطع راسها

وبعض الطيور الذكي مايعلقها لين يذبحها بالطق ..

وانصح اخواني اللي عندهم جيرات فروخ لايهدون عليها ابد ابد لان الجير مايعرفها وان جاها بيمسكها على

طول وان مسكها بدفاشه خلاص اعتبره ميّت ..

اتمنى ان الموضوع يفيد لو نسبة قليله من الاخوان بالذات الجدد على الصقاره .. كان ودي اجيب لها

صوره بس مالقيت اتمنى أي واحد عنده صوره لها يحطها بالموضوع ..

وتقبلو تحيات بعيد الهقاوي ..
__DEFINE_LIKE_SHARE__