آآآل باث آآآل

محروم.كوم · #1 08-29-2009, 11:50 PM

سلام
بعد مدة من التفكير والمقارنات بين الجيوب المتوسطة واستشارة عدد لابأس به من المغلوب على امرهم قررت ان اشتري جيب نيسان باثفندر 2005 لؤلؤي ماشي اقل من المية فتحة سيدي مثبت سرعة واركب له تانكي وبطارية اضافية وونش كهربائي ودعامية ام مساحي وكنود وشاشة ملاحة ومساعدات منورو ويايتات اوستورالية وياويلك يالبر! حتي اني بغيت اشتري العصابة قبل الفلقة!

طبعاً رحت للصناعية عشان اربط سيارتي القديمة مع ان موديلها 2006 تمهيدا لبيعها واستبدالها بالموترالمذكور اسمه وبياناته اعلاه... وكعادتي الكريمة لازم افر اقل شي على ثلاث ورش للمفاضله بين الاسعاروالعمالة..

دخلت الورشة الاولى واذا بي ارى باثاً لؤلؤياً معلقاً في السقفي كأنه نجمةٌ وقد رفع بالرافعة الهكربائية ..تنحت فيه قليلاً وانا اقول نعم مكانك فوق فوق مهوب على الارض هذا مكانك الحقيقي يالباثفندر!
انت الذي يعرف المطعاس جرتهو *** والحزم يعرفكم والشعب والحجرو
لاكن سلامات ليه مرفوع عسى ماشر؟؟ تعال يارفيق وش بها الباث رافعينة عسى ماشر؟؟
هازا توزيب مكينة!

اووف توضيب يارفيق هذا باث فندر كيف انتا سوي توضيب؟؟ الشرهه على راعيه اللي ناطله عندكم انتم جيدين في اللصبة والتميس وش عرفكم في الباثات؟! وطلعت من الورشة الاولى بعد ان تيقنت انها ليست كفؤ لتربيط سيارتي المصونة. اجل توزيب!

الورشة الثانية كانت عمالتها عرب من عرب الشمال الجنوبي يعني مشكلين ومدري وش اللي جمعهم صراحة... ولعروبتي قررت ان اقتحم هذه الورشة رغم عدم قناعتي ببعض العربان في المكانيكا (ملاحضة عزيزي القارئ ان كانك مشغول ترانا مطولين شوي) طالعت يسار ولا فيه باث رصاصي نزعت احشائه من جوفه بشكل غليض وموحش ومقزز... ياللهول منظر مفزع ومروع ... ليه كذا ياجماعة ليه!! المشكله اني اشوف الباث بديه نظييييف جداً ومكينت الباث مشلوعه... صدق لاقالوا الجيب مخبر مهوب منظر... جاني المكانيكي بعد ان رأى اشفاقي على الباث وقال لي: مذا قرى لك يابن حلزة؟؟ لا ولا شي بس ليه كذا على الباث؟؟ جاوبني المكانيكي الثاني هذا القيب ياعمنا خبط وقبنا له مكينة قيب من التشليح .. وطلعت مكينة قيب التشليح محتاجة توظيب.

الصراحة ماش تشائمت من الباث... قصدي من الورشة ...وطلعت منها وانا بديت اعيد حساباتي في شراء باث 2005 لؤلؤي فتحة وباقي المواصفات والتجهيزات تلقاها عزيز القارئ فوق .. يعني مو معقولة ورشتين القا فيها باثين محتاجين توظيب.. والمشكلة موديلاتها من 2003 وانت طالع.. ... لاكن على قولتهم الثالثة ثابته.. قررت اروح للورشة الثالثة وحاولت اني انسى كل مامر بي من ذكريات اليمة في ذلك العصر.. وقفت عند الورشة الثالثة ذات العمالة الفلبينية اللي لبسهم واحد وشكلهم واحد كنهم طقم حبه وبديت افاوضهم بتربيط الموتر من الصدام للصدام وفي اثناء المفاوضات اذ وقفت سحطة بجانب الورشة واذا بها باث اسود مقيد.. فك قيده صاحب السطحة استعداداً لتنزيلة ولكن الباث يرفض النزول! نزل الجلنط ياولد! فضه! الباث مافيه امل ينزل! تدرون ليه؟؟ لانه داري انه بيرفع على المشنقة! تجمعوا عليه الشقردية ونزلوه بالغصب من السطحه كانت مكنيته مجيمة وهم يدفونه يطلع صوت من المكينة باااااااث بااااااااااث باااااااااع! الله يذكر ضحايا العيد بالخير!

طبعا سيق الباث كالعادة الى المشنقة استعداداً لنزع احشائة وامام هذا المنظر لم اتمالك اعصابي فقررت الغاء فكرة التربيط نهائيا قصد فكرة البيع لكن السؤال ليه اشتري باث والسب فيه اكثر من ستين الف واجلس على اعصابي كل ماسمعت صوت قلت جاك الذيب جاك ولده!

يعني بالعربي مطيرنه فوق على ايش؟؟ ولا فيه مكيف خلفي ولا دف لوك ولا زنن تراكشن كنترول ولا مثبت الا في الفل ولا تسخين مراتب ولا ولا ولا!!

ولا وش رايكم :d __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فـــضـــفـــضـــة وحـــد أأأأ وي	ولـد الـمـرفـأ	رياضة محلية و عالمية	4	03-31-2010 07:18 PM
لآآآ تنتظــــــــــــــر الحـــــــــــب....!!	على النيآت بسكآت	الإستشارات النفسية والاحتياجات الخاصة وتطوير الذات	7	03-03-2010 05:42 PM
طلبية توزيعات + هدية للأم..	محروم.كوم	منتدى أخبار المواقع والمنتديات العربية والأجنبية	0	02-02-2010 01:20 PM
مممم الويندوز	برونزيه	طلبات البرامج والشروحات وحل مشاكل الحاسب الآلي	2	10-23-2008 06:14 AM
((( اليوم العالمي للأم )))	المتميزة	الإستراحه العامة	5	03-28-2008 11:36 PM