فطنة و ذكاء ابو مرزوق

محروم.كوم · #1 09-03-2017, 12:10 AM

السلام عليكم ورحمة الله وبركاته .
كل عام وانتم بخير وعساكم من عواده .

في احد الايام كنت في اجازه من العسكريه مدتها 5 ايام رافقت خوالي وصديقنا ابو مرزوق لسوق الخيل كان في رغبه لابو مرزوق يشتري فرس اصيله
وكان ابو مرزوق متوعك ذاك اليوم وحنا في السوق كنا نناظر الخيول لاحظت رجال ما ارتحت له ابد كان ابو مرزوق يجلس جنبي دقيت ابو مرزوق في مرفقه
قلت له : تشوف هالرجال ذاك الطويل ويحمل بيده خيزرانه ؟
قلي : اشوفه هيئته ما هو بايع ولا شاري لانه ما يخالط الناس ولا يناظر الخيول وكاد وراه سالفه .
ابو مرزوق كل ما يشوف فرس او حصان يناظره
ويقول ما هو اللي بخاطري ودي شيء يستاهل اقتنيه
حين قاربت الساعه تصير العاشره وقت الضحى جا رجال ومعه مهره كحيله يعرضها للبيع كان لونها احمر ومجله الاربع ارجول ويزين وجهها خط ابيض عريض
شعر ذنبها وشعر رقبتها لونه اشقر كانت قطعه من الجمال الرائع .
ابو مرزوق قال :هاذ هو المطلوب كحيله تسابق الريح الهبوب .
توجهنا عنده وبدا ابو مرزوق يتفحصها
طلب ابو مرزوق من راعي المهره يمشي فيها قدامه وناظرها وهي تمشي ما تعرج ولا تضلع من ارجولها وخاليه من الجروح وكان مع الرجال اوراق سلالة المهره
راعي المهره قال لابو مرزوق : يا اللحيه الغانمه اسم المهره سحاب
ابو مرزوق قال : مهره مزيونه لكن ودي اجربها بالطراد
ناظرني وقلي جيب المعرقه رحت على السياره جبت المعرقه واللجام حطيت المعرقه عليها
وشديتها والجمتها ركبتها قلي رجال : تسابقني على سبيل التجربه تشوف المهره سريعه او لا وافقت .
وقفنا جنب بعض وانطلقنا على طريق ترابي طوله حوالي 1 كليومتر فكان تاره يتقدمني وتاره اتقدمه
لين وصلنا اخر الطريق رجعنا
في اخر حوالي 400 متر تقدمت عليه كنت اتقدم عليه بمسافة 3 امتار كانت مهره سريعه حيل
وصلت عند الربع ونزلت عن ظهر المهره
راعيها قال : ها يا اللحيه الغانمه ويش رايك فيها عذاريب او ما هي سبوق ؟
رد ابومرزوق : وافيه وكافيه خاليه من العذاريب هاذ هي الخيل اللي تنقنى .
ربطت رسن المهره في عامود حديد ممدود بشكل افقي طوله حوالي 4 امتار وجلسنا على صفه
من الاسمنت في الظل نادى ابو مرزوق على ولد له
كشك يبيع سجاير ومشروبات ساخنه وبارده وسندويشات طلب منه يجيب قهوه لخوالي وله ولراعي المهره ولمحدثكم العبد الفقير لله ابو ظاري .
ابو مرزوق صار يفاصل راعي المهره على ثمنها خلال المفاصله جا الرجال اللي شفناه وسألت ابو مرزوق عنه صار الرجال يتفحص المهره
قله ابومرزوق : ويش تسوي ؟
رد عليه الرجال : اتفحص المهره اذا هي معروضه للبيع ؟
قله ابو مرزوق : منت شايفني جالس مع راعيها ونتفق على السعر روح من هنا لا تسوي هالحركات معي .
قام هالرجال ترك المهره وراح صار يتجول في السوق الولد جاب القهوه وقدمها لنا طول الوقت ما ابعدت عيوني عن هالرجال وابو مرزوق نفس الشيء
اتفق ابو مرزوق وراعي المهره على السعر كان ثمن المهره 4850 دينار ابو مرزوق ما كان يحمل المبلغ كله خوالي كملو للرجال ثمن المهره
راعي المهره عطى لابو مرزوق اوراق سلالة المهره واشهد بعض الرجال ومن ضمنهم خوالي على بيع المهره لابو مرزوق بيع مقلفع .
مقلفع ( ماله من نسلها شيء ) اما البيع بمثاني اول وثاني من حق بائع الفرس انه له من نسلها
اول وثاني ولاده هاذ طبعا يصير بالاتفاق بين البائع والشاري
ابومرزوق قال لراعي المهره : خلك حذر من الرجال اللي كان يتفقد المهره هاذ سارق لانه ما جا هنا
حين جلسنا وصرنا نتفاصل على ثمنها كان وده يعرف كم ثمنها ويتتبعك
ويسرقك وانت مو حاس فيه .
طلع راعي المهره بسياره وغادر السوق وحنا رحنا على طرف السوق واخذنا المهره معنا ربطتها تحت شجره وجلسنا على طاوله لراعي مطعم
وطلبو مشاوي للجميع افطرنا ودفعنا لراعي المطعم ثمن المشاوي وقمنا عن الطاوله اذا سارة شرطه
تدخل سوق الخيل .
توجهت سيارة الشرطه لمكان كان مجتمعين فيه رجاجيل واطلعوا رجال في سيارة الشرطه عرفنا
انه الرجال اللي كان يتفقد المهره وبالفعل هاذ الرجال طلع سارق محترف

قلنا ابومرزوق : يالربع من اول ما شفت هالرجال وتفرست بوجه من بعيد عرفت انه ماهو بائع ولا شاري
يناظر اللي يدخل واللي يطلع من السوق .
وكل ما يشوف رجال يطلع دراهمه من محفظته يناظره ولا يبعد عيونه عنه ولاحظت انه يراقب جيوب اثواب الموجودين يشوف اذ الرجال في جيب ثوبه دراهم اولا
لاجل كذا حين جا السارق وصار يتفقد المهره سكت وما كملت كلامي مع راعي المهره كان وده يعرف كم ثمن المهره وبعد ما يقبض ثمنها يلاحقه بدون ما يشعر ويسرقه وهو مو حاس باللي يصير .
رجعنا بالمهره للديره مضت الايام الخمسه رجعت لوظيفتي بقيت 80 يوم في العسكريه واخذت
اجازه ثانيه مدتها اسبوع ثاني يوم من الاجازه دق تلفون البيت
رديت كان ابو مرزوق على الخط .
قلي : صبحك الله بالخير يا ابو ضاري .
رديت : صبحك الله بالخير والنور والسرور حيا الله ابومرزوق .
قلي : اسمع مهرتي حايله ( تطلب اللقاح ) جيب حصانك وتعال على بيتي .
قلت له : توكل على الله مسافة الطريق واكون عندك .
حطيت على ظهر الحصان كيس خيش على وجه الكيس قطعة قماش لونها اخضر ومن تحته قطعه ثانيه لونها رمادي وله ركاب والجمت حصاني

وانطلقت لعند ابومرزوق حين وصلت عند ابو مرزوق ومهرته شافت حصاني صارت تصهل وهو يصهل بعد توجهنا من بيت ابو مرزوق لطرف الديره
نزى حصاني على الفرس اول مره ركبتها وانطلقت فيها مسافه حوالي 1 كليومتر ورجعت عند ابومرزوق وتركتها بعد ما نزى الحصان مره ثانيه عليها
ركبتها وطردت فيها بعض الوقت تقريبا 5 دقايق طردت بالمهره لاجل يثبت لقاح المهره بعد سنه ولدت مهره لونها كميت يزين جبهتها طبعه بيضا
وفيها تحجيل ارجولها اماميه فقط واسماها نجمه راحت هديه لخالي ابو حاتم وظلت عنده للحين
عمرها تقريبا 18 سنه .

صوره تشبه المهره سحاب لكن لون الذنب وشعر الرقبه يختلف .

وسلامتكم يالربع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فطنة الحوار	محروم.كوم	منتدى أخبار المواقع والمنتديات العربية والأجنبية	0	01-20-2014 01:00 PM
عادل مرزوق > عادل مرزوق : بصراحة: هل تعبنا؟	محروم.كوم	منتدى أخبار المواقع والمنتديات العربية والأجنبية	0	09-07-2011 05:30 PM
دويتووو ( ابو مشك + ابو عبد العزيز+ ابو ريم + ابو عبدالرحمن) وتبوقرنا وتحاردنا ههههه	محروم.كوم	منتدى أخبار المواقع والمنتديات العربية والأجنبية	0	03-31-2010 03:10 AM
فطنة الزميل الغامدي تحبط محاولة بنغالي لاختطاف طفلة في الدمام	محروم.كوم	منتدى أخبار المواقع والمنتديات العربية والأجنبية	0	08-07-2009 09:20 AM
فطنة فتاة	محروم.كوم	منتدى أخبار المواقع والمنتديات العربية والأجنبية	0	06-21-2009 11:10 PM