رجال وحرمه وعيل صغير

محروم.كوم · #1 08-17-2017, 11:21 PM

السلام عليكم ورحمة الله وبركاته .
مسيكم بالخير الجميع .

في احد الايام قام خالي بمشوار على سوق الخيل واشترى فرس عربيه اصيله فصيلتها الكحيله باوراق سلالتها
وكانت هاذ الفرس لاقحه من فحل عربي فصيلته نفس فصيلة الفرس .
وولدت الفرس مهره ورباها خالي وماتت الفرس ومهرتها كان عمرها سنه ونص وعسفها وطوعها للركوب وكان يطلقها جنب البيت تروح وترجع للبيت في يوم اطلق الفرس طلعت من حظيرتها وصار وقت المغرب وما رجعت
نشدنا عنها اهل الديره فقال لنا شخص شفتها وقت العصر كانت عند شجرات السرو في الشمال الشرقي من الديره ارسل خالي بطلب صديقنا ابو مرزوق وخبره بالسالفه كنت مع ابو مرزوق حين وصلنا اثر المهره
وكان الوقت الساعه 7 الصبح
فقلي ابو مرزوق : روح جيب حصانك وتعال نلتقي جنب بيتي .
رحت للبيت تجهزت حملت سلاحي واسرجت حصاني ورجعت لابو مرزوق كان ينتظرني جنب بيته .
انطلقنا ندور المهره كان كل فتره يناظر الارض ومشينا وصار وقت الضحى مرينا من جنب بير مويه

اسقينا خيولنا وتابعنا الطريق وصار وقت الظهر .
فقلي يا ابن آخي تشوف ذيك الشجره نرتاح تحتها ساعة زمن ونكمل طريقنا ان شاء الله نلاقي مهرة خالك
حين وصلنا الشجره نزلنا عن خيولنا صار يناظر الارض وتقدم خطوتين او ثلاث خطوات
فقلي : تعال هاذ اثر رجال طويل ونحيف يحمل سلاح وعنده عوار خفيف بعينه اليسار
وهاذ اثر حرمه وهاذ اثر عيل صغير ذكر مو انثى
كان يركب هو والحرمه والعيل على ظهر فرس عمر هاذ الاثر 3 ساعات على ابعد تقدير
ابتعد مسافه وناظر الارض وتابع كلامه وهاذ اثر مهرة خالك هاذ الاثر قريب وقت غروب امس .
اللي كان يحيرني ويش اللي خلى المهره ما ترجع لبيت خالي وخلاها تبعد هالمسافه عن ديرتنا
سألت ابو مرزوق : كيف عرفت اثر الرجال من اثر الحرمه
رد علي : الخبره يا ابن آخي تعلمت قص الاثر وانا طفل صغير
شايبي وجدودي من قبل كانو قصاصين اثر
قلت له : ما ينفع يتعلم الشخص قص الاثر وهو شاب صح ؟
قلي : المثل يقول ( التعليم في الكبار مثل تكسير الفخار ) ما ينفع لزوم قصاص الاثر يتعلم هاذ الشيء

وهو طفل صغير في اشياء نلاحظها لكن انتم ما تقدروا تلاحظوها لانها دقيقه جدا ودها تعليم سنوات
طويله لاجل نتقنها وكيف نميز اثر الحرمه من اثر الرجل في اشياء مهما شرحت لك عنها ما تقدر
تتعلمها وانت بهاذ العمر يلزمك انك تتعلمها وانت صغير .
تريحنا ساعة زمن وصلينا الظهر وكملنا طريقنا بعد مشي حوالي ساعتين شفنا رجال وحرمه ومعهم
عيل صغير يجلسون تحت شجرة لوز طرحنا السلام عليهم الرجال رد السلام وحرمته رجعت للخلف
ابومرزوق نشد الرجال ان كان شاف المهره الرجال قال انه ما شافها .
لاحظت انه الرجال في بعينه اليسار عوار خفيف ابو مرزوق نزل عن ظهر فرسه وصار يناظر الارض
ومشى على ارجوله اشر لي بيد اظل مكاني مشى حوالي 10 خطوات وناداني
قلي : في اثر بغل يتبع اثر مهرة خالك اثر المهره الصبح واثر البغل حوالي الساعه 9
فرق 3 ساعات والبغل يعرج من رجله اليسرى ويركب عليه ولد مراهق
تابعنا طريقنا عند العصر وقفنا نتريح ونريح خيولنا
قلي ابو مرزوق : تشوف البغل اللي شفت اثره ؟
قلت : لا ما اشوفه وين هو ؟
قلي : هناك واقف عند شجرة الصنوبر ولونه بني ضارب للسواد
دققت النظر فعلا شفت البغل كان واقف جنب شجرة الصنوبر.
قلت لابو مرزوق : غلطتي اني ما جبت زواده معي ما توقعت انا نتوخر لهاذ الوقت .
رد علي : لا تقلق جبت زواده معي لي ولك شب النار يا حمود .
سوينا شاي وقهوه وصلينا العصر وتريحنا ورحنا صوب البغل
قلي ابو مرزوق : هناك عيل عمره تقريبا 14 سنه جالس تحت شجرة الزيتون صرخ ابو مرزوق
يا ولد في بير مويه هنا ؟
قال الولد : ايه في بير مويه فوق عند الصخره الحمرا وتلاقي الركوه على بابه مربوطه بحبل
رحنا صوب البير مرينا من جنب البغل لاحظت انها رجل البغل اليسار مجروحه ويعرج منها
سقينا خيولنا وتزودنا بالمويه وتابعنا طريقنا
فقلي ابو مرزوق : هنا انقطع اثر المهره مشينا مسافه حوالي 4 كليومتر توقف ابو مرزوق
وقلي : هنا اثر المهره بعد الظهر بحوالي ساعتين .
تابعنا طريقنا قبل المغرب بساعه توقفنا بمكان نزلنا عن خيولنا وربطناها بشجرة زيتون معمره
قال ابو مرزوق : تفقد المكان حولنا ياابن آخي نمرح هنا الليله والصباح رباح ان شاء الله .
تفقدت المكان من حولنا حسب ما تدربت في العسكريه كيف تتفقد مكان من كل النواحي وهاذ الامر
يتدرب عليه العساكر ويحتاج وقت لاجل يتقنه العسكري .
رجعت بركاده وقلت في نفسي اسوي مفاجأه لابو مرزوق حين يشوفني جنبه بدون ما يشعر
تسللت وحين وصلت مكان ما تركنا اغراضنا ما لقيت ابو مرزوق ناظرت حولي ما في احد
جلست على الارض وحينها شعرت بشيء بارد على رقبتي
وسمعت صوت يقولي : ثاني مره انتبه حولك ولا تسويها معي كان متيقظ وما هو بهين وهاذ هو
خبري فيه فطين ما احد يتغلب عليه او يوقعه بفخ .
جلس جنبي قمت شبيت النار وصلينا المغرب وتعشينا وشربنا شاي وقهوه والحمدلله
قلت له : ننام في البر يا اخوي ؟
رد علي بقوله : ما تعرف تنام في البر يا حمود ؟
قلت له : يا ابو مرزوق نسيت اني عسكري 4 دورات ما بين صاعقه ومظليين وبحث وتعقب
ودورة جماجم وبعدني في فرقتي العسكريه القتاليه.
قلي : زين زين خلنا نصلي العشا
صلينا العشاء وبعدها نمت صحاني ابو مرزوق توضينا وصلينا الفجر
فطرنا وشربنا الشاي والقهوه تجهزنا وركبنا خيولنا وانطلقنا ندور المهره بعد حوالي نص ساعه بدا
الضيا ينتشر حين صارت الساعه 9 الصبح دخلنا وادي فسيح توقف حصاني ونصب اذانه وصار يهمهم
بصوت خفيف بعد لحظات
اطلق صهيلا تردد صداه في الوادي بعد لحظات سمعت صهيل حاد يتردد في الوادي اذا مهرة خالي
واقفه تحت شجرة زيتون
حين شافتنا جت بسرعه ربطت حبل في رسنها ورجعنا فيها للديره كنا نسابق الوقت حتى نصل الديره
ما صارت الساعه 12:30 الظهر كنا وصلنا الديره بعد ذيك المره ما عاد خالي يطلق مهرته
وسلامتكم يالربع

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
منشدي عن رجل وحرمه	محروم.كوم	منتدى أخبار المواقع والمنتديات العربية والأجنبية	0	05-16-2015 10:30 AM
حرمه وحرمه هرجةٍ ينقلنه	محروم.كوم	منتدى أخبار المواقع والمنتديات العربية والأجنبية	0	09-26-2012 09:00 AM
أمطار شعيب مرخ بين الغاط وحرمه 21/8/1431هـ	محروم.كوم	منتدى أخبار المواقع والمنتديات العربية والأجنبية	0	08-02-2010 11:10 PM
سيل وادي تربه وخرمه	محروم.كوم	منتدى أخبار المواقع والمنتديات العربية والأجنبية	0	04-19-2010 08:00 PM
السلام عليكم وحرمه الله أرجو الافادة	محروم.كوم	منتدى أخبار المواقع والمنتديات العربية والأجنبية	0	06-24-2009 05:50 AM