يوم حوصرنا في الديره

محروم.كوم · #1 07-20-2018, 02:12 PM

السلام عليكم ورحمة الله وبركاته
صبحكم الله بالخير الجميع

ديرتنا لها مدخل وحيد يوصلنا بباقي المناطق اللي حولنا وهاذ هو الشارع الوحيد مسفلت وعرضه حوالي 4 امتار اقرب ديره علينا تبعد عنا للغرب حوالي 10 كليومتر
الطريق للديره يحفها من الشمال جبال وهضاب بعض المناطق مستويه على بعد حوالي 2 كليومتر من الديره هناك هضبه يخالط ترابها صخور كنت الاحظ دوم صخره ضخمه جدا تقع على
طرف المنحدر قلت في نفسي يا ترى لو انها هالضحره انحدرت على الشارع الرئيسي شلون ودنا نطلع من الديره ؟
كنت اقول للربع اللي معي : تدرون اني اخاف انها هالصخره اذا انزلقت على الشارع تغلق على ديرتنا وتقطعنا عن باقي المناطق
صارو يقولون لي : يا ابو ظاري هالصخره كم مر علينا من سنين وهالصخره ما تزحزحت مكانها
مرت السنوات في يوم توعكت في وظيفتي وعطوني اجازه مرضيه بعد ما نومت في المشفى 3 ايام وكان فصل الشتا وصلت الديره وظليت في البيت كانو اخوالي وربعي يزوروني
مر علينا منخفض جوي محمل بالامطار والحمدلله في صباح يوم اذكر انه كان يوم الاربعاء
قالت لي ام العيال : ودي اوصل ظاري واخته بالسياره للمدرسه تشوف الجو هالماطر

عطيتها مفتاح السياره وطلعت مع الاولاد من البيت للسياره لاحظت انها ام العيال توخرت اكثر من اللازم دقيت على جوالها فتح الخط
قلت : توخرتي يا بنت الناس عسى ما شر ؟
كان الرد : صباح الخير يا ابو ظاري
كان اللي يتكلم زوجة عبدالمحسن ولد خالي استغربت ويش اللي صار كان في اصوات اولاد
قلت : صباح النور خير ان شاء الله ام العيال كانت ودها توصل العيال للمدرسه وترجع
ردت علي : مافي مدرسه اليوم الطريق مغلقه بالصخور والشجر انقطعنا عن بافي المناطق شفت ام عيالك في السياره جبتها عندنا ومعها العيال
قلت : زين زين ما يخالف مع السلامه وغلقت الخط
بعد حوالي 20 دقيقه سمعت صوت خالي واولاده وصوت عيالي وامهم في البيت طلعت من غرفة النوم صافحت خالي واولاده وتبادلنا تحية الصباح جلسنا وام عيالي توجهت للمطبخ
ساوت القهوه شربناها
قلي خالي : بدل هدومك وتعال معنا نشوف ويش اللي صار
دخلت غرفتي بدلت هدومي وتلفعت بفروتي وطلعنا بالسياره وتوجهنا نشوف ويش اللي صار لقينا السيارات ترجع للديره وقفنا بمكان ناظرنا اللي صار كانت الطريق مغلقه

حجاره واشجار محطمه جرفتها الامطار على الشارع وذيك الصخره في نص الشارع يا ضخامتها ناهيكم
عن كميات التراب الضخمه صرنا نرجع للخلف استدرنا بالسياره ورجعنا للديره
وبدت الاتصالات على الدفاع المدني لاجل يرسلون فريق مجهز ببلدوزر ضخم يفتحون الشارع كان الرد فرق الدفاع المدني مشغولين في مناطق ثانيه حيث انه هطل ثلوج على
بعض المناطق والدفاع المدني يحاول ازاحة هالثلوج احد اهل الديره يمتلك جراف لكنها صغيره ما تقدر تزيل كل هالكميات من الحجاره والصخور والاشجار عن الشارع ازال اللي قدر عليه
ورجع للديره ظهيرة يوم الخميس تلقى خالي ابو حاتم اتصال من مديرية الدفاع المدني انه وجه لديرتنا فرق مجهز ببلدوز وحفار لاجل يزيل اللي يغلق الشارع
طلبت من ام عيالي تسوي شاي وقهوه اخذت معي الشاي والقهوه حطيتهم في ترموسات كبيره وكاسات وتوجهنا للمنطقه اللي تغلقت لقينا رجال الدفاع المدني يزيلون كل اللي على
الشارع صبينا لهم الشاي والقهوه رجال الدفاع المدني استخدمو الحفار في تكسير الصخره الضخمه وساعدهم راعي البلدوزر الصغير من طرف الشارع الشرقي صار يزيح كميات الحجاره
اللي تتفتت بفعل ضربات الحفاراستمر الشغل على هالمنوال حوالي 3 ساعات استدعينا سايق شاحنه قلاب من اهل الديره صارو يحملون في القلاب الحجاره والصخور والاتربه
خالي تكفل بدفع اجرة راعي القلاب ظلت قطعه كبيره من الصخره رفعها راعي البلدوزر الصغير وحطها داخل صندوق القلاب وتم ازالة فروع الشجر اللي كانت على الشارع
راعي القلاب توجه بالصخره لمكان مستوي وحط الصخره هناك ورجع للديره
خالي ابلغ مدير الدفاع المدني انه قام بتجهيز غدا لرجال الدفاع المدني وفعلا توجهو معنا لبيت خالي تناولوا الغدا مع اللي حضرو من اهل الديره لبيت خالي مسا ذاك اليوم جمعت ربعي
في البيت عندي سويت لهم عشا وحضر خالوالي وازواج خالاتي وصديقنا ابو مرزوق
قلت لهم : كنت اقولكم اني اخاف انها هالصخره اذا انزلقت على الشاره تغلق على ديرتنا وتقطعنا عن باقي المناطق
كنتم تقولون : يا ابو ظاري هالصخره كم مر علينا من سنين وهالصخره ما تزحزحت مكانها
جاكم اللي قلته لكم صارلنا يومين داخل الديره وباكر الجمعه عطله رسميه يعني 3 ايام ما طلعنا من الديره لكن الحمدلله اهم شيء التيار الكهربائي 24 ساعه شغال ما احد عانى
من الظلمه يوم السبت طلعت من بعض الربع على طرف الديره الشرقي ما شاء الله الارض كانت ارتوت وصلنا لبير مويه في ارض خالي ابو حاتم فتحنا باب البير غرفنا المويه بايدينا
كانت المويه وصلت للباب رجعنا للديره جلست يومين وبعدها توجهت لوظيفتي بعد حوالي 3 اسابيع بدت تظهر بدايات فصل الربيع
شخص من ديرتنا عنده صهريج ينقل فيه مويه صالحه للشرب توجهله خالي ابو حاتم
وقله : يا صالح ودي منك باكر تتوجه للبير اللي في شرق الديره تشفط المويه اللي في البير وتخليها في الصهريج اما التراب والطمي تشفطه بالموتور وتسكبه هناك على الارض
بعدها ننظف البير من باقي التراب والطمي وبعدها نرد نسكب المويه اللي في الصهريج نرجعها للبير
وهاذ اللي حصل حين رجعنا المويه اللي في الصهريج للبير كان باقي مسافه
من باب البير لسطح المويه مسافه متر واحد والحمدلله اذا نقصت المويه في بيت خالي كان يتوجه مع راعي الصهريج يسحب من البير ويرجع للبيت يفرغونه في التنكات على سطح البيت
غمق هالبير 6 امتار جدرانه من الحجاره وهو بير قديم بناه جدي ووالده رحمهم الله واموات المسلمين
والد جدي جد شايبتي شافاها الله وعافاها
وسلامتكم يالربع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
في البوسنة لبى ذو الفقار نداء آهاتها “ألا من ناصر ينصرنا” بضربات صنعت	محروم.كوم	منتدى أخبار المواقع والمنتديات العربية والأجنبية	0	02-11-2013 09:10 PM
في البوسنة لبى ذو الفقار نداء آهاتها “ألا من ناصر ينصرنا” بضربات صنعت	محروم.كوم	منتدى أخبار المواقع والمنتديات العربية والأجنبية	0	02-11-2013 08:20 PM
كيف ينصرنا الله جل جلاله، اذا كنا نطلب النصر من أمريكا ؟	محروم.كوم	منتدى أخبار المواقع والمنتديات العربية والأجنبية	0	10-26-2012 05:11 AM
نسيج\| الشيخ صالح الجمري\| أما من ناصرٍ ينصرنا أما من ذابٍّ يذبُّ عن حرم	محروم.كوم	منتدى أخبار المواقع والمنتديات العربية والأجنبية	0	11-26-2011 10:50 AM
ألا هل من ناصر ينصرنا	محروم.كوم	منتدى أخبار المواقع والمنتديات العربية والأجنبية	0	09-12-2011 10:20 PM